"Nuntii Latini", 5.12.2003 (Radiophonia Finnica Generalis)

redegit Reijo Pitkäranta.  

Res Indiae et Pakistaniae
Aeroplanis Indorum per spatium aerium Pakistaniae rursus volare licet, ut promisit Pervez Musharraf, praesidens Pakistaniae.
"Hoc signo", inquit, "ostendimus, quam sincero animo ad pacem promovendam nitamur."
Talis nuntius eo maiore gaudio accipitur, quod India et Pakistania iam ter inter se bellaverunt neque multum afuit, quin abhinc unum annum quartum bellum oreretur. Recentissimis autem temporibus necessitudines inter utramque nationem intercedentes in melius mutatae esse videntur.

De catarrho epidemico
In Europa occidentali grippa sive catarrhus epidemicus ingenti vi grassari coepit.
Hac septimana in Francogallia duae miliones hominum hoc morbo implicitae esse aestimantur, et in Hispania numerus aegrotorum vicies maior est quam annis superioribus. Etiam in Belgio eadem contagio in epidemiam crevit, cum tres centesimae totius populi illo viro infectae essent. In maximo periculo sunt infantes quadriennes aut eis minores, praesertim si asthmate aut diabete mellito laborant.

Adenauer optimus Germanus
In Germania spectatores televisifici sententiam rogati sunt, quem Germanum omnium temporum optimum esse iudicarent.
Victoriam huius suffragii reportavit cancellarius foederalis Konrad Adenauer, qui inde ab anno millesimo nongentesimo undequinquagesimo usque ad annum millesimum nongentesimum sexagesimum tertium (1949-1963) Germaniae occidentali praefuit.
Secundus ab eo habitus est reformator Martinus Luther, cum Carolus Marx, pater communismi dictus, tertius evaderet.
Etiam Iohannes Sebastianus Bach, compositor celeberrimus, a Germanis magni aestimatur: is enim quinto loco positus est.  

De exercitatione corporis
Finni et Sueti studio corporis exercendi ceteris Unionis Europaeae civibus longe praestant, ut est videre in investigatione eurobarometrica. Hac in re civitates Europae septentrionales et meridionales inter se multum differunt. Apparet maiorem partem Finnorum et Suetorum saltem semel in septimana motui et exercitationi corporis operam dare, cum apud Hispanos, Francogallos et Italos nonnisi tertius quisque idem faciat. Omnium segnissimi ad sua sponte movendum videntur esse Portugalli et Graeci.

Qualis tempestas fuerit
Mensibus Septembri, Octobri et Novembri proxime praeteritis tempestas in Finnia dimidio gradu aut etiam sesquigradu Celsiano solito mitior fuit, ut ex statistica Instituti meteorologici patet.Eodem tempore siccitas, quae iam diu multas regiones vexaverat, paululum recessit, cum in diversis Finniae partibus satis superque pluisset. In finibus autem inter occasum solis et meridiem iacentibus pluviae defuerunt, quo factum est, ut terrae aquam sitire pergerent.

"Nuntii Latini", 28.11.2003 (Radiophonia Finnica Generalis)

redegit Tuomo Pekkanen.  

Tranquillitas in Georgia restituta
Postquam Eduardus Shevarnadze, de fraude electorali et corruptione accusatus, ex munere praesidentis Georgiae discessit, tranquillitas post tumultus longinquos in urbe Tbilisi restituta est.
Praesidens ad interim est Nino Burdzanadze, quae affirmavit nova comitia intra quadraginta quinque dies in Georgia habitum iri. 

Kofi Annan de mercatione feminarum sollicitus
Kofi Annan, secretarius generalis Nationum Unitarum, mercatione feminarum in mundo aucta se sollicitam esse rettulit: Illam mercationem ad genera criminalitatis celerrime crescentia pertinere, nam plus septingena milia hominum quotannis ad abusus sexuales commercari; magnam ex eis partem stupro subici, omnium iura humana violari.
Die Martis, quo Annan de his rebus commemoravit, apud populos ad consociationem Nationum Unitarum pertinentes quartus "Dies internationalis violentiae contra feminas tollendae" celebratus est.
Conventio, qua omnis discriminatio feminarum vetatur, a centum septuaginta quattuor nationibus probata et confirmata est.

SIDA in mundo pervagatur
Epidemia SIDAe in mundo gravescit. Pessimae sunt condiciones in partibus Africae meridionalibus, sed periculum est, ne epidemia etiam in quibusdam terris Asiae aut pristinae Unionis Sovieticae effrenate grassari incipiat.
Hoc tantum anno contagium in quinque miliones hominum vulgatum est, plus tres miliones morbo mortui sunt.

Seminaria Latina Hispanica
Latinistae variarum nationum in seminaria convenire solent, ut usum Latine colloquendi discant. Etsi participes plerumque sunt professores et studentes academici, illa seminaria hucusque extra programma universitarium tempore feriarum fuerunt.
In Universitate Sancti Pauli urbis Matriti primum factum est, ut seminaria vivae Latinitatis in annum academicum includerentur.
In primo seminario mense Novembri habito de grammatica Latine docenda, de rebus hodiernis describendis, de carminibus componendis actum est.
Participes, qui ex variis Hispaniae partibus venerant, occasionem habuerunt experiendi, quomodo lingua Latina vivo modo haud aliter atque linguae modernae disceretur.

"Nuntii Latini", 21.11.2003 (Radiophonia Finnica Generalis)

redegit Reijo Pitkäranta.    

Bush in Britanniam advenit
George Bush, praesidens Civitatum Americae Unitarum, cum coniuge Laura die Martis Londinium venit visitationem statalem in Britannia incohaturus.
Hunc eventum historicum appellaveris, si respicias eum primum inter praesidentes Americanos esse, quem regina Elisabeth II officialiter hospitio recepit. Ad tutelam eius praestandam tota urbs ingentibus praesidiis cincta est. Dicuntur quattuordecim milia custodum publicorum convocata esse ad prohibendum, ne quid periculi hospitibus accideret.

Res Iraquiae constituentur
Civitates Americae Unitae, cum Iraquianis suas res administrandas restituere vellent, translationem potestatis in Iraquia maturare decreverunt.
Propositum est, ut ibidem mense Iunio proxime futuro regimen temporarium nationale institueretur et ante finem anni bismillesimi quinti (2005) electiones liberae haberentur. Neque tamen Americani copias suas ex illa regione domum reducturi sunt. Donald Rumsfeld, minister defensionis, negavit in consilio politico nuperrime divulgato quicquam dictum esse, quod ad castra Americana in Iraquia collocata pertineret. "Condicio securitatis", inquit, "non mutabitur".

Caeliscalpium excelsissimum
In media urbe Taipei, quod caput Taivaniae esse constat, caeliscalpium in orbe omnium excelsissimum aedificatum est.Haec turris e centum uno tabulatis composita in altitudinem quingentorum octo metrorum assurgit et spatia diversi generis continet ut pantopolium, observatorium et officia graphealia.
Sumptus aedificandi ad sesquimiliardum dollariorum aut etiam altius ascendisse existimantur. Sismologi autem dixerunt se metuere, ut moles tantae celsitudinis motus terrae sustineret. Sed aedificatores tale periculum infitias ierunt.

De consilio mundi culturali
Consilium mundi culturale, dum Helsinkii die Lunae anniversarium vicesimum celebrat, complures cives de scientiis et artibus optime meritos praecipuis laudibus extulit.Inter eos, qui appellationem honorificam acceperunt, erant tres viri docti Finni, scilicet Sören Illman, professor mathematicae, Markku Kulmala, professor physicae circumiectalis, et Antti Vaheri, professor emeritus virologiae. Eodem honore affecti sunt quinque artifices Finni in sua professione praestantissimi.

Auswahl aus den "Nuntii Latini" vom 14.11.2003 (Radiophonia Finnica Generalis)

redegit Tuomo Pekkanen.  

Violentia in Iraquia et in Arabia Saudiana crudecit  
In urbe Nasirija Iraquiae meridionalis ictus terroristicus die Mercurii factus est, quo saltem viginti sex homines vitam amiserunt. Maior pars victimarum erant milites aut custodes militares Italiani.Paucis diebus ante (8.11.) Riadi, in urbe principe Arabiae Saudianae, simili impetu duodeviginti homines perierunt.
In hoc scelere insolitum fuit, quod iam non Americani aut alii occidentales petebantur sed Arabes et, ut plerique putant, familiares regis, etsi nemo ex his inter victimas fuit.
Forsitan terroristae ostendere voluerunt neminem, ne regiam quidem familiam, Riadi in tuto esse.
Italia in Iraquia meridionali paene tria milia virorum habet, qui ordinem publicum custodiunt et minas explosivas removent. Silvio Berlusconi, primus minister Italiae, affirmavit Italiam nullo terrore adduci, ut voluntatem Iraquianos adiuvandi deponeret.
Multi autem delegati oppositionis politicae flagitaverunt, ut copiae Italicae ex Iraquia deportarentur.

Voyager in confinio systematis solaris
Voyager, primum ex duobus percontatris ante viginti sex annos in spatium cosmicum emissis, fines extremos systematis solaris attigit.Iam tantum spatium permeavit, quantum est nonagies iter ex tellure in solem. In zona systematis solaris extrema ventus solaris desinit et Voyager vi solis attractiva solvitur.
Hucusque nullum instrumentum ab homine factum in tam remotum spatium penetravit. Per tenebrosas regiones interstellares Voyager in proximum systema sidereum post quadraginta fere milia annorum incidet.
Si nihil improvisi acciderit, fluentum eius electricum usque ad annum bis millesimum vicesimum sufficiet.  

Stalin redivivus
Iosephus Stalin, pristinus dictator Unionis Sovieticae, apud multos Russos gratia valere pergit. Cuius rei testimonium est, quod in urbe Ishim, quae est in Sibiria occidentali, statua eius, olim deiecta, nuperrime restituta est. Multis Russis senioribus Stalin est heros, quo duce Unio Sovietica in bello mundano secundo victrix evaserit.
Id quoque virtuti illius tribuitur, quod patriam, agricultura miserabiliter viventem, in potestatem armis nuclearibus praeditam mutaverit.
Maior autem pars Russorum Stalinum habent tyrannum, qui saltem decem miliones hominum interficiendos curavit. Totidem miliones fame perierunt, quam politica Staliniana effecerat.

De ursis in Finnia stratis
Venatio ursorum hornotina in Finnia mense vergente finita est. Ursi hoc anno strati sunt numero sexaginta septem, qui numerus post annum millesimum non-gentesimum nonagesimum quintum minimus est.
Optimam fortunam habuerunt venatores Care-liae septentrionalis, qui iam primis venationis diebus triginta ursos straverunt.

Auswahl aus den "Nuntii Latini" vom 7.11.2003 (Radiophonia Finnica Generalis)

redegit Reijo Pitkäranta.  

Status rerum in Burundia  
Pax in Burundia paulatim progredi videtur magistratibus nuntiantibus maximum ibi gregem rebellem regimini cooperari velle.
Dux motus, cui nomen Defensores democratiae, ait seditiosis et administratoribus de pace consultantibus contigisse, ut impedimenta ad concordiam inveniendam iam omnino fere superarentur.
Duae aliae Hutuorum factiones, postquam diu contra gubernatores Burundiae rebellaverunt, vere proxime praeterito ad coalitionem Tutsorum et Hutuorum communem accesserunt.
Quartus autem armatorum globus, qui a re publica defecit, recusare perseverat, quominus rei publicae intersit.  

Andreotti culpa absolutus
Abhinc unum fere annum in hoc programmate rettulimus primum quondam ministrum Italiae Giulio Andreotti homicidii convictum et vinculis viginti quattuor annorum damnatum esse. Nunc autem supremum dicasterium Italiae causa iterum cognita pristinum iudicium revocavit et illum virum omni culpa absolvit. Andreotti accusatus erat, quod una cum mafiosis diurnarium Italianum nomine Mino Pecorelli interficiendum curavisset.  

Indonesia imribus vexatur
Indonesia vehementibus inundationibus vexata est, quibus plus ducenti homines vitam amiserunt et saltem centum viginti disparuerunt.
Inter mortuos etiam quattuor viatores Europaei esse dicuntur, quorum duo Germani et duo Austriaci.
Tutatores naturae causam calamitatis caesionibus silvarum in Sumatra illegalibus attribuendam esse censent: ex illis vastationibus enim secutum esse, ut imbres effusi terra absorberi nequirent et aquae cursu suo usitato decederent.  

