Auswahl aus den "Nuntii Latini" vom 6.12.2002 (Radiophonia Finnica Generalis)

redegit Tuomo Pekkanen.

QUID PUTIN ET ZEMIN DIXERINT
Praesidens Russiae Vladimir Putin, itinere biduano in Sinas suscepto, Pekini collegam suum Jiang Zemin convenit. Qui moderatores, tamquam si optimi amici essent, poculis vini Campanensis inter se pulsis de cooperatione politica et oeconomica colloquebantur et relationes inter Russiam et Sinas intercedentes laudibus extollebant. Promulgatione communi edita Putin et Zemin Coreae Septentrionali programma nucleare deponendum esse flagitabant monentes et fortunae totius orbis terrarum et securitatis Asiae orientalis maxime interesse, ut paeninsula Corea armorum atomicorum expers maneret.

TABACUM COMMENDARI VETITUM
Ministri a sanitate Unionis Europaeae postridie Kalendas Decembres novam legem perferendam curaverunt, quae tabacum commendari omnino vetat. Producta eius generis televisifice praeconari iam nunc illegale est, sed novo edicto sancitur, ne quis merces tabacarias aut radiophonice, aut in actis diurnis, aut in Interreti pervulget. Lex antitabacaria, quam etiam curatores magnorum certaminum autocineticorum observent oportet, inde a mense Iulio anno bismillesimo quinto (2005) valere incipiet.

DUMAS ABHINC 200 ANNOS NATUS
Hoc anno duo saecula elapsa sunt, cum Alexandre Dumas, scriptor celeberrimus Francogallus, natus est. Die Saturni sollemnitates ad memoriam illius viri recolendam actae ita finitae sunt, ut reliquiae eius cum magna funeris pompa in mausoleum Parisiense nomine Panthéon transferrentur. Constat cives Francogallos maximae auctoritatis in hoc templo sepultos esse. Capulus velamento caeruleo tectus erat cum textu Francogallico litteris argenteis conscripto, quem his fere verbis Latine reddideris: "Omnes pro uno et unus pro omnibus".

Auswahl aus den "Nuntii Latini" vom 29.11.2002 (Radiophonia Finnica Generalis)

redegit Tuomo Pekkanen.

NATO AMPLIFICATA
In conventu Pragae acto NATO confirmavit septem nationes in confoederationem ascitum iri, quae essent Bulgaria, Estonia, Lettonia, Lituania, Romania, Slovakia, Slovenia. Hae nationes, quae primo vere aut ineunte aestate anni bismillesimi quarti membra fient, regionem confoederationis ampliorem facient, quamquam vim eius militarem haud multum augebunt. George Robertson, secretarius generalis confoederationis, dixit NATOnem fortiorem et efficaciorem sociam fore omnibus, etiam Unioni Europaeae et Russiae. Praesidens Poloniae Alexander Kwasniewski affirmavit se esse  commotum et felicem, quod consilium de amplificatione in urbe Praga captum esset, quam confoederatio Varsaviensis anno millesimo nongentesimo duodeseptuagesimo (1968) invasisset. Lineas divisionis Europae, iniuriam pacti inter Ribbentrop et Molotov facti, bellum frigidum atque aequilibrium in timore positum tandem aliquando finem cepisse. Igor Ivanov, minister a rebus exteris Russiae, monuit Russiam mutationes NATOnis attentissime observare et flagitare, ut confoederatio structuris belli frigidi solveretur.

Auswahl aus den "Nuntii Latini" vom 13.7.2002 (Radiophonia Finnica Generalis)

redegit Reijo Pitkäranta.

PRAESIDATUS PENES DANOS
Mense Iulio ineunte dominatus Unionis Europaeae semestris ab Hispanis ad Danos transiit. Moderatores eorum se maxime id acturos esse nuntiaverunt, ut consilium Unionis dilatandae perficeretur et certum horarium, quo novae civitates ad societatem accederent, in summo conventu Hafniae instituendo statueretur. "Quamquam dilatatio",inquit minister Bertel Haarder, "Danis praesidentibus rerum caput erit, etiam alia mandata diligenter curabuntur".

TENSIO INTER COREAS AUCTA
Coreani septentrionales finitimos suos Coreanos accusaverunt, quod naves bellicas in maritima sua misissent et hac iniuria consulto facta tensionem militarem in eadem regione augere voluissent, ubi una septimana ante classes utriusque civitatis cruente conflixissent. Magistratus Coreae Meridianae concesserunt naves suas quidem eo mari circumvectas esse, sed negaverunt eas in aquas alienas penetravisse.

UNIO AFRICANA CONDITA EST
Rectores civitatum Africae hac septimana Durbaniae, in urbe Africae Australis, conventum egerunt ibique Unionem Africanam condiderunt pristinum Ordinem Africae Unitae (OAU) oblitterando. Nova unio eo tendit, ut cooperatio nationum sociarum in oeconomia, securitate et cultu civili melior reddatur. Thabo Mbaki, praesidens Africae Australis, et Muammar Gaddafi, dux Libyae, verbis extulerunt, quantam vim haec consociatio vel ad discriminationem phyleticam avertendam habitura esset.

QUID GERHARD SCHRÖDER DIXERIT
Gerhard Schröder, cancellarius foederalis Germaniae, dixit fraudes in societatibus mercatoriis Americanis factas ostendere, quanto periculo Europaei systemata oeconomica Americana imitarentur. Abusus enim effecisse, ut fides civium, quam foris argentariis tribuissent, iam valde vacillaret. Manifestum esse possessorum Americanorum nihil interesse, quemadmodum operarii valerent, dummodo ipsi domini sibi magnas divitias pararent.

NOVA LEX IN CIVITATE VATICANA
Pontifex Maximus Iohannes Paulus II legi subscripsit, quae tabacum in aedibus civitatis Vaticanae fumare vetat. Si quis hoc statutum neglegere ausus erit, pecunia triginta euronum multabitur, sive peccator cardinalis purpuratus fuerit sive insignia archiepiscopi gesserit. Utrum cives de interdicto Latine an Italice certiores fiant, nondum constat.

AQUILAE MARINAE AUGENTUR
Numerus aquilarum marinarum in Finnia hoc anno amplius decem centesimis auctus est. Neque illud genus avium, cui nomen scientificum Haliaeetus albicilla, apud nos tanta frequentia nidificaret, nisi iam per triginta annos publice protegeretur. In praesenti in finibus nostris amplius mille aquilae marinae inveniuntur, quarum insignem partem pulli nondum nidulati constituunt.

Auswahl aus den "Nuntii Latini" vom 6.7.2002 (Radiophonia Finnica Generalis)

redegit Reijo Pitkäranta.

MAGNA CALAMITAS AERIA
Unus et septuaginta homines, quorum maior pars pueri et puellae, vitam amiserunt, cum aeroplanum epibaticum Russicum et aeroplanum onerarium Germanicum die Lunae multo mane in caelo Germaniae meridianae inter se collisa sunt. Quae fuerit causa calamitatis, nondum constat, sed examinatores illum casum tristem aut ex errore pilotae aut ex neglegentia proretarum secutum esse putant.

QUID IN AFGANISTANIA ACCIDERIT
Afgani nuntiaverunt quadraginta cives suos interisse et amplius centum vulneratos esse ictu bombico, quem aeroplana Americana in eos dedissent. Caedes in vico haud procul ab urbe Kandahar sito facta est, ubi tunc temporis nuptiae celebrabantur et hospites laetitia exsultantes more maiorum in aera sclopetabant. Americani autem, cum illis displosionibus se ad pugnam lacessi crederent, sibi temperare non potuerunt, quominus multitudinem hominum bombis verberare inciperent.

CUBA SOCIALISTICA MANEBIT
Parlamentum Cubanum consensu omnium legem fundamentalem ita mutandam esse censuit, ut systema socialisticum in Cuba administranda semper servaretur et illud consultum irrevocabile esset. Hoc plebiscito sancito civibus persuasum est nihil iam impedire posse, quominus patria sua etiam post obitum praesidentis Fidel Castro et successoris eius designati Raul Castro socialistica maneat.

ALIMENTA FINNICA PURISSIMA
In alimentis zoogenibus, quae in Finnia producuntur, nulla fere vestigia aut venenorum aut elementorum alienorum reperta sunt. Inspectione anno praterito facta apparuit in his cibariis neque ulla hormona neque remedia anabolica vetita inesse. Etiam copiae venenorum circumiectalium minimae remanserunt.

GREX BRASILIAE VICTOR EVASIT
Ludi pedifollici mundani in Corea meridiana et Iaponia instituti pridie Kalendas Iulias ad finem venerunt, cum certamen ultimum in urbe Iocohama inter greges nationales Brasiliae et Germaniae propositum est. Tropaeum tulerunt Brasilienses, postquam Ronaldo, sphaerista eorum praestantissimus, follem in portam adversariorum bis impegit. Victoria in Brasilia tanta iubilatione salutata est, ut totam nationem felicitate dissiluisse crederes.

STEVE FOSSETT REM BENE GESSIT
Steve Fossett, milionarius Americanus duodesexaginta annos natus, rem novam et memoria dignam gessit. Ei enim omnium primo contigit, ut aerostato vectus totum orbem terrarum solus circumvolaret. Fossett die quarto decimo, postquam sublimis abierat, itinere triginta unius milium chiliometrorum uno tenore confecto in desertum Australiae orientalis feliciter de caelo descendit.

Auswahl aus den "Nuntii Latini" vom 28.6.2002 (Radiophonia Finnica Generalis)

redegit Reijo Pitkäranta.

QUID PRAESIDENS BUSH DIXERIT
George Bush, praesidens Civitatum Americae Unitarum, oratione die Lunae habita censuit liberam rem publicam Palaestinensium interim condendam esse, quae certis finibus terminisque circumscriberetur. Id tamen ea condicione fieri posse, ut Palaestinenses regimine mutato sibi novos moderatores crearent. "Cum hodierni praesidentes", inquit, "potestatem deposuerint ac modus administrandi et rationes securitatis renovatae erunt, Americani civitati Palaestinensium instituendae favebunt."

LEX HISPANIAE ANTITERRORISTICA
Senatus Hispaniae legem perferendam curavit, quae eo spectat, ut factionibus terrorismum fulcientibus omni iure interdicatur. Patribus propositum est impedire, ne Batasuna, ala politica ordinis separatistici ETA, regno iam insidiaretur. Quae factio, quamquam negavit sibi ullum usum aut consuetudinem cum gregibus armatis esse, tamen semper recusavit, quominus ictus terroristicos ab ETA perpetratos condemnaret.

DE EXERCITIBUS PROFESSIONALIBUS
Numerus militum mercennariorum in exercitibus civitatum Unionis Europaeae sociarum magis atque magis augetur. Rerum condicio his decem annis tantopere mutata est, ut in media Europa, scilicet in Britannia, Belgio, Hollandia et Hispania, conglobatio quaedam exercituum professionalium oreretur. Etiam viri Francogalli militiam facientes hoc anno exeunte ad munera civilia obeunda dimittentur. Finni autem necessitatem militiae civibus suis iniunctam servaturi sunt.

OBESITAS IN ORBE TERRAE AUGESCIT
Cardiologi orbis terrarum putant obesitati tribuendum esse, quod decies centena milia hominum quotannis ex cardioplegia et morbis cardiacis moriantur. Multitudo hominum obesorum in dies augescit, ac quidem ita, ut verbi causa in America Septentrionali iam tertius quisque puer aut puella nimia pinguitudine laboret.

Auswahl aus den "Nuntii Latini" vom 21.6.2002 (Radiophonia Finnica Generalis)

redegit Tuomo Pekkanen.

COMITIA PARLAMENTARIA FRANCORUM
In comitiis parlamentariis Francorum Unio Maioritatis Praesidentialis (UMP) magnam victoriam reportavit, cum ex quingentis septuaginta septem (577) sedibus trecentas quinquaginta quattuor (354) occupavit. Rebus sic stantibus minister primarius Jean-Pierre Raffarin, post comitia praesidentialia ad tempus designatus, cum eisdem fere ministris, quos habebat, in munere mansit. Praesidens Jacques Chirac, qui antea potestatem cum ministro primario democrata sociali dividebat, nunc favorem et parlamenti et regiminis habet. Itaque ea, quae ante suffragia praesidentialia promisit, iam solvere poterit, scilicet exactionem vectigalium et tributorum renovare, condiciones pensionariorum meliores reddere, criminalitatem coercere. At tantum sexaginta fere centesimae civium ad urnas accesserunt. Itaque in actis diurnis Francorum quaesitum est, quis re vera in comitiis victoriam reportavisset, praesidens Chirac an inertia civium. Communistae unam et viginti sedes in parlamento obtinuerunt, factio prasinorum tres, Frons nationalis ne unam quidem.
 
CONVENTUS MINISTRORUM LUXEMBURGENSIS
Ministri a rebus exteris Unionis Europaeae die Lunae (17.6.) Luxemburgum convenerunt. Ibi actum est de tribus gregibus Palaestinensium in catalogum terroristarum addendis, de immigratione legibus contraria impedienda, de subventionibus agriculturae. Rationes pecuniarias gregum, qui in illo catalogo nominarentur, in tota Unione Europaea praecludendas esse. Tony Blair, minister primarius Britannorum, conventui suaserat, ut auxilium oeconomicum illis nationibus negaretur, quae migrationem illegitimam e suis terris in Unionem Europaeam non impedivissent. Quod consilium, quattuor nationibus resistentibus, reiectum est, quamquam numerus hominum, qui illegaliter in Unionem veniunt,  singulis annis circiter quingenorum milium est. De confiniis Unionis Europaeae strictius quam antea custodiendis in summo conventu, septimana vergente Hispali futuro, disputabitur. Subventionibus, quibus agricultura novorum Unionis membrorum iuvaretur, praesertim Germani obstiterunt. Nihilo minus ministri de hac re concordiam invenerunt,  sed quo modo subventiones numerentur, postea accuratius constituetur.
 
LUDI PEDIFOLLICI CONTINUANTUR
Ludi pedifollici mundani plus tres septimanas continuantur. Praeter opinionem greges Francorum et Argentinorum, qui optimis adnumerabantur, iam in sectionibus initialibus re male gesta eliminati sunt. Franci, victores olim et ludorum mundanorum et Europaeorum, ne semel quidem follem portae adversariorum inferre potuerunt. Ex triginta duobus gregibus inter octo praecipuos evaserunt  Anglia, Brasilia, Corea Meridiana, Germania, Hispania, Senegalia, Turcia, USA. Ex his quattuor in certamina semifinalia prodibunt. Ludus finalis inter victores semifinalium pridie Kalendas Iulias fiet.
 

