Nuntii Latini

Finnish Broadcasting Company

 (Radiophonia Finnica Generalis) 

 

Tabularium III

(2.1.2004 - 31.12.2004)

 

 

"Nuntii Latini", 31.12.2004 (Radiophonia Finnica Generalis)

redegit Reijo Pitkäranta.

Clades naturae in Asia
Die Dominico in Asia inter meridiem et ortum solis spectante tanta clades naturae accidit, ut saltem octoginta milia hominum vitam amitterent et eorum complures miliones tecti et domus expertes remanerent.
Causa calamitatis erat terrae motus in imo Mari Indico factus, cuius vis circiter novem graduum Richterianorum aestimatur. Fluctus ingentes ex hac concussione coorti, dum per totum mare Indicum maxima velocitate provolvuntur, omnia fere, quae eis obiecta erant, gurgitibus aquarum submerserunt. Omnium pessime illa vastatione afflictae sunt civitates epicentro sismico finitimae ut Sri Lanka, India, Indonesia et Thailandia, sed etiam in Somalia, quae in ora Africae sita est, magna multitudo piscatorum fluctibus obruta esse dicitur. Insuper metuendum est, ne propter aquam inquinatam epidemiae periculosae grassari incipiant.

De actionibus auxiliaribus
Multae civitates et societates auxiliares subsidia in regiones Asiae terrae motu vastatas mittere parant, et hae actiones adiuvandi internationales omnium temporum maximae fore existimantur. Plurimam pecuniam ad atrocitatem cladis leniendam pollicitae sunt Civitates Americae Unitae, Iaponia et Australia. Ordo autem a Cruce Rubra eo tendit, ut ad eundem finem amplius triginta miliones euronum colligantur. Etiam Unio Europaea et Argentaria rebus Asiae provehendis se idem facturas esse promiserunt.

 

Jushtshenko novus praesidens
Victor Jushtshenko, candidatus partium regimini adversarum, se victorem electionum praesidentialium Ucrainae professus est.
Suffragiis enim computatis apparuit eum sententiarum quinquaginta quattuor fere centesimas accepisse, competitorem autem Victorem Janukovitsh nonnisi quadraginta duas centesimas. Oratione in urbe Kiovia habita Jushtshenko fautoribus suis exsultantibus gratulatus ait novam aetatem politicam in Ucraina inisse. Ut omnibus constat, comitia praesidentialia in Ucraina iterum fieri necesse erat propter fraudem in primo suffragio inventam. Omnibus has paginas legentibus Novum Annum 2005 Bonum Faustum Felicem exoptamus!


 

"Nuntii Latini", 17.12.2004 (Radiophonia Finnica Generalis)

redegit Reijo Pitkäranta.

Halonen et Putin convenerunt
Praesidens Finniae Tarja Halonen hac septimana Petropolim volavit, ut ibi praesidentem Russiae Vladimir Putin conveniret. Colloquia eorum solito attentius exspectabantur, quoniam hoc autumno de relationibus inter utramque civitatem intercedentibus multum disceptatum est. Ambo moderatores tamen affirmaverunt concordiam vicinitatis etiamnunc aeque bonam esse ac ante. Quae cum ita essent, Halonen collegam suum invitavit, ut Finniam viseret, quod Putin libenter se facturum esse respondit.

Basescu Romaniae praesidens
Ex electionibus praesidentialibus in Romania habitis superior discessit Traianus Basescu, praefectus urbis Bucarestii e factione, cui nomen "Iustitia et veritas". Princeps minister Adrian Nastase, fautor socialistarum, postquam se non satis sententiarum accepisse audivit, certamine destitit dicens sibi voci populi oboediendum esse. Basescu autem de eventu comitiorum certior factus: "Ex voluntate civium", inquit, "hanc victoriam consecutus sum."
Idem iuravit se id acturum esse, ut Romania anno bismillesimo septimo (2007) Unioni Europaeae adiungeretur.

Berlusconi criminibus absolutus
Silvio Berlusconi, princeps minister Italiae, qui accusatus erat, quod annis octogesimis et nonagesimis iudices corrumpere conatus esset, ut hoc modo societatibus suis commercialibus plus lucri caperet, omnibus criminibus absolutus est. Berlusconi, quamquam iudicio trium praetorum unius criminis convictus est, tamen ex praescriptione longi temporis se eripuit, ne poenam subiret. Actor flagitaverat, ut ille vinculis octo annorum condemnaretur eique, quamdiu viveret, muneribus publicis interdiceretur. 

De reclamatione Curdorum
Septimana vergente circiter septem milia Curdorum ante praetorium Unionis Europaeae, quod Bruxellis est, reclamationis causa congregata sunt. Postulaverunt enim, ut, si Turcis licentia in societatem Unionis accedendi data esset, sibi ipsis meliora iura concederentur. Grex nomine Kon-Kurd, quo auctore ille concursus factus erat, moderatores Unionis ad consilia capienda hortatus est, quibus vitae condicio Curdorum melior redderetur. Existimantur amplius triginta milia hominum vitam amisisse pugnis inter bellatores Curdorum et copias regiminis Turciae commissis.

Memoria Sanctae Luciae
Finnis Suetice loquentibus moris est Idibus Decembribus memoriam Sanctae Luciae ritu sollemni agere. Lucia erat virgo Siciliensis, quae anno trecentesimo quarto sive abhinc mille septingentos annos Syracusis propter fidem Christianam martyrium subisse traditur. Caerimonia die Lunae sub vesperum in Ecclesia cathedrali Helsinkiensi initium cepit, cum Maria Brandt, Sancta Lucia hoc anno electa, corona candelarum ornata est. Postea curru bigarum per mediam urbem vehebatur caecis tenebris lucem spargens. Omnibus has paginas legentibus Bonum natalicium Christi exoptamus!

 

 

 

"Nuntii Latini", 10.12.2004 (Radiophonia Finnica Generalis)

redegit Tuomo Pekkanen.

Alterum in Ucraina suffragium
Supremum iudicium Ucrainae decrevit, ut alterum suffragium comitiorum praesidentialium irritum esset, et poposcit, ut novum suffragium institueretur. Quod futurum est die vicesimo sexto mensis currentis. Candidati tum erunt Victor Ianukovitsh, hodiernus minister primarius, atque Victor Iushtshenko, dux oppositionis. Ianukovitsh in ambitione praesidentiali a praesidente Russiae sustinetur, Iushtshenko autem Unioni Europaeae candidatus est acceptior. Uterque ex eis alterum suffragium fraudulentum fuisse asseverat. Parlamentum et oppositio politica flagitaverunt, ut Ianukovitsh ex munere ministri primarii discederet, sed praesidens Leonid Kutshma recusavit, quominus regimen dissolveret.

Finni melius quam alii discunt
Programma internationale discipulis aestimandis (Programme for International Student Assessments), quod breviter PISA appellatur, facultatem discendi adulescentium quindecim annorum in principalibus terris industrialibus comparavit.
Programma internationale discipulis aestimandis (Programme for International Student Assessments), quod breviter PISA appellatur, facultatem discendi adulescentium quindecim annorum in principalibus terris industrialibus comparavit. Anno bis millesimo, cum facultas legendi in undetriginta terris compararetur, quae sunt in ordine Oeconomicae Cooperationis et Progressus (OECD), Finni primum locum occupaverunt. In comparatione anno bis millesimo tertio effecta (PISA 2003), cuius eventus nuperrime divulgatus est, Finni in lectione eundem locum servaverunt atque praeterea etiam in mathematica et in scientia naturali primi fuerunt. Cum praeter illas undetriginta terras industriales etiam undecim aliae terrae respicerentur, tantum Honcong Finnos mathematica superavit.

Iustshenko ante comitia venenatus?
Iushtshenko mense Septembri repente aegrotare coepit et bis in nosocomio Vindobonensi curabatur, cum doloribus inexplicabilibus ventris et dorsi atque pustulis vulneribusque cutis affectus esset. Sunt, qui suspicentur eum, suffragiis praesidentialibus tum instantibus, ab adversariis politicis venenatum esse, sed illae suspiciones a medicis non sunt confirmatae.

Legati lenones
Duo legati Russiae in Finnia versantes in suspicionem lenocinii inciderunt.
Illi enim compluribus centenis meretricibus clientes paravisse eisque habitationes diplomaticas in usum dedisse creduntur. Homines suspecti in legatione Russiae commerciali operantur sed non sunt summi eius moderatores. Quia immunitate diplomatica fruuntur, nec interrogari nec damnari in Finnia possunt. 

Graves aestus crebrescunt
In investigatione Britannica recens facta commonetur ante medium huius saeculi, si emissiones industriae hodiernum statum annuum in mundo conservaverint, caniculam alternis annis tam suffocabilem fore quam anno praeterito.
Aestatem anni proximi fuisse in Europa post annum millesimum quingentesimum calidissimam. Periculum quidem caniculae iam inde a duodevicesimo saeculo actionibus hominis auctum esse, sed his quinquaginta annis propter effectum thermocepicum notabiliter crevisse. Anno bis millesimo tertio complura dena milia hominum propter insolitos caeli calores et longas siccitates morte praematura correpti sunt. 

 

 

 

"Nuntii Latini", 3.12.2004 (Radiophonia Finnica Generalis)

redegit Reijo Pitkäranta.  

Rerum in Ucraina condicio
Regimen Ucrainae, cui praeerat Victor Janukovitsh, munus deponere coactum est, cum suffragio in parlamento die Mercurii habito sententiam diffidentiae accepisset.
Quo facto legatis parlamentaribus placuit, ut ad civitatem regendam consilium administratorum temporarium deligeretur. Constat in Ucraina discrimen politicum ortum esse, postquam eventus electionum praesidentialium a partibus regimini adversantibus in dubium revocatus est. Leonid Kutshma, praesidens Ucrainae prope iam emeritus, proposuit, ut nova comitia praesidentialia intra tres menses instituerentur.

Graeci poena afficientur
Unio Europaea Graecis poenas impositura est, quod hi oeconomiae suae nationali male consuluerint et magistratus Unionis per dolum celaverint, quantus esset verus suae dispensationis oeconomicae defectus eo tempore, cum ad societatem Systematis nummarii Europaeai (EMU) anno bismillesimo primo (2001) accederent. Perfidia Graecorum detecta est inspectione, quam Eurostat sive Sedes statistica Unionis Europaeae hoc anno fecit.

Explosio in carbonifodina
In regione Sinarum inter septentriones et solis ortum sita complura dena operariorum vitam amiserunt, cum in carbonifodina, ubi laborabant, ingens explosio facta est. Ibi eo tempore amplius trecenti homines in opere occupati erant. Calamitate accidente centum fere fossoribus contigit, ut e periculo evaderent, cum reliqui nullo modo interitum evitare possent. Itaque iam parum est, quod de salute eorum speretur.

De dissidentibus in Cuba
Tres dissidentes Cubani, qui plus quam unum annum in captivitate fuerant, a magistratibus Cubae liberati sunt, "propter causas valetudinarias", ut dictum est.
Qui activistae e custodia emissi in numero eorum septuaginta quinque hominum erant, qui iussu praesidentis Fidel Castro abhinc sesquialterum annum comprehensi sunt et quin etiam duodetriginta annorum vinculis mandati. Sunt, qui putent liberationem ad Unionem Europaeam placandam spectare, quippe quae rectores Cubae de dissidentibus male tractandis castigaverit.

Canariae locustis vexatae
His diebus tot et tanta cicadarum examina ex Africa septentrionali in Canarias advolaverunt, ut magistratus locales facere non possent, quin his insulis statum periculi pronuntiarent.
Quae locustae migratoriae, quamvis hominibus perniciei non sint, tamen eis maximam molestiam exhibere solent. Quantopere exempli causa viatores his insectis vexentur et terreantur, vel inde apparet, quod aliquot locustae etiam decem centimetra longae sunt. Haud mirum est greges talium animalium omnem fere herbam et segetem terrae devorare et nihil omnino virens reliqui facere, ut iam in Vetere Testamento descriptum est. 

 

 

 

"Nuntii Latini", 26.11.2004 (Radiophonia Finnica Generalis)

redegit Reijo Pitkäranta.

Discrimen in Ucraina ortum
In Ucraina, ubi septimana vergente electiones praesidentiales habitae sunt, gravissimum discrimen politicum ortum est.
Nam Victor Jushtsenko, candidatus partium regimini oppositarum, eventum suffragii per malam fraudem effectum esse contendit et recusavit, quominus victoriam officialem ministri principis Victor Janukovytsh approbaret. Quam ob rem se ipsum novum praesidentem Ucrainae pronuntiavit et cives ad operistitium generale hortatus est. Fautores eius fulva vexilla agitantes iam per multos dies in urbem Kioviam ingenti multitudine congregati suo candidato maximo plausu acclamant.

Rerum condicio in Sudania
Ordo Nationum Unitarum septem milia militum in Sudaniam australem pacis tuendae causa missurus est. Quod consilium ad effectum adducetur, postquam administratores Sudaniae cum rebellibus tabulis pacis subscripserint. Speratur enim fore, ut bello in Sudania inde ab anno millesimo nongentesimo octogesimo tertio gesto tandem finis imponatur. Partes belligerantes pollicitae sunt se ad arma deponenda paratas esse. Eodem tempore rerum condicio in regione Darfur Sudaniae septentrionalis in peius mutata est novis pugnis ibidem commissis.

De statu politico Iraquiae
In Iraquia prima comitia parlamentaria die tricesimo mensis Ianuarii instituentur. Novum parlamentum, ubi primum creatum erit, tam regimen civitati administrandae eliget quam legi fundamentali scribendae praeerit. Metuendum tamen est, ne comitia futura a musulmanis sunnitis perturbentur, quippe qui minitati sint se tumultus conflaturos esse, si illud suffragium mense Ianuario exeunte habitum esset. 

Inventa Finnorum in Bolivia
Grex Finnorum archaeologicus in planitiebus Boliviae complures res antiquas invenit, quae, cum ante tempora Incorum confectae sint, priscam in America Australi culturam optime illustrant. Illa vetustatis monumenta, inter quae complures res fictiles multicolores sunt, a saeculis decimo et undecimo originem ducunt et in inventis maxime insignibus in illa regione factis numerantur. In quadam fossa paene duo metra alta tanta copia vasorum fictilium reperta est, ut pondus eorum trecenta fere chiliogrammata efficeret.

Tota Finnia nivibus obruta
In Finnia his diebus tantae nives ceciderunt, ut tota civitas inde ab oris meridionalibus usque ad ultimam Lapponiam acervis nivalibus obrueretur. Die Martis nuntiatum est in viis Portus Mariae, urbis principis Alandiae, tantundem nivium inveniri quantum in urbe Rovaniemi, qui portus Lapponiae nuncupatur. Quae cum ita sint, haud mirum est omnia fere centra scridatoria ad usum publicum iam aperta esse.

 

 

 

 

"Nuntii Latini", 19.11.2004 (Radiophonia Finnica Generalis)

redegit Tuomo Pekkanen.

Powell discedit, Rice succedit
Colin Powell, minister Americanus a rebus exteris, e munere discedit. In successionem eius in alterum quadriennium a praesidente Bush  nominata est Condoleezza Rice, quae antea fuit consiliatrix regiminis a politica securitatis et in variis vicissitudinibus belli Iraquici partem conspicuam habuit. Nominatio erit in senatu confirmanda. Quod futurum est intra unum mensem, quo tempore Powell in munere manebit. Rice est familiaris praesidentis et semper sociam eius fidelissimam se praebuit. Itaque politica Americanorum externa vix mutabitur. Ut Bush commemoravit, propositum eius principale est bellum contra terrorismum continuare et nodos Proximi Orientis expedire. 