De tempestatibus magneticis  
His diebus in spatio cosmico Telluri nostrae circumiecto tempestates magneticae summa vi saevierunt. Quibus perturbationibus radiatio coniuncta est, quae effecit, ut nonnulla instrumenta sensoria ad satellites applicata aut magnis detrimentis afficerentur aut omnino fungi desinerent.
Causa turbinum aetheriorum dicitur esse, quod nunc ipsum in photosphaera Solis ingentes maculae conspiciuntur, quarum magnitudo massam globi terrestris etiam decies superat. Rerum peritis persuasum est eruptiones magneticas in zonis his maculis circumiacentibus coortas esse.

Auswahl aus den "Nuntii Latini" vom 31.10.2003 (Radiophonia Finnica Generalis)

redegit Tuomo Pekkanen.

Hodorkovski in carcerem coniectus  
Mihail Hodorkovski, moderator societatis petroleariae Iukos, quae maxima est in Russia, in aeriportu Novosibirscano, quo aeroplanum eius privatum descenderat, comprehensus est. Inde Moscuam deportatus in carcerem coniectus est. Magistratus Russi iam diu in Hodorkovski inquirunt, in quem septem crimina intenta sunt.
Accusatur inter alia evasionis fiscalis, fraudis, falsificationis documentorum. Plerique commentatores politici censuerunt inquisitiones in societatem Iukos esse politicas, quia susceptae essent paulo post, quam Hodorkovski pollicitus esset se in comitiis Russiae parlamentariis, mense Decembri futuris, partes praesidenti Putin oppositas sustenturum esse. Hodorkovski, vir quadraginta annorum, cuius parentes erant operarii fabricae Moscuensis, hodie ditissimus Russorum habetur, nam possessiones eius paene septem miliardis euronum aestimantur.
Illo in carcerem coniecto negotiatores Russi timent, ne regimen de bonis publicis ad privatam administrationem translatis rursus inquirere incipiat. Nam Unione Sovietica dissoluta pretiosissimae possessiones rei publicae vili pretio venierunt, quo factum est, ut quidam emptores maximas sibi divitias pararent, cum plerique Russi in paupertate manerent. Praesidens Putin monuit omnes cives, cum scribas modestos, officiales regiminis, mercatores, tum etiam negotiatores, licet miliarda dollarorum possiderent, apud iudices pares esse debere.

De rebus Iraquiae 
Proximis diebus in Iraquia funestissimi ictus terroristici facti sunt, quibus quadraginta tres homines perierunt et plus ducenti vulnerati sunt. Explosiones eodem fere tempore fuerunt prope aedes Bagdatenses Ordinis a Cruce Rubra et apud quattuor stationes custodum publicorum. Acta diurna Iraquiana censent auctores scelerum esse terroristas peregrinos, qui Ramadan, sacrum mensem musulmanorum, explosionibus caedibusque incohare voluerint.

Praemium Mentoris redactioni Latinae datum 
Societas Suetiae Lundensis nomine ”Discipuli Mentoris” decrevit, ut ”praemium Mentoris”, antea tantum semel datum,  redactioni Nuntiorum Latinorum tribueretur. Illud praemium a praeside societatis Sverker Hällen in aedibus Argentariae Finniae Centralis sollemniter traditum est. Oratione Latina habita Hällen monuit sibi persuasum esse Latinam linguam in dies valentius vinculum populorum evasurum esse.

Auswahl aus den "Nuntii Latini" vom 24.10.2003 (Radiophonia Finnica Generalis)

redegit Tuomo Pekkanen.

NU saepimentum Israelianorum damnant
Sessio generalis Nationum Unitarum sententiam comprobavit, qua saepimentum ab Israelianis in ripa occidentali Iordanis fluminis exstructum damnatur: Israeliani opere desisterent et partem saepimenti iam factum rescinderent. Ex centum duodequinquaginta nationibus tantum quattuor, in his USA et Israel, sententiae obstiterunt.

Novum de stupefactivis scandalum
Novus steroides anabolicus, qui antea nullis probationibus revelari potuerat, in exemplis probativis aliquot athletarum Americanorum inventus est. Agitur de medicamento nomine tetrahydrogestrinon (THG), quod in laboratorio Californiana BALCO (Bay Area Laboratory Co-Operative) praeparatum esse dicitur. Victor Conte, moderator laboratorii, crimen commissum vehementer infitiatur. Inter clientes laboratorii sunt Tim Montgomery, Marion Jones, Kelli White aliique athletae celeberrimi. Plus quadraginta ex eis in iudicium foederale vocati sunt, ubi in illud laboratorium inquiritur. Propter scandalum, in genere suo maximum, Foederatio internationalis athleticae levis (IAAF) decrevit, ut exempla urinae inter certamina mundana Parisiis mense Augusto data, iterum examinarentur.

Ioannes Paulus II pontificatus annum XXV celebravit
Summus Pontifex Ioannes Paulus II, qui mense Octobri anno millesimo nongentesimo duodeoctogesimo creatus est, vicesimum quintum pontificatus annum celebravit. In homilia, quam compluribus denis milibus peregrinorum in Civitate Vaticana recitavit, monuit bonum pastorem apud gregem manere et ad catholicos appellavit, ut ipsius opus caritatis pergerent.

Mater Teresa beatificata
Mater Teresa, sanctimonialis, quae quinque annis ante (1997) diem obiit supremum, a Summo Pontifice die Dominico beatificata est. Nata in urbe Scopia hodiernae Macedoniae in Indiam anno millesimo nongentesimo duodetricesimo (1928) migraverat, ubi ordinem nomine “Sorores caritatis” condidit et totam vitam aegrotis, pauperibus, domo carentibus adiuvandis dedicavit. Anno millesimo nongentesimo undeoctogesimo (1979) praemio pacis Nobeliano honorata est. A matre Teresa, anno post mortem, femina quaedam Indica cancro laborans, quae illam advocaverit, sanata esse dicitur. In ecclesia catholica nemo beatus fieri potest, nisi testimoniis probatur unum saltem miraculum ab eo factum esse.

Mons Albus minus altus
Mons Albus, cacumen Europae altissimum, biennio duobus metris humilior factus est. Mense Septembri anno bismillesimo primo altitudo eius erat quattuor milia octingenta decem metra, sed eodem mense huius anni summum cacumen ad quattuor milia octingenta octo metra descenderat, ut affirmavit grex undeviginti investigatorum Francorum, quibus praefuit Pierre Bibollet. Mutationem effectam esse partim ventis, qui nives ex cacumine montis everrissent, partim calore his annis aucto, quo nives solito celerius condensarentur. Iidem investigatores mensurationibus per satellitem factis reppererunt summum Montis Albi cacumen septingentis centimetris in septentriones et occasum solis motum esse.

Auswahl aus den "Nuntii Latini" vom 17.10.2003 (Radiophonia Finnica Generalis)

redegit Reijo Pitkäranta.

De volatu cosmico Sinensium
Sinenses hac septimana primum volatum cosmicum confecerunt, cum astronauta sive taiconauta eorum nomine Yang Liwei capsula spatiali invectus Tellurem quater decies circumvolavit. Navigium eius, cum per unam et viginti horas in orbita siderali fuisset, feliciter in planitiem in Mongolia interiore patentem descendit. His rebus gestis Sinae tertia civitas facta est, cui contigit, ut hominem in vacuum spatium emitteret.

Graves tumultus in Bolivia
Iam tres septimanae sunt, cum Pacipoli, in urbe capite Boliviae, graves tumultus commoventur, quibus complura dena hominum vitam amiserunt et paene centum vulnerati sunt. Conflictus initium ceperunt, postquam cognitum est praesidentem de Lozada una cum operibus mercatoriis internationalibus id agere, ut ex Bolivia gasum terrestre in Civitates Americae Unitas duceretur. Tali consilio non solum studentes et homines pauperes, sed etiam societates opificum vehementissime reclamitant flagitantes praesidentem a magistratu amovendum esse.

Ebadi Nobelista pacis huius anni
Collegium Nobelianum Norvegiae decrevit praemium pacis hoc anno iuris consultae Iranianae Shirin Ebadi tribuendum esse. Haec iudex femina quinquaginta sex annorum ex ea re maximam laudem adepta est, quod democratiam et iura feminarum parvulorumque iam per multa decennia indefesse defendit. Revolutione islamica in Irania anno millesimo nongentesimo undeoctogesimo (1979) exorta Ebadi munus deponere coacta est, quo facto in universitatem Teheranensem transiit, ut ibi studentes iuris prudentiam doceret. Praeterea complures libros de iuribus humanis conscripsit.

Saddam e tesseris aufertur
In Iraquia veteres chartae nummariae cum novis commutari coeptae sunt. Hac renovatione e denariis Iraquianis imago praesidentis amoti Saddam Hussein aufertur et in locum eius facies duorum alterorum virorum magnae auctoritatis substituuntur. Unus eorum est Hammurabi, rex priscae Babyloniae, qui saeculo a.Chr.n. duodevicesimo rerum potitus Mesopotamenis leges imposuit hasque in monumento lapideo incidi iussit. Alter est Abu Ali al-Hasan, celeberrimus astronomus et mathematicus saeculo p.Chr. n. decimo natus.

Consumptio piscium in incremento
Esus piscium annis proxime futuris in orbe terrarum celeriter auctum iri existimatur. Creditur enim hoc incrementum maximum fore in Sinis et aliis civitatibus, quae opibus et copiis valere coeperunt. Quomodo autem pisces consumptoribus frequentia crescentibus suffecturi sint, in piscicultura efficaciter exercenda consistere videtur. Constat enim copiam piscium in maribus mundi his viginti annis valde deminutam esse.

Auswahl aus den "Nuntii Latini" vom 10.10.2003 (Radiophonia Finnica Generalis)

redegit Reijo Pitkäranta.

Discrimen inter Israelem et Syriam
Moderatores Syriae una cum Foedere Arabico Consilium securitatis Nationum Unitarum hortati sunt, ut ictum bombicum ab Israelianis contra Syriam septimana vergente factum comdemnaret. Agitur de impetu aerio, quem Israeliani in castra apud urbem Damascum collocata dederunt arbitrati greges Palaestinensium nomini Israeliano omnium infestissimos eo ipso loco armis exerceri. Kofi Annan, secretarius generalis Nationum Unitarum, partes conflictus monuit, ne leges internationales violarent neve vim inter se adhiberent.

Investigatores Bagdatum venerunt
Viri delecti, quibus praeest Martti Ahtisaari, pristinus praesidens Finniae, in urbem Bagdatum advenerunt inquisituri, qualis esset in Iraquia status securitatis post cladem funestam praetorio Nationum Unitarum mense Augusto illatam. Constat eo attentato viginti duos homines vitam amisisse. Quamdiu autem hi delegati in Iraquia versaturi et quae loca ibi obituri sint, publice non aperitur, cum metuendum sit, ne salus eorum in periculum et discrimen vocetur. Nec frustra, nam die Iovis (9.10.) nuntiatum est Bagdati denuo explosionem perniciosissimam accidisse.

Praemium Nobelianum medicinae
Praemium Nobelianum medicinae hoc anno inter Americanum Paul Lauterbur et Britannum Peter Mansfield dividitur, ut ex Instituto Carolino Stockholmiensi nuntiatum est. Ambo viri docti, utpote qui antesignani quidam in descriptione magnetographica evolvenda essent, ad artem diagnosticam provehendam multum contulerunt. Novis rationibus inventis effecerunt, ut aegroti, dum a medicis inspiciuntur, multo levioribus doloribus afficerentur quam ante.

Index corruptibilitatis editus
Ordo internationalis, cui nomen Transparency International, novum indicem edidit, quo monstratur, qui sit corruptibilitatis gradus in quaque civitate. Centum triginta tribus nationibus inter se comparatis inventum est Finniam terram minime corruptam esse. Secundas tulit Islandia, cum Dania et Nova Zelandia tertio loco ex aequo ponerentur. Civitatem autem largitionibus maxime inquinatam se praebuit Bangladesa.

Auswahl aus den "Nuntii Latini" vom 4.7.2003 (Radiophonia Finnica Generalis)

redegit Reijo Pitkäranta.