Auswahl aus den "Nuntii Latini" vom 14.6.2002 (Radiophonia Finnica Generalis)

redegit Reijo Pitkäranta.

RELATIONES INDIAE ET PAKISTANIAE
Tensio politica et militaris inter Indiam et Pakistaniam orta paulatim relaxari videtur. Die Martis naves bellicae, quas India in propinquitatem Pakistaniae miserat, reduci coeptae sunt. Donald Rumsfeld, minister defensionis Civitatum Americae Unitarum, cum in urbem Delium proficisceretur moderatores utriusque civitatis conventurus, ait rerum statum iam in melius mutatum esse.

TERRORISTA CUM BOMBA SORDIDA
Magistratus Americani terroristam comprehenderunt, qui bombam sordidam, ut dicitur, alicubi in Civitatibus Americae Unitis displosurus erat. Omnibus apparebat istum hominem nequissimum, si consilium suum perfecisset, magno civium numero perniciem allaturum fuisse. Bomba sordida nuncupatur instrumentum necis, quod ex materia displosiva et elementis radioactivis mixtis constat.

LEX DE PRODUCTIS COSMETICIS PERLATA
Parlamentum Unionis Europaeae omnium fere consensu sanxit, ne nova cosmetoria, quae animalibus adhibitis examinata essent, in regione Unionis ad mercatum deferrentur. Statutum est etiam, ut, quaecumque cutis curandae remedia in terris peregrinis auxilio bestiarum probata essent, finibus Unionis Europaeae prohiberentur.

SICILIA CUM ITALIA PONTE CONIUNGETUR
Moderatores Italiae freto Siciliensi pontem imponere decreverunt, quo Sicilia cum Italia continenti coniungeretur. Agitur de ponte pensili, qui magnitudine cetera huius generis opera superabit. Erit enim quinque chiliometra longus et in altitudinem supra maris aequor octoginta metrorum erigetur. Politici Sicilienses incepto libenter favent, sed sunt etiam, qui conatum improbent metuentes, quantum detrimentum natura circumiecta ex illa mole capiat.

PERICULUM NATANTIBUS IMMINET
Tantum abest, ut omnes adulti Finni artis natandi periti sint. Quae res sine dubio in causa est, cur anno praeterito plus centum sexaginta nostrates in aqua perierint. Ut numerus eiusmodi mortium deminuatur, apud nos hac aestate actio instituetur, cui nomen "Age prudenter in aquis!". Mensibus enim Iunio et Iulio hominibus in litoribus apricantibus orbes natatorii distribuentur eisque spectacula praebebuntur ad monstrandum, quibusnam rationibus natatores in periculum vocati ex morte eripiantur.

SERENA WILLIAMS VICTRIX EVASIT
Lutetiae Parisiorum certamen teniludii internationale propositum est. In serie feminarum Serena et Venus Williams, sorores Americanae, tanta sollertia pila ludebant, ut de primatu totius certationis inter se dimicarent. Ex hoc certamine superior discessit Serena, soror minor natu. Ludo peracto puella eventu gavisa: "Somnia mea" inquit "vera exstiterunt. Haec victoria tamen mihi dulcacida est, cum eam de sorore mea maiore reportaverim".

Auswahl aus den "Nuntii Latini" vom 7.6.2002 (Radiophonia Finnica Generalis)

redegit Tuomo Pekkanen.

ANNIVERSARIUM REGINAE ELISABETH II

Elisabeth II, regina Britannorum, abhinc quinquaginta annos in thronum ascendit. Anniversarium a Britannis mense Iunio ineunte per quadriduum celebratum est. Sollemnia inaugurata sunt concentu musicae classicae, in palatio Buckinghamiensi dato, cui adfuerunt duodecim milia civium per sortitionem electorum. Prodierunt inter alios cantatrix Kiri Te Kanawa et violoncellista Mstislav Rostropovitch. Die Lunae (3.6.) alius concentus ibidem datus est a cantoribus popularibus Paul McCartney, Eric Clapton, Elton John, Sting multisque aliis.  Postridie eius diei, praesentibus moderatoribus politicis et familiaribus reginae, missa sollemnis in basilica Sancti Pauli celebrata est. Vesperi sollemnia in viis plateisque urbis continuata sunt. Circiter septingenta hominum milia in medium Londinium convenerant, ut pompa festiva, saltationibus aliisque spectaculis diem festum celebrarent. Aeroplana militaria una cum supersonico aereo Concord urbem supervolando reginam salutaverunt. Regina dono accepit autocinetum, nota Bentley, quod octo euronum milionibus aestimatur.
 
LEGES DANORUM DE IMMIGRATIONE

Parlamentum Danorum leges pertulit, quibus immigratio coerceretur. Numerus peregrinorum in Daniam venientium temperabitur et condiciones, quibus asylum petentibus venia commorandi conceditur, fient difficiliores. Licentia perpetuo in Dania manendi peregrino non dabitur, antequam septem annos ibi habitaverit. Antea haec licentia post triennium data est. Neque peregrinus   plenam cautionem socialem nisi septennio in Dania transacto habere poterit. Ius familiam coniungendi tantum homines minime viginti quattuor annorum habebunt. Illud ius antea nullo modo circumscribebatur. Propositum est impedire, ne peregrini fictis matrimoniis concives suos nomine familiarium in Daniam inducant.
 
MILES IN UNIVERSO PULCHERRIMA

In certamine pulchritudinis, quod factum est in Portu Divite (Puerto Rico), palmam et titulum pulcherrimae in Universo feminae reportavit Oksana Fedorova, natione Russica.  Secundum locum obtinuit puella Panamensis, tertium Sinensis, quartum repraesentatrix Africae Australis. Certamen a sescentis fere hominum milionibus televisifice visum est. Oksana Fedorova est puella viginti quattuor annorum, quae artibus militaribus in Academia Petropolitana erudita est. Fieri non potuit, ut victoria eius Russis non placeret. Quin etiam Mihail Gorbatshov, pristinus praesidens Sovieticus, re comperta superbiens censuit Russos in certaminibus omnis generis, non tantum in Olympiis, aemulos superare posse. 
 
FAMES AFRICAE MERIDIANAE IMMINET

Ordines Nationum Unitarum monent famem decem fere milionibus hominum in Africa meridiana proximis mensibus imminere. Pessimas esse condiciones in Malavia, Zimbabuia, Lesotho, Suazilandia. Causam esse, quod proventus agrorum propter difficultates agriculturae, tempestates, discrimen oeconomicum  duobus annis continuis minimus fuerit.

Auswahl aus den "Nuntii Latini" vom 31.5.2002 (Radiophonia Finnica Generalis)

redegit Tuomo Pekkanen.

DE NOVA ELECTRIFICINA NUCLEARI
Parlamentum Finnicum centum septem suffragiis contra nonaginta duo (107-92) decrevit, ut nova electrificina nuclearis aedificaretur. Minister primarius Paavo Lipponen affirmavit Finniam vi nucleari ita augenda de energia in patria suppeditanda curare et nimiam importationem evitare. Ita etiam consilia de pollutione climatica evitanda optime effectum iri.
 
VIR SINE VITA TRANSACTA
In festo cinematographico Cannesiano Finni duo ex septem proemiis hornotinis  reportaverunt. Grande proemium datum est pelliculae, quae inscribitur ”Vir sine vita transacta”, auctore et moderatore Aki Kaurismäki. Praemium optimae actricis obtinuit Kati Outinen, quae in illa pellicula personam agit militis Exercitus salvifici. Iam sex annis ante pellicula Kaurismäkis ”Procul nubes effugiunt”, ubi homines opere destituti describuntur, in certamine Cannesiano fuit. In taeniola ”Vir sine vita transacta” persona principalis est homo tecto carens, qui memoriam perdidit et amore militis salvificae capitur. Palmam auream hornotinam consecuta est Roman Polanski pro pellicula ”Clavista”.
   
NATO ET RUSSIA PACTIONEM FECERUNT
Pactio de communi consilio Russiae et NATOnis in statione militari infra Romam sita die Martis confirmata  est. Praeter praesidentes Bush et Putin, duodeviginti moderatores nationum confoederatarum pactioni subscripserunt. Novo consilio ita creato cooperatio inter NATOnem et Russiam consolidatur. Russia autem internis decretis confoederationis intercedere non potest.
 
PAUPERTAS IN ARGENTINA GRAVESCIT
In Argentina triginta sex miliones hominum habitant, ex quibus duodeviginti miliones in paupertate vivunt. Numerus pauperum his duobus mensibus auctus est quattuor milionibus. Causa paupertatis ita crescentis est celeris inflatio monetalis et inopia quaestus usque aggravescens. Depressio oeconomica in Argentina iam quadraginta septem menses durat.
 
LUDI PEDIFOLLICI MUNDANI
Certamina de principatu mundi pedifollica hodie officialiter in Extrema Oriente ineunt. Ludi fiunt partim in Iaponia, partim in Corea Meridiana. In certamina admissi sunt greges triginta duarum nationum, qui in octo sectiones divisi sunt. Ex quaternis gregibus singularum sectionum initialium bini eliminabuntur. Sedecim greges in ludos sequentes admittentur, sed ea condicione, ut grex cladem passus statim eliminetur. Primus lusus fit hodie inter Senegaliam et Franciam. Zinedine Zidane, qui optimus lusor pedifollicus totius mundi bis creatus est, pede leviter laeso gregi Francorum hodie interesse non potest.
 

Auswahl aus den "Nuntii Latini" vom 24.5.2002 (Radiophonia Finnica Generalis)

redegit Reijo Pitkäranta.

DE BELLO AFGANISTANICO
Copiae internationales bellum in partibus Afganistaniae orientalibus renovaverunt, ut Talibanos et terroristas ordinis al-Qaida illis locis montanis et asperis latentes ad unum omnes opprimerent. Haec expeditio, cui amplius mille milites intersunt, imprimis a cohortibus Britannorum geritur. Americanorum autem est sociis suis praesidium aerium ex helicopteris et aeroplanis bellicis ferre.

NOVAE LUNAE CIRCUMIOVIALES
Uranoscopi Americani, dum in universitate Havaiana caelum observant, undecim novas lunas circumioviales reppererunt. Quo factum est, ut numerus satellitum, quae stellam Iovem circumferuntur, ad undequadraginta ascenderet. Haec corpora caelestia in conspectum adducta magnitudine non excellunt, cum diametro nonnisi binorum aut quaternorum chiliometrorum sint. Instrumentis ad spatium cosmicum perscrutandum illi astronomi non solum telescopio, sed etiam machina photographica digitali eximiae efficacitatis utebantur.

GLACIES EX ANTARCTIDE DEFRACTA
Ex glaciario nomine Ross in ora Terrae Antarcticae sito mons glacialis amplius ducenta chiliometra longus defractus est, cum ex eodem loco paucis diebus ante aliud fragmentum evulsum esset, quod in longitudinem octoginta chiliometra pateret. Credideris illam glaciei liquationem caelo calefacto effectam esse, sed investigatores universitatis Wisconsinianae negant talem rerum conexionem concludi posse.

ECCLESIA S. MARIAE PETROPOLITANA

Die Dominico, quo festum pentecostale celebrabatur, in urbe Petropoli ecclesia Lutherana Sanctae Mariae dedicata rursus in usum sacrum inaugurata est. Rebus divinis procurandis praefuit Aarre Kuukauppi, episcopus Ingriae, adiutus a multis clericis, quorum in numero erat Jukka Paarma, archiepiscopus Finniae. Inter hospites ad caerimoniam invitatos eminebant praesidens Finniae Tarja Halonen et Alexander Jakovlev, praefectus urbis Petropolis.

STOCKHOLMIA 750 ANNOS COMPLET
Hoc anno septingenti quinquaquinta anni ab urbe Stockholmia condita elapsi sunt. Pro conditore eius habetur dux Birgerus, qui anno millesimo ducentesimo quinquagesimo secundo duas epistulas Stockholmiae conscriptas auctoritate sua confirmavit. Prima septimana mensis Iunii Stockholmiae dies sollemnes anniversarii agentur, quo fiet, ut tota urbs sit plena acroamatum, expositionum et spectaculorum diversi generis.

Auswahl aus den "Nuntii Latini" vom 17.5.2002 (Radiophonia Finnica Generalis)

redegit Reijo Pitkäranta.

COMITIA PARLAMENTARIA
Die Mercurii in Nederlandia comitia parlamentaria facta sunt, quorum victores exstiterunt democratae Christiani et populistae extremae dextrae. Omnibus apparet, nisi Pim Fortuyn, dux huius factionis, per insidias occisus esset, extremistas tantam gratiam apud cives inituros non fuisse. Partes autem administratrices cladem acerbam acceperunt, quo fit, ut coalitio socialistarum et fautorum factionis centralis post regimen octo annorum potestate absistere cogatur. Dubium enim non est, quin Jan Peter Balkenende, praeses democratarum Christianorum, novus primus minister Nederlandiae futurus sit.

CONSOCIATIO NATO ET RUSSIA
Russia et Consociatio militaris NATO in suis relationibus mutuis novam aetatem inierunt. Ministri enim utriusque partis, dum in urbe Reykjavik considunt, inter se pacti sunt, ut consilium commune instituerent, in quo Russia eodem fere statu esset ac civitates illius confoederationis sociae. Tabulis huius decreti duabus septimanis peractis Romae subscribetur.

DE TREDECIM PALAESTINENSIBUS
Tredecim Palaestinenses, quos Israeliani pro terroristis habent, cum obsidione ecclesiae Iesu natalis Bethleemicae liberati essent, in Cyprum translati sunt, ubi nunc exspectant, donec sibi nova patria attribuatur. Sex civitates Unionis Europaeae, scilicet Belgium, Graecia, Hispania, Italia, Irlandia et Portugallia, iam nuntiaverunt se paratas esse illos viros ad se recipere. Qualem autem iuris libertatisque condicionem hi exsules in finibus Unionis Europaeae accepturi sint, nondum constat.

CONVENTUS DE IURIBUS INFANTIUM
Ordo Nationum Unitarum in urbe New York sessionem specialem de iuribus infantium habuit. Iam in eo erat, ut conventus praeter spem eveniret, quoniam participes concordiam in consulendo invenire non videbantur. Oratores Civitatum Americae Unitarum adversabantur, quominus mentio de familiis disponendis fieret, cum illa locutio ad abortum approbandum spectaret. Tandem documentum commune editum est, in quo scriptum legitur pueros et puellas contra famem et paupertatem protegendos esse.