Iaponia omnes Curiles flagitat
Ultimis belli mundani secundi diebus Unio Sovietica insulas Curiles Iaponiae occupavit. Rixa de illis insulis impedivit, ne pax inter Iaponiam et Unionem Sovieticam confirmaretur. Nuperrime Russi significaverunt se forsitan, si tractatus de pace  factus esset, dimidiam partem insularum reddituros esse. Iaponienses autem omnes Curiles  sibi flagitant. 

Culmen velocitatis aeriae Aeroplanum 
Americanorum novum culmen velocitatis assecutum est, cum paene decemplici velocitate soni volavit. Illud aeroplanum pyraulocineticum X-43A, in quo nulli inerant homines, primum aeroplano B-52 in altitudinem tredecim chiliometrorum, deinde rocheta usque ad triginta sex chiliometrorum altitudinem portatum est. Tum suo motro propellente aliquot minutas velocitate illa omnium maxima volavit, donec materia combustibili defectum in Oceanum Pacificum extra oram Californiae meridionalis praecipitavit. Novum illud motrum, in quo nullae partes sunt rotabiles, Nationalis Aeronautica et Spatialis Administratio (NASA) Americanorum excogitavit et paravit. 

Alcoholum fetui damnosum 
Ex investigatione Americana recens facta apparuit alcoholum inter graviditatem sumptum intelligentiae infantis nascituri esse damnosum. Si mater gravida singulis diebus vicena centilitra vini aut sena centilitra vini combusti sumpserit, quotiens intelligentiae infantis tribus punctis inferius erit et eius facultas discendi et cogitationes dirigendi debilitabitur. 

Viva Latinitas in Finnia valet
Administratio Institutionis Publicae Finnorum in usum scholarum duos novos libros divulgavit, quibus lingua Latina, haud aliter atque aliae linguae, vivo modo doceretur. Unus ex eis, ad scholam fundamentalem editus,  titulum habet "Salve!". Alter, nomine "Clavis Latina", textus et exercitia scholaribus gymnasium frequentantibus continet.

 

 

 

 

 

 

"Nuntii Latini", 12.11.2004 (Radiophonia Finnica Generalis)

redegit Reijo Pitkäranta.

Jasser Arafat mortuus
Jasser Arafat, praesidens Palaestinensium septuaginta quinque annos natus, die Iovis multo mane mortuus est. Diem supremum obiit in valetudinario militari Parisiensi, ubi iam per duas septimanas curabatur. Constat eum pro libertate Palaestinensium quadraginta annos pugnavisse et per totidem tempus ducem et symbolum quoddam populi sui fuisse.
Inter primos, qui se mortem eius dolere nuntiaverunt, erant Jacques Chirac, praesidens Francogalliae, et George Bush, praesidens Civitatum Americae Unitarum. Effertur Arafat die Veneris in regione Palaestinensium Ramallah funere amplissimo.

Rerum status in Iraquia
Violentia in variis Iraquiae partibus in dies crudescit: hac septimana copiae Americanae impetum maximum in oppidum Falluja facere coeperunt, et etiam quattuor alia oppida ictibus eiusdem generis affecta sunt. Quibus aggressionibus multa dena hominum interierunt. Ordines auxiliares internationales temperare non potuerunt, quin pronuntiarent salutem civium Iraquianorum sibi summae sollicitudini esse. Quidam medicus ait in oppido Falluja iam nullum chirurgum esse, qui vulneratis opem ferret.

De regimine Georgii Bush
Post comitia praesidentialia in Civitatibus Americae Unitis habita constitutio regiminis praesidentis George Bush iam aliqua ex parte mutari coepit. Namque John Ashcroft, minister iustitiae, et Don Evans, minister mercaturae, a praesidente petiverunt, dimissionem sibi daret, et eam liberationem etiam impetraverunt. ovus minister iustitiae electus est Alberto Gonzales, princeps in Aedibus Albis iuris consultus. Sunt, qui putent etiam ministros Colin Powell et Donald Rumsfeld deliberare, utrum munus deponant necne.

Quid Kofi Annan dixerit
Kofi Annan, generalis secretarius Nationum Unitarum, annum proxime futurum annum athleticae et motus corporis proprium edixit. Consilium eo spectat, ut eruditio, valetudo, evolutio et pax inter omnes gentes hac ratione provehantur. 
"Lingua rei athleticae", inquit, "omnibus populis communis est, et ars ludicra, cum in optima forma est, bonam facultatem praebet homines, cuiuscumque originis, religionis aut vitae condicionis sunt, unum in locum congregandi."

Viren nova statua figuratus
Lasse Viren, cursor Finnus quater Olympionices, nova statua eaque in Graecia collocata honoratus est. Monumentum Nonis Novembribus in oppido prope Athenas sito ritu sollemni revelatum invenitur in loco, cui postea nomen "Area heroum Olympicorum" indetur. Lasse Viren, ut omnibus fere notum, octavo saeculi proxime praeteriti decennio Olympiis tam Monachii quam Marianopoli habitis victor bis evasit ac quidem in cursibus quinque milium et decem milium metrorum.

 

 

 

"Nuntii Latini", 5.11.2004 (Radiophonia Finnica Generalis)

redegit Tuomo Pekkanen.  

America locuta est
In comitiis praesidentialibus Americanorum aequo Marte certatum est. Acerrimum fuit certamen in civitate Ohio, cuius exitus sortem comitiorum decrevit, nam numerus totalis delegatorum, quos uterque candidatus in ceteris civitatibus acceperat, idem fere fuit.
Cum maior pars suffragiorum Ohiensium computata esset, iam nullum dubium erat, quin George W. Bush plus valeret. Tum Kerry competitori telephonice gratulatus se inferiorem professus est. Bush, in alterum quadriennium praesidens designatus, oratione Washingtoniae habita de unitate nationis cives appellavit. Senatori Kerry pro bono certamine gratias agens dixit in munere praesidentis fungendo sibi etiam auxilium democratarum opus esse.
Se omnia facturum, ut fiducia eorum dignus esset. "America locuta est", inquit, "et sentio me humilem, cum cogito, quantam erga me fidem fiduciamque cives habuerunt." Affirmavit Americanos eandem terram, eandem constitutionem, eadem futura habere, quibus coniungerentur; nullos esse fines magnitudini Americae, si cives una agerent.

Osama bin Laden in televisione
Canalis televisificus Qatariensis, cui nomen est al-Jazeera, taeniam divulgavit, in qua Osama bin-Laden, notissimus dux retis al-Qaida, se fuisse ortum et originem ictuum confitetur, qui contra Americanos undecimo die mensis Septembris anno 2001 facti sunt. Alios ictus eiusdem generis Americanis eadem in taenia minitatur. Dicit praesidentem Bush Americanos in errorem duxisse et regimen eius nullo modo a regiminibus Arabicis corruptione vitiatis differre. In compluribus instrumentis communicativis propositum Osamae bin-Ladem fuisse putabatur, ut animos Americanorum ante comitia moveret. Praesidens Bush, sicut competitor eius senator Kerry, affirmavit illas minas nullam vim habere.

Arafat morbo affectus
Jasser Arafat, praeses Palaestinensium septuaginta quinque annorum, gravi morbo affectus aeroplano  Parisios portatus est, ubi in nosocomio militari ab optimis medicis curatur. De genere morbi, quo implicatus est, nihil constat, nisi quod a parte Palaestinensium nuntiatum est praesidem in articulo mortis non esse. Dictum est eum leuchaemia non laborare, ut in initio credebatur. Regimen Israelis Arafati reditum liberum in ripam Iordanis occidentalem promisit, ubi antea paene tres annos ab Israelianis circumclusus erat. Palaestinenses praesidi suo nullum vicarium designaverunt, etsi valetudine eius valde sollicitantur.

Constitutioni Unionis Europaeae subscriptum
Moderatores nationum membrorum Unionis Europaeae die undetricesimo mensis Octobris in urbe Roma legi fundamentali unionis subscripserunt. Ex parte Finniae adfuerunt minister primarius Matti Vanhanen et Erkki Tuomioja, minister a rebus exteris. In multis unionis terris de constitutione, antequam post duos annos valere incipiat, suffragium populi fiet.

 

 

"Nuntii Latini", 29.10.2004 (Radiophonia Finnica Generalis)

redegit Tuomo Pekkanen.

Comitia in USA praesidentialia
Comitia praesidentialia Americanorum postridie Kalendas Novembres fient. Principales candidati sunt George W. Bush, praesidens hodiernus republicanus, qui alterum quadriennium petit, et John Kerry, senator democrata. In disputatione inter candidatos politica eminent bellum Iraquicum et antiterroristicum. Proposita utriusque eadem fere sunt sed modi, quibus obtineantur, differunt. 
Uterque contra terrorismum pugnare et propagationem armorum internecivorum constanter impedire pollicetur. Neuter copias ex Iraquia deducere vult, antequam illa terra stabilitatem inveniat. Uterque etiam adiutor et defensor est Israelis et maiores pecunias populis egentioribus promittit.
Maxima differentia est in rebus ad foederatos pertinentibus. Kerry enim competitorem vituperat, quod civitates foederatas ab Americanis alienaverit, et bonas cum his relationes renovare pollicetur. In rebus interioribus Kerry vult eruditionem et curam valetudinis reficere, nova opera novosque labores creare, coetus sociales medios confirmare, de circumiectis tutandis curare.


Reclamatores in Thailandia suffocati
Thaksin Shinawatra, minister Thailandiae primarius, professus est custodes securitatis errorem commisisse, cum reclamatores musulmanos pessime tractarent. Illi enim custodes mille trecentos reclamatores die Lunae deprehenderunt et in autocarros, quibus deportarentur, truserunt. In arto stipati duodeoctoginta reclamatores ad mortem suffocati sunt. Shinawatra promisit de suffocatis inquisitionem futuram esse.


De Commissione Unionis Europaeae
De nova commissione Unionis Europaeae designanda iurgium ortum est, cum Rocco Buttiglione, natione Italus, dixisset se homosexualitatem non probare et dolere, quod feminae innuptae filios procrearent.
His verbis dictis iram permultorum delegatorum Parlamenti Europaei in se suscitavit, imprimis socialistarum, liberalium viridiumque. Commissio munus suum ante inire non potest quam a parlamento sit comprobata.
Primum José Manuel Barroso Portugallus, praeses commissionis, neglectis reclamationibus mutationes in commissionem facere noluit; sed cum iam haud dubium esset, quin parlamentum recusaret, ne commissionem comprobaret, sententiam mutavit. Neque enim parlamentum unum tantum ex delegatis reicere potest sed omnes una comprobare aut reicere debet. Quae cum ita essent, Nederlandienses, penes quos est praesidium Unionis Europaeae, nuntiaverunt veterem Unionis Europaeae commissionem, praeside Romano Prodi, in munere mansuram esse, donec nova commissio, parlamento acceptabilis, componeretur.


De libertate rei diurnariae
Ordo, cui nomen Redactores sine finibus, libertatem rei diurnariae in compluribus terris pristinae Unionis Sovieticae male vacillare rettulit. Pessimas esse condiciones in Turkmenia, ubi cives nulla instrumenta communicativa sequi possent nisi quae per propagandam officialem regerentur. In terris autem Balticis libertatem rei diurnariae esse laudabilem. 

 

 

"Nuntii Latini", 22.10.2004 (Radiophonia Finnica Generalis)

redegit Reijo Pitkäranta.

Vaccinum adversus malariam
Medici adversus malariam pugnantes magnos progressus fecerunt. Investigatores enim nuntiaverunt vaccinum, cui pertractando strenue operam dedissent, se utilissimum ad illum morbum avertendum praebuisse. Experimenta enim in infantibus Mozambicanis instituta ostendisse vim novi remedii tantam esse, ut periculum malariae eius ope tricenis fere centesimis deminueretur.
Idem dixerunt necesse esse illud vaccinum etiamnunc probaretur, quam ob rem existimandum esset id non ante annum bismillesimum decimum (2010) venale propositum iri.

 

De minimis vitae condicionibus
Tertia pars infantium in Europa orientali et terris pristinae Unionis Sovieticae habitantium in paupertate vivit, ut censet Unicef, ordo Nationum Unitarum liberis tuendis.
Neque oeconomiam in his civitatibus crescentem ad condicionem eorum quicquam valere. Ordo autem Nationum Unitarum ab alimentis et agricultura (FAO) relationem divulgavit, unde patet Albanos esse populum in Europa omnium pauperrimum. Tanta enim inopia laborant, ut plerisque eorum minus binis dollaris cotidie vivendum sit.

 

Thesaurus mediaevalis repertus
Ulvilae, in oppido Finniae saeculo quarto decimo condito, abhinc aliquot dies thesaurus mediaevalis magni pretii inventus est.
Quidam operarius, cum in ecclesia ibidem mediaevali reficienda occupatus terram foderet, de improviso in cantharum stanneum incidit, in quo bulga nummis argenteis referta recondita erat. Periti rem inventam eo pluris aestimant, quod copia pecuniae vetustae tanta est et huiusmodi thesauri apud nos rarissime reperiuntur. Monendum est etiam sub illo sacculo sepulcrum infantis inventum esse.

 

Res a feminis Finnis bene gesta
Grex pedifollicus feminarum Finniae nationalis, cum Russiam punctis quattuor ad unum (4-1) superavit, sibi viam ad certamina Europaea mense Iunio in Anglia instituenda aperuit. Quam magni res ab eis gesta apud nos ducatur, vel inde apparet, quod neque viris neque feminis Finnis umquam ante contigit, ut in hoc genere athletico de principatu Europae certarent.

 

 

"Nuntii Latini", 15.10.2004 (Radiophonia Finnica Generalis)

redegit Tuomo Pekkanen.

Wangari Muta Maathai praemiata
Praemium pacis Nobelianum hoc anno accipit Wangari Muta Maathai Keniana, quae est prima femina Africana illo praemio donata. Maathai a Commissione Nobeliana laudata est, quod pro evolutione continua, democratia, pace laboravisset. Anno millesimo nongentesimo septuagesimo septimo illa motum nomine "Zona viridis" in Kenia condidit. Qui motus complures denas miliones arborum in variis Africae partibus serendo contra erosionem pugnavit, asyla puerorum constituit, condiciones feminarum sociales meliores reddidit. Maathai est delegata parlamentaris et ministra a rebus circumiectalibus. Praemium pacis est decem milionum coronarum Sueticarum.

Exercitus Russiae corruiturus
Sergei Ivanov, minister defensionis Russiae, censet periculum esse, ne exercitus patriae omnino corruat, cum pauciores quam decimus quisque ex quaque aetate ad delectum militum veniant. Ante decem annos trinos ex denis venisse. Viris Russis inter annos aetatis duodeviginti et viginti septem militia  duorum annorum facienda est. Sed cum in exercitu inopia pecuniarum laborante mores facti sint laxiores et tirones saevissimis vexationibus haud raro subiciantur, militia habetur detestabilis. Etiam metus, ne in Tzetzeniam mittantur, efficit, ut iuvenes militiae subiecti novos usque modos invenire conentur, quibus delectum evitent.

Nulla in Iraquia arma interneciva
Praesidens George W. Bush imprimis propterea bellum Iraquianis inferre decrevit, quod arma eorum interneciva imminerent. In relatione autem nuper divulgata grex investigatorum (Iraq Survey Group) confirmavit nulla de armis internecivis testimonia in Iraquia inventa esse; tamen Saddamo Hussein consilium fuisse, ut illa arma paranda susciperet.