IGNISTITIUM IN PROXIMO ORIENTE
Ordines Palaestinensium, quibus nomina Hamas et Jihad islamicus, Israelianis ignistitium trium mensium dederunt, polliciti se omnibus ictibus contra eos faciendis illo tempore abstinere, dummodo ne ipsi ab hostibus proelio lacesserentur. Quo audito Fatah sive grex bellatorum praesidenti Jasser Arafat fidorum nuntiavit omnes res militares contra Israelem in dimidium annum interruptum iri. Israeliani autem haec promissa nihili pendunt contendentes armistititum de nulla alia causa factum esse, quam ut Palaestinenses tempus suas vires colligendi haberent.

Auswahl aus den "Nuntii Latini" vom 27.6.2003 (Radiophonia Finnica Generalis)

redegit Reijo Pitkäranta.

NOVUM REGIMEN IN FINNIA
Die Martis (24.6.) res publica Finnia novum regimen accepit, cum Matti Vanhanen, minister defensionis et vice praeses factionis centralis, a praesidente Tarja Halonen novus princeps minister nominatus est. Paucis minutis ante pristinum consilium rei publicae administrandae, cui praeerat Anneli Jäätteenmäki, munus deponere coactum erat, cum prima ministra propter fidem amissam ceteris molestiae esse coepisset. Constitutio novae coalitionis a vetere eo tantum differt, quod Seppo Kääriäinen, vir rerum civilium peritissimus, e vice praesidatu parlamenti in ministerium defensionis translatus est.

DE NOVO SYNGRAPHI GENERE
Anno proxime futuro syngraphi civium Unionis Europaeae signo identitatis biometrico instruentur. Ratio renovationis talis est, ut novis syngraphis frustulum annectatur, in quo non solum imago viatoris, sed etiam impressio eius digitalis reposita sit. Moderatores Unionis Europaeae hunc usum hortatu Civitatum Americae Unitarum approbare decreverunt. Americani enim sibi meliorem facultatem identitatis peregrinorum agnoscendae postulaverunt, ut terroristas finibus suis efficacius prohiberent.

PEKINUM MORBO SARS LIBERUM
Ordo sanitatis mundi (WHO) die Martis urbem Pekinum epidemia SARS liberam esse pronuntiavit eamque ex indice locorum aditu periculosorum amovit. Haud mirum est talem nuntium Pekini magno gaudio exceptum esse, si cogites, quantopere numerus itinerantium Sinas obeuntium hoc anno propter illum morbum deminutus sit. Iam speratur fore, ut deversoria urbis semivacua paulatim hospitibus repleantur.

DE SALARIO MILITUM IRAQUIAE
Moderatores Americani militibus Iraquianis stipendium solvere constituerunt, ut detrimentum oeconomicum, quod illi ex exercitu Iraquiae dimisso cepissent, hoc salario sarciretur. Pars militum mercedem menstruam accipiet, plerisque autem compensatio semel tribuetur. Haec praemia Iraquianis ea condicione sunt proposita, ut omni violentia abstinerent et rebus factionis Baath studere desinerent. Huc etiam pertinet, quod Americani in Iraquia novum exercitum duodecim milium militum comparaturi sunt.

MARE MORTUUM IN DIES ARESCIT
Iordani, Israeliani et Palaestinenses Argentariam mundanam et alia instituta nummaria appellaverunt, ut opem pecuniariam Lacui Asphaltitae sive Mari Mortuo servando ferrent. Dicitur enim illud mare in statu arescendi esse, ea scilicet causa, quod aqua fluminis Iordanis in id influentis magis atque magis ad agros irrigandos adhibeatur. His tribus annis superficiem maris tribus metris descendisse, quam ob rem metuendum esset, ne Mare Mortuum intra quinquaginta annos omnino in desertum mutaretur.
.

Auswahl aus den "Nuntii Latini" vom 20.6.2003 (Radiophonia Finnica Generalis)

redegit Tuomo Pekkanen.

IRANIANI RENOVATIONES FLAGITANT
Teherani, in capite Iraniae, multa milia hominum contra regimen reclamitantia democratiam flagitaverunt et administratores clericales vituperaverunt. Imprimis studentes Universitatis Teheranensis, condiciones patriae politicas aegre ferentes, postulaverunt, ut ajatollah Ali Khamenei a munere discederet vel amoveretur. Reclamationes, quae etiam in aliis urbibus exstiterunt, in tumultus mutatae sunt, cum vigiles voluntarii, regimen defendentes, reclamatores vehementer aggressi male mulcare coepissent. Moderatores clericales Americanos accusaverunt, quod tumultuantes sustinuendo rebus Iraniae interioribus intervenissent et ita bellum psychologicum contra Iraniam intulissent. Washingtonienses credunt regimen Iraniae consuetudines cum ordinibus terroristicis habere. Praeterea timent, ne Iraniani in inceptis arma nuclearia parandi longius processerint quam creditum sit. Dubitant autem oppositionem Iraniae politicam aperte adiuvare, nam multis Iranianis USA est “magnus Satanas”, cuius auxilium oppositioni damnosius quam utilius esse possit.

FERRIVIA INTER COREAS IUNCTA
Coreani septentrionales et australes orbitam ferriviariam inter patrias suas iunctam celebraverunt. Caerimonia fuit tantum symbolica, nam opus nondum est perfectum. Tramina trans limitem non ante quam anno exeunte transire poterunt. Ferrivia Seulum, caput Coreae Australis, cum urbe Sinuiju Coreae Septentrionalis coniungit. Consilium ferriviam inter utramque Coream aperiendi fuit signum conspicuum relaxationis inter utrosque Coreanos politicae. Utrique exspectant novam ferriviam non tantum commeatui sed etiam commercio profuturam esse. Sed rixa de armis nuclearibus, quae Coreani septentrionales sibi parare volunt, hilaritatem diei festi temperavit.

EXAMINA LOCUSTARUM MESSEM DEVORANT
Maiora examina locustarum quam proximis sexaginta annis in occidentalibus partibus Americae septentrionalis apparuerunt. In civitatibus Nevada, Utah, Idaho locustae messes deleverunt et commeatui vehiculari impedimento fuerunt. Nam magna locustarum examina, quae rotis vehiculorum comprimuntur, vias publicas lubricissimas et ita vehentibus periculosas faciunt.

Auswahl aus den "Nuntii Latini" vom 13.6.2003 (Radiophonia Finnica Generalis)

redegit Tuomo Pekkanen.

CONVENTUS AQUIANI ACTUS
Post colloquium Petropolitanum Bush et Putin Aquianum, in urbem Francogalliae, volaverunt, ubi duces octo civitatum quaestuosa industria potentium conventum egerunt. Participes, cum ex coetu discederent, nuntiaverunt sibi de incremento oeconomiae mundanae persuasum esse. Quod ad rem Iraquicam pertineret, se id acturos esse, ut Iraquia civitas stabilis et democratica fieret, quae nonnisi suis propriis iuribus uteretur.

QUID GEORGE BUSH DIXERIT
Praesidens George Bush, e conventu Aquianensi recens, in Iordaniam se contulit, ut de consilio pacis in Oriente Proximo restituendae cum Israelianis et Palaestinensibus deliberaret. Affirmavit Americanos coeptis de civitate Palaestinensium condenda toto capite annuere, sed monuit etiam fidem, quam Israelianis de civitate Iudaeorum defendenda dedissent, servandam esse.

ELISABET 50 ANNOS REGNAVIT
Postridie Kalendas Iunias (2.6.) quinquaginta anni acti erant, cum regina Britanniae Elisabet II regnum adepta est. Ad memoriam huius rei colendam regina die Lunae una cum filio Carolo et nepote Guillelmo officio divino in ecclesia Vestmonasteriensi celebrato interfuit. Eisdem sacris adfuit dominus illustrissimus Edmund Hillary, qui illo ipso coronationis die ad culmen Montis Everestii primus omnium ascenderat.

DE PERCONTATRO MARTIALI
Ordo Europaeus spatio cosmico investigando (ESA) suam expeditionem in aliam planetam incohavit, cum proprium percontatrum spatiale ex Cazastania ad stellam Martem versus emisit. Propositum est, ut hoc navigium iter suum quadringentarum fere milionum chiliometrorum iam ante finem huius anni emetiretur. Ei applicatum est instrumentum sensorium, quod solum planetae perscrutaretur ad cognoscendum, utrum ibi aqua aut alia vitae signa invenirentur necne.

Auswahl aus den "Nuntii Latini" vom 30.5.2003 (Radiophonia Finnica Generalis)

redegit Reijo Pitkäranta.

ITINERARIUM PACIS APPROBATUM
Consilium pacis, itinerarium nuncupatum, quod eo spectat, ut in Oriente Proximo civitas Palaestinensium sui iuris condatur, a regimine Israelis approbatum est. Duodecim ministri huic proposito faverunt, cum septem eidem refragarentur, quattuor a sententia ferenda se abstinentibus. Ipse Ariel Sharon, princeps minister Israelis, quamvis diu in ambiguo fuisset, ad extremum tamen album calculum illi rationi adiecit. Mahmud Abbas, primus minister Palaestinensium, negavit fieri posse, ut ullae condiciones, quas Israeliani postea posuissent, acciperentur.

DE POLITICA UNIONIS EUROPAEAE
Conventus Unionis Europaeae a rebus futuris a postulatione sua recessit, ex qua maior nationum sociarum pars decernere posset, qualem politicam externam Unio exerceret. Praesertim Britanni et Francogalli flagitaverunt, ut illa politica nonnisi omnium consensu ageretur. Idem conventus in pacto Unionis Europaeae fundamentali apparando occupatus est, de quo civitates Unionis postea inter se consilia communicabunt.

TERRAE MOTUS DAMNA EFFECERUNT
His diebus variae orbis terrarum partes vehementibus terrae motibus afflictae sunt. Primum quidem regiones Algeriae septentrionales tantopere concussae sunt, ut circiter duo milia hominum vitam amitterent et decem milia gravibus vulneribus afficerentur. Paucis diebus post motus sismici etiam Iaponiae magna detrimenta attulerunt.

NIINILUOTO RECTOR MAGNIFICUS
Novus rector magnificus Universitatis Helsinkiensis designatus est Ilkka Niiniluoto, professor philosophiae theoreticae quinquaginta septem annos natus. Illud munus explendum erat, cum pristinus academiarcha Kari Raivio cancellarius eiusdem universitatis creatus esset. Niiniluoto rectoratum quinquennii Kalendis Augustis sibi curandum suscipiet.

RARA AVIS ILMOLAE CONSPECTA
Ilmolae, in paroecia Ostrobothniae australis Finniae, die Dominico observatio ornithologica rarissima facta est. Hannu Sillanpää, ornithophilus Seinäjokiensis, dum aves in agris Alajokiensibus commorantes contemplatur, subito insolitam volucrem longipedem cano capite praeditam aspexit. Paulo post apparuit eam esse Charadrium veredum sive avem in desertis Mongoliae et Sinarum nidificantem, quae numquam ante in Europa conspecta esset.

JUHA AHOKAS VICTORIAM ADEPTUS
Septimana vergente in urbe Belgrado certatum est, quis in quaque luctatorum serie athleta in Europa omnium fortissimus iudicaretur. Quod ad classem centum viginti chiliogrammatum pertinet, ceteris praestantior inventus est Juha Ahokas natione Finnus. Iam in eo erat, ut adversarius eius e certamine superior discederet, cum Ahokas eum medium complexus ex improviso ad terram dedit itaque cum magno Finnorum gaudio victoriam reportavit.

Auswahl aus den "Nuntii Latini" vom 23.5.2003 (Radiophonia Finnica Generalis)

redegit Tuomo Pekkanen.

TRACTATUS ANTITABACARIUS
Ordo mundi sanitarius (WHO) primum omnium temporum tractatum antitabacarium comprobavit, de quo per quattuor annos disputatum erat. Delegati centum nonaginta duarum nationum Genavae de conventione consenserunt, qua commercium tabaci et mos fumificandi coercerentur. E.g. praeconia mercium tabacariarum esse circumscribenda et capsulas tabaci textibus et picturis monitoriis ornandas. Nationes, quae tractatui subscripserunt, programmatis antitabacariis maiores quam ante pecunias tribuere debent atque vectigalibus tabaco impositis et pretio eius moderando contendere, ut fumificationem restringant. Ordo mundi sanitarius censet quinas miliones hominum, quorum maior pars in terris egentioribus vivant, quotannis tabaco perire.