QUIS SIT LIBER OMNIUM OPTIMUS
Consociationes in Norvegia litterariae, cum scire vellent, quis esset optimus liber umquam exaratus, centum scriptores adierunt et eos sententiam de hac re rogaverunt. Victoriam suffragii facilem reportavit Don Quijote, opus saeculo septimo decimo a Miguel de Cervantes confectum, in quo de equite contra molendina alata desperanter pugnante narratur. Quo loco quodque opus in hoc certamine positum sit, ex indice centum librorum praestantissimorum apparet, quem Institutum Nobelianum Norvegiae nuperrime divulgavit.

Auswahl aus den "Nuntii Latini" vom 10.5.2002 (Radiophonia Finnica Generalis)

redegit Tuomo Pekkanen.

CHIRAC VICTOR
Comitiis die Dominico factis, Jacques Chirac octoginta duabus centesimis suffragiorum praesidens Francorum in proximum quinquennium creatus est. Adversario candidato Jean-Marie Le Pen circiter duodeviginti centesimae sententiarum datae sunt. Ex civibus ius suffragii habentibus, quorum sunt quadraginta duae miliones, plus octoginta centesimae ad urnas accesserunt. Numquam antea factum est, ut praesidens Francorum tanto suffragiorum numero crearetur. Jean-Marie Le Pen se cladem accepisse confessus est, sed aemulum suum accusavit, quod rationes aetatis sovieticae populum ambiendo adhibuisset. Affirmavit se in comitiis parlamentariis mense Iunio futuris novum proelium suscepturum esse.

EUROPAEI EXITUM COMITIORUM LAUDANT
Complures moderatores nationum Europaearum exitum comitiorum laudaverunt. Romano Prodi, qui praesidet commissioni Unionis Europaeae, praesidenti Chirac gratulatus dixit Francos rursus ostendisse se ad medullam Europae pertinere. Sicut multi alii gratulatores, Prodi politicam separationis extremae dextrae repulsam et confractam esse affirmavit.Pat Cox, praeses parlamenti Europaei, victoriam praesidentis Chirac rationis de intolerantia et extremismo politico triumphum appellavit. Praesidens foederalis Germaniae Johannes Rau telegrammate praesidenti Chirac misso arbitratus est  exitu comitiorum politicam nationalismi et xenophobiae repelli et valores Europaeorum communes confirmari.
Tarja Halonen, praesidens Finniae, censuit populum Francorum suffragiis datis probavisse se valoribus Europaeis defendendis addictos esse, scilicet ad sustinendam democratiam, iustitiam, iura humana. Comitiis Francorum omnes homines monitos esse democratiam per se ipsam non effici, nisi instrumenta ab illa data strenue adhiberentur.

CAEDES POLITICA IN NEDERLANDIA
Pim Fortuyn, politicus Nederlandiensis extremae dextrae, apud stationem radiophonicam Hilversumiensem die Lunae occisus est. Fortuyn, qui immigrationi vehementer obsistebat, apud cives iuniores magna gratia valebat. Ex demoscopiis recentioribus factio eius in comitiis parlamentariis hoc mense futuris quindecim centesimas votorum acceptura esse putabatur. Fortuyn, vir quinquginta quattuor annorum, qui antea professor sociologiae fuerat, a ceteris politicis, saepe austeris et taediosis, differebat. De homosexualitate sua aperte loquebatur, composite vestiebatur, luxuriose habitabat, atriensem et autoraedarium privatum habebat. De lege fundamentali articulum, quo discriminatio vetatur, omnino tollendum esse censebat.

NOVA PYRAMIS REPERTA
Archaeologi fundamenta pyramidis circiter quattuor milium quingentorum annorum haud procul ab urbe Cairo reppererunt, quae est numero centesima decima pyramis in Aegypto reperta. Forsitan aedificata est reginae, nepti aut nurui pharaonis Kheopsis, qui maximam omnium pyramidem in Aegypto aedificandam curavisse traditur.  

Auswahl aus den "Nuntii Latini" vom 3.5.2002 (Radiophonia Finnica Generalis)

redegit Tuomo Pekkanen.

GREX INVESTIGATORUM DISSOLUTUS
Kofi Annan, secretarius generalis Nationum Unitarum, decrevit, ut gregem solveret, cuius erat in res Israelianorum in oppido Jenin gestas inquirere. Ille grex, cui praefectus erat pristinus Finniae praesidens Martti Ahtisaari, Genavae multos per dies licentiam proficiscendi frustra exspectaverat, cum Israeliani novas condiciones ponendo iter illius morarentur.

STRAGES ERFORDIENSIS
Erfordiae, in urbe Germaniae, die Veneris septimanae proximae (26.4.) magna strages facta est. Iuvenis, vultum persona nigra celatus, in Gymnasium a Gutenberg nominatum irruit et sedecim hominibus pistolio automato interfectis denique sibi mortem consciit. Victimae erant tredecim magistri, duo discipuli, una custos publica in auxilium vocata. Strages maior fieri potuisset, nisi magister historiae persona a vultu occisoris arrepta eum detexisset et in vacuum conclave scholare inclusisset. Occisor erat Robert Steinhäuser, discipulus eiusdem gymnasii, qui mense Februario propter absentias illicitas et falsificationes ex schola expulsus erat.

COMITIA FRANCORUM PRAESIDENTIALIA
Alterum suffragium comitiorum praesidentialium apud Francos proximo die Dominico (5.5.) fiet. Lionel Jospin, minister primarius socialista, in primo suffragio cladem passus, cives hortatus est, ut contra Jean-Marie Le Pen suffragando ostenderent se factioni dextrae extremae et periculis inde imminentibus obsistere. In viis urbium Gallicarum magnae civium multitudines contra Le Pen agmine facto incedentes reclamitaverunt. Interfuerunt reclamationibus consociationes politicae partium sinistrarum atque ordines a iuribus humanis et circumiectis tutandis. Ex demoscopiis recentioribus Le Pen vix plus quam quintam fere partem sententiarum sibi conciliabit. Argumenta principalia, de quibus in comitiis agitur, sunt securitas, inopia quaestus, tutela socialis. Uterque candidatus de securitate civium augenda et de sceleribus coercendis locutus est. Chirac quadringenta sexaginta milia occupationum creare pollicetur, Le Pen autem novos carceres condere et immigrationi finem imponere mavult.

IN EUROPA MERIDIANA NASCI FILIOS
Investigatores Melitenses, qui nativitatem quinquaginta annorum statistice scrutati sunt, reppererunt in terris Europae meridianae plures filios nasci quam in Media aut Septentrionali Europa. Nullam causam huius rei ostendere potuerunt. Temperatura caeli differentiam explicare non potest, nam in continenti Americana condicio est adversa. Apud Mexicanos, in meridie degentes, numerus filiarum est multo maior quam infantium masculorum, in Canada autem, regione maxime septentrionali, filii inter neonatos clarissime praevalent. Ergo in regionibus Europae septentrionalibus numerosiores sunt infantes feminae, in partibus Americae septentrionalibus plures nascuntur masculi.

Auswahl aus den "Nuntii Latini" vom 26.4.2002 (Radiophonia Finnica Generalis)

redegit Reijo Pitkäranta.

CHIRAC ET LE PEN VICTORES
Die Dominico in Francogallia primum suffragium praesidenti creando habitum est. Sententiis computatis apparuit praesidentem hodiernum Jacques Chirac earum viginti fere centesimis potitum esse. Haec res nemini mira videbatur, sed quis crederet candidatum partium dextrarum Jean-Marie Le Pen primo ministro Lionel Jospin cladem illaturum? Ita tamen accidit, et inde sequitur, ut cives die quinto mensis Maii decernant, utrum Chirac an Le Pen novus praesidens Francogalliae futurus sit. Jospin, ubi primum se certamine inferiorem discessisse audivit, spe deceptus se de re publica recessurum esse nuntiavit.

OMNIS EUROPA OBSTUPEFACTA
Eventus electionum praesidentialium non solum omnes Francogallos, sed etiam totam Europam ira consternationeque affecit. Constat enim Le Pen, quippe qui sectator extremarum partium sit, societati Unionis Europaeae adversari et odio peregrinorum immigrantium flagrare. Idem vir etiam Iudaeis durum agrestemque se praebuit. Iam metuendum est, ne propter victoriam eius xenophobia et antisemitismus in Europa revirescant.

MUNUS PRAESIDENTIS AHTISAARI
Kofi Annan, secretarius generalis Nationum Unitarum, pristinum praesidentem Finniae Martti Ahtisaari illis triumviris praefecit, quorum est cognoscere, quidnam in campo profugis Palaestinensibus recipiendis in oppido Jenin acciderit. Adhuc enim ambigitur, quot homines inter operationem militarem ab Israelianis ibidem factam vitam amiserint. Postea nuntiatum est Israelianos recusavisse, quominus illud collegium approbarent, cum socii eius rei militaris parum periti essent. His cavillationibus auditis Kofi Annan respondit se paratum esse iter cognitorum in Orientem Proximum duobus diebus differre, sed fieri non posse, ut in collegium nova membra cooptarentur.

CIBI CARCINOGENESIM EFFICIENTES
Investigatores Universitatis Stockholmiensis animadverterunt in cibis amylosis et in graticula assatis magnam copiam inesse veneni nervosi, quod ad carcinogenesim conferret. Omnium periculosissima esse poma terrestria fricta, sed etiam in pane friabili eandem materiam nocivam inveniri.

Auswahl aus den "Nuntii Latini" vom 19.4.2002 (Radiophonia Finnica Generalis)

redegit Reijo Pitkäranta.

POWELL ET ARAFAT CONVENERUNT
Colin Powell, minister Americanus a rebus exteris, praesidentem Palaestinensium Jasser Arafat in oppido Ramallah convenit, ut cum eo deliberaret, quibusnam rationibus discrimen inter Israelianos et Palaestinenses ortum tandem solveretur. Post colloquium amplius tres horas continuatum Powell diurnariis dixit conventum utilem et benignum fuisse. Ad quaestionem autem, essetne ignistitium iam propius, respondere non potuit. Paucis diebus post nuntiatum est Powell re infecta ex Oriente Proximo domum profectum esse.

QUID IN VENETIOLA FACTUM SIT
Hugo Chavez, praesidens Venetiolae amotus, die Dominico ad munus obeundum rediit, cum consilia eorum, qui novis rebus studebant, ad irritum cecidissent. Revertit in urbem Caracas e quadam maris Caribici insula, in quam die Veneris ab exercitu seditioso deportatus erat. Expulsio tamen praesidentis apud plebem tantam indignationem movit, ut coniuratos rerum conversionis brevi paeniteret et Chavez de exilio in palatium praesidentiale revocaretur. Quo facto usurpator Pedro Carmona a potestate, quam tantum per unum diem tenuerat, recedere coactus est.

OPERISTITIUM IN ITALIA GENERALE
Die Martis vita publica totius Italiae omnino fere torpuit propter operistitium generale, quod societates operariorum instituerunt, ut consiliis administratorum de novis laborandi condicionibus adversarentur. Viae et plateae urbium et oppidorum refertae erant hominum vexilla agitantium et primo ministro Silvio Berlusconi reclamitantium. Omnino duae miliones civium in loca media confluxisse existimantur. Commeatus publicus tota Italia constitit, et scholae, mensae nummariae, sedes postales portas suas clauserunt.

GUSMAO NOVUS PRAESIDENS ELECTUS
Victor electionum praesidentialium Timoriae orientalis pronuntiatus est Xanana Gusmao, defensor libertatis patriae suae. Ex eventu suffragiorum apparuit eum votorum octoginta tres centesimas sibi paravisse, cum alter candidatus Francisco Xavier sententiarum septendecim centesimas acciperet. Gusmao iusiurandum praesidentiale die vicesimo mensis Maii (20.5.) dabit, eodem die, quo Timoria orientalis sui iuris fiet.

CURSUS MARATHONIUS LONDINENSIS
Septimana vergente Londinii certamen cursus Marathonii institutum est. Hic eventus athleticus spectatoribus eo maiori oblectamento fuit, quod Khalid Khannouchi Americanus illud iter velocius confecit quam quisquam ante, scilicet duabus horis, quinque minutis et duodequadraginta secundis (2.05.38). Idem fere accidit in serie feminarum, nam non multum afuit, quin Paula Radcliff, athleta e Britannis oriunda, culmen mundanum assequeretur.

Auswahl aus den "Nuntii Latini" vom 12.4.2002 (Radiophonia Finnica Generalis)

redegit Tuomo Pekkanen.

VIOLENTIA IN TERRA SANCTA CONTINUATUR Nationes Unitae, Unio Europaea, USA nec non Russia ab Israelianis flagitaverunt, ut ignistitio facto copias a vicis oppidisque Palaestinorum statim reducerent atque auxilium humanitarium ad eos pervenire permitterent. Etiam Summus Pontifex Ioannes Paulus II violentiam, quae in Terra sancta fieret, intolerabilem esse dixit. Sed ex demoscopiis recens factis circiter octoginta sex centesimae Israelianorum operationibus militaribus favent, quae in ripa Iordanis occidentali fiunt. Causa est terrorismus Palaestinorum continuus, cuius victimae cives Israeliani fuerunt. Die Mercurii huius septimanae (10.4.) octo cives mortui sunt, cum autoraeda longa ictu suicidiario prope Haifam exploderetur.  

MISSA FUNEBRIS REGINAE MATRIS
Missa funebris Reginae matris Britanniae die Martis in Abbatia Vestmonasteriensi celebrata est. Postea feretrum in castrum Vindsoriense vectum est, in cuius capella regina familiaribus praesentibus sepulcro condita est iuxta maritum suum, regem Georgium VI, qui iam ante quinquaginta annos diem obierat supremum.  

Auswahl aus den "Nuntii Latini" vom 5.4.2002 (Radiophonia Finnica Generalis)

redegit Reijo Pitkäranta.

BRITANNIA LUCTU AFFECTA
Elisabeth, mater reginae Britanniae, die Saturni post meridiem de vita decessit centum et unum annos nata. Nuntiatum est filiam reginam apud lectum matris morientis sedisse. Cives Britanni suam pristinam reginam, quae per amplius unum saeculum vixit, pro avia totius nationis habebant, memores eam summum bonum publicum propriis commodis semper anteposuisse. Die Lunae memoria matris reginae in diversis partibus Britanniae salutationibus more militari factis recolebatur.

