Nuntii Latini

Radio Bremen

Tabulatorium

2001 - 2002

 

 

"Nuntii Latini mensis Novembris 2002" (Radio Bremen) 

Recitator:Dr. Franz Hartmann

O quae mutatio rerum
In electionibus parlamentariis Turciae Factio Iustitiae Progressionique Fovendis (AKP) vicit, quae in conservativismum et religionem Islamicam propensa est. Plus enim dimidio suffragiorum adepta est. Secundum locum Factio Populi Republicana (CHP) obtinuit. Eae autem factiones, quae adhuc Turciam regebant, sedibus parlamentariis prohibitae sunt, quod singulae ne decimam quidem partem suffragiorum in se vertere potuerant.
In electionibus Austriacis, quae ante tempus solitum habitae sunt, Factio Popularis Austriaca (ÖVP), quam Wolfgang Schüssel cancellarius Austriae conservativus moderatur, victoriam assecuta est excellentem; nam post triginta duos [32] demum annos denuo ceteras factiones numero legatorum superat. Maximam autem calamitatem Factio Liberalis Austriae (FPÖ) accepit, in qua Jörg Haider, ille populismi atque nationalismi fautor, plurimum potest.

Electiones in Civitatibus Unitis Americae
Post electiones in Civitatibus Unitis Americae habitas Republicani non modo in Senatu de integro praevalent, sed in Repraesentativorum Domo etiam plures sedes tenent. Quo electionum eventu auctoritas praesidentis George W. Bush maxime aucta est.

Oppidum Wilhelmshaven portum navibus maximis idoneum adepturum
In oppido Wilhelmshaven portus aedificabitur, quo nullus in Germania maior erit. Quod decreverunt Brema et Saxonia Inferior, foederatae civitates. In portu aedificando trecentae miliones [300 000 000] Eurones consumentur. Portum novum anno bis millesimo nono [2009] in usum venturum esse volunt.


Rudolf Augstein undeoctoginta annos [79] natus in urbe Hamburgo mortuus est. Anno millesimo nongentesimo quadragesimo septimo [1947] commentarios periodicos DER SPIEGEL creavit et ex eo tempore edidit. Hoc periodico nuntiorum uti propugnaculo ad virtutes democraticas defendendas in animo habebat. Quo duce complures res pessimi exempli patefactae sunt.

Recitatorum princeps defunctus
Gert Westphal, histrio nationisque Germanicae recitator, annis octoginta duobus [82] vitae peractis mortuus est. Qui declamationum artifex maximam laudem sibi peperit praestantibus poetarum Theodiscorum operibus recitatis vel per libros audibiles propagatis. Primos gradus ad celebritatem anno millesimo nongentesimo quadragesimo sexto [1946] in statione radiophonica Bremensi ingressus erat.


Anno millesimo quadringentesimo quinto [1405] illa illustris curia Bremensis aedificata est. Ex eo tempore usque ad hoc tempus cella eius non modo apothecae, sed etiam tabernae in usu erat, in qua vina excellentissima ministrabantur. Nullam Germaniae cellam vinariam vetustiorem esse inter cives Bremenses constat. Sed, o tempora, o mores, nunc primum caupone mutato post tot saecula non solum vinum, sed etiam - incredibile auditu - cervisia in hac taberna bibi potest.

Anniversarium primum programmatis Nordwestradio
Programma radiophonicum Nordwestradio, cuius emissiones a stationibus radiophonicis Bremensi (RB) et Germaniae Septentrionalis (NDR) communiter formantur, primum annum peregit. Emittitur per frequentias octoginta octo virgula tria [88,3] et nonaginta quinque virgula quattuor [95,4] megahertzia. In paginis interretialibus huius programmatis hi quoque nuntii Latini leguntur audiunturque.


Communis opinio est Caligulam imperatorem Romanum, qui multis hominibus interitum paravit, mente sano non fuisse. Aliter Albert Camus, ille existentialismi sectator Francogallicus, de moribus eius iudicavit. Nam fabulam de illo conscripsit, in qua talia in medium profert: Caligulae post mortem Drusillae sororis, quam amore non modo fraterno amaverat, persuasum est mundum esse pravum deosque nullos. Ex quo colligit hominibus modum positum non esse. Qua re amicitia, fide, virtute neglectis perversionem omnium bonorum et malorum molitur. At fieri non potest, ut, haec omnia qui perdit, non fundamenta vitae suae simul evertat. Qua re Caligula cognoscit non posse quemquam sibi soli salutem comparare neque libertatem vindicare damno ceterorum. Libens igitur, cum vitae eius insidiae parantur, mortem obit. Quae fabula Camusiana Theodisce a Gert Westphal in ludum radiophonicum conversa nunc in phonocaseta vel in disco compacto Euronibus 14,90 emi potest (Caligula, Hörspiel von und mit Gert Westphal nach Albert Camus, ISBN 3-89469-917-5, MC 5.8117; CD 5.8917). Petatur a quolibet maiore bibliopolio vel a domo editoria LITRATON, Grete Schulga, Herbert-Weichmann-Str. 27, D-22085 Hamburg.


Pellicula de Caesare confectaInter viros antiquorum temporum praestantissimos nullus fere plurium hominum animos per saecula in se vertit quam Gaius Iulius Caesar. De illo vivo acerrime dissentiebatur: hi eum maxime venerabantur admirabanturque, illi acerbissimo odio gravique invidia eius ardebant. His persuasum erat eum imperatorem optimum et principem civitatis esse praestantem, qui novum rei publicae genus conditurus esset, in quo ab uno viro prudentia atque virtute moderato factionum cupiditates locum non haberent. Illi autem existimabant eum re publica libera pessum data tyrannum superbum exstitisse. Qualiscumque is fuit: ne per saecula quidem memoria Caesaris oblivione obruta est. Id magna ex parte effectum est commentariis, quos ipse de bellis suis conscripsit. Ei enim his quoque temporibus leguntur. Ad hoc ex rebus a Caesare in Gallia Britannia Germania gestis earum regionum quoque populi memoriae scriptae primum sunt mandati. Fabula hac grandi, quae est divisa in partes duas, proponuntur Caesaris mores cursusque difficillimus, quo gloriam summamque rerum petivit, angores, cupiditates, dolores maximi. Pellicula haec de Caesare confecta spectari poterit diebus vicesimo septimo et vicesimo octavo mensis Decembris anni bis millesimi secundi [27.+28.XII. 2002] in programmate primo stationum televisificarum Germaniae ab hora vicesima minuta quinta decima [20.15 h].

Glossarium
suffragium Wahlstimme vote
Austria Österreich Austria
domus repraesentativorum Repräsentantenhaus house of representatives
Suetus Schwede Suede
diurnarius Journalist journalist
commentarii periodici Zeitschrift periodical
histrio Schauspieler actor
Theodiscus deutschsprachig Germanspeaking
liber audibilis Hörbuch audiobook
cervisia Bier beer
cella Keller cellar
apotheca Weinlager wine-vault
interretialis Internet- internet...
pressum dare zu Grunde richten destroy

 

 

 

"Nuntii Latini mensis Octobis 2002" (Radio Bremen) 

Recitator:Dr. Franz Hartmann

Gerhard Schröder, Factionis Democratarum Socialium praeses, denuo cancellarius Germaniae factus est. Tria enim suffragia plura necessariis assecutus est in parlamento, de cuius sescentis tribus [603] legatis trecenti sex [306] sunt coalitionis rubrae-viridis. Paucis diebus ante utraque coalitionis factio ea, quae fieri velint in re publica gerenda, conventu habito probaverat, Viridium Bremae, Democratarum Socialium Berolini.

Permulti homines in impetibus terroristicis occisi
Ictu pyrobolico gravissimo in insula Bali facto - qua in insula multi homines sui recreandi causa morari solent - centum undenonaginta [189] homines necati sunt. Auctores huius cladis terroristae islamici esse putantur. Theatro Moscuensi occupato terroristae Tzetzenici circiter septingentos [700] spectatores captos retinebant, ut illis obsidibus uterentur. Custodes securitatis publicae illos liberare studuerunt gaso quodam adhibito. In quo plures quam centum [100] obsides, terroristae quinquaginta [50] vitas amiserunt.

Praemia Nobeliana data>
Praemium Nobelianum pro meritis de pace adiuvanda hoc anno Jimmy Carter, pristino praesidenti Civitatum Unitarum Americae, tributum est. Praemio litterarum Imre Kertész auctor Hungaricus affectus est. Praemium medicinae Sydney Brenner et Robert Horvitz e Britannia, John E. Sulston ex America ortis datum est.

Arva picta
In pinacotheca Bremensi tabulae a Vincent van Gogh factae spectari possunt. Ibi sunt expositae quinquaginta [50] imagines topiorum partim pictae, partim delineatae, quas artifex ille inter supremos vitae annos perfecit. Quae expositio usque ad diem vicesimum sextum [26] mensis Ianuarii aperta erit.

Brema exsultans
Per septendecim [17] dies Bremae lasciviebatur: celebrabatur enim mercatus liber anniversarius, qui inde ab anno millesimo tricesimo quinto [1035] quotannis habitus est. Nullum igitur aliud eiusmodi festum per Germaniam est vetustius. Sperabatur plures quam quattuor miliones visitatores tabernas, circumvectabula, tentoria festiva adituros, quae in pristinis civium Bremensium pascuis sunt exstructa.

Insectum conspicuum detectum
In Namibia patria Martin Wittneben, qui in universitate Bremensi biologiae studet, in insectum quoddam incidit, quod gladiatorem nominavit. Hic gladiator nulli quidem ordini recenti adnumerari potest; nota autem sunt animalia ei simillima, quae ante quadraginta quinque miliones annos [45.000.000] glaeso inclusa sunt. Insectum ergo novum est id, quod homines docti fossile superstes vocant.

Bibliotheca Alexandrina resurrexit
Aegyptiorum praesidens Mubarak in urbe Alexandria bibliothecam Alexandrinam inauguravit maximam earum, quae vel in Aegypto vel in finitimis regionibus exstant. Aedificium orbem solis orientis imitatur. Consilia bibliothecam Ptolemaeam restituendi triginta abhinc annis capta erant.