PAPA NOVOS SANCTOS CANONIZAVIT
Die Dominico (18.5.) Summus Pontifex Ioannes Paulus II quattuor novos sanctos canonizavit, inter quos monacham Polonicam, quae in Finnia vixerat. Illa est  mater Ursula Ledochowska, ex familia nobili oriunda, quae ab anno millesimo nongentesimo undecimo in communi Finnico Terijoki triennium habitavit. Ibi institutum catholicum condidit, linguam Finnicam didicit, orationes et cantiones catholicas et partem Catechismi Finnice vertit. Finnia, quae post primum bellum mundanum sui iuris facta est, erat illo tempore pars imperii Russiae.

Finnia relicta Ursula per Suetiam et Daniam in patriam revertit, ubi ordinem Ursulinarum canarum condidit. Ille ordo imprimis pueris et iuvenibus educandis atque hominibus afflictis adiuvandis operam navat. Anno millesimo nongentesimo undequadragesimo mater Ursula Romae diem obiit supremum et brevi postea sanctam venerationem apud catholicos habere coepit. Abhinc viginti annos mense Iunio a Summo Pontifice in numerum beatorum relata est.

AMNESTIA INTERNATIONALIS ACCUSAT
Amnestia Internationalis, ordo iuribus humanis defendendis, terras industriales accusavit, quod regiminibus, quae iura humana violarent, arma bellica ministrarent. Arma ab illis vendita esse e.g. in Israelem, Columbiam, Afganistaniam, Senegaliam. Gregem octo nationum industrialium maximam in orbe terrarum copiam armorum exportare. Ex relatione ab Amnestia divulgata USA, Russia, Francia, Britannia, Germania, Canada, Italia, Iaponia  tractatus internationales violant, cum arma illis venditant, a quibus ad crudelitatem exercendam adhiberi possint. Idem ordo flagitavit, ut Consilium Securitatis nomina societatum mercatoriarum divulgaret, quae arma biologica et chemica in Iraquiam exportavissent.

DE TEMPESTATE
In civitate Indiae, cui nomen Andhra Pradesa, minime quinquaginta homines calore perierunt, cum temperatura aëris prope quinquaginta gradus Celsianos ascendisset. In Finnia autem ver est amoenissimum, aves migratoriae reverterunt et lux solis etiam in regionibus meridionalibus per duodeviginti horas durat.

Auswahl aus den "Nuntii Latini" vom 16.5.2003 (Radiophonia Finnica Generalis)

redegit Tuomo Pekkanen.

SARS VAGARI PERGIT
Morbus SARS sive severum acutum respiratorium syndroma, quae etiam pneumonia atypica appellatur, non tantum in Asia et America septentrionali grassatur, sed etiam in quibusdam terris Europae vagari coepit. In Finnia primus morbi casus verisimilis in iuvene repertus est, qui paucos dies in urbe Toronto fuerat. SARS rei periegeticae damna in illis quoque terris attulit, in quibus rariores contagiones exstiterunt. Nam viatores Indiam, Indonesiam, Malesiam, Philippinas Thailandiamque eodem modo vitaverunt quam Sinas, Hongcongum et Singapuram, quae morbo maxime afflictantur. SARS peregrinos magis sollicitare videtur quam ictus terroristicus anno proximo in insula Balio factus. Cum homines terras, ubi SARS vagatur, petere non audeant, societates aëriae graviora damna quam inter bellum Iraquicum capiunt. Apud Sinenses morbo affectorum numerus iam quinque milia superat; in toto orbe terrarum aegrotantes sunt plus septem milia, ex quibus mortui circiter sescenti. Hi numeri, admodum approximativi, in dies singulos crescunt. Postquam primus morbi casus mense Februario apud Sinenses apparuit, contagio paulatim per orbem vagata est neque adhuc retineri potuit. Letalitas morbo affectorum ab initio contagionis ad octo fere centesimas aucta est et adhuc augeri posse aestimatur.

QUSAI  HUSSEIN MILIARDUM RAPUIT
Uno die ante, quam primae bombae in Bagdatum ceciderant, Qusai, filius praesidentis Saddam Hussein, ingentem summam pecuniae ex argentaria centrali Iraquiae arripuit. Aliquot magistratibus comitantibus in illam argentariam  venit et officialibus mandatum praesidentis ostendit, ex quo miliardum dollarorum sibi numeraretur. Neque officiales facere potuerunt, quin illi parerent. Filio igitur praesidentis nongentas miliones dollarorum, quae ex chartulis nummariis centum dollarorum constabant, et centum miliones euronum tradiderunt. Chartularum copia tanta fuit, ut grex virorum, per duas horas laborans, illis tres autocarros oneraret. Nuper magistratus Americani nuntiaverunt maiorem partem praedae forsitan iam mense Aprili a militibus Americanis repertam esse. Nihilo minus rapina a Qusai facta inter maxima omnium latrocinia numeranda est. Si chartulae nummariae ab eo arreptae alia super aliam struerentur, turris pecuniaria uno chiliometro altior ex illis fieret.

PETROBURGUM, URBS CCC ANNORUM
Petroburgum, megalopolis Russiae, anniversarium trecentesimum agit. Nam mense Maio, anno millesimo septingentesimo tertio, Petrus Magnus, imperator Russorum, decrevit, ut in faucibus Nevae fluminis castrum Petri et Pauli muniretur. Sollemnitates, quibus origo urbis celebratur, iam incohatae per totam aestatem continuabuntur.

Auswahl aus den "Nuntii Latini" vom 9.5.2003 (Radiophonia Finnica Generalis)

redegit Reijo Pitkäranta.

CONSILIUM IRAQUIAE RESTITUENDAE
In Iraquiam legiones multinationales mittentur, quibus custodientibus illa civitas paulatim pacetur. Prout certis auctoribus compertum est, hae copiae e militibus decem nationum constabunt eisque Civitates Americae Unitae, Britannia et Polonia praeerunt. Neque Francogalli neque Germani, bello Iraquico adversarii, ad actionem Iraquiae restituendae adhibebuntur. Adde, quod tota Iraquia in tria territoria dividetur, quorum fines nondum terminis sunt circumscripti. Earum regionum una Americanis custodienda dabitur, cum Britanni et Poloni reliquas duas sectiones sibi administrandas suscipiant. Civitates illius consilii participes ab Ordine Nationum Unitarum quaesiturae non sunt, utrum sibi illo modo agere liceat necne.

INDIA ET PAKISTANIA CONCORDIORES
Moderatores Indiae et Pakistaniae legationum suarum commercia in pristinum statum restituere decreverunt. De ea re nuperrime nuntiavit primus minister Indiae Atal Behari Vajpayee, postquam cum collega suo Pakistaniano telephonice collocutus est. Constat relationes inter utramque civitatem intercedentes iam per multa decennia pessimas fuisse propter discordiam de dominatione Casmiriae ortam. Huc accessit ictus terroristicus abhinc duos annos in parlamentum Indiae factus. Indi, quippe qui hanc aggressionem Pakistanianis crimini darent, nulla mora interposita legatum suum ex urbe Islamabada domum revocaverunt. Anno praeterito res eo deducta est, ut non multum abesse videretur, quin discrimen in apertum bellum erumperet.

PAPA ITER IN HISPANIAM SUSCEPIT
Pontifex Maximus Ioannes Paulus II itinere in Hispaniam suscepto die Dominico in media urbe Matrito missam sollemnem subdivalem egit. Ad eum audiendum circiter decies centena milia hominum convenerant. Papa, dum contionem facit, Hispanos hortatus est, ut leges Christianas fideliter servarent. "Hac sola ratione", inquit, "culturam vestram tot bonis abundantem Europae et toti orbi hereditate tradere poteritis." Caerimonia summum fastigium cepit, cum quinque Hispani, qui saeculo undevicesimo nati erant, auctoritate papae canonizati sive in numerum sanctorum relati sunt.

NAVIGIUM SPATIALE ABERRAVIT
Navigium spatiale, quo duo astronautae Americani et unus cosmonauta Russus e statione siderali internationali domum revolabant, abhinc aliquot dies in campum gramineum Cazastaniae descendit. Tunc primum evenit, ut astronautae Americani navi siderali Russicae insidentes ex spatio cosmico in Tellurem redirent. Illud vehiculum tamen, cum in atmosphaeram terrae pervenisset, e causa ignota tantopere a cursu destinato aberravit, ut quadringentis fere chiliometris remotius, quam constitutum erat, terram attingeret.

Auswahl aus den "Nuntii Latini" vom 2.5.2003 (Radiophonia Finnica Generalis)

redegit Tuomo Pekkanen

DIES FESTUS VALBURGAE
Kalendae Maiae, dies festus imprimis operariorum et studentium, proximis quattuordecim annis naturam suam politicam in Finnia paene amiserunt. Communismo ad ruinas redacto fervor politicus, Kalendarum Maiarum antea proprius, propemodum disparuit et ille dies est ante omnia sollemne vernale, quo homines vino, amoribus cantibusque hilaribus adventum veris celebrant.

Hoc anno hilaritatem Finnorum  compescuit tempestas admodum pluviosa et frigidula, passim etiam nivosa, quo factum est, ut homines potius domi manerent quam foris comissantes festum agerent. Comissatione ita deminuta custodes publici vigiliam et diem Valburgae tranquilliorem quam assolet habuerunt.

AQUA FINNICA IN MUNDO PURISSIMA
Nationes Unitae rettulerunt aquam Finnicam esse in toto terrarum orbe purissimam. In relatione recens divulgata qualitas et quantitas aquae in centum viginti duabus terris comparatae sunt. Pessimae sunt condiciones apud Belgas, quorum aquae magis quam aliis in terris colluvionibus agriculturae inquinantur. Complures ex terris pauperibus habent maximas copias aquarum; minimum aquae est in civitatibus petroleo divitibus Proximi orientis. In relatione praemonetur aquam pro singulis orbis terrarum hominibus paratam et expeditam proximis decenniis celeriter deminutum iri; anno bismillesimo quinquagesimo (2050) septem miliarda hominum in sexaginta terris inopia aquae iri laboratum.

Condicio aquarum dependet ex incremento populationis et modo, quo inquinatio deminuitur. Necesse igitur est maiorem operam circumiectis tuendis navare et usum aquae potabilis in irrigatione circumscribere. Propositum est Nationum Unitarum, ut numerus hominum, penuria aquae laborantium, ante annum bismillesimum quintum decimum (2015) dimidio minor reddatur.

EXPOSITIO SCRIPTURAE GRAECAE
Museum Epigraphicum Atheniense et Directorium Monumentorum Byzantinorum et post-Byzantinorum Ministerii Culturae Graeciae expositionem Graecae scripturae paraverunt, quae in urbe Tampere Finniae meridionalis per quinque septimanas aperta est. Illa expositio collecta est in honorem praesidii Unionis Europaeae, quod hoc tempore penes Graeciam est. Expositione, cui nomen est “ab alpha usque ad omega” origo et evolutio scripturae Europaeae a primis initiis usque ad tempora hodierna illuminantur. In promptu sunt  documenta publica et privata, profana et Christiana, carmina sepulcralia. Catalogus multicolor continet photographemata et commentarios rerum et textuum expositorum.

Primum in expositione locum tenet discus ex argilla factus, notis hieroglyphicis in spiram circumductis utrimque ornatus. Ille in urbe Phaesto repertus est et exeunte saeculo duodevicesimo a.Chr.n factus esse aestimatur. Illam scripturam nemo adhuc interpretari potuit. Ut facile intellegas, cum de rebus unicis agatur, documenta expositionis sunt facsimilia.

Auswahl aus den "Nuntii Latini" vom 25.4.2003 (Radiophonia Finnica Generalis)

redegit Reijo Pitkäranta.

JAY GARNER INTERREX IRAQUAE
Rei publicae Iraquiae interim constituendae praefectus est Jay Garner, dux generalis Americanus rude donatus. Ille vir die Lunae Bagdatum venit, ut rerum ibi condicionem melius cognosceret. Diurnariis quaerentibus, quantum temporis duraturum esset, donec Iraquia suis propriis civibus regenda traderetur, respondit se eam rem aestimare nolle. "Tamdiu", inquit, "hic manebimus, quamdiu nobis opus erit." Idem nuntiavit se rerum promotorem et non regnatorem esse. Iam multi musulmanorum ordines et etiam Curdi recusaverunt, quominus Americanos dominos suos agnoscerent.