QUID JASSER ARAFAT DIXERIT
Jasser Arafat, praesidens Palaestinensium, se potius moriturum esse dixit, quam voluntati Israelianorum morem gesturum, ut in exsilium proficisceretur. Idem flagitavit, ut nationes peregrinae iniquitatibus Israelianorum intercederent, qui in urbe Bethlehem non solum in meschitas, sed etiam in ecclesias Christianas impetus facerent. Multi bellatores Palaestinenses in ecclesiam Christi natalem asyli petendi causa confugerunt. Arafat ipse in praetorio suo in oppido Ramallah collocato pertinaciter se continet, quamquam a copiis Israelianis obsessus inopia omnium rerum laborat.

ABU ZUBAYDAH COMPREHENSUS
Abu Zubaydah, unus e fidelissimis administris Osamae bin Laden, in Pakistania comprehensus et magistratibus Americanis traditus est. Ille vir triginta annos natus operationibus ordinis terroristici al-Qaida praefuisse existimatur, cum prior dux Muhammed Atef mense Novembri bombis Americanorum occisus esset. Zubaydah captus ordini Al-Qaida eo maius detrimentum attulit, quod eum nomina omnium fere huius coniurationis sociorum novisse creditur.

OLATUS SOCIETATIS FINNAIR
Finnair, societas aeronautica Finnica, aliquot volatus inter Helsinkium et Moscuam intercedentes hac septimana abolere cogitur. Hoc enim modo Russi directivum ab Unione Europaea editum ulciscuntur, quo prohibetur, ne aeroplana Russorum nimio strepitu volantia in spatium aerium Unionis Europaeae veniant. Qua lege de sonitu aeroplanorum perlata fieri poterit, ut societates aeronauticae Russicae hoc anno etiam undecim milia volatuum revocent necesse sit.

LEA ANTILOPEN ADOPTAVIT
In viridario in Kenia constituto leaena quaedam antilopen pullam sibi alendam suscepit. Res est mira, cum bovidae, in quibus antilopae sunt, leonibus praedae esse consuerint. Illa lea autem hanc adoptionem iam ter fecit, primam anno vergente, secundam die Sancti Valentini, tertiam his diebus. Huc accedit, quod eadem fera adultas quoque antilopas sibi appropinquare sinit.

Auswahl aus den "Nuntii Latini" vom 29.3.2002 (Radiophonia Finnica Generalis)

redegit Tuomo Pekkanen. 

AFGANISTANIA TERRAE MOTIBUS AFFLICTA
Die Lunae in Afganistania septentrionali magna calamitas accidit, cum provincia Baghlan terrae motibus affligeretur. Tota urbs Nahrin corruit, triginta milia hominum domos amiserunt, numerus mortuorum est complurium centenorum. Propter longas siccitates et penuriam cibariorum Baghlan iam ante calamitatem in angustiis versabatur. Pars incolarum regionis  sunt adhuc fugitivi in Pakistania. Si illi domum iam revertissent, numerus victimarum multo maior esset. Auxilium in provinciam calamitosam ab ordinibus humanitariis et tutatoribus pacis portatur, qui sunt in Afganistania. Maxime necessaria sunt tentoria, vestes, cibaria, medicamenta. Difficultates afferunt pessimae condiciones viarum.  

DE PECCATIS SACERDOTUM
Pontifex Romanus Ioannes Paulus II ad quintam feriam hebdomadis sanctae epistulam omnibus mundi sacerdotibus dedit, in qua scripsit mentem suam penitus excussam esse peccatis aliquot sacerdotum, qui gratiam cum sacra ordinatione acceptam prodidissent.  Ita surgere scandala gravia, quae omnes alios sacerdotes bene meritos suspicione obumbrarent.  Verba pontificis ad crimina paedophiliae spectant, quibus ecclesia imprimis in USA hoc tempore gravatur. Novissimus casus septimana praeterita Ludovicopoli Missuriae (Saint Louis) palam factus est, ubi pristinus seminarista omnes catholicos episcopos Americanos accusavit, quod sceleribus sacerdotum occultatis molestatores puerorum protegissent.  

SAFIYA HUSSEINI  CRIMINE ABSOLUTA
Safiya Husseini, femina Nigeriana triginta quinque annorum, mense Octobri capitis damnata erat, quod adulterium fecisset. Nam filiolam pepererat, quae de consuetudine adulterina concepta esse iudicabatur. Supplicium, quod Safiya ex lege islamica solvere debebat, erat lapidatio. Illa poena apud nationes peregrinas quam maxime reprehendebatur. Die Lunae iudicium superius urbis Sokoto, quae sita est in Nigeria septentrionali,  Safiyam omnibus criminibus absolvit. Patrem filiolae fuisse pristinum Safiyae maritum neque ullum adulterium factum esse. Supplicium ideo quoque legi contrarium fuisse, quod lex islamica in illa regione eo tempore nondum valeret, quo filiola conciperetur.  

TELEPHONULUM PERICULUM
Qui autovehiculum gubernans telephonulo gestabili  loquitur, commeatum magis periclitatur quam gubernator ebrius. Experimentis in simulatro factis investigatores Britanni animadverterunt reactiones eorum, qui gubernantes telephonulo utebantur, dimidio lentiores esse quam alioquin. Qui alcoholum sumpserant, tantum tricenis centesimis lentius reagebant quam gubernatores sobrii.

SOCIETAS TABACARIA DAMNATA
Philip Morris, societas tabacaria Americana, damnata est, ut propinquis feminae, cancro pulmonis mortuae, centum quinquaginta miliones dollarorum solveret. Iudices censebant societatem fraudulenter egisse, cum sigarilla leviora eis commendavisset, qui fumificationem deponere vellent.  

Auswahl aus den "Nuntii Latini" vom 22.3.2002 (Radiophonia Finnica Generalis)

redegit c

CONVENTUS URBIS MONTERREY
In urbe Monterrey, quae in Mexico est, hac septimana magnus conventus internationalis invitatu Nationum Unitarum habetur ad deliberandum, quibusnam rationibus paupertas populorum in orbe terrarum deminuatur. Participes e primoribus sexaginta fere civitatum constant, sed et Argentaria mundana et Ordo a commercio mundano legatos in coetum miserunt. Moderatores Unionis Europaeae et praesidens Civitatum Americae Unitarum iam polliciti sunt se auxilium populis egentioribus praebitum aucturos esse.

STATUS IN ITALIA NECESSITATIS
Administratores Italiae, cum immigrantes illegales finibus prohibere vellent, civitati statum necessitatis indixerunt. Quod consilium ceperunt, postquam paene mille profugi Curdi e Libano in Siciliam navi vix gubernabili illegaliter pervenerunt. Novum consultum magistratibus et vigilum cohortibus maiorem auctoritatem eos peregrinos coercendi dat, qui oram Italiae sine permissu petere student.

VETUS ARX INCARUM REPERTA
In Andibus Peruvianis oppidum deperditum repertum est, quod aetate Incarum floruisse videtur. Prima ruinarum vestigia abhinc tres annos sub oculos cuiusdam archaeologi Britanni in illa regione ambulantis venerunt. Haec arx in angusto montis iugo constituta et in altitudine plus trium chiliometrorum sita unum ex ultimis praesidiis fuisse existimatur, unde Incae saeculo sexto decimo expugnatoribus Hispanis resistere conabantur.

MAGNUS SALMO EFFECTUS
In Nova Zelandia biotechnologi genis mutatis salmonem novae indolis effecerunt, qui in pondus ducentorum quinquaginta chiliogrammatum crescere potest. Quaedam civitates Americae septentrionalis iam permittunt, ut talia animalium monstra in stagnis saginentur, dummodo ne aquae illarum piscinarum fontibus naturalibus commisceantur. Qui autem eius generis pisciculturae adversantur, solliciti sunt, quidnam futurum sit, si gena nociva in circumiecta irrepserint.

Auswahl aus den "Nuntii Latini" vom 15.3.2002 (Radiophonia Finnica Generalis)

redegit Reijo Pitkäranta.

MEMORIA CLADIS AMERICANAE
Die Lunae annus dimidiatus ab ictu terroristico in America septentrionali facto praeterierat. In urbe Washington et quidem in hortis Aedium Albarum auspiciis praesidentis George Bush sollemnitas acta est ad memoriam eorum trium fere milium hominum recolendam, qui clade diei undecimi mensis Septembris mortui erant. Novi Eboraci autem silentium triste bis habitum est, scilicet eis ipsis temporis momentis, quibus utraque turrium geminarum aedium World Trade Center ingenti aeroplanorum impetu corruerat. Vespere facto in situ illarum turrium monumentum photoelectricum lucere coepit. Quod opus e duabus columnis lucis constans in altitudinem sesquichiliometri assurgit.

MUGABE ELECTIONUM VICTOR
In Zimbabua septimana vergente comitia praesidentialia facta sunt. Quorum victor pronuntiatus est Robert Mugabe, praesidens hodiernus, quippe qui amplius quinquaginta sex centesimas sententiarum sibi paravisset. Quae cum ita sint, non est necesse alterum suffragium instituere. Sed Morgan Tsvangirai, candidatus partium oppositarum, cum nonnisi quadraginta duabus votorum centesimis potitus esset, electiones illegales fuisse contendit et recusavit, quominus eventum earum approbaret. Etiam observatores Norvegi autumaverunt illa comitia multis vitiis laborasse.

ARAFAT LIBERTATEM RECEPIT
Jasser Arafat, praesidens Palaestinensium, qui inde a mense Decembri domo exire vetitus erat, libertatem in Ripa occidentali et Gaza se movendi recepit, quamquam itinera peregrina nonnisi permissu Israelianorum facere sinitur. Moderatores Israeliani custodiam eius lenire constituerunt, cum intellexissent eum imperavisse, ut occisores ministri Israelis a re viaria ad unum omnes comprehenderentur.

DE CUNICULO MONTIS ALBI
Cuniculus sub Montem Album actus, quo Francogallia cum Italia coniungitur, commeatui autocinetorum privatorum denuo apertus est. Clausus erat tribus annis ante, cum in illo meatu submontano incendium funestissimum conflatum esset, quo undequadraginta homines vitam amiserunt. Quando autem vehicula oneraria quoque licentiam per eundem cuniculum transeundi acceptura sint, nondum constat.

HELSINKIUM, URBS PURISSIMA
Helsinkium loco sexto positum est in investigatione globali, qua magnae orbis terrarum urbes inter se comparabantur ad cognoscendum, quali vitae commoditate et iucunditate uterentur. Insuper apparuit Helsinkium urbem omnium in Europa purissimam esse. Inter res, quae in hac inquisitione respiciebantur, erant criminalitas, munditia, bonitas scholarum et curae valetudinis nec non facultates otii agendi.

Auswahl aus den "Nuntii Latini" vom 8.3.2002 (Radiophonia Finnica Generalis)

redegit Tuomo Pekkanen.

HELVETIA MEMBRUM NATIONUM UNITARUM
In Confoederatione Helvetica suffragium populi factum est, in quo maior pars civium voluit, ut Helvetia membrum Nationum Unitarum fieret. Ex viginti tribus cantonibus duodecim societati favebant, undecim contra eam suffragia dederant. Quamquam Helvetia antea membrum Nationum Unitarum non fuit, tamen iam diu actionibus illarum multimodis interfuit.  

SHARON A JOSPIN REPREHENDITUR
Lionel Jospin, minister Franciae primarius, collegam suum Israelianum Ariel Sharon durissimis verbis vituperavit. Politicam illius in irritum cecidisse illumque magnam partem responsalem esse, quod circulus violentiae et ultionis in Proximo oriente in dies peior fieret et homines omnem spem abiecissent. In eo esse, ut societas Palaestinensium dissolveretur, cum nemo statum rerum moderaretur. Praesidentem Arafat esse exclusum et potestate ipsius uti nequire. Discrimen ignistitio facto politice solveretur. Nationes Europaeae, una cum Americanis, moderatoribus Israelianis et Palaestinensibus dicerent: ne longius procederent in fundula, ubi iam essent.

RECLAMATIONES CONTRA BERLUSCONI
Complura dena milia hominum in urbe Roma contra politicam Berlusconianam reclamitaverunt. Illa reclamatio maxima erat, postquam Silvio Berlusconi mense Iunio anni praeteriti regimini Italiae praesidere coepit. Causa erant renovationes a regimine factae, praesertim propositum quoddam regiminis in parlamento nuper probatum. Ex illo proposito Berlusconi, quamvis sit primus minister, imperium suum oeconomicum adhuc moderari possit. Delegati oppositionis politicae, cum de ea re suffragium fieret, ex aedibus parlamenti reclamitantes exierant. Berlusconi moderatur tria retia televisifica, quae maxima sunt in Italia, praeterea societates cinematographicas, sedes praeconiis divulgandis magnamque domum editoriam.

DE REBUS COLUMBIANIS
Dux bellatorum clandestinorum, qui contra regimen Columbiae pugnant, deprehensus et captus est. Vir ille, nomine José Parmenides Castro, operationibus seditiosorum praeerat et actiones eorum pecuniis suis sustentabat. Castro, ut custodes publici Columbiani rettulerunt, captus est in urbe Bogota, quod caput est Columbiae. Castro suspectus habetur, quod complures homines rapiendos curaverit. Accusabitur etiam de pecuniis repetundis et seditione. Alius quoque dux seditiosus, Salvador Vargas appellatus, ab exercitu Columbiano interfectus esse narratur. In operationibus militaribus contra seditiosos susceptis septem obsides liberati sunt.

DE PERICULIS CIRCUMIECTORUM
Ordo mundi sanitaria (WHO) aestimat trinas miliones parvulorum annuatim periculis circumiectalibus perire. Maior pars mortium apud nationes egentiores fit, maxime propter aquam impuram, inquinationem aeris interni et venena in circumiecta emissa. In causa sunt etiam calamitates vehiculares, incendia, pessima hygiene. Relatio ordinis in conventu Bancokii facto exposita est.

Auswahl aus den "Nuntii Latini" vom 1.3.2002 (Radiophonia Finnica Generalis)

redegit Tuomo Pekkanen.

NATIONES UNIONIS OPORTET SINT AEQUALES Tarja Halonen, praesidens Finniae, monuit necesse esse, ut  membra Unionis Europaeae inter se essent aequalia. Unionem positam esse in valoribus democraticis. Sibi persuasum esse democraticas traditiones etiam postea in Unione Europaea pro fundamento haberi. Finniam esse quidem parvam terram sed nullo modo minorem quam fuit, antequam membrum Unionis fieret.  