In eis partibus Pompeiorum antiquorum, quae nondum excavatae sunt, his diebus vindemia peculiaris habetur: ibi enim colliguntur uvae talium vitium, quales in regione Vesuviana antiquitus colebantur. Consilium est ex his uvis vinum fieri eadem ratione, qua Romani antiqui utebantur, ut cognosci possit, quali natura fuerit vinum illius regionis, quod tum maximis laudibus efferebatur. 

Documenta undecima frequentabatur quantum adhuc nulla
Sescenta quinquaginta milia [650.000] hominum oppidum Kassel petiverunt, ut expositionem artificiorum celeberrimam viserent. Spectaculum illud, quod sexto quoque anno per centum dies factum esse curatores voluerunt, finitum est. Censores autem iudicia ancipitia de operibus artificiisque ibi expositis fecerunt.


Praenuntiatio tempestatis
Nobis nuntios aut legentibus aut videntibus apud omnes maximi momenti esse videtur tempestas. Sunt permulti rerum caelestium periti, qui saepius in die nos de caeli statu certiores faciant, quasi nihil aliud sit, quo commoveri possimus quam spatia alti aeris pressus et spatia tenuis aeris pressus inter se certantia.
Aliter Horatius poeta (sat.II 6, 44-46), qui eiusmodi disputationes inter nugas numeravit, quas iter facientes alii aliis concrederent:

... "hora quota est?" "Thraex est Gallina Syro par?"
" Matutina parum cautos iam frigora mordent"
et quae rimosa bene deponuntur in aure.

Eadem de causa Seneca (ep. ad Luc. III 2 , 1ff.) se de tempestate Lucilio suo scribere negavit:

utas me tibi scripturum, quam humane nobiscum hiemps egerit, quae remissa fuit et brevis, quam malignum ver sit, quam praeposterum frigus, et alias ineptias verba quaerentium. Ego vero aliquid, quod et mihi et tibi prodesse possit, scribam.

Haud scio, an nobis quoque salubrius sit Senecam imitantibus hoc loco maiora proferre?

 

Glossarium

Lateinisch Deutsch English
suffragium Wahlstimme vote
ictus pyrobolicus Strengstoffanschlag bomb attack
imagines topicorum Landschaftsgemälde landscape paintings
circumvectabulum Karussel carousel
pascua,-uorum Weide pasture
glaesum Bernstein amber
vindemia Weinlese vintage
vitis Weinstock, Rebe vine
spatium alti aeris pressus Hoch (meteol.) high pressure aerea
spatium tenuis aeris pressus Tief (meteol.) low pressure aerea

 

 

"Nuntii Latini mensis September 2002" (Radio Bremen) 

Recitator: Heinrich Fliedner

Coalitio rubra-viridis in comitiis Germaniae fortunata
Gerhard Schröder cancellarius Germaniam in posterum quoque regere poterit coalitione rubra-viridi nisus. Ea enim in electionibus parlamentariis undecim legatos plures assecuta est quam factiones adversae. Uniones Christianae et Democratica et Socialis parem suffragiorum partem adeptae sunt atque Factio Democratarum Socialium, scilicet paulo minus quam quadraginta centesimas [realiter 38,5%]. Haec nihilominus in parlamento plus valet propter quattuor legatos superadditos. Factio Viridis duodecimam partem suffragiorum [8,6 %] accepit, Factio Liberalis Democratica paulo minorem [7,4 %]. Duae tantum legatae personaliter creatae in parlamento vices Factionis Socialismi Democratici agent. Non enim licet plures eius factionis legatos illi conventui interesse, quod ea ne vicesimam quidem suffragiorum partem [<5%] est consecuta.

Tempora mutantur, scholae mutantur in illis
Senatus Bremensis censuit institutionem discipulorum esse reformandam. Placuit, ut discipuli omnium scholarum probationes uniformes a magistratu impositas subeant, deinde, ut abhinc discipuli post quartam iam classem in diversa genera scholarum divertantur, quod adhuc non fiebat, postremo, ut parentibus eorum, qui scholam non obeant, subsidia publica minuantur

Quid congressus Iohannisburgensis profecerit
A summo conventu, qui a Nationibus Unitis Iohannisburgum erat convocatus, ut de progressu durabili consuleret, haec decreta sunt: Usque ad annum bis millesimum decimum quintum [2015] numerum illorum hominum dimidia utique ex parte diminuendum esse, qui aqua ad bibendum apta itemque deductione aquarum inquinatarum careant. Praeterea id agendum esse, ut opes a natura suppeditatae diligentius serventur, valetudinibus hominum melius curetur.

Victoria factionum sinistrarum Sueciae
Ex electionibus Sueciae Democratae Sociales victores exierunt. Göran Persson praeses ministrorum illam victoriam dixit esse eximiam; non solum factionem suam, sed etiam id genus rei publicae, in quo salus civium plurimum valeret, victoriam tulisse. Göran Persson rebus regendis praeesse perget.

Electiones ante tempus in Austria
Susanne Ries-Passer, quae et praeses Factionis Liberalium Austriae et vicaria cancellarii fuerat, discordiis factionis a Jörg Haider excitatis animo defecit et omnibus muneribus se abdicavit. Qua de causa Wolfgang Schüssel cancellarius coalitionem cum Liberalibus finitam esse declaravit. Itaque in Austria electiones ante tempus habendae erunt, quae mense Novembri huius anni fient.

Machinator insidiarum captus
Vigiles publici Pacistani virum comprehenderunt, qui illas insidias Septembres anni superioris molitus esse dicitur. Ille Ramzi Binalschib Hamburgi cohabitaverat cum Mohamed Atta, raptorum aeriorum capite. Binalschib praeter ceteros terroristas summo studio investigabatur.

Collisio traminum pestifera
In statione oppidi Bad Münder Saxoniae Inferioris duo tramina oneraria collisa sunt. Incendio duorum curruum cisterninorum, quod post displosionem est ortum, gasum pestiferum generatum est, quo valetudo hominum circiter quadringentorum [400] afflicta et solum veneno infectum est. Frenorum defectio eam cladem effecisse videtur.

Pedilusor excellens Bremam accessit
Johan Micoud excellens et praestans ille pedilusor Francogallia ortus nunc sodalis manus pedifollicae Werder Bremen est. Werderanis cum Norembergensibus decertantibus videri potuit, quid is ingeniosus campi medii dispositor valeret. Folle portae illato animos spectatorum Bremensium magna laetitia affecit.

Documenta undecima frequentabatur quantum adhuc nulla
Sescenta quinquaginta milia [650.000] hominum oppidum Kassel petiverunt, ut expositionem artificiorum celeberrimam viserent. Spectaculum illud, quod sexto quoque anno per centum dies factum esse curatores voluerunt, finitum est. Censores autem iudicia ancipitia de operibus artificiisque ibi expositis fecerunt.

Praenuntiatio tempestatis
Aestas mense Septembri erat eximia pulchritudine nobis quidem ad oram Germanici maris viventibus: fulsere vere candidi … soles, ut Catullus (carm. 8, 8) dixit alia meditans.
Nunc autem betulae omnium arborum primae frondes emittunt. Mense exeunte autumnus coepit, fructus maturescunt et noctes fiunt frigidiores.
Tali vespero Vergilius poeta (ecl. I 79-83) hospitem invitavit:

Hic tamen hanc mecum poteras requiescere
noctem
fronde super viridi: sunt nobis mitia poma,
castaneae molles et pressi copia lactis.
Et iam summa procul villarum culmina fumant,
maioresque cadunt altis de montibus umbrae.

Utinam nobis autumnus tam iucundus esse perseveret mense Octobri.

 

Latein

 

Deutsch

 

Englisch

suffragium

 

Wahlstimme

 

vote

legati superadditi

 

Überhangmandate

 

additional seats

aliciuius vices agere

 

jem. vertreten

 

represent s.o.

summus conventus

 

Gipfelkonferenz

 

summit conference

progressus durabilis

 

nachhaltige Entwicklung

 

sustainable development

utique

 

mindestens

 

at least

aquae inquinatae

 

Abwässer

 

sewage

Suecia

 

Schweden

 

Sweden

vicaria

 

Stellvertreterin

 

Vize- vice-

vigiles publici

 

Polizei

 

police

raptor aerius

 

Flugzeugentführer

 

hijacker

tramen onerarium

 

Güterzug

 

freight train

currus cisterninus

 

Kesselwagen

 

tank wagon

frenum

 

Bremse

 

brake

dispositor

 

Spielmacher

 

key player

 

 

 

 

 

 

 

 

"Nuntii Latini mensis Augusti 2002" (Radio Bremen) 

Recitator: Kurt Hille

Clades pulcherrimarum terrarum et urbium: inundationes maximae
Inundationes maximae hominibus, qui in Austria,Tzechia iisque partibus Germaniae vivunt, quae ad orientem meridiemque pectant, ingentes calamitates pulcherrimisque terris et urbibus magnas clades intulerunt. Compluribus aggeribus fractis permultos homines domiciliis cedere necesse erat. Dresdae altitudo Albis fluminis, qua nulla umquam erat maior, novem metra dimidiumque [9½] excessit. Plus triginta [30] homines fluctibus perierunt. Dubium non est compluribus miliardis euronum opus futurum esse, ut damna aquis effecta reparari possint. Cuncti consentiunt homines hac calamitate affectos adiuvandos esse. Itaque moderatores rei publicae Germanicae tributa nondum proximo anno minuenda esse censuerunt, praeter id quod paulo ante lege sanctum erat.

Transgressio Rubiconis? - Plus quadragies centena milia [4.000.000] hominum quaestu carent
Mense Iulio numerus hominum negotii quaestusque expertium iterum aucta est et Rubiconem - id est numerum quadragies centenorum milium [4.000.000] - transcendit. Hoc Iulio ergo ducenta quinquaginta milia [250.000] hominum amplius quaestu carebant quam mense Iulio anni superioris. Homines mercatus laboris periti commutationem rerum exeunte demum anno exspectant.

Gysi nunc privatus
Gregor Gysi, magister civium idemque rerum oeconomicarum senator Berolinensis, omnibus muneribus se abdicavit. Ille sibi proposuerat invidiam effugere, quam in se converterat praeter morem gratuito aeroplanis vectus. Gysi pro Factione Socialismi Democratici in re publica versabatur et multis acceptus erat.

Turci poenam mortis tollunt
Parlamentum Turciae poenam mortis - temporibus quidem pacis - tollendam decrevit. Turci ultimi sociorum Consilii Europaei poenam mortis sustulerunt. Ea dicitur condicio esse, sine qua ad Unionem Europaeam adiungi nemini liceat.