Papiones capitis damnati
Moderatores horti zoologici Helsinkiensis, qui est in insula Korkeasaari prope urbem sita, nuperrime decreverant, ut omnes papiones ibi habitantes interficerentur; castellum papionum esse vetustate corruptum neque aliam sedem, in quam transferrentur, inveniri posse. Tutatores animalium consilio papiones interficiendi consternati sunt. Cum in actis diurnis aliisque instrumentis communicativis reprobatio et reclamationes in dies crescerent, propositum  illud crudelissimum revocatum est. Papiones vivarii Helsinkiensis unam familiam tredecim membrorum faciunt. Dux gregis, cui nomen est Repe, quattuor feminas et octo posteros ex eis natos habet.

Vestigia dinosaurorum reperta
In monte Iura, qui est in Helvetia, paene sescenta vestigia dinosaurorum reperta sunt. Illa vestigia, in resina impressa, quae longitudinem inter octo et viginti centimetra variantem habent, centum quinquaginta duarum milionum annorum esse iudicantur. Pertinent ad dinosauros, quorum alii quadrupedes herbivori, alii bipedes carnivori fuerunt.

 

 

"Nuntii Latini", 8.10.2004 (Radiophonia Finnica Generalis)

redegit Reijo Pitkäranta.    

Manus militaris Finno-Suetica
Finni et Sueti opera coniuncta communem manum militarem ad copias reactionis rapidae Unionis Europaeae comparaturi sunt sperantes fore, ut etiam Norvegi hanc societatem ineant. De ea re inter ministros principes utriusque civitatis die Lunae convenit, cum seminario cuidam Finno-Suetico in oppido Haaparanta instituto interessent. Unio Europaea, si propositum eius perfectum erit, ante annum bismillesimum septimum (2007) omnino decem cohortes ad agendum promptas habebit.
 

Mercatura animalium et plantarum
Bancokii, in urbe principe Thailandiae, hac septimana conventus centum sexaginta sex nationum habitus est ad considerandum, quibusnam terminis mercatura plantarum et animalium in periculum adductorum circumscriberetur. Constat enim in foris orbis terrarum merces e partibus animalium et herbarum factas venales esse, quae quotannis multis miliardis euronum emuntur. Iaponienses iam proposuerunt, ut sibi balaenas acutorostratas commercii causa captare liceret. Namibienses autem ebur elephantis Africani emptoribus venditare volunt.
 

Duo Nobelistae medicinae
Hornotinum praemium Nobelianum medicinae investigatoribus Americanis Richard Axel et Linda B. Buck defertur, quippe qui de odoratu et eius receptoriis examinandis optime sint meriti. Dicitur natura olfactus ex omnibus animantium sensibus usque ad hunc diem incognita fere fuisse.
Novi Nobelistae autem experimentis in muribus factis monstraverunt, quo modo moleculae olfactoriae e naso in cerebrum iter suum facerent et quibus rationibus mammalia varios odores perciperent et digererent.
 

Aestas in Finnia pluviosissima
Novem mensibus proxime praeteritis in multis Finniae partibus uberiores pluviae ceciderunt quam toto anno in terra nostra fieri consuevit. Ut unum exemplum afferam, prope oppidum Lieksa ad finem mensis Septembris copia imbrium iam plus octingentorum millimetrorum fuit, quamquam antea quotannis plerumque nonnisi quingenta millimetra aut paulo amplius pluerat. Aestas tam umida rei rusticae magna detrimenta attulit, quod ex imbribus assiduis secutum est, ut segetes omnino fere putrescerent et agricolae clades oeconomicas acciperent.

 

 

 

"Nuntii Latini", 1.10.2004 (Radiophonia Finnica Generalis)

redegit Tuomo Pekkanen.  

Petroleum in periculo
Nigeria maximam in Africa copiam petrolei gignit. Maiorem eius partem producunt societates petroleariae Shell et Agip, illa multinationalis, haec Italica. Nunc congregatio rebellium, quae regimini Nigeriae bellum minatur, illas societates accusat,  quod una cum regimine in genocidio populi Nigeriani operentur. Idem rebelles flagitaverunt, ut peregrini Nigeriam relinquerent et societates  petroleariae finem productioni imponerent. Quo factum est, ut pretium unius petrolei barilis in mercatu Neo-Eboracensi iam quianquaginta dollara superaret.
Sunt qui timeant, ne petroleum propter violentiam in Iraquia crudescentem et saevas tempestates, quae civitates petroleosas Americae septentrionalis vexaverunt, etiam carius fiat.

Naufragium navis Estoniae
Die Martis (28.9.) decem anni post naufragium navis Estoniae acti erant. Navis illa traiectoria, iter ex Tallinna Stockholmiam faciens, in regione Finnica Maris Baltici de tertia noctis vigilia eversa et submersa est. Ex nongentis undenonaginta hominibus, qui in nave erant, tantum centum triginta septem servati sunt. Maior pars victimarum erant Sueti aut Estonienses. Naufragium Estoniae est in Europa maxima post secundum bellum mundanum calamitas maritima. Causa fuit, quod in saeva tempestate bucula prorae soluta et porta anteriore fracta tantum aquarum in constratum navis infimum penetraverunt, ut illa, stabilitate amissa, inclinaretur et naufragaret.
Homines in naufragio mortui die anniversario variis modis in urbibus principalibus Estoniae, Suetiae Finniaeque commemorati sunt. In ecclesia cathedrali Aboensi orationem memorialem habuit Jukka Paarma, archiepiscopus Finniae. Tallinnae praesidens Arnold Rüütel et summi magistratus ad monumentum naufragii ad commemorationem victimarum convenerunt.

Venatio alcium incepit
Septimana vergente hornotina venatio alcium in Finnia incepit. Venationi intersunt circiter centum milia hominum, quibus duodeseptuaginta milia animalium sternere licet, quod viginti fere centesimis minus est quam autumno proximo. Magistratus autoraedarios de periculo monent, quod alces praecipue inter venationem temere vias publicas transcurrentes faciunt.

Melissa xx annorum
Periodicum Latinum nomine Melissa, quod apud latinistas Finniae multos habet amatores, iam viginti annos Bruxellis editur.
Editor Melissae responsalis est Gaius Licoppe, doctor Bruxellensis, a quo etiam Fundatio eiusdem nominis condita est. Fundatio Melissa cum Museo Domus Erasmianae in libris Latinis edendis et in institutione vivae Latinitatis arte cooperatur. Fasciculus Melissae centesimus vicesimus secundus hoc mense divulgabitur. Editores periodici id agunt, ut homines animadvertant, quam utile sit studium Latinum populis Europae artius coniungendis. Auspiciis Melissae lingua Latina ita docetur, ut discipuli non tantum textus Latinos legere et intellegere sed etiam Latine scribere et loqui valeant. 
Redactoribus Melissae de rebus pro viva Latinitate laudabiliter gestis gratulamur.

 

 

 

 

"Nuntii Latini", 24.9.2004 (Radiophonia Finnica Generalis)

redegit Reijo Pitkäranta.

Hu Jintao novus dux
Sinenses novum ducem acceperunt, cum pristinus praesidens Jiang Zemin a re publica recedere decrevit et in locum eius Hu Jintao substitutus est. Quantum hic vir apud suos iam valeat, vel inde patet, quod ei tria munera administrativa maximi momenti collata sunt. Die Dominico enim Hu Jintao toti exercitui Sinarum praefectus est, cum iam antea et summus moderator factionis communistarum et praesidens civitatis electus esset. De persona eius nihil certi constat praeterquam quod libenter cantare solet, teniludio mensali delectatur et memoriam quasi photographicam habet.

Commeatus aerius Iraquiae
Hac septimana Societas aeria nationalis Iraquiae, cui nomen Iraqi Airways, volatus internationales resumpsit. Hoc factum est anno quinto decimo, postquam sanctiones Iraquiae iniunctae effecerant, ut Iraquia a commeatu huius generis excluderetur. Primum quidem iter ex urbe Bagdato Ammanam, in urbem principem Iordaniae, susceptum est eo solo aeroplano, quod illa societas in praesenti habet.

Nova cohors paci tuendae
Quinque nationes Unionis Europaeae, scilicet Francogallia, Italia, Hispania, Portugallia et Hollandia, nuntiaverunt se copias speciales coacturas esse, quarum esset ordinem in regionibus variis discriminibus afflictis custodire. Propositum est, ut haec cohors, postquam anno bis millesimo quinto (2005) exeunte ad agendum parata esset, ex octingentis fere militibus constaret et intra unum mensem, si res posceret, quoquo versus ad pacem tutandam mitteretur. Ministri, cum de indole huius legionis cogitarent, exemplum e biocolytis Francogalliae et carabinariis Italiae sibi sumpserunt.

Terrae motus in Mari Baltico
Die Martis post meridiem regio Maris Baltici duobus motibus terrae affecta est. Epicentrum eorum erat in mari ante urbem Kaliningradum patente, sed tremor sismicus etiam in multis Finniae partibus sentiebatur. Sic in suburbiis Helsinkii orientalibus, ut in Vuosaari et Herttoniemi, fenestrae habitationum aliquamdiu tinniebant. Arctopoli autem, in urbe Finniae occidentali, accidit, ut campanae cuiusdam ecclesiae sua sponte sonare inciperent.

Pellicula de Adolfo Hitler
In Germania pellicula cinematographica producta est, quae dictatorem Adolfum Hitler in munimento subterraneo Berolinensi ultimis vitae diebus degentem facit. Quod opus nomine ?Der Untergang? a criticis quidem laudatur, sed multi Germani naturam dictatoris in illa taeniola nimis humanam figuratam esse reprehendunt. Bernd Eichinger autem, productor pelliculae, respondit sibi ne propositum quidem fuisse spectaculo suo Adolfum Hitler diabolum describere.

 

 

 

"Nuntii Latini", 17.9.2004 (Radiophonia Finnica Generalis)

redegit Tuomo Pekkanen.

Silentium triste
Die Martis in omnibus scholis Finnicis silentium triste unius minutae habitum est, quo scholares in Ossetia Septentrionali occisi recolebantur. Silentium memoriale in tota Unione Europaea similiter observatum est. In memoriam hominum, in strage oppidi Beslan mortuorum, etiam parlamentum Europaeum opera sua eodem tempore interrupit.

  Turcia legem de adulterio repudiavit
Regimen Turciae legem repudiavit, qua adulterium pro crimine haberetur et carcere etiam duorum annorum puniretur. Oppositio politica et ordines in Turcia feminarum novae legi vehementer obstiterant, quia timebant, ne illa praecipue contra feminas adhiberetur et ita etiam neces propter mariti honorem factae augerentur.
Si nova de adulterio lex lata esset, aditus in Unionem Europaeam, quem Turci magnopere cupiunt, difficilior illis factus esset. Nam Commissio Unionis Europaeae Turcos certiores fecerat illam legem opinioni, quam membra unionis de Turcia haberent, nocituram esse.

  Renovationes esse rem Russiae internam
Sergei Lavrov, minister rerum Russiae interiorum, commonuit renovationes politicas esse Russorum rem internam. Ita respondit ministro Americano Colin Powell, qui die Martis dixerat se recentioribus politicis renovationibus praesidentis Vladimir Putin  sollicitum esse. Putin enim die Lunae rettulerat se velle numerum factionum politicarum circumscribere. Praeterea flagitaverat, ut sibi ad moderatores regionales designandos plena potestas daretur; illas mutationes necessarias esse, cum contra terrorismum pugnaretur.
Powell quidem concesserat pugnam contra terroristas esse necessariam, sed censuerat Russos nomine terrorismi repellendi quasdam renovationes democraticas abolituros esse.

  MGM a Sony empta
Metro-Goldwyn-Mayer, societas cinematographica Americana, a grege commerciali, in quo eminet Sony, societas Iaponica, empta est. Pretium est circiter trium miliardorum dollarorum, ad quod addenda sunt debita duorum miliardorum, quae MGM habuit. Pretiosissima pars societatis emptae est archivum quattuor milium pellicularum.  Signum societatis MGM, in toto terrarum orbe bene notum, est leo rugiens, circa cuius caput est sententia Latina "Ars gratia artis". MGM, ante octoginta annos condita, fuit ultima ex magnis officinis cinematogaphicis privatae possessionis. Maiorem eius partem, scilicet septuaginta quattuor centesimas, Kirk Kerkorian, miliardarius ille Americanus, habuit.

  Quid maioris sit quam pecunia?
Jukka Paarma, archiepiscopus Finniae Lutheranus, cives vituperavit, quod omnes res sub specie materiae aestimarent: hominibus esse considerandum, quid reicere vellent, si necesse esset; salutem, relationes humanas delicatiores, puram naturam maioris esse quam pecuniam.Idem monuit respectum et curam proximorum atque neglegentiam propriae utilitatis bono communi servire.

 

 

 

 

"Nuntii Latini", 10.9.2004 (Radiophonia Finnica Generalis)

redegit Reijo Pitkaränta.

Strages in Russia facta
Civitati Russiae die Lunae iustitium bidui nationale edictum est propter stragem in Ossetia Septentrionali factam, qua saltem trecenti triginta quinque homines mortui et amplius quadringenti graviter vulnerati sunt. Discrimen postridie Kalendas Septembres initium cepit, cum grex quidam terroristicus scholam in oppido Beslan sitam dolo malo occupavit et multa centena hominum, quorum maior pars pueri et puellae erant, obsides retinuit. Neque militibus Russis ad eos liberandos convocatis contigit, ut rem pacifice expedirent, sed secuta est ingens clades. Quae autem fuerit causa caedis inceptae, nemo satis bene scire videtur.

  Suecia operariis optima
Suecia operariis optima civitas est, si percontationi fidem habemus, quam Ordo internationalis a laboribus (ILO) nuperrime divulgavit. Proximam a Suecia hac ratione esse Finniam, deinde Norvegiam et Daniam. Illius investigationis erat securitatem oeconomicam in nonaginta civitatibus mensurare variis rebus ad vitam operariam pertinentibus inter se comparatis.

  Duo culmina mundana athletica
Certaminibus athleticis in stadio Bruxellensi habitis Jelen Isinbajeva, recens Olympionica Russa, in saltu perticario novum culmen mundanum praestitit, cum altitudinem quattuor metrorum et nonaginta duorum centimetrorum (492) superavit. Alterum primatum ibidem fecit Saif Shaheen, vir Quatariensis, quippe qui spatium trium milium metrorum cum obstaculis septem minutis, quinquaginta tribus secundis et sexaginta tribus centesimis (7,53,63) percurreret.

 

 

 

"Nuntii Latini", 3.9.2004 (Radiophonia Finnica Generalis)

redegit Tuomo Pekkanen.

  Bush officialiter candidatus
Factio Republicana Americanorum praesidentem George W. Bush unanimiter candidatum nominavit, qui in proximum praesidentatum crearetur. Inter conventum factionis, qui fuit in urbe New York, multa milia hominum contra praesidentem et bellum Iraquicum in viis urbis reclamitaverunt. Plus mille quadringenti reclamatores a custodibus publicis deprehensi sunt.
In comitiis mense Novembri futuris George W. Bush aut John Kerry, candidatus democratarum, praesidens in proximum quadriennium designabitur. Apud Europaeos Kerry multo maiore quam Bush gratia valet. 
Praesertim Francogallis et Germanis, qui bellum contra Iraquiam commissum non probaverunt, Bush magnopere displicet.
Ex demoscopia recens facta patet sexaginta sex centesimas Germanorum praesidentem hodiernum minus gratum habere. Apud Francogallos chartae lusoriae divulgatae sunt, quibus moderatores in regimine republicanorum potentiores eodem modo irridentur quam in illo chartiludio, quod Americani de ducibus Iraquianis in carcerem coniciendis ediderunt.