COLLOQUIA DE ARMIS NUCLEARIBUS
Die Mercurii politici Americani cum legatis Coreae Septentrionalis de programmate armorum nuclearium vehementer disceptato consultare coeperunt. Colloquia auspiciis Sinensium in urbe Pekino aguntur et eis intersunt James Kelly, minister adiunctus a rebus exteris Americanorum, et Li Gun, orator a Coreanis missus. Consultationes eo spectant, ut rationes inter utramque civitatem intercedentes post inimicitias sex mensium paulatim meliores reddantur. Neque multum afuit, quin etiam hic conventus revocaretur Coreanis nuntiantibus se arma nuclearia sibi iam comparare coepisse.

INVESTIGATIO MALARIAE PROGREDITUR
Investigatores Universitatis Edimburgensis magnos progressus in remedio malariae praeparando fecerunt. Nuperrime enim patefecerunt se cognovisse, qua ratione parasitus malariae novis medendi curis ita se accommodaret, ut eas omnino ad irritum redigeret: proferre enim illum parasitum proteinum quoddam, cuius ope vitam servaret. Quae cum ita sint, medici ad nova vaccina excogitanda constitutione illius proteini auxilio uti poterunt.

Auswahl aus den "Nuntii Latini" vom 18.4.2003 (Radiophonia Finnica Generalis)

redegit Tuomo Pekkanen.

RUSSI DE SPECULATIONE ACCUSANTUR
Acta Britannica, quibus titulus est Sunday Telegraph, rettulerunt documenta quaedam Bagdati reperta esse, ex quibus appareret Russos cum Iraquia ante bellum collaboravisse. Russiam ministrum Britanniae primarium Tony Blair aliosque moderatores occidentales speculatam esse et Iraquianos de rebus cognitis certiores fecisse. Ita Saddamum Hussein e.g. comperisse Britanniam mense Februario nondum ad bellum paratam fuisse. Eisdem documentis patefieri etiam de visis syngraphis in usum speculatorum acquirendis inter Russiam et Iraquiam convenisse. Regimen Britanniae de hac speculatione sententiam non dixit, quia illa documenta, quibus Sunday Telegraph niteretur, nondum accepisset.

BUSH SYRIAM MONUIT
Praesidens George W. Bush Syriam iam iterum monuit, ne pristinos moderatores Iraquianorum adiuvaret: cum Americanis collaboraret neve administris aut militibus Iraquianis, si illuc perfugissent, asylum daret. Administratores Syriaci Americanorum de Iraquianis adiuvandis criminationes reppulerunt affirmantes illas fundamento omnino carere.

ORDO BAGDATI RESTITUITUR
Corruente Saddami Hussein regimine, cum pristini custodes publici dispersi essent et milites foederatorum adhuc proeliis detinerentur, condiciones in urbibus Iraquiae erant turbulentae. Praecipue Bagdati, ubi quinque miliones hominum habitant, aqua et electricitate telephonisque deficientibus atque furibus et praedatoribus grassantibus vita civium erat gravissima. Nunc autem Americani cum Iraquianis de custodibus convocandis et de electricitate distribuenda consilia ceperunt. Multi voluntarii Iraquiani nomen suum dederunt, ut Americanos ad ordinem restituendum adiuvarent et corpora bello caducorum de viis congererent. Bagdatenses ipsi fures arripuerunt eosque coegerunt, ut praedam redderent aut in meschitis deponerent.

MUSEUM ARCHAEOLOGICUM VASTATA
Antequam bellum in Iraquia ortum erat, archaeologi appellaverunt, ne monumentis Iraquiae antiquis damna afferrentur. Neque thesauris archaeologicis inter ipsa proelia quicquam gravius accidisse videtur. At bello confecto latrones in Museum archaeologicum Bagdatense penetraverunt et ibi duos dies saevientes res pretiosissimas deleverunt aut furto abstulerunt. Circiter octoginta centesimae ex thesauris archaeologicis ibi servatis ita perierunt. Archaeologi in variis orbis terrarum partibus censent illo latrocinio hereditatem totius humanitatis terribiliter violatam et vitiatam esse. In museo Bagdatensi deposita erat collectio historiae Mesopotamiae, cuius vetustissima monumenta sunt septem milium annorum. De monumentis et artificiis in bello tuendis anno millesimo nongentesimo quinquagesimo quarto (1954) in urbe Haga inter nationes convenit. Nunc autem cooperatione internationali opus est, ut pars saltem thesaurorum recipiatur, cum res pretiosae et documenta ex Museo Bagdatensi ablata in mercatu artis occidentali venditari incipiant.

Auswahl aus den "Nuntii Latini" vom 11.4.2003 (Radiophonia Finnica Generalis)

redegit Tuomo Pekkanen.

POTESTAS SADDAMI CORRUIT
Bello Iraquico plus tres hebdomadas gesto finis certaminum iam prope adesse videtur. Singula proelia in quibusdam regionibus passim adhuc committuntur sed legiones cohortesque Iraquianorum sunt dispersae. Septimana vergente Britanni in urbem Bassoram, quam diu oppugnaverant, paucissimis Iraquianorum resistentibus ingressi sunt. Eodem fere tempore Americani carribus cataphractis in mediam urbem Bagdatum invecti palatium principale praesidentis Saddam Hussein cum regione adiacente occupaverunt. Nemini iam dubium est, quin confoederatio adversariis profligatis, urbibus principalibus occupatis atque regimine dictatoris ex potestate expulso victoriam reportatura sit.

Die a bello suscepto vicesimo primo milites Americani in partes Bagdati orientales invehentes a musulmanis shiitis, qui in illis regionibus habitant, iubilatione floribusque salutati sunt. Statuae imaginesque Saddami Hussein a civibus deiciebantur et aedificia publica, ex quibus pristini administratores effugerant, diripiebantur.

“LUSUS EST FINITUS”
Cum nuntius de rebus Bagdati gestis per televisionem in omnem terrarum orbem perlatus esset, Muhammed al-Douri, delegatus Iraquiae, diurnariis redactoribusque in sede Neo-Eboracensi Nationum Unitarum dixit lusum esse finitum. His verbis dictis primus administratorum Iraquianorum exercitus Saddami bello devictos esse concessit.

DISCRIMEN SANITARIUM IMMINET
Ordines humanitarii Nationum Unitarum de discrimine sanitario monent, quod Bagdato et quinque milionibus civium  ibi habitantium imminet. Bombardationes urbi magna detrimenta attulerunt, distributio aquae et electricitatis passim interrupta est, magnus numerus civium occisi aut vulnerati sunt. Valetudinaria, sauciis referta, penuria medicamentorum laborant.

QUID POST BELLUM FUTURUM SIT
Incertum adhuc est, ubi sit Saddam Hussein, quot fuerint victimae et quanta damna materialia, quales bello composito futurae sint in Iraquia condiciones politicae. Post colloquia Belfasti habita George W. Bush et Tony Blair nuntiaverunt Nationes Unitas in Iraquia post bellum restituenda partem vitalem habituras esse.

Auswahl aus den "Nuntii Latini" vom 4.4.2003 (Radiophonia Finnica Generalis)

redegit Reijo Pitkäranta.

DE CONDICIONE BELLI IRAQUICI
Bellum Iraquicum exacerbescere videtur, nam primae Americanorum et sociorum legiones iam portis urbis Bagdati appropinquant et ab eis spatium nonnisi aliquot chiliometrorum absunt. Pars exercitus intra zonam rubram sic dictam venit, ubi hae copiae telis propugnatorum urbis expositae sunt. Milites autem maritimi ponte Tigridis transito per ripam fluminis septentrionalem progressi Bagdatum versus procedunt. Eodem tempore cohortes republicanae, quae regimini Iraquiae praesidio esse consueverunt, Bagdatum viribus unitis defendere parant. Itaque nemo scit, quam difficile obsessoribus futurum sit illam urbem expugnare.

FINNI BELLO ADVERSANTUR
Circiter tres partes populi Finnici impetum confoederatorum in Iraquiam factum improbant, ut e demoscopia recens divulgata apparet. Illud bellum praesertim feminis nostris stomacho esse videtur, cum earum octoginta quinque centesimae ei adversentur, virorum autem sexaginta septem. Complures metuunt, ne contrarietates inter orbem islamicum et terras occidentales intercedentes propter bellum Iraquicum ingravescant.

PNEUMONIA IN SINIS PERICULOSA
Mense Februario exeunte in Sinis pneumonia novi generis periculosissima inventa est, quae iam sexaginta fere hominibus in omnibus orbis terrarum partibus perniciei fuit. Etiam Carlo Urbani, medicus Italus, qui hunc morbum primus dignoverat, die Saturni contagio eiusdem periit. Numerus eorum, qui hac febri SARS appellata impliciti sunt, in praesenti duorum fere milium est. Rerum condicio pessima est in Sinis et Hongcongi, sed virus pestilentiae per viatores etiam in Europam et Americam Septentrionalem serpsit. Quam ob rem omnibus rationibus cavendum est, ne haec epidemia in pandemiam crescat.

MUMIA VETUSTISSIMA REPERTA
Die Dominico archaeologi Aegyptii arcam ligneam quinque milibus annorum ante factam aperuerunt. In ossibus ibi conditis restabant signa resinae, quam ad mortuos mumificandos in Aegypto olim adhibitam esse constat. Quae cum ita sint, ars mumificandi multo vetustior esse videtur quam antea creditum est. Mumia reperta est in uno e viginti sepulcris prope urbem Cairum sitis, quam ob rem speratur fore, ut materies archaeologica etiam pluribus huius generis inventis augeatur.

Auswahl aus den "Nuntii Latini" vom 28.3.2003 (Radiophonia Finnica Generalis)

redegit Reijo Pitkäranta.

BELLUM IRAQUICUM SECUNDUM
Iam dies octavus est, cum bellum Iraquicum secundum continuatur. In partibus Iraquiae meridianis copiae pedestres confoederatorum bono aut vario Marte pugnantes in dies propius urbem Bagdatum processerunt, quamquam iter earum cum tempestatibus arenaceis tum resistentia Iraquianorum nonnumquam vehementissima retardatum est. Quae quamvis ita essent, foederati nuntiaverunt se iam plus quattuor milia captivorum Iraquianorum habere. Dum haec geruntur, aeroplana Americanorum et Britannorum plus duo milia bombarum computatri ope accuratissime directarum in maiores Iraquiae urbes demiserunt. Propositum erat, ut his missilibus imprimis praesidia et praetoria Iraquianorum militaria et administrativa peterentur, sed impediri non potuit, quin etiam magna civium inermium multitudo illis ictibus vitam amitteret. In plaga septentrionali milites Americani aeriportu expugnato novum belli theatrum aperuerunt. Qualem autem fortunam ipse Saddam Hussein inter hoc bellum subierit, admodum incertuim est, cum nemo pro certo sciat, utrum vir televisifice hac septimana locutus praesidens ipse an Pseudo-Saddam fuerit.

DE UNIONE EUROPAEA DISCORDI
Unio Europaea propter discrimen Iraquicum in duas partes divisa est. Namque aliquot civitates Europaeae cum Americanis aut foedus fecerunt aut expeditioni eorum saltem favent, reliquae autem aggressioni vehementer resistunt. E quindecim Unionis Europaeae nationibus quinque cum Americanis vario studio stant, scilicet Britannia, Hispania, Italia, Portugallia et Dania. Ceteri autem populi, praesertim Francogalli et Germani, cum solutionem pacificam bello anteponi voluissent, novum conflictum Iraquicum verbis acerrimis condemnaverunt.

QUID MINISTRA SIIMES DIXERIT
Regimen Finniae decrevit, ut eis, qui calamitatibus belli Iraquici afflicti essent, auxilium humanitarium plus sesquimilionis euronum daretur. Quod consilium ministra Suvi-Anne Siimes die Martis palam fecit. Maiorem illius subsidii partem per Ordinem a Cruce Rubra Finnicum et internationalem ad usum hominum ope egentium transmissum iri. Monuit Siimes metuendum esse, ne, si bellum longius productum esset, etiam plures cives Iraquiani dolore et miseria afficerentur.