Indigena consecratus
Ioannes Paulus II papa in Mexico Juan Diego indigenam consecravit. Juan Diego ab anno millesimo quadringentesimo septuagesimo quarto [1474] usque ad annum millesimum quingentesimum quinquagesimum octavum [1558] vixit et indigenarum Americae Latinae primus est, qui talibus honoribus auctus est. In oratione sacra in basilica Guadalupensi habita pontifex questus est, quod indigenae continenter negleguntur.

Venit, vidit et cucurrit
Joschka Fischer, exterarum rerum minister et cursor Marathonius ab urbe Bremerhaven ad certamen suffragiorum profectus Bremae cives invitavit, ut lacum Werder secum currentes circumirent. Ducenti quinquaginta [250] homines per decem chiliometra ministrum comitati esse feruntur.

Principatus mundanus natationis liberae
Certamina natatoria Europaea, quae Berolini habita sunt, nulli athletarum prosperius evenerunt quam Franziska van Almsick. Quae natatrix Germana quinque nomismata aurea tulit et insuper natatione libera ducentorum [200] metrorum principatum mundanum adepta est.

Insigne Bremae novum
Campus spatialis Bremensis novo et conspicuo signo exornatus est. In illo enim campo peritiae augendae dedicato exemplar missilis spatialis Arianae exstructum est altitudine sexaginta [60] metrorum, pondere sexaginta quinque [65] tonnarum.

Praenuntiatio tempestatis
Antiquis temporibus cum Tiberis campos et vias urbis inundaverat, homines intellegebant se numina deorum neglexisse.
Etiam apud Ovidium poetam (met.I 260 ff.) legimus illam fabulam priscam et omnibus populis notam de inundationibus terrarum, quibus genus hominum ob nefarios mores exstinctum est.

poena placet diversa, genus mortale sub undis
perdere et ex omni nimbos demittere caelo…
Nec caelo contenta suo est Iovis ira, sed illum
caeruleus frater iuvat auxiliaribus undis…
… vias patefecit aquarum
exspatiata ruunt per apertos flumina campos
cumque satis arbusta simul pecudesque virosque
tectaque cumque suis rapiunt penetralia sacris.

Post hanc quidem calamitatem Deucalioni et Pyrrhae tantum superesse licuit, qui novam gentem procreaverunt.
Eiusmodi ominibus tum quidem homines commoti esse feruntur secundum naturam vivere numina deorum observantes.
Quid ergo de nobis dicetur?

 

Glossarium
Latein   Deutsch   Englisch
miliardum   Milliarde   billion
magister civium   Bürgermeister   mayor
Berolinensis   Berliner   of Berlin
Consilium Europaeum   Europarat   European Council
cursor Marathonius   Marathonläufer   marathon runner
exterarum rerum minister   Außenminister   foreign minister
natatio libera   Freistil   freestyle
nomísma aureum   Goldmedaille   gold medal
spatialis   Weltraum -   space -
míssile   Rakete   rocket, missile
tonna   Tonne   ton

 

 

 

"Nuntii Latini mensis Iulii 2002" (Radio Bremen) 

Recitator: York Grüninger

Manus pedifollica Germaniae magno iubilo excepta
Pedilusores Germaniae Kalendis Iuliis in patriam reversi a fautoribus magno cum iubilo recepti sunt, postquam e certaminibus pedifollicis mundanis secundi exierunt.
Campionatum mundanum Brasiliani quintum adepti sunt. Inter ludum finalem Ronaldo follem portae Germanorum excellenter pugnantium bis inferre potuit. Oliver Kahn portarius Germanus, quod per totam competitionem omnes adversariorum impetus praeter tres a porta sua arcere potuit, optimus pedilusor huius certaminis iudicatus est. Tertium locum manus Turcica assecuta est.
Hi ludi pedifollici mundani erant primi, qui non modo extra Europam Americamque habiti sunt, sed etiam a duabus nationibus parati: a Corea Meridiana et
Iaponia. Aliquibus manibus Africanis et Asiaticis velut Senegaliae, Iaponiae, Coreae Meridianae, Turciae prospere evenit, cum nationes prioribus annis victrices velut Anglia, Francogallia, Italia, Argentina initialibus iam certaminibus male peractis eliminatae essent.

Calamitas aeronautica supra lacum Brigantinum
In collisione duorum aeroplanorum unus et septuaginta [71] homines interierunt, in quibus undesexaginta [59] minores natu. Quae calamitas accidit, cum vitio operatorum Helveticorum, quibus commeatus aeronauticus dirigendus est, aeroplanum epibaticum Russicum supra lacum Brigantinum in aeroplanum onerarium illideretur.

Tribunal Nationum Unitarum institutum
Tribunal internationale in urbe Hagia institutum est, cui facinora contra humanitatem commissa persequenda erunt. Unitae Civitates Americae huic tribunali interesse nolunt, quod verentur, ne earum milites in terras externas missi eo in ius vocentur.

Saevitia tempestatis septem homines occisi
Berolinae et in regionibus adiacentibus tempestas perniciosissima saevivit, qua septem homines occisi, viginti sex [26] vulnerati sunt. Qua tempestate nulla fuit his triginta [30] annis in ea regione perniciosior. In reliqua quoque Germania septentrionali procellae maximae coortae sunt, damna autem graviora ibi non sunt effecta.

Regia Berolinensis restituetur
Parlamentum Germaniae constituit frontem regiae Berolinensis arte baroca structam, quae bello mundano secundo deleta et postea rescissa erat, restituendam esse. Quo decreto controversia publica undecimo demum anno finita est.

Capite velato docere non licet
Magistris feminis muslimis non licet in scholis publicis Germaniae discipulos capite velato docere. Id summum iudicium administratorium ex eo collegit, quod instituta publica nulli consilio vitae maiorem auctoritatem concedere deberent quam aliis.

Praenuntiatio tempestatis
Iam Romani antiqui certe sciebant homines tum denique cultu atque moribus ornari potuisse, cum domicilia muris saepire inciperent.
Cuius rei testis est Cicero, qui adulescentulus in libello de inventione inscripto declaravit:

Nam fuit quoddam tempus, cum in agris homines passim bestiarum modo vagabantur et sibi victu fero vitam propagabant. …Quo tempore quidam magnus videlicet vir et sapiens … dispersos homines compulit in unum locum et congregavit et …ex feris et immanibus mites reddidit et mansuetos. (de inv. I 2)

Testis est etiam Vergilius, qui Aeneam Italos populos debellaturum esse his verbis dixit:

moresque viris et moenia ponet. (Aen. I 264)

Quid autem est, quod his annis nos impellat eum gradum cultus humanioris omittere et sedes nostras neque fame neque bello coactos relinquere, ut frequentes per vias stipatas aditusque incertos vagemur?
Res quam rationem habeat, satis facile perspici potest: nam tempestas mensis Iulii tam horrida ac atrox fuit, ut omnes fugerent. Una spes haec est: tempestas mensis Augusti peior esse non poterit.

 

Glossarium

 
Latein   Deutsch   Englisch
campio mundanus   Weltmeister   world champion
pedifollicus   Fußball-   football
pedilusor   Fußballspieler   football player
manus   Mannschaft   team
campionatus,-us   Meisterschaft   championship
follis   Ball   ball
lacus Brigantinus   Bodensee   Lake Constance
epibaticus   Passagier-   passenger-
aeroplanum   Flugzeug   aeroplane
iudicium administratorium   Verwaltungsgericht   administrative court

 

 

 

 

"Nuntii Latini mensis Iunii 2002" (Radio Bremen) 

Recitatrix: Hannelore Zöllner

 

Moellemann excusatus esse vult

Juergen Moellemann, praeses Factionis Liberalis vicarius, veniam Iudaeorum in Germania viventium petivit. Controversiae magnae enim factae erant, quod ille pronuntiaverat Michel Friedman, qui in Centrali Iudaeorum Germaniae Consilio secundum locum obtinet, suo more gerendi efficere, ut multorum animi a Semitis averterentur.

 

Liber Walserianus prelum subibit

Domus editoria Suhrkamp constituit se illum Martini Walser librum de morte critici cuiusdam conscriptum edituram esse. E contrario diurnum Frankfurter Allgemeine litteris apertis ad Walser datis negaverat se illud opus ante librum impressum in actis suis divulgaturum, quod animo a Semitis abhorrente conscriptum esse videretur.

 

Fons nitrofeni inventus

Horreum frumenti in civitate Mecklenburg-Vorpommern situm fons pabuli nitrofeno herbicidio contaminati est. In hoc horreo iis temporibus, quibus Respublica Democratica Germaniae vigebat, herbicidia periculosa asservabantur. Vestigia huius veneni in ovis atque gallinis reperta sunt.

 

Expositio Documenta undecima in oppido Kassel prima huius millennii patefacta

Documenta Kasseliana, qua nulla artis expositio maior atque celebrior est in mundo, his diebus patefacta est. Haec expositio anno millesimo nongentesimo quinquagesimo quinto [1955] condita adhuc decies [10x] peracta erat. Huic spectaculo, quod per centum dies usque ad diem decimum quintum mensis Septembris [a.d. XVII Kal.Oct.) visitari poterit, Okwui Enwezor e re publica Nigeriana ortus praeest.

 

Praenuntiatio tempestatis

Aequam memento rebus in arduis
servare mentem, non secus in bonis …
seu imbribus atque vento vexatus seu ardore solis aestivi oblectatus aetatem degas.
Tempestas mensis Iunii varia erat et homines desiderio temporis vere aestivi affecit, ut convivia longe exspectata sub divo celebrari possent. Nam Horatium (carm. II 3) secuti gaudia haec exoptant:
Quo pinus ingens albaque populus
umbram hospitalem consociare amant
ramis ?
Quid obliquo laborat
lympha fugax trepidare rivo ?

Huc vina et unguenta et nimium brevis
flores amoenae ferre iube rosae…
Cuius desiderio omnes flagramus aestate ineunte.