 

Alhanov praesidens Tzetzeniae
In comitiis Tzetzeniae praesidens designatus est minister rerum interiorum Alu Alhanov, cui Kremlinum maxime favet. Eum septuaginta quattuor centesimas suffragiorum accepisse nuntiatur. 
Octoginta centesimae civium suffragium dedisse dicuntur, quod minime credibile est, cum comitia absentibus observatoribus occidentalibus more sovietico facta vix iusta et honesta haberi possint.
Ex quinque prioribus praesidentibus Tzetzeniae quattuor occisi sunt. Ultimus ex his fuit Ahmad Kadyrov, qui mense Maio  in urbe Groznyi vitam amisit. Etiam praesidentem Alhanov rebelles iam capitis damnaverunt. Munus novi praesidentis est statum rerum specie saltem stabilire, sed maximi illi esse videtur quam diutissime vitam servare.

 

Olympia Atheniensia ad finem adducta
Post ludos septendecim dierum ignis Olympicus Athenis exstinctus et vexillum Olympicum quinque circulorum burgimagistro Pekinensi traditum est, nam Olympia numero undetricesima post quadriennium Pekini instituentur. In ludis Atheniensibus maximum numerum numismatum aureorum cepit USA, secundum locum obtinuerunt Sinenses, tertium Russi. Athletae Finni, qui semper ab anno millesimo nongentesimo octavo ex Olympiis aestivis unum saltem nomisma aureum reportaverunt, Athenis nullam victoriam consecuti sunt.
Maximam infamiam ceperunt Hungari, qui duo quidem nomismata aurea obtinuerunt sed utrumque propter abusum drogarum remittere coacti sunt.

 

 

 

 

"Nuntii Latini", 27.8.2004 (Radiophonia Finnica Generalis)

redegit Reijo Pitäranta.

Rerum status in Sudania
In Sudania discrimen gravissimum de provincia Darfur possidenda ortum est. Sunt in illa civitate duae partes rebelles inter se dimicantes, quae ab administratoribus flagitant, ut regioni Darfur amplior autonomia concedatur.
Pugnis in Sudania commissis iam circiter quinquaginta milia hominum vitam amiserunt et amplius decies centena milia domo fugerunt. Consilium securitatis Nationum Unitarum rectores Sudaniae monuit, ut bellatores armis exuerent et cives suos a vi tuerentur.
Nisi id ante Kalendas Septembres fecissent, Sudaniae sanctiones oeconomicas impositum iri.

De coloniis Iudaeorum
Israeliani plus quingenta nova domicilia in coloniis in Ripam occidentalem deductis aedificaturi sunt. Quod propositum innotuit, postquam Americani se hanc actionem approbaturos esse nuntiaverunt. Sed Palaestinenses et moderatores Foederis Arabici de ea re certiores facti se metuere dixerunt, ne, si fines illarum coloniarum propagati essent, conata ad pacem in Oriente proximo restituendam in periculum vocarentur. Itaque Americanos de spe pacis in illa regione debilitanda accusant.

Quid Coreani dixerint
Consultationes de programmate armorum nuclearium Coreae Septentrionalis in magnis difficultatibus esse narrantur. Coreani enim communistae non solum his colloquiis cum Americanis habendis adversantur, sed etiam praesidentem George Bush maledictis increpant: istum esse tyrannum et virum politice imbecillum, ipso Adolfo Hitler deteriorem.
Quae cum ita sint, rationi contrarium esse cum legatis eius ad summas res deliberandas considere.

Furtum in museo Osloensi
E museo Osloensi duae picturae celeberrimae ab artifice Norvego Edvard Munch factae furto surreptae sunt: quarum una erat tabula Clamor appellata, alterum autem opus litographicum, cui nomen Madonna. Quae artefacta multis milionibus euronum aestimantur. Scelus die Dominico in maxima luce perpetratum est, cum duo viri armati personam gerentes in museum penetraverunt et custodibus mortem minitati illas effigies secum abduxerunt.
Tertius autem latro munere administri fungebatur: is enim in autocineto ante museum collocato sedens exspectabat, dum socios post facinus commissum ad fugiendum adiuvaret.

 


"Nuntii Latini", 20.8.2004 (Radiophonia Finnica Generalis)

redegit Tuomo Pekkanen.


Spelunca Iohannis Baptistae?
Archaeologus Britannus Shimon Gibson, qui quinque annos speluncam prope Ierusalem sitam investigavit, credit Iohannem Baptistam ibi habitavisse. Illa spelunca aliquot chiliometra ab eo loco distat, in quo Iohannes natus esse creditur. In illa insunt imagines in parietibus pictae et fragmenta vasorum. Una ex imaginibus virum longis capillis figurat, quem Gibson ipsum Iohannem Baptistam esse putat. Studiosi autem Scripturarum Sacrarum de re dubitant.
Interpretationem esse quidem attractivam sed novas adhuc investigationes necessarias esse, antequam aliquid certi de habitatore illius speluncae dici possit.

Olympia Atheniensia
Ludi Olympici Athenienses sunt prima Olympia aestiva, postquam ictus terroristarum contra USA anno bis millesimo primo facti sunt. Moderatores ludorum intellegunt, quantopere certamina, in quae omnes gentes animos his septimanis attendunt, terroristas attrahere possint. Ideo omnibus modis praecavere conati sunt, ne impetus terroristici inter Olympia fierent. Ad athletas hospitesque tutandos circiter unum euronum miliardum consumptum est, quae pecunia quadruplex est, si illam cum sumptibus tutelariis Sydneiensibus compares.
Regio Atheniensis a multis milibus vigilum et magnetoscopiis custoditur. Naves et aeroplana NATOnis a mari et aere regionem tuentur.

De pretio petrolei
Barile petrolei hodie in mercatu Neo-Eboracensi quadraginta septem dollaris constat, quod undecim dollaris plus est quam mense Ianuario. Pretium gradatim auctum est propter bellum Iraquicum et illas difficultates, quas habet Iukos, societas petrolearia Russiae, cum vectigalia antecedentia solvere nondum potuerit.


 

 

 

"Nuntii Latini", 18.6.2004 (Radiophonia Finnica Generalis)

redegit Reijo Pitäranta.

COMITIA EUROPARLAMENTARIA
Die Dominico (13.6.) in civitatibus Unionis Europaeae comitia instituta sunt, quibus novi legati in parlamentum Europaeum crearentur.
Generatim dixeris factiones conservativas in electionibus bene successisse et maiorem sedium numerum sibi paravisse, quamquam eventus suffragii in diversis terris multum variat. In Finnia principes factiones administratrices rem bene gesserunt, cum in Germania socialistae acerbissimam cladem acciperent. Commemorare iuvat euroscepticos, qui dicuntur, vim suam valde auxisse, quod multis politicis magnam sollicitudinem incutit.
Mirandum est, quam pauci Europaei, praesertim nova Unionis Europaeae membra, ius suffragandi adhibuerint, cum in plerisque terris ne dimidia quidem pars civium sententiam diceret. Eo laudabiliores autem in studio politico sunt Melitenses, nam in illa insula omnino octoginta duae centesimae (82%) civium ad urnam ierunt.
Omnium pigerrimi ad suffragandum fuerunt Slovachi et Poloni, utpote quorum nonnisi quintus quisque votum daret.

 

PRAEMIUM MILLENNIUM DATUM
Finni, cum technophiliam suam ceteris nationibus ostentare vellent, magnum praemium internationale Millennium nuncupatum viris et feminis de technologia bene meritis proposuerunt.
Primo huius generis honore affectus est Tim Berners-Lee, vir Britannus undequinquaginta annos natus. Excogitavit enim systema inserviendi www, cuius ope omnes res in interreti obviae adiri possunt. Praemium ei porrexit praesidens Finniae Tarja Halonen caerimonia Helsinkii die Martis (15.6.) instituta.

 

CERTAMINA PEDIFOLLICA EUROPAEA
Die Saturni (12.6.) in Portugallia certamina de primatu Europae pedifollica incohata sunt. Intersunt his ludis omnino sedecim greges nationales, qui in quattuor sectiones initiales divisi sunt.
E prima lusione inter phalanges Portugalliae et Graeciae facta praeter exspectationem superiores discesserunt Graeci, cum follem bis in rete adversariorum impegissent.
Certamina usque ad diem quartum mensis Iulii (4.7.) durabunt, quo ultima certatio fiet. Dolendum autem est, quod pilicrepis Finnis non contigit, ut se per ludos eliminatorios ad illum eventum expedirent.

 

NUNTII LATINI FERIAS AGUNT
Nuntii Latini ex urbe Helsinki iam paene quindecim annos singulis septimanis sine ulla intermissione editi sunt.
Nunc autem primum fit, ut emissiones Latinae ob ferias aestivas ad novem septimanas intermittantur. Quae cum ita sint, omnes amicos nostros certiores facimus proximos Nuntios Latinos non ante quam die vicesimo mensis Augusti (20.8.) emissum iri.
Restat, ut vobis omnibus gratias quam maximas agamus et aestatem bonam exoptemus. Valete.

 

 

 

"Nuntii Latini", 11.6.2004 (Radiophonia Finnica Generalis)

redegit Reijo Pitäranta.

Memoria invasionis Normandiae
Anniversarium sexagesimum invasionis in Normandiam factae die sexto mensis currentis in litore Normandico celebratum est. Ille dies insignis habetur, quod initium fuit non tantum Europae liberandae sed etiam unificandae.Praesto erant summi moderatores quindecim nationum confoederatarum et multa milia veteranorum. Aderant inter hospites notabiliores George W. Bush, praesidens Americanus, et regina Britanniae Elisabeth II cum ministro primario Tony Blair. Cancellarius foederalis Gerhard Schröder, cuius pater in exercitu Germanorum ceciderat, fuit primus moderator Germaniae in sollemnia invitatus, neque ex moderatoribus Russiae quisquam ante praesidentem Vladimirum Putin adfuerat. Schröder affirmavit suam die festo praesentiam ostendere bellum mundanum secundum vere finitum esse.
Praesidens Bush invasionem Normandiae cum bello contra Iraquiam commisso comparavit. Americani enim illum diem pro exemplo habent, quod demonstret, quo modo in magno discrimine laborantibus succurrere valeant.
Caerimonia principalia die Dominico supra litus Omaha Beach appellatum facta sunt, ubi primo invasionis die circiter duo milia quadringenti Americani mortui aut vulnerati sunt. Praesidens Jacques Chirac, oratione ibi habita, affirmavit Francos numquam memoriam illorum virorum deposituros esse, qui se pro patria eorum ad mortem devovissent.

 

Reagan diem obiit
Ronald Reagan, quadragesimus praesidens Civitatum Unitarum Americae Septentrionalis, septimana vergente domi suae in California diem obiit supremum.
Morbo Altzheimeriano diu laboraverat. Vixit annos tres et nonaginta. Munere praesidentis ab anno millesimo nongentesimo octogesimo primo per octo annos functus est. Reagan a moderatoribus mundi laudatus est, quod ex bello frigido victor evasisset.


Telephona gestabilia interdicta
Moderatores Coreae Septentrionalis civibus suis usu telephonorum gestabilium interdixerunt. Quod factum est tantum duodevicesimo mense, postquam rete gestabilium telephonorum in Corea Septentrionali usu receptum erat. Omnia illa telephona, quae quidem non plus viginti milia numerabantur, a possessoribus ablata sunt.

 

In cauponis fumificare non licet
A Kalendis Iuniis in cauponis Norvegiae fumificare non licet. Nova lex eo spectat, ut homines in cauponis laborantes a fumificatione passiva protegantur. Quae legem non observaverint cauponae, magna pecunia multabuntur. Viginti sex centesimae Norvegiensium sunt fumificatores. Ex demoscopiis patet novam legem antitabacariam a maiore civium parte comprobari.
In Irlandia similis lex, mense Martio accepta, etiam durior est. Ibi enim fumificatio tabaci etiam in sedibus operis et in vehiculis publicis vetita est. Illis, qui legem violant, multa trium milium euronum sancta est. Ex investigatione recens facta numerus clientium non-fumificatorum in cauponis Irlandiae nunc auctus est, fumificatorum autem numerus idem atque antea mansit.

 

 

 

 

"Nuntii Latini", 4.6.2004 (Radiophonia Finnica Generalis)

redegit Reijo Pitäranta.

Al-Jawar praesidens Iraquiae
Praesidens Iraquiae electus est Ghazi al-Jawar, phylarchus sunnita quadraginta quinque annos natus, qui et vir artium machinalium peritus. Principatus rei publicae ei transiit, postquam Adnan Pachachi, pristinus minister negotiorum exterorum, recusavit, quominus munus sibi oblatum acciperet. Auctoritate autem in Iraquia plurimum valet minister princeps Ijad Allawi, qui magnam scientiam et usum rerum ad securitatem pertinentium habet. Novum regimen Iraquiae pridie Kalendas Iulias (30.6.) designabitur idque tamdiu civitatem administrabit, donec ibidem comitia parlamentaria facta erunt.

De minis litoris Estoniae
Primis huius septimanae diebus litora Estoniae magno navigiorum numero scatebant. Naves huc ideo advenerant, ut illam regionem maritimam minis purgarent.
Inceptum Estoniensibus ducibus peractum est, sed etiam multae aliae civitates, scilicet Finnia, ceterae terrae septentrionales, Belgium, Francogallia, Germania et Polonia, minis eruendis adfuerunt. Quanti laboris perscrutatio imi maris fuerit et futura sit, vel inde conieceris, quod altero bello mundano in aquis Estoniae paene triginta milia minarum dispersa esse existimantur.

Dies militum paci tuendae
Dies undetricesimus mensis Maii (29.5.) militibus Nationum Unitarum paci tuendae dedicatus erat.
Hoc honore speciali cum ei affecti sunt, qui sub signis illius ordinis militaverant aut etiamnunc militant, tum memoria heroum in tali officio caducorum reculta est. Relatu dignum est quadraginta quattuor bellatores Finnos in pace custodienda vitam amisisse. Constat Nationes Unitas in praesenti quindecim occupationes pacificas in variis orbis terrarum partibus habere, quibus saltem quinquaginta tria milia militum et undecim milia togatorum intersunt.

Panthera pardus orientalis
Bestia fera, cui nomen scientificum Panthera pardus orientalis, in tam raris animalibus refertur, ut metuendum sit, ne omnino emoriatur. Rerum autem periti nova spe tenentur hanc beluam felinam perniciem evitare posse. Observatores enim, cum populationem eius in extremis partibus Russiae orientalis enumerarent, non solum undequadraginta huius generis pantheras invenerunt, sed etiam vestigia aliquot pullorum animadverterunt.

Novum culmen mundanum
Denique res quaedam athletica. Kenenisa Bekele, agonista Aethiops viginti duos annos natus, in cursu quinque milium metrorum novum culmen mundanum splendidissimum fecit.
Certaminibus enim in Hollandia institutis hoc spatium duodecim minutis, triginta septem secundis cum triginta quinque centesimis (12,37,35) percurrit. Qua praestatione effecit, ut pristinus primatus, quem concivis eius Haile Gebreselassie Helsinkii sex annis ante consecutus erat, una secunda melior redderetur.

 

 

 

"Nuntii Latini", 28.5.2004 (Radiophonia Finnica Generalis)

redegit Reijo Pitäranta.