ETIAM ARCHAEOLOGI SOLLICITI
Duodeviginti archaeologi in orbe terrarum omnium praestantissimi appellationi subscripserunt, qua a partibus in Iraquia gellum gerentibus postulaverunt, ut thesauros ibidem culturales magni pretii interitu prohiberent. Iraquiam hodiernam sitam esse in regione priscae Mesopotamiae, cuius cultus civilis iam ante quinque milia annorum summo fastigio stetisset. Anno proxime praeterito rerum periti Americanos de quattuor fere milibus locorum certiores fecerunt, quae bombardare non liceret.

Auswahl aus den "Nuntii Latini" vom 21.3.2003 (Radiophonia Finnica Generalis)

redegit Tuomo Pekkanen.

Auswahl aus den "Nuntii Latini" vom 28.2.2003 (Radiophonia Finnica Generalis)

redegit Tuomo Pekkanen.

SADDAM CONTUMAX
In colloquio interrogatorio societatis televisificae CBS Saddam Hussein, praesidens Iraquiae, affirmavit se in patria mansurum neque in exsilium iturum esse, licet bellum oreretur. Neque sibi ullam cum Osama bin Laden necessitudinem intercedere. Missilia al-Samoud, quippe quae decreta Nationum Unitarum non violarent, ab Iraquianis non deletum iri.

DISCRIMEN COREAE SEPTENTRIONALIS
Americani volunt, ut controversia de programmate nucleari Coreae Septentrionalis in consilio multilaterali componatur. Nationes autem sociae malint eos bilateralia de hac re colloquia cum Coreanis Septentrionalibus incipere. Colin Powell, minister a rebus exteris Americanorum, significavit Americanos ad auxilium oeconomicum haud exiguum illis suppeditandum paratos fore. Neque illud auxilium ullo modo de programmate nucleari reprimendo et componendo dependere, dummodo vigilaretur, ut cibaria egentibus iuste  distribuerentur. Hoc anno Americanos quadraginta milia tonnarum daturos et, si necesse esset, praeterea sexaginta tonnarum milia cibariorum in Coream Septentrionalem mittere paratos esse.

Coreani autem Septentrionales Americanos speculationis accusant. Aeroplanum illorum in spatium suum aerium supra mare Iaponicum penetravisse et ibi multas per horas speculandi causa mansisse. Idem aeroplanum iam antea in eadem regione circumvolavisse, ut destinata potiora exploraret. Illas fuisse provocationes, ex quibus res graviores facile sequerentur.

TABACUM IN BHUTANIA VETATUR
Bhutania, parvum regnum Asiae in meridiem vergentis, inter Tibetum et Indiam situm, est prima civitas, in qua usus et commercium tabaci vetita sunt. Causa erat, quod praesertim iuvenes Bhutaniani in sigarella marihuanam et hasisum addere solebant, quo factum est, ut usus illarum drogarum augeretur. Magistratus Bhutaniani credunt sibi brevi tempore contingi, ut tabacum ex tota civitate tollant et deleant.

In orbe terrarum, ut aestimat Ordo Mundi Sanitarius (WHO), singulis annis quaternas hominum miliones tabaco mori. Proximis viginti vel triginta annis transactis mortalitatem tabacariam fore quotannis iam denarum milionum.

FINNIA IN INFORMATICA EXCELLIT
Ordo Helveticus, cui nomen World Economic Forum (WEF), rettulit Finnos inter octoginta duas nationes in technologia informatica primum locum tenere, Americanos Septentrionales secundum. Finnos usu amplo et efficaci novae technologiae excellere, cum singuli cives, societates commerciales magistratusque eorum  technologia informationis et communicationis magis quam ceteri uterentur.

LUPI IN OVILE PENETRAVERUNT
Nuperrime in provincia Ostrobothnia Finniae occidentalis complures lupi in ovile penetraverunt, ubi octo oves dilaceraverunt. Populatio lupina est in Finnia circiter centum quadraginta, ex quibus maior pars in confinio orientali habitat. Per hos annos singulae bestiae etiam in regionibus in occidentem vergentibus passim apparuerunt.

Auswahl aus den "Nuntii Latini" vom 21.2.2003 (Radiophonia Finnica Generalis)

redegit Reijo Pitkäranta.

NATO CONCORDIAM INVENIT
Civitates Consociationis militaris Nato participes concordiam tandem invenerunt in vehementi discordia, quae de Turcia protegenda orta erat. Causa controversiae erat, quod Belgae, Francogalli et Germani recusaverunt, quominus de defensione Turciae cum Americanis colloquerentur, ne bello Iraquiae inferendo favere viderentur. Rixa composita legati civitatum supra dictarum promulgationem communem ediderunt, qua pronuntiaverunt bellum nonnisi ultimam et extremam rationem esse ad discrimen Iraquicum solvendum.

PAPADOPOULOS PRAESIDENS
Die Dominico in ea insulae Cypri parte, quam Graeci incolunt, comitia praesidenti creando habita sunt. Protagonistae huius certaminis erant praesidens hodiernus Glafkos Klerides et adversarius eius Tassos Papadopoulos. Ex inopinato accidit, ut Papadopoulos iam primo suffragio facto maiorem sententiarum partem adeptus victor electionum evaderet. Thema comitiorum principale erat, utrum rogatio Nationum Unitarum de Cypro Turco-Graeca redintegranda approbaretur necne. Klerides paratus erat has consultationes intra unum annum ad finem perducere, cum Papadopoulos illud propositum tantum pro initio colloquiorum haberet.

DE STATU FINNORUM IN SUETIA
Status linguae Finnicae in Suetia melior fieri videtur. Ait enim ministra Mona Sahlin regimen suum novis consiliis capiendis id acturum esse, ut liberis Finnorum in Suetia habitantium aequiores condiciones ad Finnice discendum pararentur et saluti senum Sueto-Finnorum efficacius quam ante consuleretur. Erkki Tuomioja, minister Finniae a rebus exteris, censuit dubitandum non esse, quin Sahlin nomine totius regiminis Suetiae locuta esset.

FINNI PEREGRINOS ADOPTANT
Anno proxime praeterito plures liberi peregrini quam umquam ante in familias Finnorum adoptati sunt, cum eorum numerus ducentorum quadraginta sex erat. Plerique adoptivi e Russia et Sinis in Finniam venerunt, sed etiam liberi ex Thailandia, Insulis Philippinis et Polonia oriundi libenter in adoptionem asciti sunt. Ius adoptionis habent illa paria coniugum aut homines soli viventes, qui minimum viginti quinque annos compleverunt.

Auswahl aus den "Nuntii Latini" vom 14.2.2003 (Radiophonia Finnica Generalis)

redegit Reijo Pitkäranta.

BELLUM IRAQUICUM PARATUR
Moderatores Civitatum Americae Unitarum quadraginta fere milia militum subsidiariorum ad arma convocaverunt, quibus copiae multo frequentiores iam antea comparatae augerentur. Pars harum cohortium domi retinebitur, pars autem ad Sinum Persicum, ubi in praesenti amplius centum milia Americanorum in armis stant, navibus transferetur. Etiam Britanni se adversus tela hostium munire coeperunt. Aeriportus enim suos praesidiis cinxerunt, cum metuerent, ne, si bellum ortum esset, aeroplana descendentia aut sublime abeuntia missilibus terroristarum peterentur.

DE LEGIBUS UNIONIS EUROPAEAE
Unio Europaea leges suas scriptas et amputabit et simpliciores reddet, ut eae melius intellegantur. Quod consilium non mireris, si respicias copiam illorum codicum iam ex centum milibus paginarum constare. Sunt, qui existiment nihil obstare, quin saltem mille paginae ex hoc ingenti textuum corpore statim deleantur. Propositum est, ut paragraphi vetustate infirmatae aut variis iterationibus oneratae ex legislatione Europaea tollerentur et pro statutis obsoletis nova substituerentur.

NOMEN IUGOSLAVIA OBLITTERATUM
Parlamentum Iugoslaviae decrevit, ut nomen civitatis Iugoslaviae oblitteraretur et ei nova appellatio Serbia et Montenegro inderetur. Praeter has regiones nihil aliud superest e pristina Iugoslavia, quae tamen tantas partes in historia Europae egerit. Quis non meminerit praesidentis Josip Broz Tito, qui post alterum bellum mundanum moderatoribus nationum occidentalium in deliciis erat, cum Unioni Sovieticae resisteret et suam communismi viam deligeret? Eo mortuo confoederatio Iugoslavia dissolvi coepit, et ibi bellum civile cruentissimum exarsit.

REIJO KEMPPINEN NUNTIATOR DELECTUS
Reijo Kemppinen, consiliarius rei diurnariae Finnus quadraginta quinque annos natus, nuntiator primarius Commissionis Unionis Europaeae delectus est. Quae designatio eo notabilior habetur, quod ante hoc tempus nullus vir aut femina de terris septentrionalibus ad tale officium admissus est. Huius magistratus est conventibus diurnariis edocendis praeesse, quos nuntiorum relatores ex omnibus orbis terrarum partibus oriundi quotidie observant.

ROGER MOORE PRAEMIO DONATUS
Roger Moore, pernotus actor cinematographicus Britannus, quem personam exploratoris James Bond septies gessisse constat, inde ab anno millesimo nongentesimo nonagesimo nono munere legati bonae voluntatis ordinis Unicef fungitur. Moore hunc honorem adeptus maxime contra mercaturam puerorum et puellarum pugnavit, quam ob rem ei, cum Berolinum obiret, praemium nomine German Federal Service Cross assignatum est. "Hanc laudem", inquit, "mihi allatam pluris aestimo quam praemium cinematographicum Oscar appellatum".

Auswahl aus den "Nuntii Latini" vom 7.2.2003 (Radiophonia Finnica Generalis)

redegit Tuomo Pekkanen.

COLUMBIA PERIIT
Navicula spatialis Americanorum, nomine Columbia, paucis minutis antequam descendere debuit, supra Texasiam periit. Septem astronautae, ex quibus duae erant feminae, vitam amiserunt. In taeniis magnetoscopicis, inter descensum naviculae factis, videri potuit, quomodo navicula, cum adhuc in altitudine circiter sexaginta chiliometrorum esset, in complures partes frangeretur. Illo tempore velocitas eius erat viginti milium chiliometrorum horalium.  Testes oculati narraverunt se prope urbes Dallas et Fort Worth sonum displosionis audivisse. Partes naviculae et reliquiae astronautarum in eadem regione passim repertae sunt.

Columbia in spatio cosmico sedecim dies fuerat et antea viginti septem volatus feliciter fecerat. Nulli ex vehiculis spatialibus Americanorum acciderat, ut in descensu interiret.  Paucis secundis ante calamitatem astronautae, qui in Columbia erant, de problematis technicis nuntiaverant. Praeterea cognitum est in quattuor naviculis spatialibus, quae Americanis in usu sunt, fissuras minutissimas antea repertas esse. Ideo verisimile videtur originem calamitatis fuisse vitium technicum. Scuta thermica, quae naviculam contra calorem in descensu crescentem defenderent, aliquo modo tam gravia damna cepisse, ut illa exardescens interiret. Quam ob rem omnes navicularum spatialium volatus interrupti sunt, donec de causa cladis certiora cognosceretur.

POWELL TESTIMONIA PROPOSUIT
Colin Powell, minister a rebus exteris Americanorum, Consilio securitatis Nationum Unitarum multa et varia testimonia ostendit, quibus probaret Iraquianos arma interneciva occultare. Erant in eis phonotaeniae colloquiorum clandestinorum et photographemata laboratoriorum mobilium, in quibus arma biologica pararentur. Delegatus Iraquiae omnia testimonia ficta et falsa esse asseveravit.

ARCHIEPISCOPUS MAGISTROS LINGUAE LATINAE SALUTAVIT
Archiepiscopus Finniae Jukka Paarma epistula Latina magistris linguae Latinae missa commemoravit se operam eorum plurimi aestimare, quippe qui  linguam docerent, qua cultus civilis occidentalis et religio Christiana tradita essent. Idem nuntiavit

Ecclesiam Finnicam in signum laudis et gratiarum praeceptoribus Latinis Novum Catechismum, nuper Latine redditum, donavisse.