 

Glossarium

Latein

 

Deutsch

 

Englisch

campio mundanus

 

Weltmeister   

 

world champion

manus

 

Mannschaft   

 

team

prelum

 

Druckerpresse

 

printing press

domus editoria

 

Verlag

 

publishing house

diurnum

 

Zeitung

 

newspaper

acta, -orum

 

Zeitung

 

newspaper

 

 

 

 

 

"Nuntii Latini mensis Maii 2002" (Radio Bremen) 

Democratae Christiani Nederlandici vicerunt

In Nederlandia per suffragia tanta commutatio rerum facta est, ut Democratae Sociales post octo annorum regimen a re publica gerenda avocati sint. Plurimi enim suffragantium factionibus dextris faverunt, e quibus secundum locum nunc factio illius extremistae Pim Fortuyn obtinet, qui nuper interemptus erat; victoriam autem Democratae Christiani adepti sunt, quorum praeses Jan Peter Balkenende iam a Beatrice regina iussus est habenas rerum Nederlandicarum accipere.

Chirac praesidens iterum

Jaques Chirac denuo praesidens rei publicae Francogallicae creatus est. Suffragio decretorio hic princeps factionis Degaullianae victoriam adeptus est de Jean-Marie Le Pen, illo fautore populismi odiique phyletici et capite Frontis Nationalis. Praesidium ministrorum Jean-Pierre Raffarin suscepit; quo munere pro tempore fungetur donec mense Iunio novum parlamentum creetur.

Factio Liberalis conventum egit

Nova res facta est in conventu Factionis Liberalis in urbe Mannheim peracto: coetus legatorum primum ibi praesidem suum Guido Westerwelle fieri iussit candidatum cancellariatus. Praeterea decretum est, quid socii huius factionis fieri velint, si per suffragia iis licebit ad gubernacula rei publicae accedere. Inter alia promissum est vectigalia minutum iri legesque, quae ad ea pertinent, simpliciores redditum iri.

Hic laetitia - illic tristitia

Societas pedifollica Borussia Dortmund campionatum Germaniae huius anni assecuta est. Ultimo pediludio societatem pedifollicam Werder Bremen vicit, quae tamen certamini Europaeo UEFA intererit. Societas Schalke 04 poculum Unionis Pedifollicae Germaniae adepta est. Pedilusores autem societatis Bayer Leverkusen hoc anno tres quidem titulos merere potuerunt - non modo campionatum et poculum Germaniae, sed etiam campionatum Europae; at cunctis ludis, qui maximum momentum ad bonum eventum habuerunt, victi tamquam manibus nudis ac vacuis relicti sunt.

Senatus civitatis Hamburgi non iam vult

Portus communis civitatum Bremae, Saxoniae Inferioris, Hamburgi non fiet. Id senatus civitatis Hamburgi decrevit. Nunc Brema et Saxonia Inferior pecuniae collocatorem privatum quaerunt, ut portus navibus maximis idoneus eo adiutore in Wilhelmshaven oppido perficiatur.

Operum intermissio a metallorum opificibus finita

Post intermissionem operum quindecim dierum in civitate Badenia-Virtemberga factam inter operum datores et consociationem opificum metallorum manupretium augendum esse convenit. Hoc anno opifices manupretium quattuor centesimis partibus (4%) auctum accipient. Interim et consociationes ceterarum regionum hanc pactionem secuti sunt.

Tutela animalium legi constitutionali Germaniae inseritur

Parlamentum Germaniae decrevit, ut lege constitutionali sanciretur animalia protegenda esse. Quo decreto melius prohiberi potest, ne quis animalia vexet, indigno more vehat, eis adhuc experimenta non necessaria abutatur.

Prima editio mundana in oppido Bremerhaven facta

In theatro oppidi Bremerhaven spectaculum Atlantic Affairs primum toto in orbe terrarum datum est. Cuius operis auctor Udo Lindenberg cantus ac versus, qui inter bella mundana celebres erant, ad iudicium huius saeculi accommodatos praebuit.

Kuros Athenis inventus

Archaeologi Germani, qui antiquitatis cognoscendae causa eam regionem Athenarum effodiunt, quae Kerameikos appellatur, Kuron invenerunt. Est iuvenis statua saeculo sexto ante Christum natum facta. Opus Dipylonis magistri esse existimatur, qui primus arte sua Athenis dicitur floruisse. Praeter iuvenem aliae statuae repertae sunt, inter quas Sphinx.

Praenuntiatio tempestatis

Si et umidus et frigidus fuerit mensis Maius, agricolarum horrea doliaque plena frugum fore proverbium vetus et rusticum ait. Quae cum ita sint, hunc mensem auspicatissimum coepisse apparet. At paucis diebus post nobis quidem, qui prope mare Germanicum habitamus, temporibus aestivis frui licuit, cum reliqua Germania ab imbribus inundationibusque vexaretur. Quid ergo de messibus nostris?Horatio poetae nihil opus erat caelum sideraque observare, ut scribere posset (carm.saec. 29ff.):

 

Fertilis frugum pecorisque Tellus
spicea donet Cererem corona;
nutriant fetus et aquae salubres

 

 

et Iovis aurae.

Sed iis, qui anxii interrogant, num ii dies pauci tota aestas huius anni fuerint, consolationi sit: ver adhuc est; mense Iunio aestas incipiet.

 
     

Glossarium

     

Latein

 

Deutsch

 

Englisch

suffragium decretorium

 

Stichwahl   

 

final ballot

Degaullianus

 

gaullistisch      

 

Gaullistic

odium phyleticum

 

Rassismus

 

racism

praesidium ministrorum

 

Amt des Premierministers

 

office of prime minister

candidatus cancellariatus

 

Kanzlerkandidat

 

candidate for the chancellorship

societas pedifollica

 

Fußballverein

 

football club

campionatus

 

Meisterschaft

 

championship

 

 

 

 

 

pecuniae collocator

 

Investor

 

investor

operum intermissio

 

Streik

 

strike

operum datores

 

Arbeitgeber

 

employers

consociatio opificum

 

Gewerkschaft

 

trade union

manupretium

 

Lohn

 

wages

Dipylonis magister

 

Dipylon-Meister

 

master of the Dipylon

 

 

"Nuntii Latini mensis Aprilis 2002" (Radio Bremen)

Caedes horrifica in urbe Erfurto

Mense Aprili exeunte caedes atrocissima in urbe Erfurto facta est. Iuvenis quidam armatus scholam intravit, ut magistros necaret. Postquam sedecim [16] homines caesi sunt, auctor necis se ipsum interfecit. Ille videtur se ulcisci voluisse, quod nuper e schola expulsus erat. Tale facinus crudele numquam antea in Germania factum est.

 

Imperium Leo Kirch negotiatoris corruit

Societas KirchMedia, cui mercatura pellicularum cinematographicarum et transmissionum televisificarum quaestui erat, aere diruta est. Hic enim complexus mercatorius, qui inter maximos Europae fuerat, pronuntiavit aes alienum, quod postremo ad sex miliarda Euronum conflatum erat, solvi non iam posse. In Germania nullum umquam maius naufragium fortunarum post bellum secundum mundanum accidit.

 

Legatio Colin Powell ministri irrita

E regione Orientis Proximi Colin Powell ab exteris rebus minister Civitatum Unitarum Americae irritus domum rediit, quod indutias inter Israelianos et Palaestinenses perficere non potuit. Palaestinenses, quorum impetibus homines caedi pergunt, Israelianis crimini dant illos in pugnis, quae in oppido Dienin commissae sunt, magnam caedem fecisse. Consilium Securitatis Nationum Unitarum decrevit de his rebus collegium inquisitorium institui.

 

Ad militiam obligari a constitutione Germanica non abhorret

Iuvenes ad militiam vocari non discrepat a constitutione Germaniae. Quo iudicio summae rei publicae consilium querellae adversatum est, qua postulabatur, ne quis officio militiae teneretur nisi voluntarius. Praeterea declaratum est non alienum esse a pari iuris condicione mulierum virorumque servanda viros tantum ad militiam obligari.

 

Impetus terroristicus in Tunesia

Dierbae in insula Tunesiae vasa gasaria autocineto onerario imposita ante synagogam displosa sunt. Quare multi homines aut mortui sunt aut gravia vulnera acceperunt. Inter eos fuit grex Germanorum, qui, ut illud aedificium celebre viserent, laophoro eo advecti erant. Adhuc mortui sunt duodeviginti [18] homines, inter quos tredecim [13] Germani. Non iam dubitatur displosionem illam machinatione terroristarum factam esse.

 

Commutatio rerum Magdeburgi

civitate Saxonia-Anhaltino factis, cum Factio Socialis Democratica Germaniae calamitate quasi Cannensi affecta dimidium fere suffragiorum perderet. Democraticis Liberis post octo annos tandem rursus licebit in sellis curiae Magdeburgensis sedere. Reinhard Höppner, praeses civitatis Saxoniae-Anhaltini, se magistratu abdicaturum totumque e re publica recessurum esse pronuntiavit. Sunt, qui dicant Gerhard Schröder cancellarium clade nuntiata consternatum iterum iterumque exclamavisse: "Reinhard Höppner, suffragia redde!"

 

Novum museum in loco victoriae Arminii celebris

Magno cum apparatu in vico Kalkriese dedicatio musei novi celebrata est, quod in loco cladis Varianae famosae exstructum est. Per multa saecula dubitabatur, ubinam illa pugna facta esset, qua Germani anno nono p. Chr. n. Romanos Arminio duce "in saltu Teutoburgiensi" devicerant tres legiones occidentes. Ante quattuordecim [14] autem annos reliquiis quibusdam casu detectis illud dubium plane sublatum esse videtur. Huic celebritati interfuit etiam Romano Prodi Commissioni Europaeae praesidens.

 

Artificia Graeca in urbe Berolino exponuntur

"Vetustas Graeca - sitne aliquid fictum an factum" disputant ii, qui electa artificia Graeca in Aedibus Martin Gropius composuerunt. Opera quinto et quarto saeculo a.Chr.n. facta inspici possunt, quo in tempore ars Graeca floruisse dicitur. In his operibus exstruendis pars ornamentorum lapideorum, quae Heroum in oppido Trysa situm ornaverant, dilapsa et fracta est. Artificia reliqua usque ad diem secundum mensis Iunii visitari possunt.

 

Loriot Praemium Eulenspiegel adeptus

Victor von Bülow vel Loriot a Bremensibus Praemio Till Eulenspiegel affectus est. Hic tamquam Till Eulenspiegel curavisse dicitur, ut homines quasi in speculum intuentes vitas et mores cognoscerent. Plerique ludi huius hominis urbani in aedibus Radiophoniae Bremensis perfecti sunt. Victor von Bülow spatium vitae, quod Bremae emensus erat, prosperrimum et felicissimum fuisse affirmavit.