Harri Holkeri munus deponit
Harri Holkeri, praefectus Cosoviae interim administrandae, munus deponit propter defatigationem laborum et ex aliis causis valetudinariis.
Docuit diurnarios Helsinkium die Martis (25.5.) convocatos se consilium magistratu abeundi sua sponte fecisse et negavit hoc sibi ab ullo alio persuasum esse.
Constat Ordinem Nationum Unitarum et Unionem Europaeam eum publice defendisse, etsi regimen eius vehementer reprehensum est, quod prohibere non potuisset, quin mense Martio in Cosovia tumultus cruenti orerentur.

Regio Caribica imbribus vexata
In re publica Dominiciana et Haitia septimanis proxime praeteritis tam magni et assidui imbres ceciderunt, ut flumina agros inundarent et circiter duo milia hominum in fluctibus et labibus terrae limosis perirent. Calamitas regionis Caribicae eo gravior describitur, quod etiam segetes agricolarum deletae et magni pecorum greges interfecti sunt.

Hans Köhler novus praesidens
Novus praesidens foederalis Germaniae designatus est Hans Köhler, pristinus director generalis Aerarii internationalis.
Praesidens hodiernus Johannes Rau, qui mox rude donabitur, recusaverat, quominus ad hoc munus iterum aspiraret. Suffragium factum est a collegio foederali, quod e legatis parlamentaribus et electoribus singularum civitatum Germaniae constabat.
Köhler erat candidatus partium regimini oppositarum, cum profestrix Gesine Schwan, antagonista eius, favore administratorum frueretur.

De sceleribus in Finnia factis
Numerus facinorum in Finnia commissorum anno praeterito tribus centesimis (3%) auctus est, ut e Sede statistica comperimus.
Incrementum praesertim ad maletractationes, violentiam domesticam et stupra feminis illata pertinet. Iucundum autem scitu est caedes et alia scelera graviora eodem tempore deminuta esse.

De feriis scholarium aestivis
Iam tempus adest, cum pueri et puellae Finni labore scholastico finito ad ferias aestivas proficiscuntur. Qui autem examen maturitatis feliciter praestiterunt, capiti suo birretum candidum imponunt. Die Saturni huius septimanae apud nos amplius unum et triginta milia scholarium titulo studentis ornantur. Maior pars eorum feminae sunt, nam harum copia duodeviginti fere milium est.

 

 

"Nuntii Latini", 21.5.2004 (Radiophonia Finnica Generalis)

redegit Tuomo Pekkanen.

De pace in Iraquia restituenda
Gerhard Schröder, cancellarius foederalis Germaniae, censet copias ex terris islamicis in Iraquiam mittendas esse, quae stabilitatem tueantur.
Sed necesse esse, ut tutatores pacis auctoritatem Nationum Unitarum habeant. Copias muslimorum, quae ex terris islamicis venerint, una cum militibus Iraquianis meliorem facultatem securitatis in Iraquia confirmandae habituras esse.
In colloquio interrogatorio televisionis Germanicae Schröder affirmavit homines eadem religione coniunctos multo melius quam alios una acturos esse. Diffidebat autem fieri posse, ut foederatio ab Americanis conducta rem in Iraquia restitueret.
Violentia autem et strages fere cotidianae in Iraquia continuantur. Die Lunae (17.5.) Izzedin Salim, praeses consilii praesidialis, bomba vehiculari explosa Bagdati una cum compluribus aliis occisus est. Consilium praesidiale eodem die praesidi mortuo sunnitam ex urbe Mosul successorem designavit.

Algae Sinui Finnico imminent
Experti timent, ne magna spatia Sinus Finnici hac aestate algis venenosis tegantur. Maximum est periculum in archipelago Finnico et in aliis partibus septentrionalibus Maris Baltici. Sinus Bothnicus verisimiliter pari periculo expositus non est.
Abundantia nutrimentorum sive eutrophicatio in Mari Baltico iam plus decennium continuatur.
Magnae phosphori copiae praesertim in partibus occidentalibus et mediis Sinus Finnici repertae sunt. Quid futurum sit, de condicionibus meteorologicis maxime pendet, nam algae venenosae, quae cyanophylla appellantur, calida tempestate atque aeris tranquillitate maxime propagantur. Natatores tactu cyanophyllorum morbis cutaneis facile afficiuntur, animalia vero, quae illa forte comedunt, in periculum mortis vocantur.

Lactatio morbos cardiovasculares amovet
Ex recenti investigatione, in commentariis periodicis "The Lancet" nuper divulgata, infantes, quos mater mammis nutrit, rarius quam ceteri postea in morbos cardiovasculares incidunt. Infans lactans primis hebdomadibus lentius crescit quam ille, qui alio nutrimento alitur. Id autem periculum non tantum hypertoniae et nimii cholesteroli sed etiam diabetae deminuit.

Ruslana palmam tulit
Certamen cantus Eurovisionis in urbe Istambul Turciae Idibus Maiis factum est. Intererant triginta sex nationes, ex quibus in finale certamen tantum viginti quattuor admissae erant.
Palmam  tulit Ucraina cantu nomine "Wild Dance" sive "Saltatio Fera", quem Ruslana, iuvenis cantatrix, cum grege suo cecinit. Ruslana etiam modos musicos illius cantus scripserat, qui compositio est rhythmorum ethnicorum et saltationum atque musicae modernae popularis. Proximae aemulae Ucrainae erant Serbia-Montenegro et Graecia. Munere iudicum functi sunt spectatores singularum terrarum, qui per telephonum suffragia dederunt. Anno proximo certamen Kioviae, in capite Ucrainae instituetur.

 

 

 

 

"Nuntii Latini", 14.5.2004 (Radiophonia Finnica Generalis)

redegit Tuomo Pekkanen.

Putin ius iurandum praestitit
Vladimir Putin alterum praesidentatum iniens sollemne ius iurandum praestitit. Caerimoniis, per televisionem in omnes Russiae partes transmissis, viri politici etmagistratus potentiores in Cremlino adfuerunt. Comitiis praesidentialibus mense Martio factis Putin magnam victoriam reportavit, qua in alterum quadriennium praesidens Russiae crearetur.Brevi oratione inaugurali habita Putin sollemniter asseveravit se Russiam "firmam quidem sed pacificam rem publicam facturum esse, qua cives gloriarentur". Promisit etiam se iura humana tutaturum, constitutionem etlibertatem patriae defensurum populoque fideliter serviturum esse.

Praesidens Tzetzeniae occisus
Die nono mensis Maii, quo victoria ex Germania Nazistica reportata in Russiacommemorabatur, in stadio urbis Groznyi explosiofacta est, quo Ahmad Kadyrov, praesidens Tzetzeniae, aliique saltem sex homines mortui et complures deni vulnerati sunt.
Inter hos est Valeri Baranov, imperator exercitus Russorum Caucasi septentrionalis. Materia explosiva a rebellibus Tzetzenis sub podio abscondita erat, unde praesidens aliique homines notabiliores pompam militarem diei sollemnis spectabant.
Calamitate comperta Putin se mortem praesidentis vindicaturum esse affirmavit: responsales explosionis sine ullo dubio poenam soluturos esse. Inter primum bellum Tzetzenicum, decem annis ante commissum, Kadyrov fuit dux rebellium, sed postea in partes Russorum transiit et foederatus eorum factus est.
Autumno proximo comitiis perquam fraudulentis praesidens creatus est. Mors eius spem pacis in Tzetzenia restituendae in longissimum tempus Russis abstulit. Secundum bellum Tzetzenicum iam quinque annos geritur.
Rebelles Tzetzeni in tot greges divisi sunt, ut praesidente Kadyrov mortuo Russis difficillimum sit partem invenire, quacum consulant. Res eoquoque gravatur, quod ad resistentiam, quae primum fuit politica, extremistae islamici aliarum nationum adiuncti sunt.

Nuptiae in Dania regiae
In ecclesia cathedrali Havniensi fiunt hodie (14.5.) nuptiae regiae, cum Frederik, filius primogenitus Reginae Margarethae II, et Mary Donaldson, natione Australiana, matrimonio coniunguntur. In nuptias octingenti hospites invitati sunt. Vulgus in viis urbis diemfestum celebrat, in quibus commeatus vehicularis ideo vetitus est.

Saddam viginti patronos habebit
Familia Saddami Hussein viginti iuristas elegit, qui eum in iudicio defenderent. Patroni a coniuge et tribus filiabus eius nominati sunt. Saddam ante Kalendas Iulias, cum summa potestas ab Americanis transferetur Iraquianis, concivibus suisiudicandus tradetur. Iudicium autem non ante, quam anno proximo ineunte committetur.

 

 

 

 

"Nuntii Latini", 7.5.2004 (Radiophonia Finnica Generalis)

redegit Reijo Pitkäranta.

Captivi Iraquiani humiliati
Cives Americani et multi alii quoque homines obstupefacti sunt imaginibus nuper divulgatis, quae ostendunt captivos Iraquianos a custodibus carceris Americanis et male mulcatos et insultanter irrisos esse.
George Bush, praesidens Civitatum Americae Unitarum, ubi primum iura humana a suis tam graviter violata esse audivit, magistratus ministerii defensionis hortatus est, ut diligentissime cognoscerent, utrum illa facinora tantum paucis ergastulariis stipendia merentibus crimini darentur an de maiore malo apud exercitum orto ageretur. "Utcumque se ea res habet", inquit, "omnes, qui tanta belli scelera commiserunt, digni sunt, qui severissime puniantur."

Auxilium Coreanis datum
Coreani septentrionales auxilium approbaverunt, quod moderatores Civitatum Americae Unitarum se eis daturos esse polliciti sunt, ut calamitati ferriviariae ante duas septimanas factae succurrerent.
Subsidium eorum maximam partem ex medicamentis constat. Illud infortunium, quo amplius centum sexaginta homines vitam amiserunt et mille trecenti vulnerati sunt, factum esse dicitur, cum duo tramina materia displosiva onerata inter se colliderentur et ingenti explosione delerentur.

Electrogrammata nugatoria
Vira computatoria et electrogrammata nugatoria effecerunt, ut programmata cursus electronici omnino obturari periclitarentur.
Quantopere copia nuntiorum ineptorum in commeatu communicativo annis proxime praeteritis aucta sit, vel inde apparet, quod ex omnibus epistulis electronice emissis septuaginta fere centesimae quisquiliae fuisse existimantur. Mikko Hyppönen, vir Finnus technicae informaticae tuendae peritissimus, metuit, ne systema totius cursus electronici, nisi quod remedium nuntiis vanis transmittendis inventum sit, in futuro collabatur.  

Mona Lisa detrimenta accepit
Mona Lisa, pictura omnium celeberrima, quam Leonardo da Vinci abhinc quingentos annos confecit, iam aliqua detrimenta accepisse videtur.
Curatores enim Musei artis Parisiensis Louvre, ubi haec effigies feminae aenigmatice surridentis asservatur, nuntiaverunt se de condicione illius operis admodum sollicitos esse. Causam anxietatis esse, quod fundus tabulae tenuissimus ex populo factus propter varietatem humiditatis detorqueri coepisset.
Propositum esse, ut Mona Lisa instrumentis technicis funditus examinaretur et anno bismillesimo quinto ineunte (2005) in novam aulam ad exponendum transferretur.

 

 

 

"Nuntii Latini", 30.4.2004 (Radiophonia Finnica Generalis)

redegit Tuomo Pekkanen.

Unio Europaea amplificatur
Kalendis Maiis Estonia, Lettonia, Lituania, Polonia, Tzechia, Slovakia, Slovenia, Hungaria atque pars Cypri Graeca et Melitta ad Unionem Europaeam officialiter adiunguntur. 

Illa amplificatio, qua numerus membrorum fit viginti quinque, multas difficultates et politicas et oeconomicas secum affert, quia pleraeque novarum nationum erant quondam partes confoederationis orientalis. Quam ob rem illae et re oeconomica et condicionibus vitae et consuetudinibus politicis a membris unionis prioribus multum differunt.
Spes autem est stabilitatem tam politicam quam oeconomicam per amplificationem in Europa auctum iri, nam oeconomia novorum membrorum crescente differentiae, quae sunt in vitae condicionibus orientis et occidentis, paulatim deminuentur.
De nova lege fundamentali concordia nondum inventa est. Discordiae praesertim ad suffragium in consilio ministrorum impertiendum et ad numerum commissariorum pertinent. Ideo sunt, qui timeant, ne amplificatio initium dissolutionis fiat, cum unio viginti quinque terrarum rationibus regatur, quae in principio ad cooperationem sex nationum sint institutae.
Amplificatio ...  multos effectus habebit. Commercium externum utilitatem percipiet, cum societates mercatoriae novas facultates pecunias in regionibus vicinis collocandi et merces in illas exportandi invenerint.
Consumptoribus proderit, quod importatione ex novis unionis terris certamen inter mercatores augebitur et ita pretia mercium deminuentur.
 

Memoria cladis Chernobyliensis
In Ucraina clades Chernobyliensis, quae fuit abhinc duodeviginti annos, in memoriam revocata est. 
Calamitas illa funestissima accidit, cum reactorium electrificinae displosum sordes nucleares in magnam Europae partem dispergeret. Hodie quoque in Ucraina plus duae miliones civium morbis radiatione nucleari effectis laborant.

 

 

 

"Nuntii Latini", 23.4.2004 (Radiophonia Finnica Generalis)

redegit Reijo Pitkäranta.

Dux ordinis Hamas occisus
Abdel Aziz Rantisi, medicus et praeceptor quinquaginta quattuor annos natus, postquam ordini Palaestinensium Hamas tantum per tres septimanas praefuit, die Saturni vesperi interfectus est. Periit ab impetu, quem milites exercitus Israelis speciales in autocinetum eius fecerunt missilibus ex helicopteris coniectis. Praedecessor eius Ahmed Jassin mense Martio exeunte in urbe Gaza similem sortem habuerat. Palaestinenses extremistae de novissima caede certiores facti iuraverunt se Israelianos pro illis necibus centies ulturos esse.

Status Libyae melioratus
Relationes inter Libyam et Civitates Americae Unitas intercedentes paulatim mitescere videntur. Americani enim constituerunt, ut sanctiones oeconomicae Libyae impositae auferrentur. Interdictum autem de commercio armorum etiam posthac valebit.

Novus praesidens Slovachiae
Praesidens Slovachiae praeter exspectationem creatus est Ivan Gasparovich, praeses olim parlamenti eiusdem civitatis. Nam die Dominico mane magistratus comitiis instituendis rettulerunt hunc candidatum votorum sexaginta centesimas (60%) sibi paravisse, cum Vladimir Meciar, pristinus primarius minister, qui victor electionum fore existimabatur, cladem acerbam acciperet. Munus praesidentis Slovachiae quinque annorum est et maximam partem caerimoniale describitur.

Ornamentum vetustissimum
In spelunca quadam in Africa meridionali sita ornamentum margaritarium repertum est, quod pro omnium vetustissimo decore arte humana facto habetur. Constat ex una et quadraginta margaritis excultis et abhinc septuaginta quinque milia annorum confectum esse creditur. Inventum eo pluris aestimaveris, si respicias id documento esse cultus civiles multo vetustiores esse quam antea creditum sit.