GREX TARANDRORUM TRAMEN DETINUIT
In Finnia septentrionali haud raro evenit, ut tarandri hieme in ferriviis conspiciantur, in quibus facilius quam in silvis nivosis vagantur. Plerumque autem tramine adveniente effugiunt neque commeatum ferriviarium impediunt. Nuperrime autem magnus grex tarandrorum in aggerem ferriviae ascendit et tramen rapidum consistere coegit. Officiales ferriviarii pastores tarandrorum advocare frustra conabantur. Cum animalia abire nollent, tramen per tres horas post gregem ambulantem lentissime vehebatur, donec ultima animalia de ferrivia decesserunt. Altitudo nivium in illa regione unum metrum superat, ex quo facile intellegas tarandris commodius esse per ferriviam iter facere.

Auswahl aus den "Nuntii Latini" vom 31.1.2003 (Radiophonia Finnica Generalis)

redegit Reijo Pitkäranta.

COMITIA ISRAELIS PARLAMENTARIA
Hac septimana in Israele comitia parlamentaria instituta sunt. Suffragiis computatis apparuit partes dextras nomine likud, quibus praeest primus minister Ariel Sharon, tantam electionis victoriam reportasse, ut triginta septem parlamenti sedes sibi conciliarent. Factio autem operariorum cladem accepit, cum numerus eorum legatorum ad undeviginti reductus est. Adde, quod fautores partium media sequentium nonnisi quindecim sedibus parlamentaribus potiti sunt.

VACCINATIONES CONTRA VARIOLAS
Crederes morbum variolarum ex orbe terrarum iam penitus sublatum esse. Sed populus Americanus ad immunitatem illius pestilentiae consequendam vaccinari coeptus est, moderatoribus metuentibus, ne Civitates Americae Unitae bello bacteriologico exponerentur. Primum quidem quingenta milia militum talem corporis curam subeunt una cum iis, qui valetudini publicae operam dant. Praesidens George Bush in hac medicatione experienda concivibus exemplo erat, quippe qui inter primos Americanos iniectionem variolis arcendis sibi assumeret.

IURA IN ARABIA SAUDIANA HUMANA
Moderatores Arabiae Saudianae polliciti sunt se id acturos esse, ut condiciones iurum humanorum in civitate sua meliores redderentur. Namque iis vitio vertitur, quod maleficos poenis nimis duris afficiant. Iubet enim lex islamica, quam diligentissime servant, furibus manum dextram amputari, adulteros lapidari et interfectores stupratoresque morte multari. Si quis vinum biberit, in periculo erit, ne verberibus laceretur. Observatores ordinis Human Rights Watch rettulerunt Arabibus iam persuasum esse magnam legum mutationem esse necessariam.

MEMORIALIA DIEI 27.1. EUROPAEA
Die Lunae in Finnia, ut et in multis aliis Europae terris, memoria eorum recolebatur, qui persecutionibus altero bello mundano factis vitam amiserunt. Abhinc enim octo annos parlamentum Europaeum decrevit, ut haec memorialia quotannis die vicesimo septimo mensis Ianuarii (27.1.) agerentur sive eo ipso die, quo homines in campo carcerali Auschwitz inclusi in libertatem vindicati essent. Constat Germanos dictatori Adolfo Hitler addictos circiter duodecim miliones hominum occidisse, quorum dimidia fere pars Iudaei erant.

DE FAMILIIS LIBERIS GAUDENTIBUS
Eodem tempore, cum complures coniuges Finni liberis orbi esse volunt, familiae multicipites apud nos magnam gratiam inisse videntur. Anno enim superiore copia omnium in Finnia liberorum quidem amplius septem milibus deminuta est, sed numerus familiarum quattuor aut pluribus liberis gaudentium crevit. Kimmo Jokinen, vir sociologiae peritus, censet parentes, qui vitam familiarem magni aestiment, saepe res domesticas cursui honorum consulto anteponere.

Auswahl aus den "Nuntii Latini" vom 24.1.2003 (Radiophonia Finnica Generalis)

redegit Tuomo Pekkanen.

INCENDIA IN AUSTRALIA SAEVIUNT
Incendia fruticetorum, quibus saeviora his centum annis non fuerunt, regiones urbi Canberrae vicinas aliasque partes Australiae in orientem solem et meridiem vergentes vastaverunt. Incitamentum ignibus dederunt venti in campis planis vehementer flantes, calores solis continui atque siccitas, qua adiuvante flammae celeriter vagantur. Die Sabbati (18.1.) incendia incolis inopinantibus ipsam urbem Canberram tam repente invaserunt, ut aliquot homines perirent et  circiter quadringenta aedificia flammis delerentur. Duo milia quingenti homines domibus suis relictis vim ignium effugerunt. Spissa nubes fumosa urbem contexit et lumen solis obscuravit.

CONTRA BELLUM PRO PACE
In variis orbis terrarum regionibus reclamationes contra bellum Iraquiae inferendum factae sunt. Defensores pacis in  magnis urbibus tam Asiae et Europae quam etiam Americae septentrionalis cum suis praeconiis insignibusque convenerunt et agmine facto prodierunt. In Iaponia reclamationibus interfuerunt complura milia hominum. Consiliis Americanorum bellicis etiam in Germania, Francia, Britannia atque apud nationes Arabicas obsistitur. Moscuae aliquot centeni reclamatores ante aedes delegationis Americanae flagitaverunt, ut Americani manus de Iraquia auferrent.  Sex milia hominum, Gothoburgi Suetiae contra bellum reclamantes, in praeconiis suis etiam dictaturam praesidentis Saddam Hussein damnaverunt.

DISCRIMEN COREAE SEPTENTRIONALIS
Coreani septentrionales mense Octobri programmata nuclearia continuanda susceperunt, quo factum est, ut Americani auxilia cibaria illis suppeditare intermitterent. Ex viginti tribus milionibus incolarum Coreae septentrionalis octo fere miliones extrema fame tantopere laborant, ut haud procul absint, quin cibo deficiente pereant. Septentrionalis Corea est civitas Stalinistica, in qua condiciones vitae sunt miserabiles. Compertum est a profugis ibi esse castra carceralia, peiora quam Auschwitz, in quae captivi politici mitterentur. Americani nuntiaverunt se ad cooperationem oeconomicam cum Coreanis septentrionalibus paratos esse ea condicione, ut illi nuclearia programmata deponerent.

SUETI BIBULI
Consumptio alcoholi in Suetia proximis annis vehementer aucta est. Anno bis millesimo secundo (2002) singuli Sueti, plus quindecim annos nati, dena litra consumpserunt, si quantitatem in purum alcoholum commutes. Acta Suetica, quibus nomen est Svenska Dagbladet, rettulerunt illam copiam maiorem esse quam umquam post annum millesimum octingentesimum septuagesimum quintum (1875).

AVES CANTARE COEPERUNT
Frigoribus mitescentibus varia avicularum genera, in quibus parus, merula, passer et fringilla, cantus suos vernales in Finnia meridionali cantare coeperunt. Etiam noctuae primos ululatus amatorios dederunt, quibus adventum veris praenuntiant. Etsi aves iam cantant, tempus nidificationis in his partibus septentrionalibus nondum instat.

Auswahl aus den "Nuntii Latini" vom 17.1.2003 (Radiophonia Finnica Generalis)

redegit Reijo Pitkäranta.

COREA SEPTENTRIONALIS MINITANS
Civitates Americae Unitae auxilium cibarium Coreae Septentrionali suppeditatum intermittere decreverunt, quoad haec civitas condiciones antea propositas acciperet. Americani hoc consilium ceperunt, ubi primum de programmate Coreae Septentrionalis nucleari discordia vehemens orta est. Coreani enim non ita pridem recusaverunt, quominus pactione de armis nuclearibus facta starent, minitantes se experimenta missilium denuo suscepturos esse.

PRAESIDATUS UNIONIS EUROPAEAE
Kalendis Ianuariis moderamen Unionis Europaeae semestre ad Graecos transiit, cum superiore tempore penes Danos fuisset. Graecis propositum est imprimis adversus criminalitatem in paeninsula Balcanica grassantem pugnare. Dicitur scelerum contagio in Albania longius et latius patere quam quisquam putet. Sunt, qui aestiment oeconomiam huius civitatis dimidia fere parte negotiis illegalibus contaminatam esse. Praesertim commercium hominum et drogarum nec non purgatio pecuniae contra legem acquisitae negotiatoribus scelestis lucro sunt.

QUID WORLDWATCH RETTULERIT
Worldwatch, ordo rebus circumiectalibus observandis, conspectum annuum de statu orbis terrarum in sede sua Washington divulgavit. In illo documento nova quaedam rerum futurarum spes inesse videtur. Aestimatoribus enim persuasum est veras mutationes in melius effici posse, dummodo omnium opes et operae ad meliorem mundum oecologicum constituendum conferantur. Exemplum progressus prosperi afferunt usum energiae solis et venti in Hispania, Iaponia et Germania his singulis annis tricenis centesimis auctum esse, cum illae civitates propositi tenaces id egissent, ut his energiae fontibus magis quam ante uterentur.

NOVAE LUNAE NEPTUNI REPERTAE
Astronomi tres novas lunas circum planetam Neptunum volventes invenerunt. Quae cum ita essent, numerus satellitum huius stellae ab octo ad undecim crevit. Lunae recens repertae sunt visu difficillimae, cum diametro non nisi tricenorum chiliometrorum sint et multotiens debilius conspiciantur quam alia corpora caelestia. Observationem debemus gregi astronomico internationali, qui telescopiis in Chilia et in insulis Havaianis collocatis usus caelum contemplabatur.

DE LIBERTATE FEMINARUM IRANIAE
Feminis Iranianis licentia data est certamina athletica spectandi, quae mense Februario ad honorem revolutionis islamicae instituentur. Hoc consultum historicum appellaveris, cum antea feminis Iraniae nullus aditus in spectacula virorum agonica fuerit. In generibus athleticis, quae spectatricibus satis idonea habentur, sunt ludus bascaudarius, manufollium, ludus follis volatici et teniludium. Mulieribus tamen interdictum est, ne certaminibus luctandi et natandi adessent, ea scilicet causa, quod athletae magna corporis parte nuda certarent.

Auswahl aus den "Nuntii Latini" vom 10.1.2003 (Radiophonia Finnica Generalis)

redegit Tuomo Pekkanen.

SADDAM HUSSEIN INSPECTORES ACCUSAVIT
Oratione televisifica die Lunae habita, qui dies sollemnis erat exercitus Iraquianorum, praesidens Saddam Hussein inspectores Nationum Unitarum speculationis accusavit. Indices investigatorum Iraquianorum ab illis componi, quaestiones insidiosas operariis proponi, notitiam castrorum et legitimae productionis militaris colligi. Illam nihil esse nisi speculationem. Si Americani cum confoederatis suis Iraquiam invasissent, Iraquianos ad bellum paratos fore. Illo bello Iraquianos fore superiores. Minas Americanorum nihil esse nisi sibila serpentium et latratus canum. “Dubium non est”, ait Saddam, “quin iusti in patria sua victoriam reportent et hostes eorum certam cladem accipiant.”

BELLUM POSSE EVITARI
Dum Americani bellum parare maturant, Jack Straw, minister a rebus exteris Britannorum, bellum contra Iraquiam nullo modo inevitabile esse affirmavit. Periculum, ne bellum oreretur, esse minus quam multi asseveravissent. In actis diurnis tot de bello suscipiendo affirmationes fuisse, ut illas refutare necesse esset.

Septimana ineunte Mohamed el-Baradei, moderator ordinis IAEA (sc. Internationalis Atomicae Energiae Associationis), narravit inspectores a Nationibus Unitis constitutos, quorum esset in arma interneciva Iraquianorum inquirere, nihil suspecti repperisse. Maturius tamen adhuc esse certa et definita de illis armis iudicia facere.

TURCI SOLLICITI
Turci, unica inter confoederatos Americanorum natio islamica, solliciti sunt, ne bello gesto Iraquia in duas partes dividatur. Abdullah Gül, minister Turciae primarius, censuit bello in Proximo Oriente commisso omnes nationes eius regionis iri affectum. Etiam Aegyptii monuerunt impetu contra Iraquiam facto regionem iam antea inflammabilem labefactatum iri.