 

Elisabeth secundae reginae mater mortua

Mater reginae anno centesimo secundo vitae in Windsor palatio suo mortem obiit. Cives Britanniae ei nomen amoris plenum materculae reginae dederunt, quod plebi dilectissima erat.

 

Et nunc: Tempestas

Si quicquam post longam saevitiam hiemis optanti optigit umquam insperanti, nihil gratius esse potest quam ver. Ut in carminibus Buranis (Carm. amatoria 136,1)
scriptum est:

Omnia Sol temperat
purus et subtilis,
novo mundo reserat
faciem Aprilis;
ad Amorem properat
animus herilis
et iocundis imperat
deus puerilis.

Quamquam multo etiam calidius fieri oportet, ut gaudiis veris fruamur, animo non deficiamus: aestas crescit eundo.

 

Glossarium

Latein

 

Deutsch

 

Englisch

pellicula cinemato-graphica

 

Film   

 

movie

transmissio televisifica

 

Fernsehübertragung      

 

television broadcast

aere dirui         

 

insolvent werden                      

 

go bankrupt

complexus mercatorius 

 

Konzern

 

combine

aes alienum

 

Schulden

 

debts

miliardum

 

Milliarde           

 

billion (US), 1000 millions (GB)

naufragium fortunarum  

 

Bankrott

 

bankrupt

 

 

 

 

 

Oriens Proximus

 

Naher Osten    

 

Middle East

irritus   

 

erfolglos

 

without success

dicio    

 

Verwaltung       

 

government

perscrutare      

 

durchsuchen

 

search, scour

 

 

 

 

 

summae rei publicae consilium

 

Verfassungsgericht

 

constitutional court

querella

 

Klage   

 

action, suit

officio teneri                             

 

verpflichtet sein

 

be obliged

 

 

           

 

 

vas gasarium

 

Gasbehälter

 

gas canister

autocinetum onerarium

 

Lieferwagen

 

van

displodi (pass.)  / displosio

 

explodieren  /  Explosion

 

explode  /  explosion

laophorum

 

Autobus

 

bus, coach

machinatio
terroristarum

 

Terroranschlag

 

terrorist attack

dedicatio

 

Einweihung, Eröffnung

 

opening

celebritas         

 

Feierlichkeit

 

festivity

vetustas Graeca

 

griechische Klassik

 

classical Greek period

Alii nuntii

De congressu amicorum linguarum Latinae et Graecae

"Litterae Latinae et Graecae numquam evanescent" - id quidem sibi persuasum habent magistri et professores, qui linguam Latinam et Graecam docent. Qui hoc anno - ad numerum fere mille - in urbem Dresdam convenerunt, ut de his quaestionibus disputarent: Quanti aestimari potest his quidem temporibus studium linguae Graecae et Latinae? Cur etiam hodie litteris antiquorum hereditate nobis relictis studeamus? Neque philologi ipsi modo, sed etiam alii gravissimi et dignitate praediti homines, in his Theo Sommer, ille editor commentarii periodici DIE ZEIT, multis et iustis de causis studium humanitatis non neglegendum esse censuerunt. "Praemio humanitatis", quod secundo quoque anno homini de humanitate merito a societate linguae Graecae et Latinae faventium tribuitur, hoc anno Alfred Grosser, ille auctor Franco-Gallicus, affectus est.

 

De museo novo in Kalkriese

Ante diem undecimum Kalendas Maias (21.4.)in vico Kalkriese prope oppidum Osnabrück sito, museum novum a Sigmar Gabriel, primo ministro Saxoniae Inferioris, apertum est. Ibi duo milia fere annorum reliquiae Vari legionumque eius iacent, postquam anno nono post Christum natum tres legiones Romanae (XVII., XVIII., XIX.) a Germanis Arminio Cherusco duce proelio devictae sunt. Paucis modo annis ante hic maestus locus illius cladis Varianae "in saltu Teutoburgiensi" factae, qui tot annos a tot viris prudentibus frustra quaesitus erat, repertus est. Hunc verum locum pugnae esse apparet ex magna copia rerum militarium et nummorum Romanorum ibi inventorum, quos ante annum nonum post Christum natum signatos esse constat. Museum, quod opus novum ac huic tempori aptum est, a visitatoribus quasi explorari potest. Locus pugnae, qui a Tacito in Annalibus (I,61) perscribitur, nunc hortus archaeologicus factus est.

 

 

 

"Nuntii Latini mensis Martii 2002" (Radio Bremen) 

Tumultus in consilio foederali ortus

Cum lex de advenis recipiendis in consilio foederali lata esset, tumultus et rumores orti sunt. Praesidens consilii Klaus Wowereit suffragium ambiguum Brandenburgense assensionem iudicaverat. Qua ratione praesides civitatum factionum Christianarum rem publicam labefactari affirmaverunt et indignationem simulantes a contione secesserunt.

 

Coloniae indignatio magna de pecuniis acceptis

Factio Socialis Democratica Coloniensis pecuniis acceptis in infamiam incidit. Norbert Rüther, qui modo huic factioni renuntiavit, confessus est se contra leges falsis professionibus fontem largitionum acceptarum celavisse. Coloniae nunc publice investigatur, num illae pecuniae solutae sint, ut maior apparatus purgamentis comburendis locaretur.

 

In Afganistania inter alios Germani milites mortem obierunt

Et duo milites Germanici et tres Danici, qui praesidiis Afganistaniae intererant, interfecti sunt, dum missili, quo aeroplana deleri possint, vim displodendi adimere conantur. Insuper tres Dani et quinque Germani gravibus vulneribus affecti sunt. Milites mortui et vulnerati quoque iam in patrias revecti sunt. Quo de casu certior factus Rudolf Scharping, minister defensionis Germaniae, statim itinere Africano interrupto Berolinum revertit.

 

Regio orientis proximi tumultibus concussa

Nullo tempore, postquam Palaestinenses ante duos annos seditionem coeperunt, violentius actum est quam hoc mense. Profecto plures ducentis hominibus interfecti sunt, dum insidiae terroristicae fiunt vel Israeliani maiore vi vindictam quaerunt. Consilium Securitatis Nationum Unitarum autem Civitatibus Americae Unitis rogantibus declaravit sibi rem publicam Palaestinensium instituendam videri. Quae sententia ad id tempus nequaquam effici potuerat.

 

Comitia Bavarica

Comitiis communalibus nuper per Bavariam habitis Unio Socialis Christiana paulo plura suffragiorum acquisivit quam proximis. Monaci autem in capite Bavariae candidatus factionis Socialis Democraticae Christian Ude iterum magister civium primarius electus est; qui denuo coalitione rubra-viridi nisus urbem regere poterit.

 

Helvetii de civitate Nationibus Unitis adiungenda suffragium ferunt

Cives Confoederationis Helveticae plebiscito facto civitatem suam Nationibus Unitis adiungendam esse constituerunt. Pro ea re duodecim cantones sententias tulerunt undecim cantonibus rem improbantibus. Confoederatio Helvetica ultima rerum publicarum - civitate Vaticano et Taivania exceptis - adhuc Nationibus Unitis se adiungere negaverat.

 

Mercatus librarius Lipsiae habitus

Mercatu librorum Lipsiae habito Christa Wolf auctrix Praemio Librario Germanico pro opere vitae affecta est. Günter Grass, qui iam Praemium Nobelianum adeptus erat, ornatu magno facto excellentissima oratione ingenium auctricis laudavit. Ceterum hoc anno libros audibiles hominibus maxime acceptos esse apparuit. Eius generis libri recentes etiam in mensa Radiophoniae Bremensis expositae erant.

 

Novus praesidens summae rei publicae consilii

Hans-Jürgen Papier nunc summae rei publicae consilio praeest. Is aetate quinquaginta octo [58] annorum a consilio foederali delectus succedit Jutta Limbach, quae annos sexaginta octo [68] nata otio cum dignitate fruetur. Papier erat ex quattuor annis vicepraesidens summae rei publicae consilii.

 

Athenienses stadium Olympicum renovant

Stadium Olympicum Atheniensium abhinc tres annos terrae motu graviter laesum penitus reficitur. Hoc aedificium marmore candido exstructum insigne est, quod ibi prima Olympia nostrae aetatis anno millesimo octingentesimo nonagesimo sexto [1896] data sunt. Magistratibus propositum est, ut opera perficiantur, priusquam mense Augusto anni bis millesimi quarti [2004] ludi Athenis editi erunt.

 

Galli in Germaniam reverterunt

Pellicula novissima e libellis orta, quos auctores pictographici René Goscinny et Albert Uderzo ediderant, plurimos spectatores in cinemata attrahit. Iterum dramatis personae ab hominibus veris aguntur. Hac in fabula, quae inscribitur "Asterix et Obelix: Missio Cleopatra", illi Galli fortes et callidi formosam Cleopatram adiuvant milites Romanos pavore atque plagis vexantes.

 

Praenuntiatio tempestatis

Quo usque tandem abutere, o Iupiter, patientia nostra? Quam diu etiam furor tempestatis tuus nos eludet? Quem ad finem effrenati imbres et venti se effundent? Anonymus quidam in carminibus Buranis de vere multum et diu meditans metuit, ne hiems iam mense Februario recedere cogatur:

Bruma, veris aemula,
sua iam repagula
dolet demoliri;
demandat Februario,
ne se solis radio
sinat deleniri. (carmina Burana 57,1)

Tempestatibus mensis Februarii fortiter restitimus. Nunc autem mense Martio, i.e. vere ineunte, etiam nos desiderium solis et caloris capit. Da, quae promissa sunt, o Iupiter, cum tempora anni cursu solis terminata sunt.

 

Glossarium

Latein

 

Deutsch

 

Englisch

consilium foederale

 

Bundesrat

 

parlament for representation of the federal states

praesides civitatum

 

Länderchefs

 

minister presidents of the federal states

advena, -ae, m./f.