Caedes Bodomensis soluta?
Animi Finnorum commoti sunt nuntio postridie Kalendas Apriles publice allato: exquisitoribus tandem contigisse, ut quaestionem, quisnam esset noxius triplicis homicidii Bodomensis quadraginta quattuor annis ante commissi, fere solverent.
Mense Iunio anno millesimo nongentesino sexagesimo (1960) duo adulescentuli duodeviginti annorum una cum duabus puellis triennio minoribus excursionem ad lacum Bodom non procul ab urbe Helsinki situm facere decreverunt festum pentecostes in gremio naturae celebraturi. Primo diluculo, cum sub pellibus pernoctarent, tres eorum compluribus cultri ictibus crudelissime in suo tentorio occisi sunt. Alter ex adulescentulis solus omnium, quamvis graviter vulneratus, ex tanta strage superfuit. Investigatores hoc scelere occultissimo novis rationibus diligenter examinato nuntiaverunt sibi persuasum esse illud facinus nefarium a iuvene caedis superstite perpetratum esse. Itaque eum, hodie senem sexaginta duos annos natum, comprehendi iusserunt.

 

 

 

"Nuntii Latini", 16.4.2004 (Radiophonia Finnica Generalis)

redegit Tuomo Pekkanen.

Res in Iraquia gravescunt

Unus annus transactus est, ex quo Americani nuntiaverunt copias suas Bagdatum expugnasse et regimen Saddami Hussein profligasse. Etsi Saddam Hussein deprehensus et in carcerem coniectus est, tamen Iraquia pacari posse non videtur.
Impetus contra Americanos etfoederatos continuantur et in dies singulos recrudescunt.
Bello specie confecto circiter quingenti milites Americani vitam amiserunt. Neque mireris, quod cives Americani de expeditione in Iraquiam facta dubitare iam coeperunt. Ex demoscopiis ante festum Paschatos factis apparet statum rerum in Iraquia aut malum aut prorsus pessimum a maiore parte civium haberi. Quadraginta sex centesimae (46%) civium putant melius futurum fuisse, si expeditio in Iraquiam suscepta non esset. Triginta sex centesimae (36%) censent copias ex Iraquia in patriam reducendas esse, quia operationes secundum exitum habere non possint. Multo maior pars, scilicet octoginta septem centesimae (87%) civium, credunt fieri non posse, ut democratia in Iraquiam inducatur. Etsi oeconomia apud Americanos crescere coepit etnumerus opere destitutorum deminuit, rebus in Iraquia male gestis praesidens George W. Bush apud cives suos gratiam quam habuit paulatim amittere videtur.

Cives peregrini in Iraquia obsides
Circiter quadraginta cives peregrini ex duodecim nationibus oriundi a rebellibus Iraquianis rapti obsides retinentur. In via publica prope Bagdatum rebelles pro singulis Americanis sibi traditis denamillena dollarorum, pro ceteris peregrinis quina millena obtulerunt. Securitate itadeficiente operarii et adiutores peregrini Iraquiam relinquere coeperunt. Germani et Franci cives suos hortati sunt, ut quam primum domum reverterentur, itemque Russi omnes operarios suos revocaverunt. Romano Prodi, praeses Commissionis Europaeae, flagitavit, ut obsides quibuslibet modis liberarentur. Cum de rebus Iraquiae interrogaretur, respondit rerum condicionem ibi tam malam esse quam esse posset.

Glaciarium Groenlandiae liquefieri
Ex investigatione Britannica patet proximo millenio fieri posse, ut glaciarium Groenlandiae liquefiat, si status caeli eodem modo quo hodie caluerit. Glaciario dissoluto superficiem Oceani in medio septem metris altiorem fore. Investigatores Universitatis Radingensis credunt temperatura plus tribus gradibus aucta glaciarium liquefactum iri.

Phocae in Canada captantur
In Canada maxima captura phocarum incepit. Regimen Canadensium venatoribus licentiam trecenta phocarum milia captandi dedit. Maior pars ex his biduo capiuntur. Ante viginti quinque annos, cum imagines parvularum phocarum, quae fustibus necabantur, mentes hominum commovissent, venatio phocarum novellarum in Canada vetita erat.

 

 

 

"Nuntii Latini", 9.4.2004 (Radiophonia Finnica Generalis)

redegit Reijo Pitkäranta.

De rebus Afganistaniae
Moderatores Afganistaniae et sex civitatum finitimarum Berolinum congregati decreverunt, ut nationes suae opere et consilio artissime coniuncto ad cryptopolium drogarum impediendum laborarent.
In hoc conventu internationali, qui Britannis mediatoribus convocatus erat, de ea quoque re deliberabatur, quibusnam rationibus securitas Afganistaniae melior redderetur. Communis opinio erat pacem et salutem in Afganistaniam ea tantum condicione redire posse, ut commercio drogarum finis imponeretur.

Consilium Cypri uniendae
Consilium de insula Cypro redintegranda, quod secretarius Nationum Unitarum generalis Kofi Annan nuperrime promulgavit, a moderatoribus Graeciae, Cypri et Turciae approbatum est.
Quae cum ita sint, nihil iam obstat, quin de proposito eius die vicesimo quarto mensis Aprilis ad populum referatur. Si Cypriis utriusque partis placuerit patriam suam rem publicam foederalem fieri, haec insula tota iam Kalendis Maiis proxime futuris in societatem Unionis Europaeae accedet. Constat Cyprum inde ab anno millesimo nongentesimo septuagesimo quarto (1974) in duas partes divisam esse.

Novus Maris Baltici status
Ordo navigatorum internationalis, qui vulgo IMO vocatur, Mare Balticum regionem maritimam maxime sensibilem nominavit.
Ex hoc decreto sequitur, ut navigationes eius novis legibus et sanctionibus, quae opus sint ad calamitates oecologicas inde avertendas, coerceri possint. Una ex actionibus huc pertinentibus est aliquot Maris Baltici partes ab omni commeatu navali pacare.

Televisio magis spectatur
Tempus, quod homines in televisionem intuendam impendunt, in toto orbe terrarum auctum est, ut patet ex investigatione internationali recens divulgata.
Nuntiatur enim spatium televisionis spectandae anno praeterito quindecim fere minutis crevisse. Omnium cupidissimi huius otii generis agendi fuerunt Iaponienses, quippe qui amplius quattuor horas cotidie apud album visificum sederent, cum Europaei tres horas et dimidiam ad hoc satis esse existimarent. Telespectatores imprimis fabulis fictis delectantur, quamquam etiam spectacula veritatem imitantia maiore aura populari quam ante frui coeperunt.

 

 

 

"Nuntii Latini", 2.4.2004 (Radiophonia Finnica Generalis)

redegit Tuomo Pekkanen.

Confoederatio Natoamplificata
Confoederatio Natonovis nationibus amplificata est. Ad undeviginti membra anteriora septem adiuncta sunt, scilicet Estonia, Lettonia, Lituania, Bulgaria, Romania, Slovakia, Slovenia.
Nunc primum factum est, ut nationes pristinae Unionis Sovieticae adconfoederationem asciscerentur. Polonia, Tzekia, Hungaria, olim partes confoederationis Varsaviensis, iam quinque annos in Natone sunt. Neque mireris, quod Russi solliciti quaerunt, quid ex illa amplificatione tandem aliquando fiat; mutationem enim ad commoda sua militaria, politica, oeconomica attinere. Praesidens George W. Bush, cum nova membra Natonis salutaret, monuit foederatis novum adversarium esse, qui mortem inter innocentes tam Novi Eboraci quam Matriti disseminasset. Terroristas ea omnia odisse, quae Natorepraesentaret; illos libertatem despicere, unitatem nationum timere, ordines earum perturbare, quod quidem illis numquam contingeret.

Comitia regionalia Francorum
Altero suffragio comitiorum regionalium factiones sinistrae Francorum victoriam reportaverunt, quo factum est, ut regimen dimitteretur. Praesidens Jacques Chirac petivit, ut Jean-Pierre Raffarin etiam novum regimen constitueret. Novus minister aerarii publici ad renovationes oeconomicas exsequendas nominatus est Nicolas Sarkozy.

Saddam a custode corporis proditus
Saddam Hussein, die tertio decimo mensis Decembris prope oppidum Tikrit ab Americanis deprehensus, a custode corporis, familiari suo, proditus erat.
Cum copiae Americanorum mense Aprili Bagdatum intrarent, vir ille, nomine Mohammed Ibrahim Omar al-Musslit, unus ex custodibus erat, qui Saddamum inde fugientem comitabantur. Cum mense Decembri Bagdati captus esset, ab Americanis interrogatus brevi inductus est, ut latebram dictatoris aperiret. Neque tamen praemium viginti quinque milionum dollarorum accepit, quod proditori Saddami promissum erat, quia non sponte sua sed necessitate coactus interrogatoribus Americanis latibulum domini ostendit. Dies, quo Saddam in iudicium adducetur, nondum constitutus estneque crimina, de quibus accusabitur, adhuc definita sunt. Jacques Verges, advocatus Francogallus, qui antea etiam terroristas in iudiciis defendit, nuntiavit se causam Saddami dicere velle; id ut faceret, proximos et familiares Saddami petivisse.

Lex Irlandiae tabacaria
In Irlandia lex lata est, quae fumificationem tabaci in omnibus locis publicis sedibusque operis vetat, ut in grapheis, officinis, cauponis cafeisque. Si quis legem violaverit, etiam tribus milibus euronum multari poterit. Bernie Ahern, minister Irlandiae primarius, affirmavit novam legem a maiore parte civium comprobari.

 

 

 

 

"Nuntii Latini", 26.3.2004 (Radiophonia Finnica Generalis)

redegit Tuomo Pekkanen

Negotiatores Finni Bagdati occisi
Duo negotiatores Finni, via autocinetica Bagdati vehentes a viris ignotis, qui alio vehiculo iuxta eos vehebantur, sclopeto occisi sunt. Autoraedarius, qui vehiculum Finnorum gubernabat, incolumis mansit, homicidae effugerunt. Negotiatores morte perempti delegationi Finnicae intererant, quae Bagdatum venerat, ut de cooperatione commerciali recreanda cum magistratibus Iraquianis consuleret. Illo facinore perterrita delegatio, quae unam septimanam Bagdati mansura erat, rebus infectis quam primum in Finniam revertit. Caedes negotiatorum fuit scelus abominabile et actus terroristicus, ex quo manifestum est condiciones in Iraquia esse adhuc periculosissimas neque quemquam peregrinum ibi tutum esse.

Mundum non esse tutiorem
Romano Prodi, praeses commissionis Europaeae, in colloquio televisifico Americano dixit mundum bello Iraquico tutiorem factum non esse neque periculum a terroristis imminens deminutum; relationes quidem inter nationes Europaeas et Civitates Unitas Americanorum esse meliores quam anno ante, cum opiniones de bello Iraquico suscipiendo vehementer differrent. In eodem colloquio Joe Lieberman, senator Americanus, praemonuit, ne nationes Europaeae eodem modo errarent, quo moderatores Britanniae et Galliae anno millesimo nongentesimo duodequadragesimo erravissent; illos enim pacto Monacensi ea spe inductos subscripsisse, ut ita Adolphum Hitler, ducem Germaniae nazisticae, pacarent; Europaei ne cogitarent se pacem cum reti terroristico al-Qaida separatim facere posse. "Nulla est pax", ait Lieberman, "cum his hominibus, qui nos omnes, ab ipsis differentes, occidere volunt." ? Neque mundus hodiernus eo quidem tutior factus est, quod  Ahmed Jassin, dux spiritalis ordinis Hamas, directis ex helicoptero Israelianorum missilibus occisus est et ita Arabum in occidentales ira etiam magis quam antea incitatur.

Memoriale Matritense 
Memoria victimarum terrorismi in cathedrali Almudena Matritensi die Mercurii sacris caerimoniis celebrata est.Rex Hispaniae Juan Carlos et regina Sophia multique moderatores nationum occidentalium convenerant, ut una cum familiaribus centum nonaginta homines commemorarent, qui per facinus barbaricum die undecimo mensis Martii vitam Matriti amiserant. 

 

 

 

"Nuntii Latini", 19.3.2004 (Radiophonia Finnica Generalis)

redegit Reijo Pitkäranta.

Magna strages Matriti facta
Ut iam omnibus constat, die undecimo mensis Martii (11.3.) Matriti, in urbe capite Hispaniae, series ictuum terroristicorum accidit, qua ducenti homines vitam amiserunt et mille quadringenti sauciati sunt. Facinus ita dispositum erat, ut illo die mane, cum commeatus publicus ubique frequentissimus esset, decem bombae singulis minutis interiectis in tribus stationibus ferriviariis Matritensibus exploderentur. Ex eis septem media fere urbe, reliquae autem in suburbio displosae sunt. "Crederes finem omnium rerum advenisse", dixerunt quidam testes oculati vestigia caedis describentes. Communis opinio est illud scelus a musulmanis extremistis perpetratum esse.


Comitia Hispaniae parlamentaria
Impetus in Matritum factus etiam magnam vim ad politicam Hispaniae internam contulisse videtur. Namque electionibus parlamentaribus ibidem die Dominico institutis socialistae praeter exspectationem superiores discesserunt sententiarum longe maiorem partem consecuti. Apparet regimen Hispaniae conservativum talem poenam stragis Matritensis pertulisse.

Putin praesidens iterum creatus
In Russia pridie Idus Martias comitia praesidentialia habita sunt. Iam eodem die vesperi Vladimir Putin se victorem suffragii professus est votorum amplius septuaginta centesimas adeptus. Quae cum ita essent, Putin a populo iterum dignus ductus est, cui summa rerum Russiae committeretur. Competitores eius modestum successum habuerunt: Nikolai Haritonov, candidatus communistarum, suffragiorum quattuordecim centesimas sibi conciliavit, cum ceteri ambitores ne quinas quidem centesimas acciperent.

De foramine in Outokumpu altissimo
In terram oppidi Outokumpu, quod in Carelia Finniae septentrionali situm de re metallica notum est, foramen plus duo chiliometra altum terebrabitur. Hoc inceptum gregi operario Russico exsequendum datum est, cum inter utramque civitatem conventum esset, ut Russi variis instrumentis technicis et rerum peritis suppeditatis aes alienum a Finnis conflatum deminuerent. Foramen profundissimum, cuius diameter nonnisi duo et viginti centimetra efficiet, inter alia variis mensionibus geophysicis faciendis proderit.

 

 

 

 

"Nuntii Latini", 12.3.2004 (Radiophonia Finnica Generalis)

redegit Reijo Pitkäranta.

Comitia in Graecia facta
Septimana vergente in Graecia comitia legatis in parlamentum creandis instituta sunt. His electionibus superior discessit factio conservativorum nomine Nova democratia, cum socialistae et eorum dux Georgius Papandreu cladem acerbissimam acciperent. Ex eventu suffragii sequitur, ut novus primarius minister Graeciae fiat Kostas Karamanlis, praeses partium victricium. Papandreu autem pollicitus est se novo regimini auxiliaturum esse et in consultationibus de insula Cypro unificanda et in Olympiis Atheniensibus praeparandis.

Lex Iraquiae fundamentalis
Collegium Iraquiae interim administrandae legem fundamentalem temporariam eiusdem civitatis perferendam curavit et his tabulis publicis subscripsit.Hoc negotium bis dilatum erat, postquam musulmani shiitae, qui partem interregiminis faciunt, iterum atque iterum recusaverunt, quominus rogationem approbarent. Propositum est, ut nova lex mense Iulio valere incipiat et usque ad finem anni bismillesimi quinti (2005) rata sit. Constitutio magni interesse existimatur ad potestatem Iraquianis mense Iunio exeunte reddendam.