EUROPA SEPTENTRIONALIS FRIGET
Partes Europae in septentrionem vergentes his diebus insolitis frigoribus vexantur. In certis regionibus Careliae Russicae frigus quinquaginta graduum Celsianorum fuit, quam ob rem in eis status necessitatis indictus est. Calefactione propter frigora deficiente hydrargyrus thermometri in quibusdam multizoniis, valetudinariis asylisque puerorum vix aliquot gradus supra zerum ascendit. Ideo societates humanitariae Finnorum operam dant, ut calorifera electrifica, vestes, calceamenta cibariaque in Careliam Russiae suppeditentur. Moscuae hac hieme homines admodum ducenti octoginta, ex quibus plerique tecto domoque caruerunt, frigore mortui sunt. In multis domibus Finnorum frigora, passim triginta gradus superantia, aquaeductus congelaverunt.

MARE BALTICUM GLACIE CONTEGITUR
Apud litora Finniae ampliora spatia Maris Baltici glacie conteguntur quam multis decenniis. Fieri poterit, ut totum aequor usque ad Freta Danorum congeletur. Magnae naves traiectoriae Baltici Maris sunt tam solidae, ut durissima quoque hieme commeare valeant. Mercatoriis navibus auxilio sunt naves glacifragae.

Auswahl aus den "Nuntii Latini" vom 3.1.2003 (Radiophonia Finnica Generalis)

redegit Reijo Pitkäranta.

EURO IAM PER ANNUM USURPATUR
Iam unus annus praeteriit, cum in Europa nova moneta, scilicet euro, usurpari coepta est. Ex eurobarometro, quod Commissio Europaea promulgavit, patet plurimos Europaeos hac pecunia satis contentos esse. Finni ad usum eius solito melius assueverunt, nam nonnisi tres centesimae civium nuntiaverunt sibi difficultates in novis nummis tractandis fuisse. Germani autem desiderio marcae suae teneri videntur.

DE MERITIS TRIUM FEMINARUM
Libellus periodicus Americanus TIME tres feminas propter res anno bismillesimo secundo bene gestas honoris causa nominavit. Quae sunt Sherron Watkins, vicepraeses pristina societatis mercatoriae Enron, Cynthia Cooper ex WorldCom et Coleen Rowlay, una e custodibus foederalibus Civitatum Americae Unitarum. Causa laudis erat, quod Watkins et Cooper fraudes a ratiocinatoribus in societatibus suis commissas patefecissent et Rowlay superiores suos de quodam terrorista ante impetus in New York et Washington factos praemonere conata esset.

FAMILIA REGIA IN ITALIAM REDIIT
Princeps Vittorio Emanuele, filius ultimi regis Italiae, postquam per quinquaginta sex annos exsulavit, coniuge et filio comitantibus ex Helvetia in patriam rediit. Parlamentum enim Italiae mense Octobri decrevit, ut familiae regiae, cui propter auxilium dictatori Benito Mussolini olim datum omni Italia interdictum erat, tandem in solum patrium reverti liceret. Princeps Vittorio cum suis documento subscripsit, quo confirmavit se regnum Italiae non iam petiturum esse.

DE PARTITURA BEETHOVENIANA
Partitura originalis nonae symphoniae, quam musicographus celeberrimus Ludovicus van Beethoven saeculo undevicesimo composuit, in indicem hereditatum mundi accepta est. Manuscriptum eius e ducentis paginis constans Berolini asservatur. Agitur de primo opere musico, quod UNESCO, ordo Nationum Unitarum culturalis, pro rebus speciatim tutandis habendum esse censuit. Tirocinium illius symphoniae Vindobonae anno millesimo octingentesimo vicesimo quarto (1824) actum est moderatore ipso Beethoven, qui eo tempore iam surdus erat.

Auswahl aus den "Nuntii Latini" vom 27.12.2002 (Radiophonia Finnica Generalis)

redegit Tuomo Pekkanen.

DE PETROLEO IRAQUIAE
Quamquam Americani et Britanni rationes securitatis interponentes bellum Iraquiae minitantur, multi suspicantur causam principalem discriminis Iraquiani esse petroleum. Opes petroleariae Iraquiae, quarum certus locus nondum est definitus, maximae in mundo habentur. Etiam opes iam repertae post copias petrolearias Arabiae Saudianae secundum locum tenent. Iam nunc societates petroleariae occidentales de hereditate praesidentis Saddam Hussein inter se disputant.

Itaque primum propositum belli imminentis esse videtur novum regimen in Iraquia constituere. Quod si factum erit, societates petroleariae Americanorum iura in ingentibus campis petroleariis operandi accipient.

Delegati oppositionis politicae Iraquianorum iam promiserunt se pactiones de petroleo cum societatibus Americanis et Britannis facturos esse. Praesidente Saddam Hussein ex potestate expulso et novo Iraquiae regimine sub tutela Americanorum condito, illos cum sociis suis certam potestatem de petroleo Iraquiae constituendi habituros esse.

Difficile autem est praescire, quomodo pretium petrolei mutetur. Si bellum breve fuerit, pretium ad breve tempus augebitur, sed  longinquum bellum novum discrimen oeconomicum in mundo efficiet. Fieri etiam poterit, ut pace facta et productione in Iraquia aucta petroleum fiat facilius acquisitu et vilius quam multis annis antea.

LAPPONIA FINNIAE PEREGRINOS ATTRAHIT
Hoc mense plures peregrini quam umquam ante Lapponiam Finniae obeunt. Circiter sexaginta milia periegetarum, quorum maior pars sunt Britanni, trecentis quinquaginta volatibus specialibus in Lapponiam venerunt. Anno vergente homines religionis orthodoxae ex Russia et Graecia illis succedunt, itemque Franci, qui itinera Lapponica tum demum suscipere solent. Viatores in Lapponia occasionem tarandro vehendi, cibos Lapponicos gustandi, noctem arcticam aurora boreali illuminatam admirandi habent. Societates periegeticae in deversoriis - piscinis, balneis aliisque commoditatibus modernis ornatis - programmata specialia peregrinis paraverunt. Neque iter est difficile, quia in multos aeriportus Lapponiae etiam maxima aeroplana descendere possunt.

Auswahl aus den "Nuntii Latini" vom 20.12.2002 (Radiophonia Finnica Generalis)

redegit Tuomo Pekkanen.

UNIO EUROPAEA AMPLIFICABITUR
Die tertio decimo mensis Decembris (13.12.) summi moderatores Unionis Europaeae, dum conventum Hafniae, in urbe capite Daniae, agunt, de decem novis civitatibus in societatem Unionis cooptandis consenserunt. Itaque, nisi quid adversi acciderit, inde a Kalendis Maiis anni bismillesimi quarti (1.5.2004) communitas Europaea e viginti quinque nationibus constabit et eius nova membra erunt Estonia, Lettonia, Lituania, Tzechia, Hungaria, Polonia, Slovenia, Slovachia, Melita et Cyprus. Romano Prodi, praeses Commissionis, decretum recens factum laudavit censens dichotomiae Europae finem impositum esse decem novis nationibus in nomen Europaeum ascitis. "Nunc demum", inquit, "Europa vere est unita, quoniam integratio ex voluntate populorum libera orta est."

TERRORISTAE OCCIDI SINUNTUR
Praesidens George Bush investigatoribus a re exploratoria Americanorum centrali (CIA) licentiam terroristas omnium periculosissimos occidendi dedit. In actis diurnis New York Times intitulatis scriptum legitur illo indice nomina viginti quattuor virorum contineri, quorum capita essent Osama bin Laden et eius princeps minister Ayman al-Zawahiri. Leges quidem Americanae praesidenti vitae necisque potestatem non concedunt.

TUMULTUS IN VENETIOLA FACTI
Venetiola iam per duas septimanas operistitio generali et tumultibus violentis laborat. Seditiosis propositum est, ut praesidens Hugo Chavez munus deponeret et in civitate nova comitia instituerentur. Biocolytae animos multitudinis calefactos reprimere conati sunt gaso lacrimogeno et proiectilibus cummeis contra vulgus tumultuans utendo. Etiam praesidens Chavez consilia duriora ad rem publicam restituendam adhibere constituit, ut peregrinis ostenderet operistitio prohiberi non posse, quominus exportationes petrolei e Venetiola more solito continuarentur.

FINNI ET SUETI BONI INVENTORES
Civitates Unionis Europaeae parvae, quales sunt Finnia, Suetia, Dania et Hollandia, acriore ingenio ad novas res inveniendas praeditae esse videntur quam ceterae, si relationi nuper factae fides tribuitur. Finni et Sueti investigatione innovatoria omnes antecedunt, et penes eos est maximus numerus diplomatum inventionis ad summam technologiam pertinentium. In regionibus creativitatis potentissimis sunt Stockholmia cum suburbiis, Nylandia Finnorum et Finnia septentrionalis.

DE PIIS CANTIONIBUS NATALICIIS
Tempore diem natalem Christi proxime praecedente in ecclesiis Finniae Lutheranis moris est pias cantiones natalicias omnium pulcherrimas una voce cantare. Psalmodiae huius generis, quae abhinc triginta annos cura et studio Societatis missionariae Finniae initium ceperunt, apud populum tanta gratia valent, ut hi eventus communes iam pro festo cantandi nationali maximi momenti habeantur.

BONA NATALIA!

Auswahl aus den "Nuntii Latini" vom 13.12.2002 (Radiophonia Finnica Generalis)

redegit Tuomo Pekkanen.

RELATIO DE ARMIS INTERNECIVIS
Relatio de armis internecivis, quam Nationes Unitae ab Iraquianis flagitaverant, inspectoribus armorum Bagdati tradita, in sedem sociationis Neo-Eboracensem missa est. Continet paene duodecim milia paginarum, ex quibus duo milia centum ad vim nuclearem attinent. Iraquiani affirmant se arma biologica, chemica aut nuclearia non habere. Alterum relationis exemplar Vindobonam missum est, ubi ab ordine IAEA (Internationalis Atomicae Energiae Associatio) examinabitur. Compendium relationis intra decem dies paratum erit et certiora de illa iudicia ad diem vicesimum septimum mensis Ianuarii praeparabuntur. Mohamed ElBaradei, moderator ordinis IAEA, petivit, ut omnes patientiam haberent, quoad relatio accurate perlecta esset. Idem censuit non ante, quam post unum annum iudicari posse, an Iraquiani facultatem arma nuclearia parandi haberent. Amir al-Saadi, consiliarius praesidentis Saddam Hussein, speravit relationem Americanis satisfacere. Si quid in illa reprehendendum esset, testimonia inspectoribus armorum tradenda esse, ut illi in rem loco ipso inquirerent.

EXERCITIA MILITARIA AMERICANORUM
Americani in Quataria exercitia militaria susceperunt, ut praefecturam novissima technica ornatam usu probarent. In exercitiis currus cataphracti, naves longae, aeroplana aut copiae bellatorum non intersunt, nam tantum instrumenta probantur, quae ad imperandum, vigilandum et communicandum pertinent. Praefecti exercitus de exercitatione belli Iraquiae inferendi agi vehementer negaverunt.

CARTER DE BELLO PRAEVENTIVO MONUIT
Jimmy Carter, praesidens olim Americanorum, hornotinum praemium pacis Nobelianum Osloae, in urbe principe Norvegiae, die Martis recepit. Oratione ibi habita de periculis belli praeventivi monuit. “Hodie”, inquit, “minimum octo nationes armis nuclearibus ornatae in orbe terrarum sunt, ex quibus tres vicinis suis minitantur. Idque in regionibus fit, in quibus magnae inter nationes contentiones sunt. Si civitates praepotentes rationem belli praeventivi adoptaverint, exemplum earum effectus calamitosos habere poterit.” Quae verba ad politicam Americanorum et imminens bellum Iraquicum spectabant, quamquam Carter mentionem concivium suorum non fecit.

MAXIMUM RESERVATORIUM FERARUM
Moderatores trium terrarum Africae meridianae tractatui subscripserunt, ex quo maximum reservatorium bestiarum ferarum in communi confinio Mozambici, Rei publicae Africae Australis et Zimbabuiae circa flumen Limpopum conderetur. Reservatorium, situm in zavanis flumini Limpopo propinquis, erit magnitudine circiter centum milium chiliometrorum quadratorum. Saepimenta finium sunt sublata, ut elephantes, rhinocerotes, leones aliaque animalia per semitas suas translaticias sine impedimentis migrare possent et periegetae sine expeditionibus telonialibus ex una terra in aliam commearent.