 

Zuwanderer

 

immigrant

lex de advenis recipiendis

 

Zuwanderungsgesetz

 

immigration laws

Colonia

 

Köln

 

Cologne

Colonienses

 

Kölner

 

of Cologne

renuntiare (cum dativo)

 

sich lossagen von, etw. aufgeben

 

renounce

professio

 

(Steuer-)Erklärung

 

tax declaration

purgamenta

 

Müll

 

waste

apparatus purgamentis comburendis

 

Müllverbrennungs-anlage

 

incinerating plant

locare

 

in Auftrag geben

 

order

Danicus

 

dänisch

 

Danish

praesidia, -orum

 

Schutztruppe

 

protecting force

missile

 

Geschoss, Rakete

 

missile

vim displodendi adimere

 

entschärfen

 

de-activate

Oriens proximus

 

der Nahe Osten

 

Middle East

vindicta

 

Vergeltung

 

retaliation

Consilium Securitatis

 

Sicherheitsrat

 

Security Council

nequaquam

 

auf keine Weise

 

by no means

comitia,-orum

 

Wahlen

 

elections

suffragium

 

Wahlstimme

 

vote

Monacum

 

München

 

Munich

magister civium primarius

 

Oberbürgermeister

 

Lord Mayor

Lipsia

 

Leipzig

 

 

libri audibiles

 

Hörbücher

 

audio-books

mensa (in mercatu)

 

Messestand

 

exhibition stand

summae rei publicae consilium

 

Verfassungsgericht

 

 

casus viarius

 

Verkehrsunfall

 

car accident

auctor pictographicus

 

Comicautor

 

 

 

 

"Nuntii Latini mensis Februarii 2002" (Radio Bremen) 

Ludi Olympici hiberni peracti

Exquisitissimo et permagnifico spectaculo finis Olympiorum hibernorum undevicesimorum [XIX] celebratus est, quae in Urbe Lacus Salsi per sedecim dies habita sunt. Nullis certaminibus, postquam ante centum sex [106] annos denuo instituta sunt, plus operae studiique ad id consumptum est, ne spectatores athletaeque in ullum periculum vocarentur. Ludis interfuerunt plures quam duo milia quingenti [2500] agonistae e septuaginta septem [77] nationibus orti. Inter quos Ole Einar Bjoerndalen Norvegus eminuit, qui quattuor nomismata aurea tulit. Nullius nationis athletis melius evenit quam Germaniae, qui triginta quinque [35] nomismata sibi pepererunt, inter quae erant duodecim aurea. Laetitia autem certaminum feliciter peractorum paulum obumbrata est: fuerunt enim athletae, qui iuris iurandi Olympici obliti drogis se excitavissent. Hi duos in annos certaminibus athleticis excludentur.

 

Milosevic reus factus

In tribunali Hagensi, quod est ad iniurias bellicas persequendas institutum, agi coeptum est in Slobodan Milosevic, qui praesidens Serbiae Iugoslaviaeque fuerat. Ei crimini datur auctorem fuisse, ut in Bosnia genocidium perpetraretur atque in Cossovia Croatiaque humanitate contempta alia scelera gravissima committerentur. Damnatum poenam sequi oportet, ut per reliquam vitam inclusus teneatur. Exspectatur sententiam non ante finem anni bis millesimi quarti [2004] pronuntiatum iri.

 

Jagoda magistratu se abdicavit

Florian Gerster, et minister rerum socialium Rhenaniae-Palatinatus et sodalis factionis Socialis Democraticae, administrationi operum praeerit. Succedet Bernhard Jagoda, quem cum rumores tum minister operum atque laborum Walter Riester urgebant, ut immaturo otio se daret. Qua ratione Riester demonstravit se infamiam tabularum, quae male administratae essent, non pati. Item administrationem operum reformari iussit.

 

Convivium vetustissimum Bremae habitum

Centeni et mercatores et nauarchi et viri, qui in rebus politicis vel oeconomicis primos ordines tenent, Bremam in curiam convenerunt, ut quadringentesimum duodesexagesimum [458.] convivium anniversarium Schaffermahl dictum celebrarent. Sigmar Gabriel, qui Saxoniam Inferiorem regit, invitatus erat, ut orationem haberet. Ille cooperationem suae civitatis cum civitate Bremensi maximi momenti esse affirmavit. Praecipue id spectandum esse, ut in Germania septentrionali viae opesque ad commercium pertinentes meliores redderentur

 

Günter Grass librum novum perfecit

Numero quinquaginta milium exemplarium liber novus a Günter Grass scriptus editus est. In hoc libro, qui inscribitur "gressu cancri" [Im Krebsgang] , de illis rebus atrocibus narratur, quae die tricesimo [30.] mensis Ianuarii [= a.d. III. Kal.Febr. ] anno millesimo nongentesimo quadragesimo quinto [1945] factae sunt: tum in mari Baltico navis Germanica nomine Wilhelm Gustloff, cui decem milia [10 000] hominum inerant, a nave subaquanea Russorum demersa erat. Qui liber, cuius auctor iam praemium Nobelianum adeptus est, in plus triginta [30] linguas transferetur.

 

Spectacula cinematographica Berolini data

Berolini denuo ludi cinematographici editi sunt, in quibus spectacula quadringenta [400] numero ex octoginta [80] nationibus data sunt. Iis ludis nomine Berlinale primum praefuit Dieter Kosslick, qui in locum Moritz von Hadeln Helvetii successit. Praemium, cui nomen est Ursus Aureus, iudices duabus pelliculis tribuerunt: et pellicula cinematographica "Solis dies sanguineus" [Bloody Sunday] a Paul Greengrass facta et pellicula picturata "arte magica sublatus" [Spirited Away], quam Hayao Miyazaki Iaponiensis perfecerat, hoc praemio affectae sunt. Ursus Argenteus pelliculae Germanicae ab Andreas Dresen factae "dimidium scalarum" [Halbe Treppe] datus est. In summa quingenta milia [500 000] hominum ludos spectatum venerunt.

 

Elisabeth Mann Borgese obiit

Elisabeth Mann Borgese oceanographa octogesimo quarto anno [84.] in Confoederatione Helvetica e vita excessit. Docuerat inde ab anno millesimo nongentesimo octogesimo [1980] rerum politicarum scientiam in Dalhouse studiorum universitate Canadensi. Qua auctrice per nonnulla foedera pactum est, ut maria tutanda essent. Elisabeth Mann Borgese, filia postuma Thomas Mann scriptoris fabularum, nunc etiam in Germania apud multos homines nomen praeclarum accepit emissionibus televisificis recentibus, quibus vitae et tempora patris atque gentis clarissimae Mann divulgarentur.

 

Hildegard Knef mortua

Post morbum longinquum Hildegard Knef, illa actrix, cantrix, auctrix defuncta est. Vixit septuaginta sex [76] annos. Johannes Rau praesidens rei publicae eam actricem famosissimam fuisse praedicavit, cum Gerhard Schroeder cancellarius diceret Germanos artificem scaenicam popularissimam amisisse. Ludis cinematographicis, qui Berolini habebantur, huic divae cinematographicae, quae etiam in Hollywood aliquid profecerat, recensio praeteritorum artis operum dedicata est.

 

Cantrix Bremensis certamini internationali intererit

Corinna May, cantrix caeca Bremensis, proverbium secuta est, quo affirmatur Bremensibus licere ter conari. Nam bis frustra conata in certamine Chilonii habito electa est, ut pro Germania decertaret de praemio a consociatione televisifica Eurovisione instituto, de quo mense Maio Tallinni in capite Estoniae decertabitur. Carmine suo "Sine musica vivere nequeo" [I Can't Live Without Music] illa per Germaniam telespectatores tanta admiratione affecit, ut suffragio telephonico e quattuordecim [14] competitoribus victoriam ferret.

 

Praenuntiatio tempestatis

Tempestas mensis Februarii gratissima fuit, si quem procellae delectant, immo vero non tantum procellae, sed etiam nives, pruinae et tonitrus fulgura comitantes. Talia tempora Vergilius poeta neminem nisi heroem suum pati potuisse scripsit, cum eum ad oras Africae iactari fecit:

… ac venti velut agmine facto,
qua data porta, ruunt et terras turbine perflant.
Incubuere mari totumque a sedibus imis
una Eurusque Notusque ruunt creberque procellis
Africus, et vastos volvunt ad litora fluctus.

Intonuere poli et crebris micat ignibus aether…
(Verg.Aen. I 82 ff.)

Nobis autem, qui anno millesimo nongentesimo sexagesimo secundo [1962] impetui fluctuum et ventorum restitimus, clades maritimae vastationes
eiusmodi ferentes non iam contingant mense Februario posteris in annis.

 
   

Glossarium

   

 

Latein

 

Deutsch

Urbs Lacus Salsi

 

Salt Lake City

agonista

 

Wettkämpfer(in)

nomísma

 

Medaille

obumbrare

 

überschatten

ius iurandum

 

Eid

drogis excitare

 

dopen

 

 

 

tribunal Hagense

 

Haager Gerichtshof

crimini dare

 

vorwerfen

genocidium

 

Völkermord

perpetrare

 

begehen

sententia

 

Urteilsspruch

 

 

 

Rhenania-Palatinatus (-ûs)

 

Rheinland-Pfalz

administratio operum

 

Bundesanstalt für Arbeit

minister operum atque laborum

 

Arbeitsminister

infamia

 

schlechter Ruf durch etw.

tabellae

 

Statistiken

 

 

 

nauarchus

 

Kapitän

anniversarius,-a,-um

 

jährlich

Saxonia Inferior

 

Niedersachsen

septentrionalis,-e

 

nördlich

commercium

 

Warenverkehr

 

 

 

mare Balticum

 

Ostsee

navis subaquanea

 

U-Boot

praemium Nobelianum

 

Nobelpreis

 

 

 

Berolinum

 

Berlin

ludi cinematographici

 

Filmfestspiele

pellicula picturata

 

Zeichentrickfilm

Iaponiensis

 

Japaner

 

 

 

oceanographa

 

Meereskundlerin

Confoederatio Helvetica

 

Schweiz

rerum politicarum scientia

 

Politische Wissenschaften

studiorum universitas

 

Universität

Canadensis,-e

 

kanadisch

postumus,-a,-um

 

zuletzt geboren

emissio televisifica

 

Fernsehsendung

 

 

 

actrix

 

Schauspielerin

auctrix

 

Autorin

cancellarius

 

Kanzler

diva cinematographica

 

Filmdiva

recensio praeteritorum artis operum

 

Retrospektive

 

 

 

Chilonium

 

Kiel

consociatio

 

Organisation

televisificus,-a,-um

 

Fernseh-

Tallinnum

 

Tallinn

Estonia

 

Estland

per

 

überall in

telespectator

 

Fernsehzuschauer

suffragium telephonicum

 

Abstimmung per Telefon

competitor

 

Mitbewerber

 

 

 

procella

 

Sturm

nix, nivis

 

Schnee

pruina

 

Raureif

tonitrus,-ûs

 

Donner

 

 

"Nuntii Latini mensis Ianuarii 2002" (Radio Bremen) vom 1.2.2002

Euro adest

Euro anno ineunte inductus est mercatoribus argentariisque nullis difficultatibus affectis. Hanc pecuniam novam permulti homines ubique Europae laetitia atque clamore acceperunt. Ceterum Germanis ante Kalendas Martias marca Germanica uti licet.