NOVUM DE PACE CONSILIUM
De pace in Proximo oriente facienda novum consilium ab Abdullah, principe hereditario Arabiae Saudianae, adumbratum est. Ex illo consilio Israeliani, relicta Gaza et ripa Iordanis occidentali, in fines, quos ante bellum sex dierum anni millesimi nongentesimi sexagesimi septimi habuissent, se reciperent. Nationes autem Arabicae Israelem civitatem agnoscerent, consuetudines cum illa diplomaticas iungerent, de securitate illius fidem praestarent. Etiam commercium in statum normalem redigeretur. Murus lamentationis Hierosolymitanus et pars Iudaica veteris urbis Hierosolymorum Israeli relinquerentur.  
Ariel Sharon, minister Israelis primarius, de novo pacis consilio colloqui paratus esse dicitur. Radiophonia Israelitica narravit illum a regimine Americanorum petivisse, ut sibi facultatem cum principe Abdullah communicandi pararet. Colin Powell, minister a rebus exteris Americanorum, propositum Arabiae Saudianae  firmum gradum faciendae pacis iudicavit.  

FRAUDES ATHLETARUM
Olympia hiemalia, in urbe Lacus Salsi celebrata, septimana vergente ad finem pervenerunt. Ludi opinione fere omnium feliciter facti sunt, quamquam probationibus sanguinis et urinae palam factum est, quod  aliquot athletae medicamenta vetita ad vires augendas et reficiendas ante certamina sumpserant. Nomen medicamenti a quibusdam nartatoribus sumpti est darbepoetinum, quod paucis mensibus ante ludos in usum receptum erat. Excellebant inter fraudatores Johannes Mühlegg, origine Germanus sed natione Hispanus, nartator in tribus certaminibus victor, atque Larisa Lazutina et Olga Danilova, nartatrices Russiae. 

Ut fieri solet, omnes athletae fraudis accusati innocentiam suam asseverabant et methodos rationesque probationis dubias falsasque esse accusabant. Mühlegg, qui antea usum excitationis drogariae vehementer damnaverat, mirari se aiebat, quomodo fieri potuisset, ut medicamentum in corpus suum intraret. Russi autem se victimas persecutionis fuisse dixerunt. Victor Mamatov, moderator gregis Russorum, Americanos accusabat, quod rationibus politicis inducti iniuste contra concives suos egissent. Russos in ludis contemptos et discriminatos esse, quod nimis multa nomismata consecuti essent. Americanos quibusvis modis victoriis feminarum Russicarum finem imponere voluisse.  

Auswahl aus den "Nuntii Latini" vom 22.2.2002 (Radiophonia Finnica Generalis)

redegit Reijo Pitkäranta.

MAGNA CALAMITAS IN AEGYPTO
In Aegypto amplius trecenti homines mortui sunt incendio funesto in tramine communi conflato, quod Cairo abierat et in urbem Luxor versus vehebatur. Clades eo maior erat, quod tramen igne concepto non statim constitit, sed vectores, ut vitam servarent, de curribus per fenestras desilire coacti sunt. Incendium ex displosione authepsae cibariae initium cepisse creditur.

QUID BUSH IN IAPONIA DIXERIT
Praesidens George Bush, dum civitates Asiaticas lustrat, in parlamento Iaponiae verba fecit confirmans Civitates Americae Unitas fidem in securitate Asiae praestanda servaturas esse. Idem promisit suos milites, si opus esset, ad varias minas avertendas ’vi Americana’ usuros esse. Iapones laudabat, quod in bello Afganistanico suppetias tulissent pollicitus se pro sua parte renovationibus in Iaponia oeconomicis omnimodis sustentaturum.

SANCTIONES ZIMBABUAE IMPOSITAE
Ministri Unionis Europaeae a rebus exteris praesidenti Zimbabuae Roberto Mugabe et adiutoribus eius sanctiones imponendas esse decreverunt. Causa punitionis est, quod Mugabe in comitiis praesidentialibus praeparandis leges democraticas violasset et probihuisset, quominus observatores Unionis Europaeae in Zimbabuam libere venirent. Timetur tamen, ne tutela civium Europaeorum in illa terra commorantium propter sanctiones periclitetur.

CONVENTUS CONTRA TABACUM ACTUS
Ministri et summi magistratus sanitatis ex una et quinquaginta civitatibus Europae Varsoviam congregati deliberabant, quibusnam rationibus fumificatio deminueretur. Constat enim tabacum quotannis plus decies centenis milibus hominum mortem inferre. Consilium de eadem re abhinc quinque annos captum compluribus nationibus quidem fructui fuit, sed nusquam eventus ad spem responderunt. Adhuc aliquibus Europae terris usu venit, ut tabacum publice commendari liceat.

COPIAE PISCIUM DEMINUUNTUR
Multa genera piscium in Oceano Atlantico septentrionali decem annis proxime futuris omnino exhaurientur, nisi capturae praedatoriae finis factus erit. In maximo periculo sunt astacus, gadus, solea et thynnus, ut docent thalassobiologi, qui in urbe Bostonia conventum terrarum orbis egerunt. His quinquaginta annis copiae piscium duabus partibus decreverunt et praedae ad dimidium redactae sunt quamvis instrumentis piscatoriis melioribus factis.

Auswahl aus den "Nuntii Latini" vom 15.2.2002 (Radiophonia Finnica Generalis)

redegit Tuomo Pekkanen

IUDICIUM CONTRA MILOSEVIC COEPTUM
In tribunali Hagensi iudicium contra Slobodan Milosevic, pristinum Iugoslaviae praesidentem, die Martis incohatum est. Milosevic accusatur de legibus belli violatis et sceleribus contra humanitatem in Bosnia, Croatia, Cosovia commissis. In bellis Balcanicis, quae paene decennium duraverunt, complura centena hominum milia perierunt. 

Milosevic aliique summi moderatores Serborum coniurationis accusantur, quae ad id spectavit, ut musulmani et Croatae in Bosnia habitantes expellerentur aut interimerentur. In Bosnia ducenta quinquaginta milia incolarum vitam amiserunt, in Croatia trecenta triginta milia civium domiciliis suis expulsi sunt. Praeterea Milosevic et eius asseculae responsales habentur, quod octingenta milia Albanorum in Cosovia habitantium maxime in Albaniam aut Macedoniam confugere coacti sunt. Quibus sceleribus denique effectum est, ut Nato rebus Balcanicis interveniret et Serbi copias suas ex Cosovia abducerent. Milosevic in iudicio contumaciter se gessit, innocentiam suam asseverabat atque, ut iam in sessionibus ante ipsum iudicium habitis, negavit tribunal Hagense esse legale. Carla del Ponte, accusatrix principalis, dixit se trecentos testes collegisse, quibus Milosevic reus genocidii esse convinceretur. Iudicium duos annos duraturum esse existimatur.

PUTIN AMERICANOS MONUIT
Vladimir Putin, praesidens Russiae, Americanos monuit, ne bellum contra Iraquiam temere susciperent. Cooperationem internationalem non esse subaestimandam. Casum Iraquiae esse quidem ambiguum, sed illud problema ab una civitate solvi non posse. Nullam esse causam usus inter nationes consuetos neglegendi, cum de Iraquia ageretur.

OLYMPIA HIEMALIA FIUNT
Olympia hiemalia, numero undevicesima, his septimanis in Urbe Lacus salsi (Salt Lake City) Americae septentrionalis aguntur. Ludi inaugurati sunt a praesidente George W. Bush, ignis Olympicus accensus est a grege Americano hoccei glacialis, qui grex in Olympiis viginti duobus annis ante factis aureum nomisma consecutus erat. Finni iam secundo ludorum die victoriam duplicem reportaverunt. Nam in coniuncto certamine, quod ex desultura nartatoria et nartatione quindecim chiliometrorum constat, Samppa Lajunen evasit primus, Jaakko Tallus secundus. Alterum nomisma aureum Finnis portavit Janne Lahtela, qui die Martis in descensu per tumulos acrobatico  ceteros superavit.

PRINCIPISSA MARGARETA OBIIT
Margareta, principissa Britanniae, die nono mensis currentis in valetudinario Londinensi diem obiit supremum. Pridie eius diei impetu cardiaco affecta erat. Margareta, soror reginae Elisabeth, iam diu valetudine laboravit. Funus principissae proximis eius praesentibus fit hodie in capella Sancti Georgii Castelli Windesorensis.

Auswahl aus den "Nuntii Latini" vom 8.2.2002 (Radiophonia Finnica Generalis)

redegit Tuomo Pekkanen

FORUM MUNDI OECONOMICUM
Forum Mundi Oeconomicum (WEF) mense Ianuario in Februarium vergente Neo-Eboraci seminarium egit. Moderatores oeconomici iudicabant recessionem brevi finem habituram esse. Hoc anno in USA incrementum oeconomicum fore unius et dimidiae centesimae, in Europa aliquanto minus, in Iaponia autem oeconomiam adhuc recessuram esse. In eodem seminario divulgata est relatio, in qua res circumiectalis centum quadraginta duarum nationum recensetur. Primum locum in hac comparatione obtinet Finnia, quam sequuntur Norvegia et Suetia. Ex nationibus Unionis Europaeae ultimi sunt Belgae, inter omnes ultimum locum tenet Confoederatio Phylarchiarum Arabicarum. Finnia praesertim tribus  rebus excellit. Pollutio aeris et aquae ad minimum redacta est, emissiones gasales tepidariorum sunt exiguae, et pro tertio, problemata circumiectorum efficaciter a moderatoribus tractantur et solvuntur. Idem Forum (WEF) mense Octobri investigationem divulgavit, ex qua Finnia etiam competitivitate primum in orbe terrarum locum obtinet.

DEMENTIAM ALCOHOLO PROHIBERI
Investigatione in Nederlandia per sexennium facta compertum est dementiam usu alcoholi moderato prohiberi. Idoneam portionem ad memoriam conservandam ex binis potiunculis pro singulis diebus constare. Inter varia potionum alcoholicarum genera nullam esse differentiam.  Periculum dementiae abstemiis esse quadraginta centesimis maius quam alcoholi potoribus moderatis.

CONVENTUS ALF MATRITENSIS
(www.tekhnai.es/alfconventus)
Decimus conventus internationalis cademiae Latinitati fovendae, qui Salmanticae erat futurus, Matritum translatus in aedibus Universitatis Sancti Pauli (CEU) a die II usque ad diem VII mensis Septembris huius anni habebitur. Conventui praesidebit Bruno Luiselli, praeses ipsius Academiae, moderator erit Antonius Capellán García, architectus Matritensis. Argumenta principalia in Conventu tractanda erunt duo. Pro primo: De lingua Latina communicationis inter Europaeos instrumento a XV usque ad XX saeculum. Pro secundo: De inceptis hodiernis institutionis Latinae renovandae et vivae Latinitatis fovendae. Universi fautores Latinitatis ad Conventum Matritensem grati acceptique venietis! 

Auswahl aus den "Nuntii Latini" vom 1.2.2002 (Radiophonia Finnica Generalis)

redegit Reijo Pitkäranta.

CALAMITAS LACUPOLITANA
Lacupoli, in urbe capite Nigeriae, armamentarium e causa ignota displosum est, quo facto multa centena hominum vitam amiserunt terrore panico ex calamitate orto. Si actis diurnis localibus fidem habemus, numerus mortuorum etiam duorum milium est. Praesidens Olusegun Obasanjo illam cladem pro tragoedia nationali habet et toti civitati iustitium edixit.

QUID GEORGE BUSH DIXERIT
Praesidens George Bush apud Congressum orationem annuam habuit, in qua considerabat, qualis esset status nationis. Monuit longe abesse, ut bellum contra terroristas illatum iam compositum esset, nam periculum terrorismi populo Americano adhuc imminere. Inveniri multa dena milia terroristarum, qui in diversis orbis terrarum partibus, praesertim in Oriente Proximo et in Philippinis, insidias suas expedite machinarentur.

DE SYSTEMATE OECOLOGICO
Systema oecologicum multarum regionum montanarum in periculum vocatum est, ut apparet ex investigatione recens instituta. In maximum discrimen venerunt Alpes nec non Mons Imavus, Caracorumi sive Montes Nigri et Caucasus Indicus, quae montium iuga ex Asia meridiana usque ad Afganistaniam extenduntur. In causis, cur circumiecta horum montium continuorum magis atque magis erodantur, sunt bella pollutiones, caesiones silvarum, res metallica et agricultura.

ASTRID LINDGREN DEFUNCTA
Astrid Lindgren, clarissima scriptrix Sueta, Stockholmiae diem supremum obiit anno aetatis suae nonagesimo quarto. Operibus suis, quorum amplius centum composuit, imprimis apud pueros et puellas magnam gratiam iniit, cum vitam eorum optime perspiceret et stilo lepidissimo et facetissimo describeret. In patria sua Astrid Lindgren, utpote conscientia quaedam totius nationis, plurimi aestimabatur.

TURUNEN, SENATOR IAPONIAE
Martti Turunen, vir natione Finnus unum et sexaginta annos natus, est primus omnium occidentalium, cui contigit, ut senator parlamentaris Iaponiae fieret. Ille, cum iuvenis viginti sex annorum munere missionarii functus in Iaponiam profectus esset, tanta eius delectatione captus est, ut sua familia domum remissa sibi in Iaponia novum domicilium collocaret. Civitatem autem Iaponiae accepit anno millesimo nongentesimo undeoctogesimo.

VARENNE, EQUUS VELOCISSIMUS
In hippodromo Vincennensi Lutetiae Parisiorum certamen tolutarium Prix d’ Amerique nuncupatum institutum est, quod omnium huius generis certaminum durissimum iudicatur. Ceteris tolutariis multo pernicior evasit equus Italicus nomine Varenne, de cuius victoria Finni quoque optime meriti erant, cum exercitor eius esset Jori Turja et curatores Iina Rastas et Esa Myllymäki.

Auswahl aus den "Nuntii Latini" vom 25.1.2002 (Radiophonia Finnica Generalis)

redegit Reijo Pitkäranta.

ERUPTIO VULCANI FUNESTISSIMA
Mons ignivomus nomine Nyiragongo, qui in partibus Congoae orientalibus situs est, nuperrime magna vi erupit ex faucibus suis tantam lavae massam eructans, ut multa dena hominum in urbe vicina Goma habitantium interirent et ingens civium numerus tecto privaretur. Iam ordines auxiliarii e diversis civitatibus in regionem calamitatis frumentum et commeatus subvehendos curant.