Investigatores Francogalli
Die Martis circiter duo milia investigatorum in Francogallia praestantissimorum nuntiaverunt se omnibus operis administrativis finem facturos esse.
Indignantur enim, quod moderatores rei publicae scientiis et artibus excolendis satis subsidii non paraverint. Motu publico nomine "Investigationem servemus" condito flagitant, ut non solum plus pecuniae in varias doctrinas impendatur, sed etiam novae operis sedes ad scientias promovendas constituantur. Censent enim inopiam argentariam unam e causis esse, cur in dies plures feminae et viri docti e Francogallia in terras peregrinas emigrent.  

Multa avium genera emoritura
Plus mille ducenta avium genera sive octava pars totius volucrium populationis omnino emori periclitantur, ut aestimat Birdlife, ordo ornithophilorum internationalis. Autumant huius rei periti in unaquaque fere terra saltem unam avium speciem nidificare, quae in discrimen adducta sit. Caesiones silvarum in Brasilia pluvialium aviariis pessime imminere, sed etiam cultiones in Africa agrorum aviculis magno periculo esse.

 

 

 

"Nuntii Latini", 5.3.2004 (Radiophonia Finnica Generalis)

redegit Tuomo Pekkanen.

Kerry candidatus democratarum

Iam certum est senatorem John Kerry fore apud Americanos candidatum praesidentialem democratarum.
Cum Kerry in novem ex decem civitatibus, in quibus comitia primaria die Martis facta sunt, victor evasisset, John Edwards, aemulus eius principalis, cladem in ambitione passus se a certamine recessisse nuntiavit.

Ordo in Haiti restituitur
Jean-Bertrand Aristide, praesidens Haitianus, die Dominico munere deposito in exsilium profectus est. Postridie eius diei in rem publicam Africae Mediae venit, ubi confugium habet.
Praesidens interimarius in Haiti est Boniface Alexandre, qui petivit, ut Nationes Unitae copias in Haitim ad pacem restituendam mitterent. Quam petitionem Consilium Securitatis comprobavit. Primi milites Americani, qui nucleum copiarum inernationalium faciunt, iussu praesidentis Bush iam in insulam venerunt. Etiam Canada et Francia operationi intererunt. Kofi Annan, secretarius generalis, arbitratus est ordinem in Haiti non ante quam spatio trium vel quattuor mensium restitutum iri.

Abusus sexuales sacerdotum catholicorum
Post annum millesimum nongentesimum quinquagesimum (1950) plus quam decem milia sescenti (10600) pueri in USA rettulerunt se victimas fuisse abusus sexualis sacerdotum catholicorum. Sacerdotes ita accusati quattuor milia quadringenti quinquaginta (4450) numerantur. Relatio, quae archivis ecclesiasticis nititur, mandatu episcoporum catholicorum composita est.

Passio Christi
Prima spectacula publica pelliculae cinematographicae ?Passio Christi? die Mercurii Cinerum, tempore quadragesimae ineunte data sunt. Praecipuum est, quod omnes in illa dialogi sermone Latino aut Aramaico fiunt.Prima spectacula publica pelliculae cinematographicae  "Passio Christi" die Mercurii Cinerum, tempore quadragesimae ineunte data sunt. Praecipuum est, quod omnes in illa dialogi sermone Latino aut Aramaico fiunt.
Mel Gibson, moderator pelliculae, affirmavit se ultimas Christi in terra horas quam fidelissime describere voluisse. 
Argumentum ex quattuor evangeliis sumptum est. Partes Mariae Magdalenae agit Monica Bellucci, personam Iesu Christi  James Caviezel.
Illi qui pelliculam viderunt, monent in illa forsitan plus esse sanguinis et lacrimarum quam homines mollioris animi ferre possint. Sunt etiam, qui moderatorem de antisemitismo accusaverint.

Reditus Regis statunculis praemiatus
Clarissimi actores actricesque Hollywoodenses praemiis academicis, quae vulgo statuncula Oscar nominantur, rursus honorati sunt.
Optima pellicula pro opinione omnium nominata est ?Reditus Regis?, tertia pars trilogiae ?Fabula de domino anulorum? Eadem illa pellicula, cuius moderator est Peter Jackson,  omnino undecim praemia acquisivit. Sean Penn, qui primas partes in pellicula ?Flumen mysticum? egerat, optimus actor iudicatus est. Charlize Theron, homicidam serialem in pellicula ?Monstrum? confessa, statunculum actricis optimae accepit. Nominari adhuc debent Renee Zellweger, optima actrix subsidiaria, et Tim Robbins, optimus ex actoribus subsidiariis iudicatus.

 

 

 

 

 

"Nuntii Latini", 27.2.2004 (Radiophonia Finnica Generalis)

redegit Reijo Pitkäranta.

Terrae motus in Marochio factus
Die Martis multo mane partes Marochii septentrionales vehementi terrae motu afflictae sunt, quo factum est, ut paene sescenti homines morerentur et trecenti graviter laederentur.Vis concussionis amplius sex graduum Richterianorum fuisse existimatur. Pessime illa calamitate vici et oppida in litore maris Mediterranei sita affecta sunt.

Regimen Russiae exauctoratum
Vladimir Putin, praesidens Russiae, ex improviso ministrum primarium Mihail Kasjanov et cum eo totum regimen civitatis quattuor annis ante electum exauctoravit. Oratione televisifice habita causam decreti sui nuntiavit esse, quod ante comitia praesidentialia rem publicam diligentius administrandam sibi suscipere vellet

Comitia in Irania parlamentaria
In Irania comitia parlamentaria facta sunt, quorum victores exstiterunt conservativi. Civium nonnisi dimidia fere pars sententiam tulit, cum frequentia suffragatorum in electionibus antea institutis multo maior fuisset.
Qui rebus renovandis student, iam metuunt, ne theocratae rei publicae islamicae posthac in adversarios severius agant.
Ali Khamenei, dux Iraniae spiritualis, exitum suffragii pro victoria habuit, quam Iraniani ex Americanis et aliis libertatis oppressoribus reportavissent.

Saddam in carcere visitatus
Legatis Ordinis a Cruce Rubra die Saturni facultas data est pristinum praesidentem Iraquiae Saddam Hussein in carcere visendi.
Hoc iure milites bello capti, inter quos Saddam quoque numeratur, ex pacto Genavensi utuntur. Inspectores in ergastulo tamdiu manserunt, donec Hussein a medico examinatus est. Exspectabant etiam, quoad hic litteras ad familiam suam conscriberet. Neque observatores postea diurnariis aperuerunt, quomodo Hussein valeret aut quo loco custodia teneretur.

Novus planetoides inventus
Ultra stellam errantem Plutonem novus planetoides glacialis inventus est, cuius diameter circiter mille octingenta chiliometra efficit.
Planetulam reppererunt uranographi in schola superiore technica Californiae laborantes. Agitur de omnium maximo corpore caelesti circumsolari, quod appellatione planetae non nuncupatur. Orbita eius plus tria miliarda chiliometrorum remotius extenditur quam extremus planetae Plutonis circuitus.

 

 

 

 

"Nuntii Latini", 20.2.2004 (Radiophonia Finnica Generalis)

redegit Reijo Pitkäranta.

De rebus Indiae et Pakistaniae
Relationes inter Indiam et Pakistaniam intercedentes iam tantopere mitigatae sunt, ut legati harum civitatum in urbe Islamabad congregati die Lunae consultationes mutuas aperirent. De his colloquiis incohandis in conventu praesidentium utriusque partis mense Ianuario habito decretum erat. Unum melioris fidei signum putaveris esse, quod grex athleticus ex India in Pakistaniam profecturus est ludi pilae et portae faciendi causa.

De conventu Berolinensi
Gerhard Schröder, Tony Blair et Jacques Chirac, duces trium civitatum Unionis Europaeae sociarum, die Mercurii Berolinum convenerunt, ut imprimis de quaestionibus oeconomicis Unionem attingentibus deliberarent. Neque fieri potuit, quin sermones horum triumvirum ceteris eiusdem Unionis membris offensioni essent. Nationes enim minores timere coeperunt, ne summae Unionis Europaeae res paulatim in manus oligarchorum magna auctoritate praeditorum pervenirent.

Iura regis Suetiae coercentur
Rex Suetiae Carolus XVI Gustavus visitationes statales peregrinas non iam facere sinetur nisi ab aliquo ministro comitatus. Quoties haec itinera habebuntur, munera primorum regni ita dividentur, ut rex tantum caerimoniis publicis praesit, colloquia autem politica ministro duce agantur. Carolus Gustavus enim Suetis stomachum movit, cum in Bruneium invitatus id maxime in hospite sultano laudavit, quod phylarchiam suam politice perspicuam et apertam reddidisset.

Athenae pulchriores redduntur
Facies urbis Athenarum pulchrior reddita est, quod fortasse non factum esset, nisi ibidem hoc anno Olympia aestiva celebrarentur. Multa consilia ad Athenas exornandas pertinentia iam ad effectum sunt perducta. Huc spectat, quod in media urbe plurimae florum et virgultorum plantationes institutae ac circa variorum certaminum loca et in collibus Athenis circumiacentibus magna copia arborum sata est. In inceptis est etiam amplissimus hortus archaeologicus, qui ab arce Acropoli ad stadium Panathenaicum extenditur.

De equis et studio equitandi
Abhinc duos annos in Finnia circiter sexaginta milia equorum esse aestimabantur. In praesenti autem numerus eorum etiam maior esse videtur, si respicias studium equitandi apud nos valde auctum esse praesertim puellis et feminis huic oblectamento operam navantibus. Iam amplius dimidia pars equorum in Finnia stabulantium in possessione eorum sunt, qui in urbibus aut sedibus incolis frequentibus habitant et in his regionibus magna equilia aedificaverunt. Quae cum ita sint, multi flagitant, ut etiam in commeatu publico disponendo saluti et commodis equitantium melius provideatur quam ante.

 

 

 

 

"Nuntii Latini", 13.2.2004 (Radiophonia Finnica Generalis)

redegit Tuomo Pekkanen.

Velamen capitis in scholis Francorum prohibitum
Longe maior pars delegatorum in camera inferiore parlamenti Franciae legem probavit, quae vetat, ne symbola religiosa in scholis publicis portentur.
Illa lex, de qua in toto orbe islamico plurimum disputatum est, non tantum ad velamina musulmanorum spectat, sed etiam ad kippam, tegimen capitis Iudaeorum, atque maiores cruces Christianorum. 
Postquam senatus sive camera superior legem acceperit, illa proximo autumno, novo anno scholastico ineunte, valere incipiet.
Nova lege regimen affirmare vult Franciam esse civitatem laicam, in qua religio a scholis et servitiis publicis abesse debet, ut discriminationes et proselytismus omnis generis evitentur.

Europaei occidentales immigratione solliciti
Nationes, quae Kalendis Maiis ad Unionem Europaeam adiungentur, illas terras vehementer vituperant, quae decreverunt, ut migrationem ex oriente in occidentem circumscriberent.
E.g. Sueti, Dani, Nederlandienses Britannique nuntiaverunt civibus novorum unionis membrorum in terras ipsorum libere immigrare non licere.
Ideo imprimis Poloni et Slovaki timent, ne migratione ita circumscripta Unio Europaea in duas classes inaequales dividatur.
Illi autem, qui migrationem circumscribere student, solliciti sunt, ne complures miliones hominum pauperum ex Europa orientali in occidentem vagentur, ut ibi meliores vitae condiciones quaeritent.

De armis Iraquianorum internecivis
Praesidens George W. Bush commissionem instituit, quae inquireret, cur ante bellum de armis internecivis Iraquianorum res per speculatores allatae essent,  quae post bellum falsae esse viderentur.
Factio democratarum diu flagitaverat, ut illa commissio institueretur.
Bush enim bellum Iraquiae ideo imprimis inferre voluerat, quod Saddam Hussein interneciva arma haberet.

Columbae internuntiae vias publicas sequuntur
Columbae internuntiae sive litterigerae, ut notum est, e longinquo in columbarium suum facile reverti possunt. Vulgo creditum est illas sole adiuvante rectam in domicilium viam invenire.
Nuperrime autem investigatores Universitatis Oxoniensis, qui per decem annos columbas internuntias observaverant, aliam illis rationem esse cognoverunt Technica enim satellitari adhibenda animadverterunt columbas vias principales sequi et in triviis iter flectere.
Itinerarium illarum non esse semper brevissimum sed laborem leviorem, cum lineas viarum velut tabulam geograhicam sequerentur.
Forsitan, ut investigatores arbitrantur, columbae, antequam viae publicae stratae essent, lineamentis litorum aut riparum ad cursum dirigendum utebantur.

In Asia plurimi pueri scholam non frequentant
Unesco, ordo Nationum Unitarum, rettulit in Asia plurimos esse liberos, qui scholam non frequentarent; raros esse eos, qui scholam perficerent.
Puellas saepius quam pueros institutione scholastica omnino privari aut scholam interrumpere coactas esse.
Post Asiam pessimas esse condiciones in partibus Africae infra desertum Saharae iacentibus.

 

 

 

"Nuntii Latini", 6.2.2004 (Radiophonia Finnica Generalis)

redegit Tuomo Pekkanen.

Instrumenta communicativa coercentur
Consilium Europaeum rettulit se sollicitari, quod potestas publica instrumenta communicativa coerceret.  Canales televisificos etradiophonicos in multis terris Europae occidentalis a gubernatoribus civitatis castigari. Exemplum esse societatem BBC, cuius de belloIraquico nuntii a regimine Britannico pessime vituperarentur.

Controversia de insula Cypro
Insula Cyprusiam quadraginta annos inter Graecos etTurcos ita divisa est, ut Turci in septentrione tertiam fere partem insulae teneant. Propositum est, ut Cyprus mense Maio membrum Unionis Europaeae fiat. Sed antea Turci et Graeci controversiam de insula unienda componere debent. Alioquin tantum pars Graeca ad unionem accedet. Si concordia inventa erit, etiam Turcia faciliorem in Unionem Europaeam aditum habere poterit. Ut colloquia de Cypro unienda maturaret, Tayyip Erdogan, minister primarius Turciae, suasit, ut partes quaedam insulae, quas Turci tenerent, Graecis concederentur.

Peregrinatores conculcati
Inter peregrinationem musulmanorum minime ducenti quinquaginta homines in turba conferta conculcati mortui sunt. Maior pars ex eis periit, cum peregrinatores contra tres columnas, quae Satanam figurare creduntur, lapillos conicerent. Ritui lapidationis in vico Mina, qui quindecim chiliometra ab urbe Meccadistat, complura centena millena musulmanorum intererant. Lapidatio columnarum originem ducit ex opinione Satanam a propheta Abraham eiusque duobus filiis, quibus ibi apparuisset, lapidibus coniectis fugatum esse.Omnes musulmani, ubicumque terrarum habitant, minime semel in vita peregrinationem quinque dierum in Arabiam Saudianam facere debent, ut ibi loca sacra religionis islamicae venerentur.  Neque mirum est, quod in magna hominum multitudine calamitates saepe accidunt. Maxima fuit strages anno millesimo nongentesimo nonagesimo, cum mille quadringenti viginti sex peregrinatores in mortem conculcati sunt.Hoc anno circiter duo miliones musulmanorum Meccam venisse aestimantur.

De rebus Russicis
In Russiaquotannis circiter bini miliones puerorum nondum quattuordecim annorum a parentibus male tractantur; ex eis plus quinquagena millena domo relicta violentiam parentium fugiunt, paene bina millena domi tam male mulcantur, ut moriantur.Haec comperimus ex relatione, quam parlamentum Russicum faciendam curavit.
Murmanskiae, in litore Maris glacialis, officina purgamentis nuclearibus tractandis a Russis aedificata est. Norvegienses, sordibus nuclearibus Russorum solliciti, plus dimidiam partem sumptuum solverunt, ut opus maturarent.Acta diurna Norvegica, quibus nomen estAftenposten, nuperrime rettulerunt officinam, iam ante tres annos perfectam, nondum in usum captam esse.