Edmund Stoiber cancellariatum petit

Edmund Stoiber, et primus minister Bavariae et praeses Unionis Christianae Socialis, propalam professus est sese ex sententia utriusque factionis Christianae cancellariatum petiturum.
Antea Unionis Christianae Democraticae praeses Angela Merkel se ab eodem incepto desistere denuntiaverat. Mense Septembri in Germania fient comitia parlamentariis creandis.

Milites Germani nunc in Afganistania

Vexillationes Germanicae inde a mense Ianuario Kabul, caput Afganistaniae, circumeunt. Qui milites ad negotium evocati sunt, quo nullum difficilius periculosiusque umquam post secundum bellum mundanum exercitui Germaniae mandatum erat. Ad mille milites Germani praesidiis a Nationibus Unitis missis intererunt.

Senatrix Bremensis mortem immaturam obiit

In via autocinetica, quae est inter Bremam et Bremerhaven oppida, Hilde Adolf, dum autocinetum domum ducit, casu viario interfecta est.
Ea fuerat senatrix Bremensis, cui condiciones operariorum, feminarum, iuvenum, hominum egentium nec non salus publica curae erant. Quae mulier pro Factione Sociali Democratica in re publica versata plebi maxime accepta erat, ut putaretur digna esse, quae Henning Scherf civium Bremensium magistro succederet.

Bremae paulo plures homines labore destituti

In oppido Bremerhaven mense Decembri septendecim virgula septem partes centesimae [17,1%] ex operariis quaestu carebant - non aliter atque mense anteriore. Bremae autem eorum numerus paulo auctus est, ut tunc duodecim virgula quattuor partes centesimae [12,4%] ex iis sine labore essent. Christian Hawel, qui Bremae officium operum et laborum dirigit, pronuntiavit et tempestatem hibernam et recessionem oeconomicam illud effecisse. Inter operarios totius Germaniae illo tempore paene decimus quisque tantum quaestus expers erat.

Neubarth exercitator novus societatis pedifollicae Schalke 04

Frank Neubarth, pristinus ille pedilusor societatis Werder Bremen, ludis huius anni finitis manum primam societatis pedifollicae Schalke 04 exercebit. Se usque ad annum bis millesimum quartum [2004] hoc munere functurum esse subscriptione nominis confirmavit. Neubarth trecentos septendecim [317] ludos pro Werderanis absolvit et nonagies septies [97x] follem portae intulit

Certamen birotale sex dierum Bremense optimum eventum habuit

Bruno Risi et Kurt Betschart socii certamine birotali duodequadragesimo [38.] Bremae habito victoriam adepti sunt. Ambo birotarii Helvetici certamen Bremense vicerunt tertium, cum Andreas Kappes, cui Brema orto spectatores Bremenses maxime faverent, una cum Andreas Beikirch socio quartus e certamine exiret.
In summa centum triginta milia [130.000] spectatorum hoc certamen Bremae frequentaverunt, quod maximum et plebi maxime acceptum omnium certaminum birotalium orbis terrarum esse inter omnes constat.

Nova praeses instituti Goethe

Jutta Limbach, quae nunc summae rei publicae consilio praeest, Kalendis Maiis novum munus inibit: Ea praeses instituti Goethe succedet Hilmar Hoffmann, qui munere cedet, ut otio cum dignitate fruatur.

Astrid Lindgren mortua

Nonaginta quattuor [94] annos nata Astrid Lindgren obiit. Propter fabulas pueriles liberis atque parentibus ubique terrarum maxime accepta erat. Composuit libellos classicos velut " liberi Bullerbuenses sumus " vel " de Karlsson tecticola " vel " de Pippi tibialibus longis ", quae fabula anno millesimo nongentesimo quadragesimo quinto [1945] gloriam repentinam atque universalem poetriae attulerat.

Sociologus celeberrimus Lutetiae Parisiorum mortuus

Lutetiae Parisiorum Pierre Bourdieu sociologus natione Francogallus anno aetatis septuagesimo secundo [72.] in valetudinario quodam e vita discessit. Hic vir, qui inter homines contemporaneos in doctrina sociologica versantes eminuit, numquam a re publica recessit. Inter libros eius, quibus laudem sibi paravit, est ille "de miseriis mundanis" conscriptus, qui anno millesimo nongentesimo nonagesimo tertio [1993] editus est.

Praenuntiatio tempestatis

Iam Romani antiqui existimabant hiemis tempestatem praeclaram occasionem esse paululum vini gustare. Exempli causa Horatius poeta commemorari potest, qui e domo sua Soracte nive candidum videns Thaliarcho cuidam mandavit:
Dissolve frigus ligna super foco
large reponens atque benignius
deprome quadrimum Sabina,
o Thaliarche, merum diota.
Permitte divis cetera….
Hoc anno ineunte nobis in septentrionibus viventibus tempestas paulum quidem nivis, sed, ut semper, procellas imbresque graves tulit:
Sequamur exemplum Horatii poetae !

 
Glossarium
Latein   Deutsch
factio   Partei
vexillatio   militärische Abteilung
circumire (+acc.)   in .... patrouillieren
praesidia, -orum   Schutztruppen
via autocinetica   Autobahn
autocinetum   Auto
casus viarius   Verkehrsunfall
civium magister   Bürgermeister
labore destitutus   ohne Arbeit, arbeitslos
officium operum et laborum   Arbeitsamt
societas pedifollica   Fußballverein
pedilusor   Fußballspieler
follem portae inferre   ein Tor schießen
certamen birotale   Radrennen
birotarius   Radfahrer
summae rei publicae consilium   Verfassungsgericht
tibiale   Strumpf
Lutetia Parisiorum   Paris

 

 

 

 

 

 

"Nuntii Latini mensis Decembris 2001" (Radio Bremen) vom 28.12.2001

Regimem ad tempus delectum Afganistaniam reget

Consilium Securitatis Nationum Unitarum exercitum multinationalem in Afganistaniam mitti constituit. Qui exercitus praesidio erit iis, qui Talibanis pulsis per sex menses Afganistaniam recturi sunt. Militibus eius exercitus, quibus Britanni praesunt, et Afganos tuendi et sui defendendi causa armis uti licet.

"Rubri" et "Rubidi" coalescunt in civitate Berolino

Coalitio Factionis Socialis Democraticae (SPD) cum Factione Socialismi Democratici (PDS) civitatem Berolinum per quinque annos reget. Klaus Wowereit (SPD) magister civium et Gregor Gysi (PDS) laeti dixerunt se de principiis regendi consentire.
De muneribus distribuendis se postea acturos esse. Regimen novum, quod Berolini senatus appellatur, die decimo septimo [17.] mensis Ianuarii creabitur.

Angela Merkel triumphavit

Angela Merkel e conventu Factionis Christianae Democraticae (CDU), qui in urbe Dresden habitus est, quasi triumphans abiit. Delegatorum enim nonagesima pars e centum [90%] Laurenz Meyer secretarium generalem suffragata est. Numero suffragiorum etiam gradus comprobationis Angela Merkel ipsius significari existimabatur.

Procuratores navalium "Vulkan" damnati

Tres procuratores pristinorum navalium "Vulkan" ab iudicio civitatis Bremae fidei laesae damnati sunt, ut per binos annos custodia teneantur. Per iudicium autem eis spatium probationis concessum est. Re centum dies acta iudicibus persuasum est Friedrich Hennemann, qui navalibus praefuerat, una cum duobus collegis octingentis quinquaginta milionibus [octiens milliens et quingentiens = 850.000.000] marcis Germanicis pecuniae publicae aliter usum esse atque iussus sit. Ei enim mandatum erat, ut hac pecunia navalia in Germania orientali sita adiuvarentur.

Numerus incolarum urbis Bremae crescit

Bremae hoc ipso tempore quingenta quadraginta milia triginta unus [540.031] incolae vivunt; quorum numerus sescentis triginta [630] maior est quam numerus proximi anni. Quod in medium protulit Officium Statisticum Civitatis Bremensis.
Numerus autem incolarum oppidi Bremerhaven perpetuo minuitur, nam ad bina milia [2.000] hominum quotannis illinc demigrant.

Brema certaminis pedifollici mundani particeps esse vult

Henning Scherf magister civium Bremensium in urbe Francofurto Bremam locum pediludiorum certaminis mundani proposuit. Talibus ludis faciendis Bremam maxime idoneam esse, nam in hac urbe et tutas tranquillasque res omnes et cunctas vias brevissimas esse. Stadium Visurgis renovatum quadraginta quinque milia [45.000] spectatorum capturum esse. Sumptus autem stadii renovandi quinquaginta quinque milionibus [quingenties et quinquagies = 55.000.000] marcis Germanicis constabunt.

Artificia magni momenti Berolini denuo spectari possunt

Berolini aditus ad Veterem Artificiorum Expositionem Nationalem a Julian Nida-Ruemelin denuo spectatoribus praebitus est. Hoc institutum, cuius aedificium per tres annos funditus renovatum est, anno millesimo octingentesimo septuagesimo sexto [1876] primum usui publico dedicatum erat. Ibi per tria tabulata quadringentae quadraginta [440] picturae atque octoginta [80] sculpturae spectari possunt. Inter quorum artifices ante alios laudani sunt hi: Caspar David Friedrich, Karl Friedrich Schinkel, Max Liebermann, Adolph Menzel, Max Beckmann nec non Edouard Manet, Claude Monet, Auguste Renoir, Auguste Rodin.