DE AFGANISTANIA ADIUVANDA
Legati unius et sexaginta civitatum et oratores viginti fere ordinum internationalium in urbe Tokio conventum de auxilio Afganistaniae suppeditando egerunt. Participibus placuit, ut huic nationi tot et tantis malis afflictae pecunia quinque miliardorum euronum praestanda succurreretur. Moderatores Finniae promiserunt se decem miliones euronum ad Afganistaniam reaedificandam daturos esse. Propositum est, ut de pecunia Finnorum imprimis condiciones vitae feminarum et infantium meliores redderentur et minae de terra removerentur.

PAX IN MONTE LEONINO FACTA
Bellum civile, quod civitatem Montem Leoninum per decem annos vexavit, tandem compositum esse videtur. Nuntiavit praesidens Ahmed Tejan Kabbah res iam pacatas esse, cum moderatores civitatis cum ducibus bellatorum tectorum consensissent, ut arma deponerent. Hoc bellum domesticum civibus multo sanguine stetit, nam proeliis commissis saltem quinquaginta milia hominum vitam amisisse existimantur.

DE MAGNO OPERE SINENSIUM
Sinenses in civitate sua aggerem in orbe terrarum omnium maximum exstruere coeperunt. Cum tantam molem aliter perfici non posse arbitrarentur, magnam multitudinem urbium et oppidorum, quae illi operi incohando obstarent, displodendo delere decreverunt. Quo factum est, ut amplius decies centena milia civium domo sua relicta sibi novas sedes quaerere cogerentur.

Auswahl aus den "Nuntii Latini" vom 18.1.2002 (Radiophonia Finnica Generalis)

redegit Tuomo Pekkanen.

MUSHARRAF EXTREMISTAS COERCET
Pervez Musharraf, praesidens Pakistaniae, quinque ordines musulmanorum extremistarum in Pakistania agere vetuit. Duo ex illis ordinibus sunt responsales caedis, in parlamento Indiae mense Decembri factae. Post illam caedem non multum afuit, quin bellum in Casmiria inter Indiam et Pakistaniam oreretur. Nihilo minus praesidens Musharraf nuntiavit Pakistaniam cives suos de facinoribus terroristicis suspectos tribunalibus peregrinis damnandos tradituram non esse. Idem, quamvis terrorismum damnavisset, promisit Pakistanianos eos greges musulmanorum et animo et diplomatice adiuturos esse, qui administrationi Indorum in Casmiria resisterent. Et Russi et Americani nuntiaverunt se contentos esse, quod Musharraf greges extremistarum exstirpare vellet. Id fore fundamentum, quo tensio inter Indos et Pakistanianos relaxaretur. Post sermonem praesidentis magistratus Pakistaniae iam circiter duo milia extremistarum  deprehenderunt et sedes eorum clauserunt.  

SCHOLAE PUELLARUM AFGANARUM
Caburiae, in urbe principe Afganistania, quindecim scholae puellarum hac septimana sunt apertae.  Illae scholae pecuniis ex Germania ministratis renovatae et calefactione ornatae sunt Quindecim milia quingentae puellae se scholas frequentare velle nuntiaverunt. Magistrae, quae puellas docent, sunt quadringentae triginta. Inter regimen Talibanorum scholae puellarum vetitae erant.  

TALIBANI IN CUBAM DEPORTANTUR
Talibani et bellatores ordinis al-Qaeda, in Afganistania capti, in stationem militarem Guantanamensem, in litore Cubae sitam, ab Americanis transferuntur. Captivi singuli in itinere ad sedes suas sunt catenati et a binis vigilibus custoditi. De iudiciis, in quibus de facinoribus eorum quaeratur, nondum constitutum est.  

BERLUSCONI DE LUPANARIBUS
Silvio Berlusconi, primus minister Italiae, iras et discordias provocavit, cum de lupanaribus in Italia restituendis considerandum esse dixit. Vias publicas, quae prostitutione turparentur, purgari posse, si lex anni 1958 de lupanaribus claudendis abrogaretur. Claudio Scajola, minister rerum interiorum, statim se primo ministro assentire nuntiavit. Alii autem novo proposito vehementer resistunt: Lupanaribus lege comprobatis ipsam civitatem fore sociam illicitae pecuniarum exactionis. Gloria Buffo, delegata parlamentaris, negavit primi ministri esse meretrices viarum verbis aggredi, cum in tribus canalibus televisificis eius ipsius cotidie feminae vestibus exutae viderentur.  

Auswahl aus den "Nuntii Latini" vom 11.1.2002 (Radiophonia Finnica Generalis)

redegit Reijo Pitkäranta.

RERUM IN PROXIMO ORIENTE STATUS
In Proximo Oriente post intermissionem trium septimanarum novae violentiae ortae sunt. Die Iovis mane duodecim currus loricati Israeliani cum machinis aggerandi in urbem Rafah regionis Gazae meridianae penetraverunt et habitationes Palaestinensium destruere coeperunt. Copiae Israelianae sclopetis automatariis armatae invasoribus praesidio erant. Illa excursione Israeliani eum impetum ulcisci voluerunt, quem Hamas, ordo Palaestinensium extremistarum, in stationem eorum militarem pridie eius diei fecerat cum interitu quattuor Israelianorum et amborum aggressorum.

BERLUSCONI, MINISTER MULTIPOTENS
Silvio Berlusconi, primus minister Italiae, sibi etiam negotia civitatis extera interim curanda suscepit. Quod consilium cepit, postquam minister Renato Ruggiero, assiduarum in regimine de politica Europaea rixarum pertaesus, se id munus deponere nuntiavit. Ruggiero in eis ministris erat, qui euronem, monetam Unioni Europaeae communem, in usum receptum esse valde gaudebant, cum tres alii ministri illam renovationem nummariam parvi penderent.

DUO CAPITA CULTURALIA EUROPAEA
Unio Europaea duas urbes elegit, quae hoc anno capita cultus civilis Europaea nuncupari mererentur. Hae sunt Salamantica Hispanorum et Brugae, urbs Belgarum in Flandria occidentali sita. Salamantica, cuius mentionem iam Livius, antiquus rerum Romanarum scriptor, in libris suis fecit, ob monumenta praeclara tantam sui admirationem habet, ut parva Roma vulgo appelletur. Brugae autem ’Venetiae septentrionales’ vocari solent, quod mediae huius urbis partes crebris canalibus abundant.

VICTOR HUGO ANTE 200 ANNOS NATUS
Mense Februario proxime futuro ducenti anni acti erunt, cum Victor Hugo, scriptor celeberrimus Francogallus, in urbe Vesontione natus est. Acta diurna Francogallica iam hac septimana memoriam tanti viri celebrare coeperunt autumantes eum inter primos pecuniae communis Europaeae fautores fuisse. Illum enim anno millesimo octingentesimo quinquagesimo quinto (1855) proposuisse, ut tota Europa una et eadem moneta continentali uteretur omnibus aliis nummorum generibus de medio sublatis.

Auswahl aus den "Nuntii Latini" vom 4.1.2002 (Radiophonia Finnica Generalis)

redegit Tuomo Pekkanen.

EURO IN USUM RECEPTUS
Inito novo anno circiter trecentae miliones Europaeorum, qui in duodecim terris Unionis Monetariae Europaeae habitant, pecuniis suis nationalibus depositis chartas nummarias monetasque communes in usum receperunt. Nova pecunia est euro, qui in centesimas divisus est. Apud plerosque populos Unionis pecunia nationalis iuxta eurones usque ad finem mensis Februarii adhiberi poterit. Transitus in usum euronum fuit ingens operatio, nam anno vergente quinquaginta miliarda nummorum et quattuordecim miliarda et dimidium chartarum nummariarum publice emissa sunt. In novis chartis nummariis portae, ianuae, fenestrae pontesque delineata sunt, quae nusquam exstiterunt sed varias aetates variaque genera architectonica praeferunt. 
Kofi Annan, secretarius generalis Nationum Unitarum, prospicientiam laudavit, qua duodecim nationes Europaeae, unitatem contra dissolutionem defendentes, novam pecuniam assumerent. Testimonium esse politicae, quae in unitatem et integrationem niteretur, quod nationes, olim inimicitiis disiunctae, in usum pecuniae communis transeuntes viribus unitis opulentiam peterent.

ANARCHIA ARGENTINAE IMMINET
Senator Eduardo Duhalde a parlamento praesidens Argentinae designatus est, qui usque ad mensem Decembrem anni bismillesimi tertii in munere maneret. Antecessor eius, Adolfo Rodrigues Saa, post unam tantum septimanam tumultibus ortis a praesidentatu discedere coactus est. In his decem diebus Duhalde est iam quintus Argentinae praesidens iuratus. Perturbatio politica in Argentina orta est, cum praesidens Fernando de la Rua propter discrimen oeconomiae publicae munus reliquisset. Cives timent, ne pecunias in argentariis depositas amittant, illi autem, qui debita peregrina habent, propter devaluationem imminentem sollicitantur.  
Duhalde, vir sexaginta annorum, est factionis peronistarum sed etiam apud ceteras partes politicas magna gratia valet. In oratione inaugurali pollicitus est regimen unitatis nationalis constituere, quo adiuvante chaos oeconomicum et politicum compesceretur.  

Auswahl aus den "Nuntii Latini" vom 28.12.2001 (Radiophonia Finnica Generalis)

redegit Reijo Pitkäranta.

KARZAI IUS IURANDUM DEDIT
Hamid Karzai, primus minister Afganistaniae temporarius, die vicesimo secundo mensis Decembris ius iurandum officiale dedit. Hoc factum est sollemnitate in urbe Cabulo instituta, cui interfuerunt duces tribuum seniores, legati diversarum civitatum et milites Americani magnae auctoritatis. Karzai, dum civibus verba facit, monuit Afganistaniam plus viginti annos bello vexatam plenam esse ruinarum, quam ob rem ad eam reaedificandam celeri auxilio internationali opus esset. Idem pollicitus est iniurias a Talibanis populo illatas correctum et iura feminarum in integrum restitutum iri.

QUID PONTIFEX MAXIMUS DIXERIT
Pontifex Maximus Iohannes Paulus II maiorem partem orationis suae nataliciae omnibus parvulis angustiis belli pressis dedicavit et speravit fore, ne intolerantia et violentia umquam sub religionis praetextu adhiberentur. Imprimis eos infantes, qui in Israele, in regionibus Palaestinensibus, in Afganistania, in Ruanda et in Civitatibus Americae Unitis viverent, in animo habebat. "Servate parvulos", inquit, "ut hi pro sua parte spem humanitatis servare possint".

DISCORDIA INDIAE ET PAKISTANIAE
India et Pakistania se ad bellum gerendum parare videntur, nam ambae civitates missilia et copias speciales in utriusque confinium, praecipue in loca regioni Casmiriae vicina, transtulerunt. Causa discriminis nuperrime orti est impetus, quem grex quidam terroristicus abhinc duas septimanas in parlamentum Indiae fecit. Rectores Indiae culpam huius facinoris in musulmanos conferunt contendentes incursionem auspiciis Pakistanianorum effectam esse.

EVENTUS IN CUNICULO FRETI GALLICI
Cuniculus sub Freto Gallico actus die Mercurii mane clausus est, ut impediretur, ne quaedam peregrinorum turba e Francogallia in Britanniam illegaliter immigraret. Commeatus ferriviarius in cuniculo interceptus est, quoad custodes publici Francogalliae circiter centum quinquaginta homines ignotae originis, qui Britanniam petebant, tandem comprehenderunt.

DE INCENDIIS IN AUSTRALIA SILVARUM
Civitas Nova Vallia Meridiana, quae est in partibus Australiae inter meridiem et solis ortum spectantibus, vehementibus incendiis silvarum vexatur. Calamitate factum est, ut ferriviae et viae stratae rumperentur ac saltem quinquaginta milia familiarum electricitate privarentur. Etiam in megalopoli Sydneio et Camberrae, in urbe capite Australiae, multa domicilia propter periculum ignis in dies latius grassantis vacuefacta sunt.

Auswahl aus den "Nuntii Latini" vom 21.12.2001 (Radiophonia Finnica Generalis)

redegit Tuomo Pekkanen.

OSAMA EXSULTABAT
In televisione Americana divulgata est taenia magnetoscopica, in qua Osama bin Laden ictibus terroristicis die XI mensis Septembris factis exsultat. In illa taenia cum quattuor sociis in cubiculo sedens narrat se tempus ictuum quinque diebus ante praescisse, immo vero computavisse, quanta damna aeroplana pro missilibus adhibita factura essent. ”Fratres nostri”, inquit, ”qui operationem effecerunt, sciebant se martyrium subituros esse. Illos rogavimus, ut in Americam irent, sed de ipsa operatione ne primam quidem rem cognoverant. Exercebantur, sed illis operationem non aperuimus, antequam in loco et eo ipso momento, quo in aeroplanum ascensuri erant.”
Osama narrat se maximam rerum fiduciam habuisse et credidisse incendio, quod combustibile liquidum effecisset, structuras aedificii ferreas solutum iri; deinde tabulatum, quod aeroplanum contigisset, una cum tabulatis supra positis collapsurum esse. De facinoribus praeparandis ”Aestimaveramus”, inquit Osama, ”tria vel quattuor tabulata contingi posse.”
De culpa Osamae ne antea quidem ullum dubium apud Americanos fuit, sed verba in taeniam magnetoscopicam recepta haud ambigue convincunt eum fuisse sceleris originem et excogitatorem.  Illa taenia in quadam domo privata urbis Jalalabad mense Novembri exeunte reperta erat.  

BELLUM IN AFGANISTANIA CONFECTUM
Proeliis in montibus Tora Bora finitis bellum Afganistanicum confectum est. Ultimi bellatores ordinis al-Qaeda ex speluncis montium in confinium Pakistaniae effugerunt. Ad pacem tutandam tria milia militum ex variis nationibus in Afganistaniam mittentur. Post sex menses seniores gentium convenient, qui novum Afganistaniae regimen creabunt. At quo Osama bin Laden evaserit, penitus ignoratur. Americani promiserunt se viginti quinque miliones dollarorum soluturos esse, si quis eum deprehendisset aut certa indicia de loco, ubi esset, praebuisset.  Talibanis ex potestate expulsis et ordine al-Qaeda  in Afganistania devicto nihilo minus periculum terrorismi nationes occidentales sollicitare pergit.  

NOKIA IN ORBE TERRARUM SEPTIMA
Acta diurna Financial Times indicem societatum mercatoriarum divulgaverunt, quae hoc anno in orbe terrarum maximi aestimantur. Primum locum in illo indice tenet General Electric, opus mercatorium Americanum, secundum Microsoft, programmatis computatralibus ubique nota. Nokia, societas Finnica telephonulis clarissima, septimum locum habet. Anno praeterito Nokia in eodem indice fuit undecima. Cum Silvio Berlusconi, primus minister Italiae, in summo conventu Unionis Europaeae, nuper in Laeken habito, Finnos malignis sermonibus offendisset, acta diurna, quibus titulus Helsingin Sanomat, monuerunt nullam societatem Italicam inter quinquaginta in orbe optimas locum obtenuisse.  