 

 

 

 

"Nuntii Latini", 30.1.2004 (Radiophonia Finnica Generalis)

redegit Reijo Pitkäranta.

Saakashvili munus suscepit
Mihail Saakashvili, novus praesidens Georgiae triginta sex annos natus, die Dominico (25.1.) munus officialiter suscepit.
Reportaverat enim manifestissimam victoriam comitiorum praesidentialium, quae in illa civitate post praesidentem Edvard Shevardnadze potestate expulsum facta erant. Caerimoniae inaugurationis interfuit etiam Colin Powell, minister Americanus a negotiis exteris.
Saakashvili pollicitus est se id acturum esse, ut corruptioni in patria luxurianti frena imponerentur et discordiae regionales acerrimae componerentur.

Russi tuberculosi laborant
Tuberculosis pulmonum, quamvis e terris occidentalibus iam fere evanuisset, in Russia tamen his diebus grassari coepit et novas formas sibi assumendo solito periculosior facta est.
Metuendum est, ne virus huius morbi tam forte reddatur, ut etiam omnium efficacissimis remediis resistere possit.

Fossae in Iraquia sepulcrales
Helena Ranta, dentista forensis Finlandensis, gregi scientifico quinque hominum osteo-odontologiae peritorum praeerit, qui mense Martio in Iraquiam proficiscetur ad fossas ibidem sepulcrales examinandas.Hoc eam rogaverunt confoederati auspiciis Americanorum.
Ranta sperat fore, ut mandatum suum, cuius est magnitudinem illarum fossarum et numerum mortuorum variis locis promiscue humatorum investigare, circiter sex septimanis perficiatur.

Forum oecumenicum constituetur
In Finnia Forum oecumenicum permanens constituetur, quod eo spectat, ut cooperatio et relationes inter diversas religiones et confessiones intercedentes provehantur. De ea re iam multae sessiones communes habitae sunt et his consultationibus adfuerunt antistites ecclesiarum evangelico-lutheranae, orthodoxae et catholicae necnon primores communionum islamitarum et Iudaeorum.

Shakespeare Finnice reddetur
Domus editoria Finnica Werner Söderström consilium cepit omnia opera Guillelmi Shakespeare denuo in Finnicum convertendi. De quanto incepto agatur, vel inde patet, quod Shakespeare omnino triginta septem dramata, tam comoedias quam tragoedias, conscripsit. Propositum est, ut singulis annis quaterna volumina divulgarentur. Primae versiones novae seriei iam hoc vere in lucem prodibunt.

De certamine artis glacialis
Septimana vergente in vivario Helsinkiensi Korkeasaari appellato artifices e variis terris oriundi inter se certaverunt, quis eorum e glacie pulcherrimum opus artis caelare valeret, ea condicione posita, ut thema figurae creandae ex universitate animalium sumeretur. Victoriam certaminis tulit manus Russo-Americana, cum in fragmento glaciei imaginem ranae in scirpeto aquam subeuntis mira arte expressit. Etiam Finni se excellentissimos crystallarios praebuerunt, quippe qui duobus lucanis e glacie sculptis praemium secundum sibi pararent.


 

 

 

"Nuntii Latini", 23.1.2004 (Radiophonia Finnica Generalis)

redegit Tuomo Pekkanen.

Kerry in Iowa victor
Candidati praesidentatum Americanorum petentes iam populum ambire coeperunt. Prima comitia democratarum in civitate Iowa facta sunt, ubi victor evasit senator John Kerry, qui duodequadraginta centesimas suffragiorum cepit.
Factio democratarum, comitiis primariis in omnibus civitatibus factis, candidatum suum exeunte mense Iulio eliget.
Candidatus republicanorum est George W. Bush, qui alterum praesidentatum petit. Dies, quo alteruter de candidatis praesidens designabitur, erit tertius decimus mensis Decembris.
Novus praesidens munus in quadriennium die vicesimo mensis Ianuarii anno bis millesimo quinto suscipiet. Ex constitutione Americanorum idem praesidens semel denuo creari potest.

Bush politicam suam defendit
In oratione de statu nationis habita praesidens Bush politicam suam defendit: Necesse fuisse impetum in Iraquiam facere, ut Saddam Hussein arma interneciva praeparare desineret; oeconomiam patriae praesertim propter vectigalia et tributa a regimine suo levata meliorari; bellum terroristis illatum bene successisse, etsi periculum terrorismi nondum esset sublatum.
Praesidens in oratione sua etiam de re sanitaria egit flagitans, ut sumptus deminuerentur et providentia socialis, quantum fieri posset, ad privatum dominium redigeretur. De argumento orationis principali, scilicet de statu civitatis foederalis Americanorum, Bush affirmavit eum validum esse et stabilem.

Primi milites Iaponienses in Iraquiam missi
Primae copiae Iaponiensium in Iraquiam missae sunt, quae operationi Americanorum interessent.
Sunt triginta quinque milites, qui viam circiter mille concivibus suis praeparant.
Numquam antea post bellum mundanum secundum copiae Iaponiensium peregre nisi ad operationes Nationum Unitarum mitti potuerunt, quibus ab anno millesimo nongentesimo nonagesimo secundo intersunt.
Sed lex aestate anni proximi mutata est. Cum cives rem aegre ferrent, praescriptum est, ne Iaponienses in eis Iraquiae regionibus essent, in quibus proelia fierent. Regimini Iaponiae periculum politicum sine dubio imminebit, si qui milites Iaponienses in Iraquia mortem occubuerint.

Irlandia praesidium Unionis Europaeae tenet
Anno vergente Irlandia praesidium Unionis Europaeae quindecim terrarum accepit. Cum praesidium post sex menses deposuerit, numerus membrorum erit viginti quinque.
Difficillima est quaestio de lege fundamentali, qua potestas intra unionem iuste et ad res tractandas accommodate solvatur. Mense Iunio Unio Europaea amplificata primum parlamentum creabit.

Barba virum facit
In quibusdam partibus Indiae septentrionalibus constitutum est, ut custodibus publicis, qui subium sive barbam labii superioris haberent, maior quam ceteris merces solveretur.
Magistratus enim censent subium plus auctoritatis custodibus afferre. Praeceptum autem est, ne barba labii superioris aspectum saevum haberet.

 

 

 

 

 

"Nuntii Latini", 16.1.2004 (Radiophonia Finnica Generalis)

redegit Reijo Pitkäranta.

Catarrhus epidemicus avium
Medici Nationum Unitarum metuunt, ne catarrhus epidemicus avium, qui regiones Asiae iam infestat, hominibus maiori periculo sit quam Sars sive Syndrome acuta respirationis severa. 
Peter Cordingly, investigator ex Ordine sanitatis mundi (WHO), monet fieri posse, ut hoc virus in pecore volatili inventum, si cum grippa vulgari coniunctum sit, periculosissimam epidemiam efficiat.
 

Mijailovic in ius vocatus
Mijailo Mijailovic, iuvenis viginti quinque annorum, confessus est se ministram Suetam Anna Lindh mense Septembri cultro perfodisse. 
Itaque reus homicidii factus est et die Mercurii in ius Stockholmiense vocatus.
Iuris consulti existimant satis superque testimoniorum in promptu esse, quae ostendant illud scelus re vera a Mijailovic commissum esse.
Hic, cum de caede quaereretur, rettulit se cuidam voci internae oboedivisse, quae se Serbice hortaretur, ut ministram Anna Lindh aggrederetur.

Saddam statum captivi habet
Moderatores Civitatum Americae Unitarum pristino dictatori Iraquiae Saddam Husseim statum militis bello capti officialiter concesserunt, ut ex Pentagono sive ministerio defensionis Americanorum nuntiatum est.
Hinc sequitur, ut ei ex pacto Genavensi ius cibi, tecti et curae valetudinis tribuatur. Negant tamen Americani illam rem ullam vim habere ad eam vitae condicionem, qua Saddam in praesenti utatur.
Locus autem, ubi Saddam Hussein custodia teneatur, non est palam factus.

Berlusconi immunitate privatus
Iudicium Italiae constitutionale recusavit, quominus primo ministro Silvio Berlusconi immunitatem accusationum daret. 
Iudices enim, cum legem non ita pridem perlatam antiquarent, aequalitatem civium infeliciter tolli censuerunt, si unus homo tale privilegium acciperet.
Quo decreto fit, ut lis corruptionis in primum ministrum Berlusconi illata continuetur.

De itineribus Finnorum
Finni anno proxime praeterito eodem fere studio ac ante itinera peregrina susceperunt.Si quaesieris, in quas Europae terras nostrates otiandi causa libentissime profecti sint, respondemus Hispaniam et Graeciam viatoribus plurimum placuisse, sed etiam numerum peregrinationum in Bulgariam factarum valde auctum esse.
Huc accedit, quod Austria et Portugallia populo Finnico acceptiores esse coeperunt. Gratia autem Turciae multum deminuta est, fortasse propter res in ea regione turbidas.

Aranda vela ventis dedit
Aranda, navigium Finnicum maribus cognoscendis, die Lunae vela ventis dedit et cursum ad orientem versus direxit.
Primum quidem Sinum Finnicum perscrutabitur, deinde in aquas Russiae ad specimina maritima facienda perget.

 

 

 

 

 

"Nuntii Latini", 9.1.2004 (Radiophonia Finnica Generalis)

redegit Tuomo Pekkanen.

Spiritus in Martem descendit

Robotum exploratorium "Spirit", ab Americanis die decimo mensis Iunii in Martem versus missum, facto itinere quingentarum milionum chiliometrorum, die Dominico (4.1.) in planetam feliciter descendit.
Locus ad descensum electus erat crater, in quo olim lacus fuisse putatur. 
Imagines, quas robotum in terram misit, prospectum praebent planum et lapidosum. Inest in eo vehiculum automatum, quo superficies Martis accuratius investigabitur atque signa aquae et vitae quaerentur.
Etiam Ordo Spatialis Europae (ESA) percontatrum in superficiem Martis misit, sed sors et condicio illius est incerta, quia investigatoribus nondum contigit, ut contactum cum illo constituerent.
In Martem aut in orbitam circummartialem iam quadraginta annis apparatus observatorii plus tricies missi sunt, sed tantum tertius quisque volatus prospere processit.
His mensibus percontatra spatialia in Martem versus missa fuerunt frequentiora, quia ille planeta propius a Terra distat quam umquam spatio sexaginta milium annorum.

Lex fundamenalis Afganistaniae

Magnum Consilium Afganorum, quod loya jirga appellatur, legem fundamentalem comprobavit. Ex nova lege Afganistania est res publica islamica, in qua nulla lex potest esse islamismo contraria, sed etiam ceterae religiones libere exerceri possunt.Viri et feminae sunt ex lege aequales. Parlamentum ex duabus cameris constat. Camera inferior, quae a populo creatur ideoque camera populi dicitur, ius habet ministros deponendi.
Praesidens, qui suffragio populi creatur, camerae populi est responsalis. Ministri, summus magistratus iudicialis atque praefectus argentariae centralis camera populi approbante a praesidente designantur.
Pristinus rex Zahir Shah in totam vitam pater patriae appellatur. Nova lex Afganistaniae firmam consitutionem creavit, in qua praesidens plurimum valet, nam minister primarius nullus est neque consilia regionalia in lege locum habent.
Linguae officiales sunt duae, scilicet pashtu Patanorum et dari Tadzikorum. Linguae tribuum minorum, ut Usbekorum et Turkmenorum, officiales in eis regionibus probantur, in quibus multum valent.

De morte Dianae nova investigatio
Principissa Diana decem mensibus ante mortem suspicabatur principem Carolum de calamitate vehiculari moliri, qua coniux ipsius pristina periret.Quam rem Diana in epistula  atriensi suo Paulo Burrell scripta aperuerat. Principissae in Carolum suspiciones, de quibus Burrell tacuerat, in actis diurnis The Daily Mirror die epiphaniae palam factae sunt.
Diana et amicus eius Dodi Al Fayed calamitate vehiculari Parisiis pridie Kalendas Septembres anno millesimo nongentesimo nonagesimo septimo perierunt.
Magistratus Francorum censuerunt causam fuisse, quod gubernator vehiculi calamitosi ebrius fuisset. In Britannia, epistula Dianae palam facta, nova de mortis causa investigatio suscepta est.

 

 

 

 

 

"Nuntii Latini", 2.1.2004 (Radiophonia Finnica Generalis)

redegit Tuomo Pekkanen.

Urbs Iraniae motu terrae vastata 
(In provincia Iraniae nomine Kerman, quae inter meridiem et solis ortum spectat, postridie Nativitatis Domini terrae motus accidit, quo urbs Bam pessime afflicta est.
Magistratus Iraniae aestimant aedificiis in illa calamitate corruentibus plus triginta milia hominum mortuos esse totidemque fere vulneratos.
Bam, urbs antiquissima, iacet apud viam Sericam, qua olim commercium inter Sinenses et Europaeos fiebat. Incolarum habuit ducenta milia. Praefectus provinciae Kerman censuit duas partes tertias aedificiorum, in eis duo urbis valetudinaria, terrae motu deletas esse.
Etiam vicis propinquis magna damna allata sunt. Irania propter calamitatem auxilium internationale petivit.
Finni valetudinarium campestre cum suis medicis et operariis atque gregem viginti quattuor hominum in urbem Bam miserunt, qui vulneratos curarent et superstites ex ruinis exquirerent. Succursoribus impedimento fuerunt tremores terrae posteriores et tempestas pessima.
Praeterea accidit, ut subsidia in Iraniam missa a latronibus diriperentur. Neque calamitas, qua provincia Kerman afflicta est, sui generis fuit, nam Irania est una ex eis terris, quae motibus terrae maxime expositae sunt.
Saeculo vicesimo Irania viginti magnis terrae motibus concussa est, quibus omnino plus centum quadraginta hominum milia perierunt.


Comitia Serbiae parlamentaria
In comitiis Serbiae parlamentariis factio radicalis SRS victoriam reportavit, cum paene duodetriginta centesimas suffragiorum cepit.
In novum parlamentum electi sunt Vojislav Seselj, moderator huius factionis, et Slobodan Milosevic, candidatus factionis socialistarum (SPS).
Uterque ex eis in tribunali Haagensi de criminibus belli accusatur.   

Pericula ex climate calidiore imminentia
Caeli status calescens valetudini hominum nova pericula affert. Morbi tropici in novas regiones diffunduntur et mutationes in quantitate pluviarum subalimentationem facile efficiunt.
Cum maiore caeli temperatura insecta, quae malariam portant, etiam in Europam vagari possunt, ubi ille morbus hodie nullum est problema.
Praeterea diarrhoea infantibus saepe fatalis augetur, cum contagiones in calore facilius pervagentur.
Magnae difficultates imminent e.g. in India, Bangladesa, Vietnamia, in quibus agricultura magnopere de pluviis monsoniis suo tempore cadentibus dependet.
Haec comperimus ex relatione, quam Ordo Mundi Sanitarius (WHO) recens divulgavit. 


Nulla pax in terris
Anno bismillesimo tertio exeunte et novo  anno ineunte tumultus bellici et impetus terroristici in Proximo Oriente, Iraquia, Tzetzenia finem non habuerunt.
Multi volatus inter Parisios et Californiam propter metum terroristarum revocati sunt, Bagdati incursiones rebellium cotidie fere continuantur, in Tzetzenia impetus contra milites Russos crebrescunt.