"Harry Potter" in linguam Latinam vertetur

J.K.Rowling auctrix fabularum de Harry Potter et principes domus editoriae Bloomsbury iis fabulis in Latinum et Graecum translatis animos discipulorum ad eas linguas discendas incitari volunt. Itaque Peter Needham professori cuidam, qui linguam Latinam et Graecam in collegio Eton docet, mandaverunt, ut librum "de Harrio Pottero et de lapide sapientium" usque ad annum bis millesimum tertium [2003] in Latinum et Graecum transferret.

Praenuntatio tempestatis

Germania est omnis divisa in partes duas, quorum unam incolunt homines Bavarici, alteram gentes quaedam, quae sub septemtrionibus vivere consueverunt. Hi omnes inter se differunt lingua, institutis, tempestate. Septemtrionalia tenent diu atque obstinanter imbres ventique et nebulae, sub sole candido in nive ambulare Bavaros iuvat. Putes mense Decembri imprimis nonnullos homines sub septemtrionibus viventes in animum inducere, ut in Bavariam migrent. Minime vero. Hi viri mulieresque haud umquam animo deficient sperantes tempestatem aliquando meliorem futuram. Ceterum non nisi in septemtrionibus Radiophonia NORDWEST audiri potest.

 
Glossarium
Latein   Deutsch
consilium securitatis   Sicherheitsrat
Nationes Unitae   die Vereinten Nationen (UNO)
coalescere   sich verbinden, koalieren
Berolinum   Berlin
secretarius generalis   Generalsekretär
suffragari   für jemanden stimmen
comprobatio   Zustimmung
procurator   Manager
navalia,-ium n   Werft
fides laesa   Untreue
bini   je zwei
probatio   Bewährung
certamen mundanum   Weltmeisterschaft
pedifollicus   Fußball
magister civium   Bürgermeister
Bremensis   bremisch
Francofurtum   Frankfurt
pediludium   Fußballspiel
stadium Visurgis   Weserstadion
Vetus Artificiorum Expositio Nationalis   Alte Nationalgalerie
tabulatum   Stockwerk
domus editoria   Verlag
Bavaria   Bayern
Bavarus   Bayer
Bavaricus   bayerisch
septemtriones   Großer Wagen; Norden
septemtrionalia,-ium n   nördliche Gegenden
radiophonia   Radio, Rundfunk

 

 

"Nuntii Latini" (Radio Bremen) vom 29.11.2001

Schroeder venit, vidit, vicit

Gerhard Schröder legatos factionum et Socialis Democraticae et Viridium coegit assentiri, ut milites Germani bello Afganico interessent. Ille enim cancellarius Germaniae negavit coalitionem pergi posse, nisi omnes legati factionum regentium praeter singulos consilia sua adiuvarent. Socii Factionis Socialis Democraticae in conventu in urbe Nuernberg habito Gerhard Schröder cancellarium Germaniae maxima parte suffragiorum praesidem factionis comprobaverunt. Socii, in his et iuniores, qui "Jusos" appellantur, ita in omnibus fere rebus cum cancellario consentiebant, ut nonnulli commentatores Factionem Socialem Democraticam nihil aliud nisi congregationem ad eligendum cancellarium factam esse dicerent - ut olim Factionem Christianam Democraticam regente cancellario Helmut Kohl. Socii Factionis Viridis, qui in oppido Rostock rationes rei publicae regendae magnis controversiis disputabant, quasi dentibus stridentes et stomacho laborantes bellum contra terroristas comprobaverunt et hoc modo coalitionem regentem servaverunt. Quamquam ob eam rem a sociis Factionis Socialis Democraticae maxima laude afficiebantur, Democratae Christiani Factionem Viridem quasi animam suam amisisse et obsoletam supervacaneamque factam esse affirmaverunt.

Pro Afganistania pax firma quaeritur

A Nationibus Unitis [UNO] invitati legati gentium Afganistaniae et eorum, qui copiis suis singulis eius terrae regionibus potiti sunt, prope Bonnam concilium habent; etiam legatio regis ante triginta [30] fere annos fugati adest. Tale concilium propter discidia inter gentes Afganorum et propter dominationem Talibanorum per multos annos haberi non potuerat. Ut pax firma fiat, hae quaestiones solvendae sunt: Quomodo omnes huius terrae incolae securi vivere poterunt? Quomodo Afganistania post cladem Talibanorum administrabitur? Quomodo res publica democratica instituetur nulla gente nullaque factione exclusis? Quomodo egestati civium occurri atque saluti publicae prospici poterit? Has res convenire difficillimum erit. Quare fortasse pluribus conciliis opus erit, ut ea pax aequa assequatur, quae desiderantur.

Adiutores societatis "Shelter Now" in Germaniam reversi

Illi quattuor viri mulieresque societatis auxiliaris "Shelter Now", qui obsides a Talibanis deducti per tres menses in carceribus inclusi erant, nunc demum in Germaniam reverterunt. Postquam loco secreto se refecerunt, in Saxoniam Inferiorem redierunt. Talibani illos accusaverant, quod religiones Christianas vulgarent.

Plutonium in portum oppidi Bremerhaven invectum aegre fertur

Sodales consociationis oecologicae "Greenpeace" [i.e. pax virens] in portu oppidi Bremerhaven navi centum viginti quinque [125] chiliogramma plutonii invehenti palam adversati sunt. Illa materia radioactiva decem annis ante in Scotiam deportata erat. Nunc autem, quod depositorium illud sublatum est, haec materia periculosissima in Germaniam revecta est.

"Harry Potter" in cinematibus exoptatus

Nulla umquam fabula cinematographica iam primis diebus plures spectatores attraxit quam illa nova Americana de "Harry Potter et lapide sapientium" facta. Sic et in Civitatibus Americae Unitis et in Britannia arcae cinematum pecunia inundatae sunt. Haec fabula, quae est de illo artis magicae tirone Britanno, inde a die vicesimo secundo [22] mensis Novembris in Germaniae quoque cinematibus spectari poterat.

 

Latein   Deutsch   Englisch
Factio Socialis Democratica   SPD   Social Democratic Party
Factio Viridium   Partei der Grünen   Green Party
stridere   knirschen   to gnash
stomachus   Magen   stomach
supervacaneus   überflüssig    
Bonna   Bonn   Bonn
discidium   Zerwürfnis    
dominatio   Gewaltherrschaft    
egestas   Elend, Notlage    
prospicere   sorgen für   to take care of
procuratio   Amt eines Beauftragten   task of a deputy
magister civium Bremensium   Bremer Bürgermeister   mayor of Bremen
consociatio oecologica   Umweltschutz-organisation   environmental organization
adversari   entgegentreten   to oppose, to act against
depositorium   Lagerstätte   disposal site
fabula cinemato-graphica   Film   movie
arca   Kasse   cashbox
tiro   Lehrling   apprentice
 

 

 

"Nuntii Latini" (Radio Bremen) vom 7.11.2001

Berolini adhuc de coalitione futura dubitatur
      Ex electionibus, quae Berolini in capite Germaniae habitae sunt, Factio Socialis Democratica victrix exiit. Tamen sola urbem regere non poterit. Adhuc autem nondum satis constat, quam factionem ad civitatem regendam adhibitura sit. Klaus Wowereit praefectus urbis dixit id spectandum esse, ut et consensus inter regentes maximus et coalitio futura per hos quinque annos stabilis foret. Frank Steffel, qui inter candidatos factionis Democraticae Christianae principatum obtinuerat, pronuntiavit suam factionem, quae ipsius culpa in electionibus non satis placuisset, summa vi regentibus se opposituram.

Bellumne Afganicum brevi finietur?
      Colin Powell, Civitatum Americae Unitarum minister rerum externarum, affirmavit Americam bellum Afganicum ante hiemem conficere velle. Timendum enim esse, ne hiems multa et gravia impedimenta afferat. Attamen Americanos pugnando non destituros esse nisi propositis perfectis. Utrum proelia per mensem Ramadan muslimis sacrum continuentur necne, pro fortuna belli decretum iri.

Perficieturne portus in oppido Wilhelmshaven?
      Ii, qui nuper creati mox civitatem Hamburgi recturi sunt, portum navibus maximis ideoneum in oppido Wilhelmshaven aedificari nolunt: Sibi pactum de eo portu communiter cum civitatibus Brema et Saxonia Inferiore aedificando non iam servandum videri. Qua de re praefectus urbis Hamburgi designatus, Ole von Beust, mox cum collega suo e civitate Saxonia Inferiore, Sigmar Gabriel, aget.

 Via autocinetica A 1 amplificabitur
      Collegium mercatorum Bremensium consilium viam autocineticam A 1 - quae via linea Hanseatica appellatur - inter Bremam et Hamburgum urbes sex curriculis exornandi laudat. Praeses collegii mercatorum linea Hanseatica hoc modo amplificata statum oeconomiae civitatis Bremensis meliorem fore dixit.
 

"Kursk" in navale siccum tracta
      Viri rerum navalium periti hoc tempore inspiciunt, quae de nave subaquanea atomica "Kursk" restant. Reliquiae enim huius navis paucis diebus ante in navale siccum prope Murmansk situm invectae sunt. Illa navis atomica mense Augusto superioris anni aliquot explosionibus affecta in mari Barentico demersa erat. Qua calamitate centum duodeviginti milites perierant omnes.

 Radiophonia NORDWEST auditur primum
      Hodie (Kalendis Novembribus) Radiophonia NORDWEST incipit divulgari in omnes partes Germaniae ad septentriones vergentes. Quo nomine BREMEN 2 et NDR emissiones culturales communiter diffundunt. Succedit stationi BREMEN 2, quae usque ad hunc diem emittebat, quae scire digna essent de artibus liberalibus. Statio NORDWEST vos de iis certiores faciet, quae apud Bremenses, Frisios, Chaucos vel in domibus vel in foro senatuque in artibus atque litteris facta erunt.

Praenuntiatio tempestatis
      October huius anni Iano deo similis fuit, partim in aestatem respexit et dies calidiores tulit, partim iam autumni signa ostendit: nebulam quidem et imbrem, sed adhuc iucundum calorem. Attamen augures auspiciis factis tempestatem per Novembrem etiam hoc anno malam futuram esse interpretati sunt. Promite ergo vestimenta gravia contra ventum et imbrem e cistis et aequo animo fortunae obviam ite; vel ut Horatius poeta iam scripsit Leuconoen quandam appellans: sapias, vina liques... carpe diem quam minimum credula postero.