Auswahl aus den "Nuntii Latini" vom 14.12.2001 (Radiophonia Finnica Generalis)

redegit Reijo Pitkäranta.

RERUM IN PROXIMO ORIENTE STATUS
Primus minister Israelis Ariel Sharon et regimen eius omnes necessitudines cum praesidente Palaestinensium Jasser Arafat intercedentes rumpere decreverunt. Culpae eius id tribuunt, quod tot cives Israeliani his diebus ictibus suicidalibus a terroristis Palaestinensibus factis aut vitam amiserunt aut graviter vulnerati sunt. Inter eosdem ministros etiam de magnis actionibus belli in Ripa occidentali et Gaza incohandis convenit.

DE POENA TERRORISMI STATUENDA
Civitates Unionis Europaeae sociae inter se de poena terrorismi statuenda consenserunt. Ministri iustitiae Bruxellas congregati pacti sunt, ut, qui gregibus terroristarum praefuissent, vinculis quindecim annorum damnari possent. In facinoribus autem terroristicis talia scelera numerari, quibus commissis structurae alicuius civitatis aut ordinis internationalis diruerentur.

PRAEMIA NOBELIANA SAECULARIA
Hac septimana centum anni praeterierunt, cum praemia Nobeliana viris et feminis de litteris et artibus optime meritis attribui coepta sunt. Osloae, ubi praemium pacis quotannis dari solet, die Lunae iubilaeum saeculare celebratum est, ad quod agendum non solum hornotini Nobelistae, sed etiam pristini conciliatores pacis invitati erant.

QUOMODO VENETIAE SERVENTUR
Decuriones urbis Venetiarum consilium ceperunt, quo usi patriam suam in mare desidere prohiberent. Propositum est, ut in ostio sinus Venetiarum muri mobiles instruerentur, qui impedirent, ne aestus maris in urbem ascenderet. Quotienscumque accessus maris solito altior urbi imminebit, ascensus aquae marinae illa mole pro vallo collocata obsaepietur. Tutatores autem naturae metuunt, ne lacuna Venetiarum, si illud consilium perfectum sit, in stagnum et paludem mutetur.

MORBUS VACCAE VESANAE IN FINNIA
In Finnia primus casus morbi vaccae vesanae inventus est. Suspicio erat bovem, quae in quodam praedio Finniae septentrionalis pascebatur, illo contagio affectam esse, dum investigatores Britanni, specimine cerebri eiusdem ruminatoris diligenter examinato, pro certo affirmaverunt illam vaccam re vera encephalopathia bovina spongiformi laborasse. Unde eum languorem acceperit, nondum constat pecuario negante armenta sua his viginti annis pabulo tritis ossibus mixto saginari.

NOVUM INVENTUM ARCHAEOLOGICUM
Archaeologi in Aegypto sepulcrum aetatis vetustissimae effoderunt, in quo medicus pharaonis cum instrumentis suis humatus erat. Apparet illum virum nomine Skar abhinc quattuor milia ducentos annos valetudini regalium quintae dynastiae consuluisse.

Auswahl aus den "Nuntii Latini" vom 7.12.2001 (Radiophonia Finnica Generalis)

redegit Tuomo Pekkanen.

SPES PACIS EVANESCIT
Ictibus funestis a suicidis Palaestinis in Israele effectis viginti quinque Israeliani perierunt et plus ducenti vulnerati sunt. Fine hebdomadis tam sanguineo factum est, ut spes pacis in Proximo oriente faciendae magis magisque evanescere videretur. Periculum  stragis ordo Hamas ad se pertinere confessus est. Ut caedem vindicent, Israeliani destinata in regionibus Palaestinorum sita missilibus ex aeroplanis militaribus helicopterisque missis ferire pergunt. Americani, antea Israelianos ad moderationem hortati, sententia mutata concesserunt eos ius sui defendendi habere. Utrique autem parti de suis factis deliberandum esse, ut pax inter illas aliquando conciliari posset. Intifada, motus Palaestinorum, qui iam quattuordecim menses durat, effecit, ut plus mille homines vitam amitterent et ordo Hamas maiorem quam ante gratiam apud Palaestinos pararet. Post ictus terroristicos recentiores quidam ex moderatoribus eius ordinis gloriabatur esse suis tot voluntarios ad novas strages efficiendas paratos, ut in proximos viginti annos sufficerent.

DE BELLO AFGANISTANICO
Maiore parte Afganistaniae iam pacata bellum in regione urbis Kandahar continuatur. Vulgo putantur et Muhammed Omar et socii peregrini Talibanorum usque ad mortem pugnaturi esse. Colin Powell, minister a rebus exteris Americanorum, censet in quaestione nihil esse nisi tempus, quo Osama bin Laden deprehendatur et Taliban corruat.

PRINCIPISSA MASAKO FILIOLAM PEPERIT
Masako, principissa hereditaria Iaponiae, Kalendis Decembribus filiolam peperit. Postquam Masako mense Iunio anni 1993 principi hereditario Naruhito nupsit, Iaponienses illam attentissime observaverunt, ut  signa viderent, quibus nativitas heredis imperii praenuntiaretur. Anno 1999, graviditate apud populum iam palam facta, Masako partum immaturum edidit. In familia Iaponiae imperiali nulli post annum 1965 filii nati sunt et periculum est, ne proxima generatio dynastiae, in toto terrarum orbe vetustissimae, prole mascula careat. Cum lex, quae nunc est, successionem femineam vetet,  de iure successionis  mutando apud Iaponienses disputari coeptum est.

QUID FUTURUM SIT LINGUIS CLASSICIS
Mense Novembri in Decembrem vergente in urbe Sassari insulae Sardiniae conventus internationalis fuit, in quo de sorte linguarum classicarum quaerebatur, qualis in Europa futura esset. Aderant seniores, laudatores temporis acti, qui, vivae Latinitatis ignari, condiciones hodiernas tristiter lamentabantur sed nihil novi proposuerunt. Novam spem attulerunt magistrae iuniores, quae de suis felicissimis experimentis linguam Latinam novo et vivo modo docendi narrabant.  Conventui convocando Luciano Cicu professor Universitatis Sassariensis cum suis  adiutoribus operam diligenter dederat. Participes ex novem nationibus Europaeis convenerant.

Auswahl aus den "Nuntii Latini" vom 30.11.2001 (Radiophonia Finnica Generalis)

redegit Reijo Pitkäranta.

RERUM IN AFGANISTANIA STATUS
Aeroplana Americanorum praesidia Talibanorum ultima in Afganistania disposita bombardare perrexerunt, ut praesertim oppidum Kandahar, quod in partibus eiusdem civitatis meridianis situm est, ex hostibus expugnaretur. Americani, dum in Afganistania bellum gerunt, amplius quadraginta loca reppererunt, quae armis exitialibus praeparandis profuisse existimantur. Illa laboratoria iam in potestatem copiarum contra Talibanos pugnantium venerunt. Hac septimana ex inopinato etiam Russi suos milites Cabulum miserunt.

CONVENTUS DE AFGANISTANIA
Bonnae, in urbe Germanorum, consultationes aguntur, qualis administratio Afganistaniae imperio Talibanorum iam omnino fere liberatae futura sit. In hunc conventum auspiciis Nationum Unitarum convocatum venerunt legati Foederis septentrionalis, fautores regis Afganistaniae exsulantis nec non oratores duorum gregum minorum. Joschka Fischer, minister Germaniae a rebus exteris, participes ad compromissum historicum hortatus est, quod Afganistaniae meliorem sortem futuram daret. Idem censuit iuribus humanis ita consulendum esse, ut feminis quoque dignitas debita attribueretur.

EMBRYO HUMANUS CLONIZATUS
Societati mercatoriae Americanae nomine Advanced Cell Technology contigit, ut embryonem humanum clonizaret. Biotechnici, cum hoc artificium perfecissent, negaverunt sibi homines multiplicare in animo habere. Immo, clonizationem eo tendere, ut novae rationes ad aegritudines varii generis curandas proferrentur, quales essent cancer, sida, diabetes, Parkinsonismus et morbus Alzheimerianus. Quae quamvis ita sint, in toto orbe terrarum vehemens disceptatio de iure ethico talis investigationis orta est.

HUBBLE NOVAM PLANETAM INVENIT
Telescopium spatiale nomine Hubble extra nostrum systema solare novam planetam invenit, quae suam atmosphaeram natrii plenam habet. Ex Administratione Americanorum aeronautica et spatiali (NASA) nuntiatum est illud corpus caeleste magnitudine planetae Iovis instar fere esse et a Tellure spatio centum quinquaginta annorum luce mensorum distare. Orbita autem huius planetae propius sideri suo accedit, quam ut ibi ulla vitae signa reperiri possint.

MINISTRI ARABES TERRORISMUM DAMNANT
Ministri a rebus exteris viginti duarum nationum Arabicarum die Mercurii in Quataria conventum extraordinarium confoederationis Arabicae habuerunt, in quo scelus barbaricum in Americam commissum vehementer damnaverunt. Idem sollicitabantur, ne bellum ex Afganistania in alias terras islamicas vagaretur, et negaverunt terrorismum esse religionis islamicae.

Auswahl aus den "Nuntii Latini" vom 5.10.2001

redegit Reijo Pitkäranta.

QUID CONSOCIATIO NATO CENSUERIT
Praepositi consociationis militaris NATO censuerunt se a Civitatibus Americae Unitis iam satis multa et valida testimonia accepisse, quae ostenderent Osamam bin Laden et satellites eius culpam magnae calamitatis in urbibus New York et Washington factae sustinere. George Robertson, primus secretarius eiusdem confoederationis, dixit manifeste probatum esse perpetratores scelerum socios fuisse conspirationis internationalis al-Qaida nuncupatae, cui praeesset Osama bin Laden. Quae cum ita essent, fieri non posse, quin quintus articulus, quo in charta consociationis NATO fundamentali de defensione communi sanctum esset, in usum reciperetur.

QUID PUTIN BRUXELLIS DIXERIT
Praesidens Russiae Vladimir Putin paratus est de consociatione NATO dilatanda benignius cogitare, dummodo Russia in illa rerum progressione melius respiciatur. Hanc sententiam Bruxellis pronuntiavit, ubi moderatores Russiae et Unionis Europaeae summi gradus conventum egerunt. Eodem tempore affirmavit se Civitatibus Americae Unitis in actionibus antiterroristicis auxiliaturum esse.

COMMEATUS IN AFGANISTANIAM
Primi commeatus frumenti, quos ordo Nationum Unitarum in Afganistaniam advehendos curat, in urbem principalem Cabulum pervenerunt. Haec invectio, qua magna copia farinae in pistrinas eiusdem urbis transportabatur, erat prima, quam auxiliatores post aggressionem terroristicam in Americanos factam Afganis suppeditaverunt. Neque currus onerarii in itinere ullis periculis occurrebant, quam ob rem nihil obstare videtur, quin transportationes cibariorum continuari possint.

TURRIS PISARUM DENUO APERIETUR
Turris Pisarum obliqua, quae iam diu viatoribus clausa est, medio mense Decembri denuo usui publico aperietur. Abhinc undecim annos animadversum est illam molem mediaevalem quinquaginta sex metra altam tantopere inclinatam esse, ut qui eam intravissent, in capitis periculum venirent. Deinde turris refectione suscepta quadraginta quinque centimetris erectior reddita est. Architecti existimant eam ita renovatam saltem trecentis annis proxime futuris visitatoribus satis tutam fore.
 
 

Auswahl aus den "Nuntii Latini" vom 28.9.2001

redegit Reijo Pitkäranta.

UNIO EUROPAEA CONVENTUM EGIT
Moderatores Unionis Europaeae Bruxellis conventum necessitatis egerunt deliberaturi, quae consilia de impetibus terroristicis in populum Americanum nuper factis caperent. Convenae unanimiter affirmaverunt se summa sodalitate Civitatibus Americae Unitis subsidium laturos esse in actionibus contra terroristas adhibendis. Americanos ab Unione Europaea adiutum iri, etiam si illi adversus territores arma sumere constituissent, dummodo ne id cum decretis Consilii securitatis Nationum Unitarum discreparet

SANCTIONES PAKISTANIAE SUBLATAE
Sanctiones oeconomicae et militares, quae Indiae et Pakistaniae propter experimenta nuclearia tribus annis ante facta impositae erant, iussu praesidentis George Bush sublatae sunt. Censuit enim Bush operae pretium non esse illas sanctiones continuare, quod talis puniendi ratio suis non iam usui esset. Constat regimen Pakistaniae Americanis permisisse, ut spatio suo aerio, si opus esset, ad impetus in fines Afganistaniae faciendos uti possent.

PERES ET ARAFAT CONVENERUNT
Shimon Peres, minister negotiorum exterorum Israelis, et Iasser Arafat, praesidens Palaestinensium, in aeriportu Gazensi convenerunt, ut violentiis, quae iam unum annum in Oriente Proximo durant, finem imponerent. Consensum est inter eos de cooperatione securitatis renovanda et de talibus consiliis ineundis, quibus fides armistitii servaretur. Israeliani etiam promiserunt se coercitiones, quas regionibus Palaestinensium indixissent, levaturos esse.

PAPA ITER IN ARMENIAM SUSCEPIT
Pontifex Romanus Iohannes Paulus II hac septimana iter salutatorium in Armeniam suscepit. Causa visitationis est, quod in praesenti mille septingenti anni acti sunt, cum Armenia civitas Christiana facta est. Traditur ecclesia eius ab apostolis Taddeo et Bartolomeo, quorum sepulcra adhuc ut loca sacra coluntur, condita esse. Anno trecentesimo primo Armenia omnium nationum prima fidem Christianam sibi religionem statalem assumpsit.
 
 

Auswahl aus den "Nuntii Latini" vom 21.9.2001

redegit Tuomo Pekkanen.

ATRA DIES MARTIS
Vigiles aliique succursores, qui in ruinis Manhattanensibus fumum emittentibus nulla mora interposita laboraverunt, postridie calamitatis diei quinque siphonarios servaverunt, postea autem neminem superstitem reppererunt. Victimae, quarum numerus in dies crescit, Neo-Eboraci sunt quinque milia sescentae quadraginta, Washingtoniae centum undenonaginta. Quinque milia quadringenti viginti duo homines in calamitate Neo-Eboracensi vi explosionum ita disparuerunt, ut corpora eorum adhuc non sint reperta. Erant inter victimas homines ex saltem sexaginta duabus nationibus oriundi. Cives Britanni, qui perierunt, erant inter ducentos quinquaginta et trecentos, Germani inter centum et ducentos.

BUSH ISLAMITAS AMERICAE DEFENDIT
Cum homines post ictus terroristicos in quibusdam partibus iram suam contra musulmanos vel Arabas in America habitantes vertissent, praesidens Bush Centrum Islamicum Washingtoniense visit, ut iniustis animi motibus finem imponeret. "Musulmani Americani", inquit, "operam pretiosam rei publicae tribuunt et digni sunt, qui reverenter tractentur. Facies terroris non est vera facies islamismi."

BIN LADEN AD IUDICIUM FLAGITATUR
Americani Talibanos Afganistaniae accusant, quod Osamae bin Laden, qui de ictibus terroristicis suspectus habetur, refugium dederint, et flagitant, ut illum sibi tradant. Delegatio Pakistaniae, de postulatis Americanorum in Afganistaniam missa, infectis rebus Islamabadam, in urbem Pakistaniae principem, revertit. Etiam Consilium securitatis Nationum Unitarum Talibanos hortatur, ut Osamam ad iudicium dedant. Muhammed Omar, summus sacerdos Talibanorum, dixit suos cum Americanis de ea re consulere paratos esse. Cum hoc propositum ab Americanis reiectum esset, consilium sacerdotum Talibanorum Osamae suasit, ut sponte ex Afganistania abiret.

BELLUM PARATUR
Americani magnam consociationem internationalem contra terrorismum constituere pergunt. Italia, Britannia Germaniaque auxilium militare, si opus esset, promiserunt. Russi cum Americanis consentiunt vim militarem ad terrorismum reprimendum forsitan necessariam esse. Ivan Ivanov, minister a rebus exteris Russorum, de cooperatione Russo-Americana cum ministro Colin Powell Washingtoniae collocutus est. Dubium non esse videtur, quin Americani ictus terroristicos Neo-Eboraci et Washingtoniae factos ulciscantur. Copiis electis imperatum est, ut ad bellum se pararent. Die Mercurii centum aeroplana militaria in stationes apud Sinum Persicum sitas missa sunt, sed ministerium defensionis recusavit, quominus certam metam eorum palam faceret. Minister Donald Rumsfeld monuit omnes rationes contra terroristas eorumque adiutores adhibendas esse neque usum copiarum terrestrium excludi posse. Etiam praesidens Bush de effectu ictuum aeriorum dubitans: "Cui bono est", inquit," contra tentoria denorum dollarorum, eaque vacua, binarum milionum dollarorum rochetas mittere?"
 
 
 

Auswahl aus den "Nuntii Latini" vom 14.9.2001

redegit Tuomo Pekkanen.

IMPETUS IN USA TERRORISTICUS
Die Martis (11.9.) mane impetus terroristicus maximae crudelitatis in Civitates Americae Unitas factus est. Terroristae aeroplanum commerciale vi abduxerunt et contra turrim aedium Neo-Eboracensium, nomine World Trade Center, inopinanter gubernaverunt. Duodeviginti minutis post, aliud aeroplanum contra alteram earundem aedium turrim volavit. Turres geminae, altitudine quadringentorum undecim metrorum, quod symbolum potentiae oeconomicae Americanorum habebatur, ignem conceperunt et explosionibus factis post unam fere horam corruerunt. His aedibus deletis tertium aeroplanum, id quoque vi abductum, contra Pentagon praecipitavit, quae est sedes Washingtoniensis ministerii defensionis. Postea compertum est, ut minister a rebus exteris Colin Powell confirmavit, primum scopum tertii ictus fuisse Aedes Albas, residentiam praesidentis. Quartum aeroplanum a terroristis interceptum prope urbem Pittsburgh in silvam decidit. In aedificiis in ruinas redactis complura dena milia hominum laborare solebant.

DE AUCTORE SCELERIS INDICIA
De auctore et origine scelerum suspectus maxime habetur Osama bin Laden, Arabs Saudianus, terrorista et miliardarius in Afganistania latitans, quem ordini terroristico praeesse constat. FBI sive Foederalis Grapheum Investigationis Americanorum indicia quaedam de culpa illius in lucem iam venisse nuntiavit.
 

NUMERUS VICTIMARUM INGENS
De numero victimarum tantum vagae aestimationes fieri potuerunt. Praeter ducentos sexaginta sex vectores aeroplanorum, plus quinquaginta custodes publici et ducenti fere siphonarii mortui sunt. Minister defensionis Donald Rumsfeld censet in aedibus Pentagon circiter ducentos homines interisse. Nemo audet coniectare, quot milia hominum in ictibus Neo-Eboracensibus disparuerint. Sospites ex ruinis adhuc quaeruntur.

NATO SOCIIS SUCCURRIT
Confoederatio NATO nuntiavit se operationes defensivas suscepturam esse, si palam factum esset ictus contra Americanos extra Civitates Americae Unitas praeparatos esse. Ita primum fit, ut quintus articulus libri fundamentalis NATOnis in usum recipiatur. In illo articulo impetus contra unam nationem pro impetu in omnes nationes confoederatas facto habetur.

BUSH SUOS CONFIRMAVIT
Post calamitatem in historia Americanorum maximam praesidens George W. Bush animos civium orationibus habitis confirmavit: Hominem ignavum contra totam nationem Civitatum Americae Unitarum impetum fecisse, sed libertatem esse defendendam. Qui responsales flagitiorum ignominiosorum essent, ab Americanis quaesitum et punitum iri. Scelera commissa multo ampliora fuisse terrorismo, scilicet operationes bellicas. Scopum earum fuisse libertatem et democratiam. Hostem esse novi generis, qui nullam vitae humanae reverentiam haberet. Neque tamen eum in aeternum latitare posse neque eos, qui hosti refugium praeberent, in tuto mansuros esse.
 

Auswahl aus den "Nuntii Latini" vom 7.9.2001

redegit Reijo Pitkäranta.

DE CONSULTATIONIBUS COREARUM
Corea Septentrionalis ad consultationes cum Corea Meridionali resumendas parata est. Invitationem ad colloquia renovanda fecit Commissio nationi uniendae, cuius auctoritas apud illam civitatem multum valet. Inter utramque Coream iam bona necessitudo intercedebat, cum politica in Civitatibus Americae Unitis mutata effecit, ut vincula novae amicitiae necopinato rumperentur. Causa eius rei existimatur esse, quod Coreani septentrionales praesidentem Americanorum George Bush sibi infestissimum esse censent.

SOCOLATA E CIBIS SALUBRIBUS EST
Esus socolatae saluti prodest, ut quidam iam antea suspicabantur. Quam vere illa res ab eis iudicata esset, investigatores Californiani experimentis suis nuper probaverunt. Apparuit enim flavonoida, quae in socolata inessent, infarctus cordis et cerebri deminuere, cum coagulationem sanguinis coercerent. Socolatae ea quoque virtus tribuenda est, quod antioxydantium ope carcinogenesim prohibet.
 
 

Auswahl aus den "Nuntii Latini" vom 31.8.2001

redegit Tuomo Pekkanen.

NUPTIAE IN NORVEGIA REGIAE
Haakon, heres regni Norvegiae, et Mette-Marit Tjessem Höiby matrimonium inierunt. Nuptiae regiae in ecclesia cathedrali Osloensi celebratae sunt praesentibus circiter octingentis hospitibus, inter quos erant principes et moderatores aut delegati nationum Europaearum nec non amici et familiares novorum coniugum. Ex Finnia in nuptias Osloenses venerat praesidens Tarja Halonen cum marito Pentti Arajärvi. In vias urbis congregati erant complura dena milia civium, ut sponsos viderent. Sollemnem nuptiarum benedictionem sponsis dedit episcopus Osloensis Gunnar Stålsett. Cena nuptialis hospitibus notabilioribus in palatio regio apposita est. Culminatio sollemnium nuptialium fuit spectaculum pyrotechnicum media nocte datum. In platea urbis principali plebs occasionem caerimonias nuptiales spectandi per magnum quadrum visificum habuit. Praecipuum in his nuptiis regiis erat, quod nova nupta, ex plebe oriunda, filium quattuor annos natum habet, quem sola sustentavit.
 

MERIDIATIONEM ESSE SALUTAREM
Somnus postmeridianus productivitatem laboris auget et defatigationem deminuit. Ex investigatione in Hispania facta patet meridiatione maximum quadraginta minutarum cerebrum et musculos recreari. Ita postmeridiano somno tam memoriam quam facultatem cogitationes in laborem conferendi meliorari. Requiete autem nimis longa rhythmum somni nocturni perturbari.
 

FEBRIS APHTHOSA RECRUDESCIT
Febris aphthosa in Britannia iam sedata esse putabatur, cum contagium in novas regiones grassatum esse nuntiatum est. Novos casus in Anglia septentrionem et orientem spectante apparuisse. Ad epidemiam coercendam in Britannia hoc anno plus tres miliones septingenta milia animalium domesticorum necata sunt.
 
 

Auswahl aus den "Nuntii Latini" vom 24.8.2001

redegit Reijo Pitkäranta.

NATO MILITES IN MACEDONIAM MITTIT
Consociatio militaris NATO in Macedoniam tria milia quingentos milites paci tuendae mittere decrevit, quorum esset bellatores Albanorum tectos dearmare. De actione suscipienda inter legatos civitatum sociarum Bruxellas congregatos die Mercurii convenit. Omnes cohortes in Macedoniam decem diebus perventurae existimantur, et tota operatio, si res bene successerint, intra unum mensem perficietur. Nemo tamen certe scit, quanta sit armorum copia, qua rebelles Albani utuntur.

DE CONIURATIONE COMMUNISTARUM
Die Dominico in Russia memoria coniurationis in praesidentem Unionis Sovieticae Mihail Gorbatshov decem annis ante factae acta est. Die enim undevicesimo mensis Augusti anno millesimo nongentesimo nonagesimo primo (19.8.1991) quidam oligarchae communistae sibi summam in Unione Sovietica potestatem arripere conabantur. Conspiratio autem spatio trium dierum oppressa est, et potestas ad praesidentem Russiae Boris Jeltsin transiit, qui omnibus rebus turbatis in currum cataphractum in mediam Moscuam invectum escendit et apud milites contionem habuit democratiam vehementer flagitans.

QUID GREX RIO FLAGITAVERIT
Moderatores undeviginti civitatum Americae Latinae Iacobopoli sive in urbe Santiago conventum egerunt, in quo polliciti sunt se sumptus defensionis coercituros esse ad oeconomiam uniuscuiusque civitatis meliorandam. Grex Rio, quo nomine ille coetus nuncupatur, documento edito nationes Americae Latinae ad fidem mutuam hortatus est eisque suasit, ne copiam armorum defensionis augerent et ut potius talibus consiliis provehendis operam darent, quae paupertatem multarum milionum hominum in suis terris deminuerent.

INDEX VESTIUM PROHIBITARUM
Teherani, in capite Iraniae, vigiles urbis custodire coeperunt, ne quis in vestitu et cultu corporis ab islamismo abhorrentibus in publicum prodiret. Feminae, si os vultusque fuco ornaverunt, in cauponis nullam ministrationem habent, et viris usu focalis interdictum est. Neque mercatoribus ius est tales tuniculas vendendi, quae imaginibus actorum cinematographicorum occidentalium decoratae sunt. His legibus perlatis musulmani conservativi auctoritatem praesidentis Mohammed Khatami debilitare student.
 
 

Auswahl aus den "Nuntii Latini" vom 17.8.2001

redegit Tuomo Pekkanen.
 

MEMORIALE MURI BEROLINENSIS
Idibus Augustis quadraginta anni acti erant, ex quo murus Berolinensis duci coeptus est. Paucis mensibus inter Berolini partes orientales et occidentales limes centum septem chiliometrorum perfectus est, quo moderatores communistae Germaniae orientalis impediebant, ne homines in occidentem gregatim effugerent. Murus ornatus erat trecentis turribus atque custodiebatur a quattuordecim milibus custodum et sescentis canibus. Post quattuor annos pro primo opere murus firmior substitutus est, qui anno septuagesimo quinto (-75) novis operibus renovatus est. Octingenti homines, qui trans murum fugere conabantur, a custodibus occisi sunt. Quamquam muro instructo cursus profugorum repressus est, tamen multis hominum milibus contigit, ut contemptis custodibus in libertatem evaderent. Murus ignominiosus die nono mensis Novembris anno undenonagesimo (9.11.1989) ruptus est. Sequenti anno Germania orientalis et occidentalis unitae sunt.

COREANI SEPTENTRIONALES IN RUSSIA
Cum Kim Jong-il, moderator Coreae septentrionalis, nuper Russiam viseret, palam factum est Coreanos debita sua Russis ita solvere, ut eis operarios gratuitos mitterent. Acta diurna, quibus titulus est The Moscow Times, narraverunt circiter decem milia Coreanorum hac condicione opus servile in Russia facere. Campi, in quibus Coreani a suis magistratibus custoditi laborant, sunt maxime in Sibiria aut in Oriente extremo. Magistratus Russi locales ius rebus eorum interveniendi non habent. In quibusdam saltem campis operarii mercedem quandam accipiunt, ex qua triennio vel quinquennio pretium frigidarii vel televisionis servare possunt.

VITIA VERBERIBUS EXTRAHENDA
Ajatollah Shahroudi, moderator Iraniae iuridicus, nuntiavit verbera publica crebrius quam ante esse adhibenda, ut vitia radicitus extraherentur. A die vicesimo tertio mensis currentis verberationes exactissime perficiendas esse. At una tantum septimana ante ministerium Iraniae a rebus interioribus verbera publica damnaverat, quod existimationi Iraniae inter nationes nociva essent.

PERCONTATRUM GENESIS IN SPATIUM EMISSUM
Administratio Aeronautica et Spatialis Americanorum (NASA) in spatium cosmicum percontatrum emisit, quod particulas solis minutissimas colligeret. Percontatrum, cui nomen est Genesis, multas chiliometrorum miliones longe a sole vagabitur, sed laminae eius corpuscula microscopica arripient, quae ventis solaribus portantur. Haec corpuscula ex eadem materia sunt atque discus pulvereus et gasalis, ex quo systema solare ante plus quattuor miliarda annorum formari coepit. Genesis, si opus suum perfecerit, erit primum post rochetas in lunam missas navigium spatiale, quod specimina ex spatio cosmico in terram afferet.